Paa'ncho'n Namaazo'n Aur Jum'ah Me'n Kitni Rak'aat Hai'n? Aa'iye Hadeeso'n Ke Zariye Se Iske Baare Me'n Jaante Hai'n.
Namaaz e Fajr Ki Rak'aat :- Namaaz e Fajr Me'n Kul 4 Rak'aat Hai'n, Pehle 2 Sunnat e Mo'akkedah Aur Phir 2 Farz.
Dalaa'il :-
Sunan e Abi Daawood Ke Andar Hadees No.1258 Hai Ke Nabi e Paak ﷺ Ne Fajr Ki Sunnato'n Ke Baare Me'n Farmaaya Ke Fajr Ki 2 Sunnato'n Ko Na Chhodo, Agarche Tumhe'n Ghode Apne Paao'n Tale Kuchal Daale'n.
Saheeh Muslim Me'n Hadees No.1688 Hai Ke Nabi e Paak ﷺ Ne Farmaaya Ke Fajr Se Pehle 2 Rak'ate'n Duniya Aur Uski Har Cheez Se Behtar Hai.
Nabi e Paak ﷺ Ne Fajr Se Pehle Ki 2 Rak'ate'n Kabhi Tark Nahee'n Farmaaye'n, Chunaanche Ummul Momineen Sayyadatuna Aa'yesha Siddeeqa Radiallaahu Anha Se Saheeh Bukhaari Me'n Hadees No.1159 Marwi Hai, Woh Farmaati Hai'n Ke Nabi e Paak ﷺ Ne Fajr Se Pehle 2 Rak'ate'n Kabhi Tark Nahee'n Farmaayee'n.
Zohar Ki Rak'aat :- Namaaz e Zohar Me'n Kul 12 Rak'aat Hai'n, 4 Rak'aat Sunnat e Mo'akkedah Zohar Ki Farz Se Pehle, Phir 4 Rak'aat Farz Aur Phir 2 Rak'aat Farz Ke Ba'ad Sunnat e Mo'akkedah Aur Phir 2 Rak'aat Nafil Hai'n.
Dalaa'il :- Sunan e Ibne Maaja Aur Jaame Tirmizi Me'n 414 Number Hadees Hai Ke Rasoolullaah ﷺ Ne Farmaaya Ke Jisne 12 Rak'ate'n Ada Kee'n, Allaah Rabbul Izzat Uske Liye Jannat Me'n Mahel Ta'meer Farmaayega.
Aur Woh 12 Rak'ate'n Yeh Hai'n, 4 Zohar Se Pehle, 2 Zohar Ke Ba'ad, 2 Magrib Ke Ba'ad, 2 Isha Ke Ba'ad Aur 2 Rak'at Fajr Se Pehle, In 12 Rak'aat Ki Fazeelat Ahaadees Me'n Maujood Hai Ke Jo Inhe'n Ada Karega Allaah Rabbul Izzat Uske Liye Jannat Me'n Mahel Ta'meer Farmaayega.
Musannaf Ibne Abi Shayba Me'n Imaam Abu Bakar Ibne Abi Shayba Ne Sayyaduna Maula Ali Radiallaahu Anhu Se Hadees No.6021 Naqal Ki Hai Ke Woh (Hazrat Maula Ali Radiallaahu Anhu) 4 Rak'aat Zohar Se Pehle, 2 Rak'aat Zohar Ke Ba'ad, 2 Rak'aat Magrib Ke Ba'ad, 4 Rak'aat Isha Ke Ba'ad Aur 2 Rak'aat Fajr Se Pehle Ada Karte The.
Yeh Raha Khaleefa e Chahaarum Sayyaduna Maula Ali Radiallaahu Anhu Ka Amal, Iske Alaawah Isi Tarah Al-Mo'jamul Ausat Me'n Imaam Tabraani Ne Sayyaduna Anas Bin Maalik Radiallaahu Anhu Se Hadees No.2733 Naqal Ki Hai Ke Nabi e Paak ﷺ Ne Farmaaya Ke 4 Rak'aat Zohar Se Pehle Aur 4 Rak'aat Isha Ke Ba'ad, Lailatul Qadr Me'n 4 Rak'aat Padhne Ke Baraabar Hai'n.
Tirmizi Shareef Ki Hadees No.428 Me'n Hai Ke Hazrat Ummul Momineen Hazrat Umme Habeeba Radiallaahu Anha Nabi e Kareem ﷺ Ka Yeh Irshaad Naqal Karti Hai'n Ke Jisne Zohar Se Pehle 4 Rak'aat Aur Zohar Ke Ba'ad 4 Rak'aat Ki Hifaazat Ki Allaah Paak Usko Jahannam Ki Aag Par Haraam Kardega.
Namaaz e Asar Ki Rak'aat :- Namaaz e Asar Me'n Kul 8 Rak'aat Hai'n, 4 Rak'aat Farz Se Pehle Sunnat e Gair Mo'akkedah Aur Phir 4 Rak'aat Farz.
Dalaa'ill :- Nabi e Paak ﷺ Ne Asar Se Pehle Bhi 4 Rak'aat Ada Farmaayi Hai'n, Chunaanche Sayyaduna Maula Ali Radiallaahu Anhu Se Jaame Tirmizi Ke Andar Hadees No.429 Aur 598 Marwi Hai Ke Rasoolullaah ﷺ Ne Asar Se Pehle 4 Rak'aat Namaaz Ada Farmaayi Hai'n, To Asar Se Pehle Waali 4 Rak'ato'n Ka Saboot Bhi Mil Gaya.
Namaaz e Magrib Ki Rak'aat :- Namaaz e Magrib Me'n Kul 7 Rak'aat Hai'n, Pehle 3 Rak'aat Namaaz e Magrib Farz, Phir 2 Rak'aat Sunnat e Mo'akkedah Aur Phir 2 Rak'aat Nafil.
Dalaa'ill :- Sunan e Ibne Maaja Aur Jaame Tirmizi Me'n 414 Number Hadees Hai Ke Rasoolullaah ﷺ Ne Farmaaya Ke Jisne 12 Rak'ate'n Ada Kee'n, Allaah Rabbul Izzat Uske Liye Jannat Me'n Mahel Ta'meer Farmaayega.
Aur Woh 12 Rak'ate'n Yeh Hai'n, 4 Rak'aat Zohar Se Pehle, 2 Rak'aat Zohar Ke Ba'ad, 2 Rak'aat Magrib Ke Ba'ad, 2 Rak'aat Isha Ke Ba'ad Aur 2 Rak'aat Fajr Se Pehle, In 12 Rak'aat Ki Fazeelat Ahaadees Me'n Maujood Hai Ke Jo Inhe'n Ada Karega Allaah Rabbul Izzat Uske Liye Jannat Me'n Mahel Ta'meer Farmaayega.
Mishkaat Shareef Ki Hadees No.1184 Me'n Hai Ke Hazrat Mak'hool Rahmatullaah Alaih Nabi e Kareem ﷺ Se Mursalan Naqal Farmaate Hai'n Ke Jisne Magrib Ke Ba'ad Baat Karne Se Pehle 2 Rak'aat Padhi Aur Ek Riwaayat Me'n 4 Padhne Ka Zikr Hai, Uski Namaaz Illiyyeen Me'n Uthaali Jaati Hai.
Isse Magrib Ke Ba'ad Ki 2 Nafil Namaaz Saabit Hoti Hai.
Namaaz e Isha Ki Rak'aat :- Namaaz e Isha Me'n Kul 17 Rak'aat Hai'n, Pehle 4 Rak'aat Sunnat e Gair Mo'akkedah, Phir 4 Rak'aat Farz, Phir 2 Rak'aat Sunnat e Mo'akkedah, Phir 2 Rak'aat Nafil, Phir 3 Rak'aat Witr Waajib, Phir 2 Rak'aat Nafil, Iss Tarah Yeh 17 Rak'aat Hai'n.
Dalaa'il :-
Abu Abdullaah Muhammad Bin Nasrul Maroozi (Mutawaffi 294 Hijri) Mukhtasar Qayaamul Lail Kitaab Me'n Farmaate Hai'n Ke Hazrat Sa'eed Bin Jubair Radiallaahu Anhu Isha Se Pehle 4 Rak'ate'n Padhne Ko Mustahab Samajhte The. (Mukhtasar Qayaamul Lail, Safha No.88,)
Saheeh Muslim Shareef Me'n Hadees No.629 Aur 1239 Mazkoor Hai Ke Nabi e Paak ﷺ Ne Witr Padhne Ka Hukm Diya Aur Farmaaya Ke,
Jisko Andesha Ho Ke Woh Subah Na Jaag Sake, To Use Chaahiye Ke Woh Sone Se Pehle Witr Ada Karle.
Saheeh Bukhaari Ke Andar 117 Number Hadees Hai, Sayyaduna Abdullaah Ibne Abbaas Radiallaahu Anhuma Farmaate Hai'n Ke Nabi e Paak ﷺ Ne Isha Ki Namaaz Padhi, Phir Ghar Tashreef Le Gaye Aur 4 Rak'aat Namaaz Ada Farmaayee'n, Phir So Gaye.
Isi Tarah Sunan e Abu Daawood Me'n Sayyadatuna Hazrat Aa'yesha Siddeeqa Radiallaahu Anha Se Hadees No.1303 Marwi Hai, Aap Farmaati Hai'n Ke Nabi e Paak ﷺ Jab Bhi Isha Ki Namaaz Ke Ba'ad Mere Paas Tashreef Laate To 4 Ya 6 Rak'aat Ada Farmaate.
In Ahaadees Se (Jo Upar Guzree'n) Waazeh Hota Hai Ke Nabi e Paak ﷺ Ne Isha Ke Ba'ad Bhi Mazeed Rak'ate'n Ada Farmaayi Hai'n.
Iske Alaawah Sahaaba e Kiraam Radiallaahu Anhum Se Bhi Iska Saboot Milta Hai,
Musannaf Ibne Abi Shayba Me'n Imaam Abu Bakar Ibne Abi Shayba Ne Sayyaduna Maula Ali Radiallaahu Anhu Se Hadees No.6021 Naqal Ki Hai Ke Woh (Maula Ali Radiallaahu Anhu) 4 Rak'aat Zohar Se Pehle, 2 Rak'aat Zohar Ke Ba'ad, 2 Rak'aat Magrib Ke Ba'ad, 4 Rak'aat Isha Ke Ba'ad Aur 2 Rak'aat Fajr Se Pehle Ada Karte The.
Yeh Raha Khaleefa e Chahaarum Sayyaduna Maula Ali Radiallaahu Anhu Ka Amal Aur Iske Alaawah Namaaz e Isha Ke Ba'ad 4 Rak'aat Ada Karne Ke Muta'alliq Upar Ahaadees Guzri.
Iske Alaawah Imaam Abu Bakar Ibne Abi Shayba Ne Isi Tarah Musannaf Ibne Abi Shayba Me'n Isha Ke Ba'ad 4 Rak'aat Padhne Ke Muta'alliq Ek Poora Baab Qaayem Kiya Hai, Jisme'n Hazrat Abdullaah Bin Amro, Hazrat Abdullaah Bin Mas'ood Aur Hazrat Aa'yesha Radiallaahu Anhuma Se Riwaayaat Naqal Ki Gayee'n Hai'n Ke Jo Shakhs Isha Ke Ba'ad 4 Rak'aat Ada Kare, Allaah Paak Use Lailatul Qadr Me'n 4 Rak'aat Padhne Ke Baraabar Sawaab Ata Farmaayega. (Musannaf Ibne Abi Shaiba: 7352)
Isi Tarah Imaam Mujaahid Taabayi Se Hadees Lekar Aaye Aur Imaam Abdur Rahmaan Ibne Aswad Se Bhi Riwaayat Lekar Aaye.
Iske Alaawah Isi Tarah Al-Mo'jamul Ausat Me'n Imaam Tabraani Ne Sayyaduna Anas Bin Maalik Radiallaahu Anhu Se Hadees No.2733 Naqal Ki Hai Ke Nabi e Paak ﷺ Ne Farmaaya Ke 4 Rak'aat Zohar Se Pehle Aur 4 Rak'aat Isha Ke Ba'ad Lailatul Qadr Me'n 4 Rak'aat Padhne Ke Baraabar Hai'n.
Isi Tarah Nabi e Kareem ﷺ Ka Farmaan Hai, Sabse Pehle Qayaamat Ke Din Bande Se Uski Namaaz Ka Hisaab Liya Jaayega, Agar Woh Kaamil Huwi To Kaamil Likh Di Jaayegi Aur Agar Mukammal Na Huwi To Allaah Paak Apne Farishto'n Se Irshaad Farmaayega, Kya Tum Mere Bande Ke Paas Koi Nafil Paate Ho? To Woh Uske Faraa'iz Ko Uske Nawaafil Ke Zariye Poora Kar De'nge, Phir Isi Tarah Zakaat Aur Deegar Aa'maal Ka Hisaab Liya Jaayega. (Sunane Abu Daawood, Kitaabus Salaat, Hadees No.864)
Namaaz e Jum'ah Ki Rak'aat :- Jum'ah Me'n Kul 12 Rak'ato'n Ka Saboot Milta Hai, Jum'ah Ke Khutba Se Pehle 4 Rak'aat Sunnat e Mo'akkedah, Phir Khutba Ke Ba'ad Jum'ah Ki 2 Rak'aat Farz, Phir Jum'ah Ki 2 Rak'aat Farz Ki Adaayegi Ke Ba'ad 6 Rak'aat (4 Rak'aat Ek Salaam Ke Saath, Aur 2 Rak'aat Ek Salaam Ke Saath) Sunnat Hai'n, Albatta 4 Rak'aat Sunnat e Mo'akkedah Aur 2 Rak'aat Sunnat e Zaa'idah Hai'n, Padhne Ki Tarteeb Yeh Hai Ke Pehle 4 Rak'aat Sunnat Padhni Hai'n, Phir 2 Rak'aat, Inka Saboot Ahaadees e Nabviya Aur Sahaaba e Kiraam Ke Amal Se Saabit Hai, Nawaafil Jitna Padhna Chaahe'n Padh Sakte Hai'n.
Dalaa'il :- Hazrat Abdullaah Bin Mas'ood Radiallaahu Anhu Se Riwaayat Hai Ke Nabi e Akram ﷺ Jum'ah Se Pehle 4 Rak'aat Aur Jum'ah Ke Ba'ad 4 Rak'aat Padhte The. (Mo'jamul Ausat Littabraani, 3/91, Hadees No:3959)
Hazrat Ali Radiallaahu Anhu Farmaate Hai'n, Jo Jum'ah Ke Ba'ad Namaaz Padhe Use Chaahiye Ke 6 Rak'aat Padhe. (Sharah Ma'aaniul Aasar, 1/234, Hadees No.1978)
Khaalid Bin Abdullaah Ne Sohail Se, Unho'n Ne Apne Waalid (Abu Saaleh) Se Aur Unho'n Ne Hazrat Abu Hurairah Radiallaahu Anhu Se Riwaayat Ki, Unho'n Ne Kaha, Rasoolullaah ﷺ Ne Farmaaya Ke Jab Tum Me'n Se Koi Jum'ah Padh Chuke To Uske Ba'ad 4 Rak'ate'n Padhe. (Saheeh Muslim, Kitaabul Jumu'ah, Hadees No.2036)
Faa'idah :- Mundarja Baala Riwaayaat Se Ma'loom Huwa Ke Jum'ah Se Pehle 4 Rak'aat Aur Jum'ah Ke Ba'ad 6 Rak'aat Padhe, In 6 Me'n Se Pehle 4 Rak'aat Padhe Aur Uske Ba'ad 2 Rak'aat, Aur 2 Rak'aat Nafil Bhi Padh Sakte Hai'n.
Mohtaram Qaari'een :- In Tamaam Riwaayaat Aur Deegar Muta'addid Ahaadees Se Waazeh Hota Hai Ke Faraa'iz Ke Saath Saath Sunnat e Mo'akkedah Aur Gair Mo'akkedah Ada Karne Me'n Beshumaar Fazeelate'n Hai'n, Lehaaza Hame'n Chaahiye Ke Faraa'iz Ke Saath Sunnato'n Ka Bhi Ahtemaam Kare'n Aur Zyaadah Se Zyaadah Ajar Wa Sawaab Haasil Kare'n.
By Alahazrat Foundation Research Team - 7710809266/9892708816
