Mohtaram Qaari'een ! Taareekh Ka Mutaale'ah Karne Waale Bakhoobi Jaante Hai'n Ke Jitne Bhi Baatil Firqe Hai'n Sabne Apne Makar Wa Fareb Me'n Logo'n Ko Qur'aan Wa Hadees Ka Naam Lekar Dhoka Diya Hai, Unhee'n Baatil Firqo'n Me'n Se Ek Firqa Wahaabiya Hai, Yeh Firqe Waale Apne Wajood Se Lekar Ab Tak Qaum e Muslim Ko Yeh Fareb De Rahe Hai'n Ke Du'aa Sirf Allaah Se Karna Chaahiye Kuchh Maa'ngna Hai To Sirf Allaah Se Maa'ngna Chaahiye, Yahaa'n To Baat Durust Hai Ispar Ham Ahle Sunnat Wa Jamaa'at Ka Ikhtelaaf Hi Nahee'n Hai Magar Iske Saath Saath Wahaabiya Yeh Nazariya Bhi Qaum e Muslim Ke Saamne Rakhte Hai'n Ke Jo Log Allaah Ke Mehboobo'n Ko Majaazi Madadgaar Samajh Kar Madad Ba Ma'ni Waseela Ke Maa'ngte Hai'n Woh Log Galat Hi Nahee'n Balke Mushrik Hai'n, Na'ooz Billaah, Jabke Haqeeqat Iske Bar'aks Hai, Chand Dalaa'il Mulaaheza Farmaaye'n,
Allaah Paak Qur'aan Shareef Me'n Farmaata Hai,
Tarjuma :- Aur Neki Aur Parhezgaari Par Ek Doosre Ki Madad Karo. (Sureh Maa'idah, Aayat No.2)
Bataaya Jaaye ! Agar Allaah Ke Alaawah Kisi Se Madad Lena Mutlaqan Galat Hai To Iss Hukm e Ilaahi Ka Haasil Kya Hoga? Kya Iss Aayat Me'n Saaf Saaf Nahee'n Bataaya Ja Raha Hai Ke Tum Log Neki Aur Parhezgaari Ke Kaamo'n Me'n Ek Doosre Ki Madad Karo? To Madad Karne Waale Ko Hi Madadgaar Kehte Hai'n Na? To Iss Aayat Se Har Woh Insaan Madadgaar Ho Gaya Jo Nek Wa Taqwa Ke Kaam Me'n Madad Karta Hai, Matlab Waazeh Hai Ke Haqeeqi Madadgaar Allaah Paak Hai Aur Majaazi Madadgaar Allaah Ke Nek Bande Bhi Hai'n,
Hadees Shareef Me'n Bhi Beshumaar Dalaa'il Hai'n Magar Ek Hadees e Paak Mulaaheza Farmaaye'n,
Saheeh Muslim Me'n Hai,
Tarjuma :- Hazrat Rabee'ah Bin Ka'ab Aslami Radiallaahu Anhu Bayaan Karte Hai'n, Mai'n Rasoolullaah ﷺ Ke Paas Raat Guzaara Karta Tha, Mai'n Aap ﷺ Ke Wazu Keliye Paani Aur Aap ﷺ Ki Deegar Zarooriyaat Ki Ashiya Laaya Karta Tha, To Ek Din Aap ﷺ Ne Mujhse Farmaaya, Maa'ngo (Jo Maa'ngna Chaahte Ho), Mai'n Ne Arz Kiya, Mai'n Jannat Me'n Aap ﷺ Ki Rafaaqat (Saath) Maa'ngta Hoo'n, Aap ﷺ Ne Farmaaya, Kya Iske Alaawah Kuchh Aur (Chaahte Ho)? Mai'n Ne Arz Kiya, Bas Yehi (Maqsood) Hai, Aap ﷺ Ne Farmaaya, To Phir Kasrat e Sujood (Kasrat Se Namaaz Padhne) Ke Zariye Apne Nafs Ke Khilaaf Meri Madad Karo.(Muslim Shareef, Hadees No.226 Kitaabus Salaat, Naashir Daaru Ihyaahis Taraasil Arabi, Bairoot)
Bataaya Jaaye Huzoor e Aqdas ﷺ Ne "A'inni" Farmaaya Ke Meri Madad Karo, Kya Koi Fatwa Lagaayega Ke Huzoor Nabi e Akram ﷺ Ne Apni Madad Karne Keliye Ek Sahaabi Ko Farmaaya Ke Meri Madad Karo Yeh Galat Hai? Doosri Taraf Huzoor ﷺ Ka Mutlaq Taur Par "Sal" Farmaana Ke Maa'ng Kya Maa'ngta Hai, Kya Sahaabi e Rasool Ne Ae'teraaz Kiya Ke Aap ﷺ Kaisi Baate'n Kar Rahe Hai'n? Maa'ngna To Sirf Allaah Se Chaahiye Aap ﷺ Kaise Farma Rahe Hai'n Ke Mujhse Maa'ng Kya Maa'ngta Hai, Sahaabi Ne Koi Ae'teraaz Nahee'n Kiya Jisse Saaf Zaahir Hai Ke Huzoor Nabi e Akram ﷺ Alhamdulillaah Majaazi Madadgaar Hai'n Aur Majaazi Taur Par Aap ﷺ Se Maa'ngna Galat Nahee'n Balke Ayn Sharee'at Hai.
Khulaasa e Kalaam Yeh Hai Ke Qur'aan Wa Hadees Me'n Beshumaar Dalaa'il Maujood Hai'n Jinse Waazeh Hota Hai Ke Ambiya e Kiraam Alaihimus Salaam Wa Sahaaba e Kiraam Radiallaahu Anhum Ajma'een Aur Auliya Allaah Rahimahullaah Alaihim Ajma'een Majaazi Taur Par Madadgaar Hai'n Lehaaza Unko Pukaarna Jaa'iz Hai, Isi Nazariye Aur Aqeede Par Aslaaf e Ummat Rahe Hai'n, Ab Aaye'n Chand Ibaaraat Aslaaf e Ummat Ki Mulaaheza Farmaaye'n Aur Dekhe'n Ke Mohaddiseen Wa Mufassireen Wa Fuqaha e Islaam Ne Isi Aqeede Aur Nazariye Ko Kitne Saaf Aur Waazeh Andaaz Me'n Bayaan Kiya Hai,
Allaama Khateeb Bagdaadi (Wafaat 463 Hijri) Apni Kitaab "Taareekh e Bagdaad" Me'n Likhte Hai'n,
Tarjuma :- Hame'n Qaazi Abu Abdullaah Al Husain Bin Ali Bin Muhammad Simri Ne Khabar Di, Unho'n Ne Kaha, Hame'n Umar Bin Ibraaheem Al-Muqri Ne Khabar Di, Unho'n Ne Kaha, Hame'n Mukram Bin Ahmad Ne Bataaya, Unho'n Ne Kaha, Hame'n Umar Bin Is'haaq Bin Ibraaheem Ne Bataaya, Unho'n Ne Kaha, Hame'n Hazrat Ali Bin Maimoon Ne Bataaya, Unho'n Ne Kaha, Mai'n Ne (Imaam) Shaafayi Ko Yeh Farmaate Huwe Suna, Beshak Mai'n (Imaam) Abu Haneefa (Alaihir Rehma) Se Barkat Haasil Karta Hoo'n Aur Har Roz Unki Qabar Ki Ziyaarat Keliye Aata Hoo'n Pas Jab Mujhe Koi Zaroorat Ya Haajat Pesh Aati Hai, To Mai'n 2 Rak'at (Nafil) Namaaz Padhta Hoo'n, Phir Imaam Abu Haneefa Radiallaahu Anhu Ki Qabar Ke Paas Aata Hoo'n Aur Wahaa'n Allaah Paak Se Apni Haajat Ka Sawaal Karta Hoo'n, To Woh (Haajat) Mujhse Door Nahee'n Hoti Yahaa'n Tak Ke Poori Kardi Jaati Hai. (Taareekh e Bagdaad, Jild No.1, Safha No.445 Daaru Gurabil Islaami, Bairoot)
Imaam Ibne Jauzi (Wafaat 597 Hijri) Apni Kitaab "Al Mantazam Fi Taareekhul Umam Wal Mamlook" Me'n Likhte Hai'n,
Tarjuma :- Muhammad Bin Half Bin Marzubaan Ne Bayaan Kiya, Unho'n Ne Kaha, Mujhe Ahmad Bin Zaheer Ne Bataaya, Unho'n Ne Kaha, Mujhe Ali Bin Al Barbari Ne Bataaya, Unho'n Ne Kaha, Mujhe Mere Waalid Ne Bataaya, Aur Woh Un Awwaleen Logo'n Me'n Se The Jo Tirtoos Me'n Tab Aabaad Huwe Jab Use Abu Saleem Ne Ta'meer Kiya Tha, Woh Ek Umar Raseedah Buzurg The, Unho'n Ne Kaha, Shaam Se 3 Bhaayi Hamaare Saath Jihaad Me'n Shareek Huwa Karte The, Jo Azeem Sheh Sawaar Aur Bahaadur The, Woh (Aa'm) Lashkar Ke Saath Mail Jol Nahee'n Rakhte The, Balke Tanha Safar Karte Aur Alag Hi Qayaam Karte The, Jab Woh Dushman Ko Dekhte To Uss Waqt Tak Nahee'n Ladte The Jab Tak (Aa'm Lashkar) Muqaabla Karne Keliye Kaafi Rehta, Ek Baar Unho'n Ne Gazwah Kiya To Unka Saamna Taagiya (Roomi Baadshaah) Se Huwa Jo Ek Bahot Bade Lashkar Ke Saath Tha, Roomiyo'n Ne Musalmaano'n Se Ja'ng Ki, Unhe'n Shaheed Kiya Aur Qaidi Banaaya, To Un Bhaa'iyo'n Ne Ek Doosre Se Kaha, Tum Dekh Rahe Ho Ke Musalmaano'n Par Kya (Museebat) Naazil Huwi Hai, Ab Ham Par Waajib Hai Ke Ham Apni Jaane'n Allaah Ki Raah Me'n Pesh Kare'n Aur Lade'n, Chunaanche Woh Aage Badhe Aur Baaqi Musalmaano'n Se Kaha, Tum Hamaare Peechhe Raho, Hamaare Aur Dushman Ke Darmiyaan Raasta Chhod Do, Insha Allaah Ham Tumhaari Taraf Se Kaafi Ho'nge, Unho'n Ne Aisi Ja'ng Ki Ke Roomiyo'n Ko Magloob Kar Diya, Roomi Baadshaah Ne Apne Jarnelo'n Se Kaha, Jo Koi Unme'n Se Ek Aadmi Bhi Mere Paas (Pakad Kar) Laayega, Mai'n Use Taraqqi Doo'nga Aur Apna Jarnel Bana Loo'nga, Tab Roomiyo'n Ne Unpar Halla Bol Diya Aur Unhe'n Qaidi Bana Liya, Haalaa'nke Unme'n Se Kisi Ko Ek Zakham Tak Nahee'n Aaya Tha, Roomi Baadshaah Ne Kaha, Unko Pakadne Se Badi Na Koi Ganeemat Hai Aur Na Koi Fateh, Woh Unhe'n Lekar Rawaana Huwa Yahaa'n Tak Ke Qustuntuniya Paho'nch Gaya, Wahaa'n Usne Unke Saamne Nasraaniyat (Isaa'iyat) Qabool Karne Ki Peshkash Ki Aur Kaha, Mai'n Tumhe'n Iqtedaar Me'n Shareek Karoo'nga Aur Apni Betiyaa'n Tumhaare Nikaah Me'n De Doo'nga, Magar Unho'n Ne Inkaar Kar Diya Aur Pukaara "Ya Muhammada" Baadshaah Ne Poochha, Yeh Kya Keh Rahe Hai'n? Darbaariyo'n Ne Bataaya, Yeh Apne Nabi Ko Pukaar Rahe Hai'n, Tab Baadshaah Ne Unse Kaha, Agar Tum Meri Baat Maan Lo (To Theek) Warna Mai'n 3 Dege'n Tel Se Bhar Kar Tapaau'nga, Yahaa'n Tak Ke Jab Woh Poori Tarah Josh Maarne Lage'ngi To Mai'n Tum Me'n Se Har Ek Ko Ek Ek Deg Me'n Daal Doo'nga, Unho'n Ne Phir Bhi Inkaar Kar Diya, Usne 3 Dege'n Laane Ka Hukm Diya, Unhe'n Nasab Kiya Gaya, Unme'n Tel Daala Gaya, Phir Hukm Diya Ke 3 Din Tak Unke Neeche Aag Jalaayi Jaaye, Har Roz Unhe'n Un Dego'n Ke Saamne Laaya Jaata Aur Isaa'iyat Qabool Karne Ki Da'wat Di Jaati, Aur Yeh Laalach Diya Jaata Ke Woh Apni Betiyaa'n Unke Nikaah Me'n Dega Aur Unhe'n Hukmeraan Bana Dega, Magar Woh Inkaar Kar Dete Aur Islaam Par Saabit Qadam Rahe, Phir Usne Sabse Bade Bhaayi Ko Bulaaya Aur Use Isaa'iyat Qabool Karne Ki Da'wat Di, Usne Inkaar Kiya, Baadshaah Ne Use Daraaya Aur Kaha, Mai'n Tujhe Uss Deg Me'n Daal Doo'nga, Usne Phir Bhi Inkaar Kiya, To Use Deg Me'n Daal Diya Gaya, Jaise Hi Woh Usme'n Gira, Uska Gosht Pighal Gaya Aur Uski Haddiyaa'n Chamakti Huwi Upar Aagayee'n, Phir Usne Doosre Bhaayi Ke Saath Bhi Aisa Hi Kiya (Use Bhi Tapte Tel Me'n Daal Kar Shaheed Kar Diya), Jab Un 2 Bhaa'iyo'n Ko Shaheed Kar Diya Gaya To Unki Saabit Qadami Aur Apne Deen Par Mazbooti Ko Dekh Kar Baadshaah Naadim Huwa Aur Kehne Laga, Mai'n Ne Aise Logo'n Ke Saath Yeh Sulook Kiya Jinse Badh Kar Bahaadur Mai'n Ne Kabhi Nahee'n Dekhe, Phir Usne Sabse Chhote Bhaayi Ke Baare Me'n Hukm Diya To Use Uske Qareeb Laaya Gaya, Baadshaah Use Har Tareeqe Se Wargalaane Aur Deen e Islaam Se Pherne Ki Koshish Karne Laga, Magar Woh Inkaar Karta Raha, Tab Baadshaah Ke Darbaariyo'n Me'n Se Ek Roomi Afsar (Ilj) Khada Huwa Aur Kehne Laga, Aye Baadshaah! Agar Mai'n Ise Fitne Me'n Mubtala Kardoo'n (Ya'ni Deen e Islaam Se Pher Doo'n) To Aap Mujhe Kya In'aam De'nge? Baadshaah Ne Kaha, Mai'n Tujhe Apna Jarnel Bana Doo'nga, Usne Kaha, Mai'n Ispar Raazi Hoo'n, Baadshaah Ne Poochha, Tu Ise Kis Tarah Fitne Me'n Daalega? Usne Jawaab Diya, Baadshaah Salaamat Jaante Hai'n Ke Arab Aurato'n Ke Mu'aamle Me'n Bahot Jald Maa'il Ho Jaate Hai'n, Aur Roomiyo'n Ko Ma'loom Hai Ke Meri Fulaa'n Beti Se Zyaadah Khoobsurat Koi Aurat Nahee'n Hai, Aap Use Mere Hawaale Karde'n, Mai'n Use Apni Khoobsurat Beti Ke Saath Tanha Chhod Doo'nga, Woh Use Zaroor Fitne Me'n Daal Degi,
Chunaanche Baadshaah Ne Uss Afsar Ko 40 Din Ki Mohlat Di Aur Naujawaan Ko Uske Hawaale Kar Diya, Woh Afsar Use Lekar Ghar Aaya Aur Apni Beti Ke Paas Paho'ncha Diya, Usne Beti Ko Baadshaah Se Kiye Gaye Wa'de Aur Muqarrarah Muddat Ke Baare Me'n Bataaya,
Beti Ne (Baap Se) Kaha, Use Mere Paas Chhod De'n, Mai'n Aapki Taraf Se Uska Kaam Tamaam Karne Keliye Kaafi Hoo'n, (Ya'ni Mai'n Use Deen e Islaam Se Pherne Keliye Kaafi Hoo'n), Woh Naujawaan Uss Ladki Ke Paas Iss Haal Me'n Raha Ke Din Bhar Rozah Rakhta Aur Raat Bhar Ibaadat Me'n Khada Rehta, Woh Amal e Ibaadat Me'n Zara Bhi Susti Na Karta, Yahaa'n Tak Ke Muqarrarah Muddat Ka Bada Hissa Guzar Gaya, Baadshaah Ne Uss Afsar Se Poochha, Uss Shakhs Ka Kya Haal Hai? Woh Apni Beti Ke Paas Aaya Aur Poochha, Tumne Kya Kiya? Beti Ne Jawaab Diya, Mai'n Kuchh Na Kar Saki, Yeh Aisa Shakhs Hai Jisne Isi Shaher Me'n Apne Bhaa'iyo'n Ko Khoya Hai, Mujhe Darr Hai Ke Iska Inkaar Apne Bhaa'iyo'n (Ke Gam) Ki Wajah Se Ho, Kyu'nke Jab Bhi Woh Yahaa'n Unke Aasaar Dekhta Hai (To Use Unki Yaad Aati Hai), Aap Baadshaah Se Muddat Me'n Izaafe Ka Kahe'n, Aur Mujhe Aur Ise Kisi Aur Shaher Muntaqil Kar De'n,
Afsar Ne Baadshaah Se Darkhwaast Ki To Usne Muddat Me'n Chand Dino'n Ka Izaafa Kar Diya Aur Unhe'n Baahar Jaane Ki Ijaazat Dedi, Woh Un Dono'n Ko Ek Doosri Basti Me'n Le Gaya, Wahaa'n Bhi Woh Naujawaan Kayi Din Tak Isi Haal Me'n Raha, Din Ko Rozah Rakhta Aur Raat Ko Ibaadat Me'n Khada Rehta, Jab Muqarrarah Muddat Me'n Se Sirf Chand Din Baaqi Reh Gaye To Ek Raat Uss Ladki Ne Usse Kaha, Aye Naujawaan ! Mai'n Dekh Rahi Hoo'n Ke Tum Ek Bahot Azeem Rab Ki Ibaadat Karte Ho, Aur Mai'n Bhi Tumhaare Saath Tumhaare Deen Me'n Daakhil Ho Gayi Hoo'n Aur Apne Aaba Wa Ajdaad Ka Deen Chhod Chuki Hoo'n, Naujawaan Ko Pehle To Uski Ibaadat Ki Baat Par Yaqeen Na Aaya, Yahaa'n Tak Ke Uss Ladki Ne Baar Baar Uska Ae'aadah Kiya, Tab Naujawaan Ne Usse Kaha, Phir Yahaa'n Se Bhaagne Aur Jis Museebat Me'n Ham Hai'n Usse Nijaat Paane Ki Kya Tadbeer Hai? Uss Ladki Ne Kaha, Mai'n Tumhaare Liye Tadbeer Karti Hoo'n, Woh Sawaariyaa'n Lekar Aayi Aur Usse Kaha Utho, Ham Yahaa'n Se Tumhaare Mulk Ki Taraf Bhaag Chalte Hai'n, Chunaanche Woh Dono'n Sawaar Ho Gaye, Woh Raat Bhar Safar Karte Aur Din Me'n Chhup Jaate The, (Roomiyo'n Ne) Unhe'n Talaash Kiya Magar Woh Unki Nazro'n Se Ojhal Rahe, Ek Raat Jab Woh Chale Ja Rahe The Ke Achaanak Ghodo'n Ke Simo'n Ki Aawaaz Sunaayi Di, Ladki Ne Usse Kaha, Aye Mard ! Apne Uss Rab Ko Pukaaro Jiski Tumne Tasdeeq Ki Aur Jispar Imaan Laaye, Taake Woh Hame'n Dushman Se Nijaat Dilaaye, Achaanak Kya Dekhta Hai Ke Uske Dono'n (Shaheed) Bhaayi Wahaa'n Maujood Hai'n Aur Unke Saath Farishte Hai'n Jo Uski Taraf Bheje Gaye Hai'n, Usne Un Dono'n Ko Salaam Kiya Aur Unka Haal Poochha, Unho'n Ne Bataaya, Bas Woh Ek Gota Hi Tha Jo Tumne (Tel Ki Deg Me'n) Dekha, Uske Ba'ad Ham Seedhe Firdaus (Jannat) Me'n Paho'nch Gaye, Aur Allaah Ne Hame'n Tumhaare Paas Bheja Hai Taake Ham Uss Ladki Ke Saath Tumhaare Nikaah Ke Gawaah Bane'n, Chunaanche Unho'n Ne Uska Nikaah Uss Ladki Se Kar Diya Aur (Bhaayi) Waapas Chale Gaye, Woh Naujawaan Shaam Ke Ilaaqe Me'n Paho'ncha Aur Usi Khaatoon Ke Saath Wahee'n Qayaam Kiya, Woh Dono'n Iss Waaqe'ah Ki Wajah Se Mash'hoor Huwe Aur Pehle Zamaane Me'n Shaam Me'n Ma'roof The, Unke Baare Me'n Kuchh Ash'aar Bhi Kahe Gaye The Jo Mai'n Bhool Gaya, Siwaaye Iss Ek She'r Ke,
Tu Sachcho'n Ko Unki Sachchaayi Ke Tufail
Zindagi Aur Maut (Dono'n) Me'n Nijaat Ata Farmaayega
(Al-Muntazam, Jild No.8, Safha No.329-331, Naashir Daarul Kutub Ilmiya, Bairoot)
Imaam Ibnul Aseer (Wafaat 630 Hijri) Apni Kitaab "Al Kaamil Fit Taareekh" Me'n Likhte Hai'n,
Tarjuma :- Maidaan e Karbala Me'n Umar (Bin Sa'ad) Ne (Hazrat Imaam) Husain Radiallaahu Anhu Ki Shahaadat Ke Ba'ad 2 Din Wahaa'n Qayaam Kiya, Phir Woh Koofa Ki Taraf Rawaana Huwa Aur Apne Saath Hazrat Imaam Husain Radiallaahu Anhu Ki Betiyo'n, Aap Radiallaahu Anhu Ki Behno'n Aur Un Bachcho'n Ko Bhi Le Liya Jo Unke Saath The, Jabke Hazrat Imaam Ali Bin Husain (Ya'ni Imaam Zainul Aa'bideen Radiallaahu Anhu) Beemaar The, Phir Woh Un Sabko Lekar (Hazrat Imaam) Husain Radiallaahu Anhu Aur Unke Saathi Shaheedo'n Ki Laasho'n Ke Paas Se Guzra Jo Zameen Par (Be Gaur Wa Kafan) Pade Huwe The, Yeh Dekh Kar Aurate'n Cheekh Uthee'n Aur Rone Lagee'n, Aur Aap Radiallaahu Anhu Ki Bahen Hazrat Zainab (Bint e Ali) Pukaar Uthee'n, "Aye Muhammad ﷺ ! Aap Par Aasmaan Ke Farishte Darood Wa Salaam Bhejte Hai'n ! Yeh Husain Radiallaahu Anhu Khule Maidaan Me'n Pade Hai'n, Khoon Me'n Lat Pat Hai'n, Unke Aa'za Kate Huwe Hai'n, Aap ﷺ Ki Betiyaa'n Qaidi Bana Li Gayi Hai'n Aur Aap ﷺ Ki Zurriyat (Nasal) Qatal Kardi Gayi Hai, Jin (Ki Laasho'n) Par Saba (Mashriqi Hawa) Khaak Uda Rahi Hai. (Al-Kaamil Fit Taareekh, Jild No.3, Safha No.185-186, Naashir Daarul Kitaabul Arabi, Bairoot, Lebnaan)
Imaam Shamsuddeen Al Qurtubi (Wafaat 671 Hijri) Apni Mash'hoor e Zamaana Tafseeri Kitaab "Tafseer e Qurtubi" Me'n Likhte Hai'n,
Tarjuma :- Hazrat Ali Radiallaahu Anhu Se Riwaayat Hai, Unho'n Ne Farmaaya, Rasoolullaah ﷺ Ko Dafan Kiye Huwe Hame'n 3 Din Guzre The Ke Hamaare Paas Ek Aa'raabi (Dehaati) Aaya, Usne Khud Ko Rasoolullaah ﷺ Ki Qabre Anwar Par Gira Diya Aur Uski Mitti Apne Sar Par Daali, Phir Arz Guzaar Huwa, "Aye Allaah Ke Rasool ﷺ ! Aap ﷺ Ne (Allaah Ka Paigaam) Irshaad Farmaaya Aur Hamne Aap ﷺ Ka Qaul Suna, Aap ﷺ Ne Allaah Se (Wahi Ko) Mehfooz Kiya Aur Hamne Use Aap ﷺ Se Haasil Kiya, Aur Allaah Ne Aap ﷺ Par Jo (Kalaam) Naazil Farmaaya Usme'n Yeh Aayat Bhi Thi, (Aur Agar Jab Woh Apni Jaano'n Par Zulm Kare'n) Ya'ni Poori Aayat, Aur (Ab) Mai'n Ne Apni Jaan Par Zulm Kiya Hai Aur Aap ﷺ Ki Baargaah Me'n Haazir Huwa Hoo'n Taake Aap ﷺ Mere Liye Magferat Talab Farmaaye'n,
Tab Qabre Anwar Se Nida (Aawaaz) Aayi, Beshak Tumhe'n Bakhsh Diya Gaya Hai.
(Tafseer e Qurtubi, Jild No.5, Safha No.266, Tafseer Sureh Nisa, Aayat No.64 Naashir Daarul Kutubul Misriyah, Qaaherah)
Imaam Ibnul Haaj (Wafaat 737 Hijri) Apni Kitaab "Al Mudkhal" Me'n Likhte Hai'n,
Tarjuma :- Pas Zaa'ir (Ziyaarat Karne Waala) Ambiya e Kiraam Alaihimus Salaam Ki Baargaah Me'n Haazir Ho Aur Uske Liye Zaroori Hai Ke Woh Door Daraaz Maqaamaat Se Ambiya e Kiraam Alaihimus Salaam Ki Ziyaarat Ka Qasad Kare, Phir Jab Woh Unke Paas Paho'nch Jaaye To Use Chaahiye Ke Woh Aa'jizi, Inkesaari, Miskeeni, Faqar, Faaqa, Ehtiyaaj, Bechaargi Aur Khuzu Ke Ausaaf Se Muttasif Ho, Woh Apne Dil Aur Khayaal Ko Unki Taraf Haazir Kare Aur Unka Mushaahedah Apni Zaahiri Aa'nkh Ke Bajaaye Dil Ki Aa'nkh Se Kare, Kyu'nke Ambiya e Kiraam Alaihimus Salaam Na To Boseedah Hote Hai'n Aur Na Hi Tabdeel Hote Hai'n, Phir Woh Allaah Paak Ki Waisi Hamd Wa Sana Bayaan Kare Jiska Woh Ahel Hai, Phir Unpar Darood Bheje, Unke Sahaaba Keliye Allaah Ki Raza Ki Du'aa Kare Aur Phir Qayaamat Tak Neki Ke Saath Unki Pairwi Karne Waalo'n (Taaba'een) Keliye Rehmat Ki Du'aa Kare,
Phir Apni Muraado'n Ke Poora Hone Aur Gunaaho'n Ki Magferat Keliye Allaah Paak Ki Baargaah Me'n Ambiya e Kiraam Alaihimus Salaam Ka Tawassul Pesh Kare, Ambiya e Kiraam Alaihimus Salaam Se Istegaasa Kare (Madad Chaahe) Aur Apni Haajaat Unse Talab Kare, Aur Unki Barkat Se Du'aa Ki Qabooliyat Ka Pukhta Yaqeen Rakhe Aur Iss Baare Me'n Apne Husne Zan Ko Mazboot Kare, Kyu'nke Ambiya e Kiraam Alaihimus Salaam Allaah Ka Khula Huwa Darwaazah Hai'n, Aur Allaah Paak Ki Yeh Sunnat Jaari Rahi Hai Ke Haajate'n Unke Haatho'n Par Aur Unke Sabab Se Poori Hoti Hai'n,
Aur Jo Shakhs Un Tak (Jismaani Taur Par) Paho'nchne Se Qaasir Ho, Use Chaahiye Ke Unpar Salaam Bheje Aur Apni Haajaat, Gunaaho'n Ki Magferat Aur Uyoobo'n Ki Pardah Poshi Wagairah Ka Zikr (Arz) Kare, Kyu'nke Woh Mo'azzaz Sardaar Hai'n, Aur Kareem Log Use Radd Nahee'n Karte Jo Unse Sawaal Kare, Na Use Jo Unka Tawassul Pakde, Na Use Jo Unka Qasad Kare Aur Na Hi Use Jo Unki Panaah Le, Yeh Guftagu Umoomi Taur Par Ambiya Aur Mursaleen (Alaihimus Salaatu Was Salaam) Ki Ziyaarat Ke Baare Me'n Hai.
(Al-Mudkhal, Jild No.1, Safha No.258, Naashir Daarut Turaas)
Imaam e Asma Wa Rijaal Allaama Zahbi (Wafaat 748 Hijri) Apni Kitaab "Taareekhul Islaam" Me'n Likhte Hai'n,
Tarjuma :- Talq Bin Samhi Ne Zimaam Bin Ismaa'eel Se Riwaayat Ki Hai Ke (Nabi e Kareem ﷺ Se) Mohabbat Karne Waale Abu Khairah Uss Waqt Khade Huwe Jab Misr Ke Ameer "Hausarah" Mimbar Par Khutba De Rahe The Aur Ro Rahe The, To Abu Khairah Ne (Pukaar Kar) Kaha, Aye Muhammad (ﷺ) ! Nazar e Karam Farmaa'iye Aur Dekhiye Ke Aap Ke Ba'ad Aapki Ummat Ne Kya Kiya Hai.
(Taareekhul Islaam, Jild No.8, Safha No.525, Naashir Daarul Kitaabul Arabi, Bairoot)
Isi Tarah Imaam e Asma Wa Rijaal Allaama Zahbi Apni Ek Doosri Kitaab "Tazkeratul Huffaaz" Me'n Likhte Hai'n,
Tarjuma :- Abu Bakar Bin Abi Ali Se Riwaayat Hai Ke Ibnul Muqri Kaha Karte The, Mai'n (Imaam) Tabraani Aur Abu Al-Shaikh Madeena Munawwarah Me'n (Haazir) The, Ham Par Ta'ngi Ka Waqt Aa Gaya (Ya'ni Khaane Peene Ka Saamaan Khatam Ho Gaya) Aur Hamne Uss Din Faaqa Kiya, Jab Isha Ka Waqt Huwa To Mai'n Ne Rauza e Rasool ﷺ Par Haazir Hokar Arz Kiya, Ya Rasoolallaah ! Bhook Lagi Hai, Tabraani Ne Mujhse Kaha, "Baith Jaao, Ab Ya To Rizq Aayega Ya Maut" Phir Mai'n Aur Abu Al-Shaikh (Apne Maqaam Par) Chale Gaye, Itne Me'n Darwaaze Par Ek Alvi (Saadaat Me'n Se Ek Buzurg) Tashreef Laaye, Hamne Unke Liye Darwaazah Khola To Dekha Ke Unke Saath 2 Gulaam The Jinke Paas 2 Bade Tokre The Jinme'n Bahot Sa Saamaan (Khaana) Tha, Un Buzurg Ne Kaha, "Tumne Meri Shikaayat Nabi e Kareem ﷺ Se Kardi ! Mai'n Ne Khwaab Me'n Aap ﷺ Ki Ziyaarat Ki Aur Aap ﷺ Ne Mujhe Hukm Diya Ke Mai'n Tumhaare Paas Kuchh Saamaan Lekar Jaau'n.
(Tazkiratul Huffaaz, Jild No.3, Safha No.122, Naashir Daarul Kutubil Ilmiyya, Bairoot)
Imaam Nawwi (Wafaat 676 Hijri) Apni Kitaab "Al Azkaar" Me'n Likhte Hai'n,
Tarjuma :- Mujhe Mere Ba'az Bade Jayyad Ulama (Shuyookh) Ne Bataaya Ke Unka Ek Jaanwar Bhaag Gaya, Mera Khayaal Hai Ke Woh Khachchar Tha, Woh (Shaikh) Iss Hadees Se Waaqif The, (Ya'ni Hazrat Abdullaah Bin Mas'ood Radiallaahu Anhu Se Riwaayat Hai Ke Rasoolullaah ﷺ Ne Irshaad Farmaaya, "Agar Kisi Bayaabaan (Sehra Ya Ja'ngal) Me'n Tum Me'n Se Kisi Ka Jaanwar Chhoot Kar Bhaag Nikle, To Use Chaahiye Ke Yoo'n Pukaare, "Aye Allaah Ke Bando ! (Use) Rok Lo, Aye Allaah Ke Bando ! (Use) Rok Lo, Kyu'nke Allaah Paak Ke Zameen Me'n Kuchh (Aise Farishte Ya Gaibi Makhlooq) Maujood Hote Hai'n Jo Use Rok Le'nge.) Chunaanche Unho'n Ne Woh Kalmaat (Jo Hadees Me'n Hai) Kahe To Allaah Ne Fauran Use Unke Liye Rok Diya, Aur Ek Martaba Me'n Khud Ek Jamaa'at Ke Saath Tha Ke Unka Ek Jaanwar Bhaag Nikla Aur Woh Use Pakadne Se Aa'jiz Aa Gaye, To Mai'n Ne Woh Kalmaat (Jo Hadees Me'n Hai) Kahe, Chunaanche Woh Jaanwar Usi Waqt Ruk Gaya, Aur Uske Rukne Ki Un Kalmaat Ke Siwa Koi Aur (Zaahiri) Wajah Na Thi. (Al-Azkaar, Safha No.224, Naashir Daarul Fikr Bairoot Lebnaan)
Imaam Jalaaluddeen Suyooti (Wafaat 911 Hijri) Apni Kitaab "Al Fataawa Lil Fataawa" Me'n Likhte Hai'n,
Tarjuma :- Tamaam Ambiya (Alaihimus Salaam) Zindah Hai'n, Unki Wafaat Ke Ba'ad Unki Roohe'n Unki Taraf Lauta Di Gayi Hai'n, Aur Unhe'n Apni Qabro'n Se Nikalne Aur Aa'lam e Baala (Aasmaano'n) Aur Aa'lam e Zeree'n (Zameen) Me'n Tasarruf Karne (Ya'ni Mu'aamlaat Me'n Asar Andaaz Hone Ya Tasarruf Karne) Ki Ijaazat Ata Ki Gayi Hai.
(Al-Fataawa Lil Fataawa, Jild No.2, Safha No.317, Naashir Daarul Fikr Bairoot, Lebnaan)
Imaam Abul Hasan Samhoodi Shaafayi (Wafaat 911 Hijri) Apni Kitaab "Wafaa'ul Wafaa" Me'n Likhte Hai'n,
Tarjuma :- Nabi e Akram ﷺ Ki Wafaat Ke Ba'ad Nabi e Akram ﷺ Ke Zariye Tawassul Ka Ek Maf'hoom Yeh Bhi Ho Sakta Hai Ke Nabi e Akram ﷺ Se (Allaah Ke Huzoor) Du'aa Ki Darkhwaast Ki Jaaye, Bilkul Usi Tarah Jaise Nabi e Akram ﷺ Ki Zaahiri Zindagi Me'n Kiya Jaata Tha, Yeh Uss Riwaayat Ki Buniyaad Par Hai Jise Imaam Bayhaqi Ne Aa'mash, Abu Saaleh Aur Hazrat Maalikud Daar Ke Waaste Se Riwaayat Kiya, Aur Ibne Abi Shayba Ne Bhi Use Saheeh Sanad Ke Saath Hazrat Maalikud Daar Se Riwaayat Kiya Hai, Woh Kehte Hai'n,
Hazrat Umar Bin Khattaab Radiallaahu Anhu Ke Zamaane Me'n Log Qahet Me'n Mubtala Ho Gaye, To Ek Shakhs Nabi e Akram ﷺ Ki Qabar e Anwar Par Haazir Huwa Aur Arz Ki, Ya Rasoolallaah ﷺ ! Apni Ummat Keliye Allaah Se Baarish Ki Du'aa Farmaa'iye Kyu'nke Woh Halaak Ho Rahe Hai'n, Uske Ba'ad Rasoolullaah ﷺ Uss Shakhs Ke Khwaab Me'n Tashreef Laaye Aur Farmaaya, Umar Ke Paas Jaao, Unhe'n Mera Salaam Kaho Aur Unhe'n Khabar Do Ke Unpar Baarish Barsaayi Jaayegi, Neez Unse Kaho Ke, (Intezaami Umoor Me'n) Daanaayi Aur Musta'di Se Kaam Le'n, Chunaanche Woh Shakhs Hazrat Umar Radiallaahu Anhu Ke Paas Aaya Aur Unhe'n Uski Khabar Di, Hazrat Umar Radiallaahu Anhu (Yeh Sun Kar) Ro Pade Aur Farmaaya, Aye Mere Rab ! Mai'n Koshish Me'n Koi Kasar Nahee'n Utha Rakhta Siwaaye Uske Jo Mere Bas Se Baahar Ho,
Aur Saif Ne "Al-Futooh" Me'n Riwaayat Kiya Hai Ke Jis Shakhs Ne Yeh Khwaab Dekha Tha Woh Sahaabi e Rasool Hazrat Bilaal Bin Haaris Muzni Radiallaahu Anhu The,
Iss Riwaayat Se Istedlaal Ka Maqaam Yeh Hai Ke Nabi e Akram ﷺ Se Aa'lam e Barzakh Me'n Hone Ke Baawajood Baarish Ki Du'aa Ki Darkhwaast Ki Gayi, Aur Uss Haalat Me'n Nabi e Akram ﷺ Ka Apne Rab Se Du'aa Karna Na Mumkin Nahee'n Hai, Neez, Nabi e Akram ﷺ Ke Paas Jo Sawaal (Darkhwaast) Lekar Aaye Uska Ilm Nabi e Akram ﷺ Ko Hona Bhi Marwi Hai, Lehaaza Nabi e Akram ﷺ Se Baarish Ya Uske Alaawah Deegar Cheezo'n Ki Du'aa Ki Darkhwaast Karne Me'n Koi Rukaawat Nahee'n Hai, Jaisa Ke Duniyaawi Zindagi Me'n (Nabi e Akram ﷺ Se Darkhwaast Karna) Jaa'iz Tha. (Wafaa'ul Wafaa, Jild No.4, Safha No.195, Naashir Daarul Kutubil Ilmiyya, Bairoot)
Shaikhul Islaam Imaam Shihaab Ramli Ansaari (Wafaat 957 Hijri) Apni Kitaab "Fataawa Ramli" Me'n Likhte Hai'n,
Tarjuma :- Sawaal - Awaam Me'n Jo Yeh Baat Raa'ij Hai Ke Woh Shadaa'id (Mushkilaat) Ke Waqt "Ya Shaikh Fulaa'n" Ya "Ya Rasoolallaah ﷺ" Kehte Hai'n, Aur Isi Tarah Ambiya, Mursaleen, Auliya, Ulama Aur Saaleheen Se Jo Istegaasa (Fariyaad) Karte Hai'n, Kya Yeh Jaa'iz Hai Ya Nahee'n? Aur Kya Rusul, Ambiya, Auliya, Saaleheen Aur Mashaa'ikh Apni Wafaat Ke Ba'ad Bhi Madad Kar Sakte Hai'n? Aur Iss Mauqif Ko Kaunsi Cheez Tarjeeh Deti Hai?
Jawaab - Ambiya Mursaleen, Auliya, Ulama Aur Saaleheen Se Istegaasa Karna Jaa'iz Hai, Rusul, Ambiya, Auliya Aur Saaleheen Apni Wafaat Ke Ba'ad Bhi Madad Kar Sakte Hai'n, Kyu'nke Ambiya Ke Mo'jezaat Aur Auliya Ki Karaamaat Unki Maut Se Khatam Nahee'n Hotee'n. (Fataawa Ramli, Jild No.4, Safha No.382, Naashir Maktabatul Islaamiya)
Mazkoorah Baala Ibaaraat e Aslaaf Se Bhi Waazeh Hai Ke Ambiya e Kiraam Alaihimus Salaam Wa Sahaaba e Kiraam Radiallaahu Anhum Ajma'een Aur Auliya Allaah Rahimahullaahu Ta'aala Alaihim Ajma'een Ko Pukaarna Aur Majaazi Madadgaar Samajh Kar Madad Maa'ngna Jaa'iz Hai.
By Alahazrat Foundation Research Team - 7710809266/9892708816
