Asar Ki Namaaz Ka Waqt Kab Se Shuru Hota Hai, Isme'n Ulama Ka Ikhtelaaf Hai, Mash'hoor Riwaayat Ke Mutaabiq Imaam e Aa'zam Abu Haneefa Alaihir Rehma (Wafaat 150 Hijri) Ka Kehna Hai Ke Jab Har Cheez Ka Saaya, Do Misl Ke Baraabar Ho Jaaye, Tab Se Asar Ka Waqt Shuru Hota Hai.(Muatta Imaam Muhammad, Safha 31, Kitaab Al-Asl, Al-Mash'hoor Bil Mabsoot, Jild No.1, Safha No.144)
Hazrat Abu Hurairah Radiallaahu Anhu Ka Bhi Yehi Mauqif Hai. (Muatta Imaam Maalik, Safha No.8), Ek Riwaayat Ke Mutaabiq Imaam Sufiyaan Sauri Alaihir Rehma (Wafaat 161 Hijri) Ka Bhi Yehi Maslak Hai. (Al-Asma Wal Asma Wal Kuna Lil Imaam Assadooli Abi, Jild No.2, Safha No.577)
Imaam Abu Haneefa Alaihir Rehma Ki Daleel Yeh Hai,
Imaam Muhammad Alaihir Rehma (Wafaat 189 Hijri) Farmaate Hai'n,
Tarjuma :- Hazrat Rasoolullaah ﷺ Ne Farmaaya, Doosri Ummato'n Ke Muqaable Me'n Tumhaari Zindagi Ki Muddat Iss Qadar Hai Jis Qadar Asar Aur Guroob e Aaftaab Ka Darmiyaani Waqfa Hota Hai, Tumhaari Aur Yahood Wa Nasaara Ki Misaal Aisi Hai Jaise Kisi Ne Mazdoor Ko Kaam Par Lagaaya Aur Kaha Ke Kaun Hai Jo Mere Liye (Subah Se) Dopaher Tak Ek Qairaat Ke Badle Yeh Kaam Kare? Yahood Ne Kaam Kiya.
Phir Uss Shakhs Ne Kaha, Kaun Hai Jo Ek Qairaat Ke Badle Me'n Asar Tak Kaam Kare? To Nasaara Ne Ek Qairaat Ke Badle Namaaz e Asar Tak Kaam Kiya, Phir Usi Shakhs Ne Kaha, Ke 2 Qairaat Ke Badle Namaaz e Asar Se Magrib Tak Kaun Mera Kaam Anjaam Dega?
(Ispar Huzoor ﷺ Ne Irshaad Farmaaya) Sunlo ! Woh Log Tum Ho, Jo Namaaz e Asar Se Magrib Tak Kaam Karte Ho, Rasoolullaah ﷺ Ne Irshaad Farmaaya, Iss Baat Par Yahood Wa Nasaara Naaraaz Huwe Aur Kehne Lage, Ham Ne Zyaadah Kaam Kiya Magar Mazdoori Kam Mili, Uss Shakhs Ne Kaha, Kya Mai'n Ne Tumhaare Haq Me'n Kisi Qism Ki Koi Kami Ki Hai?
Yahood Wa Nasaara Ne Jawaab Diya Nahee'n,
Usne Kaha, Yeh Meri Taraf Se Ahsaan Hai, Jispar Chaahu'n Ahsaan Karu'n. (Muatta Imaam Muhammad, Hadees No.1008, Saheeh Bukhaari, Hadees No.557)
Iss Hadees Se Istedlaal Yeh Hai Ke Yahood Wa Nasaara Ka Qaul, "Hamne Zyaadah Kaam Kiya Magar Mazdoori Kam Mili" Ispar Dalaalat Karta Hai Ke Zohar Ka Waqt, Asar Ki Namaaz Se Zyaadah Hai, Kyu'nke Nasaara Ne Dopaher (Zohar) Se Asar Tak Kaam Kiya Tha Aur Zyaadah Kaam Usi Waqt Hoga Jab Zyaadah Waqt Ho, Lehaaza Yeh Hadees Waazeh Taur Par Dalaalat Karti Hai Ke Asar Ka Waqt, Zohar Ke Waqt Ke Muqaable Me'n Thoda Hai, Aur Isi Wajah Se Kaha Gaya Ke Do Misl Se Shuru Hota Hai.
Yehi Wajah Hai Ke,
1 – Imaam Abu Zaid Ad Daboosi (Wafaat 430 Hijri) Farmaate Hai'n Ke,
Tarjuma :- Pas Yeh Bataane Keliye Ke Amal Kam Kiya Hai, Misaal Me'n Waqt Ke Chhote Hone Ko Bayaan Kiya, To Isse Yeh Baat Nikal Kar Aayi Ke Asar Ka Waqt (Bamuqaabla Zohar Ke) Chhota Hai, Aur Asar Ka Waqt (Bamuqaabla Zohar) Chhota Usi Waqt Hoga Jabke Jawaab Imaam Abu Haneefa Alaihir Rehma Ke Qaul Ke Mutaabiq Ho. (Kitaab Al-Aasaar Lid Daboosi, Ba Hawaala Sharah Ibne Maajah Lil Muglataayi, Safha No.1002)
2 - Imaam Muhammad (Wafaat 189 Hijri) Ne Bhi Asar Me'n Taakheer Ko Afzal Qaraar Diya Hai Aur Kaha,
Tarjuma :- Kya Tum Nahee'n Dekhte Ke Zohar Aur Asar Ke Darmiyaan Jo Waqfa Hai Woh Asar Aur Magrib Ke Darmiyaani Waqfe Se Zyaadah Hai, Lehaaza Yeh Hadees Asar Ko Taakheer Se Padhne Par Dalaalat Karti Hai. (Muatta Imaam Muhammad, Hadees No.1008)
3 - Imaam Abu Bakar Al Raazi (Wafaat 370 Hijri) Farmaate Hai'n,
Tarjuma :- Yeh Hadees 2 Waj'ho'n Se Imaam Abu Haneefa Alaihir Rehma Ke Qaul Ke Saheeh Hone Par Dalaalat Karti Hai,
1) Aap ﷺ Ne Irshaad Farmaaya, Tumhaari Muddat Pichhli Ummato'n Ke Muqaable Me'n (Aisi Hai) Jaise Asar Aur Magrib Ke Darmiyaan (Ka Waqfa), Aur Isse Aap ﷺ Ka Maqsad, Muddat Ke Kam Hone Ko Bataana Hai.
2) Yeh Hadees Ek Doosre Andaaz Se Bhi Hamaare Mauqif Par Dalaalat Karti Hai, (Aur Woh Iss Tarah) Ke Aap ﷺ Ne Irshaad Farmaaya, "Yahood Wa Nasaara Ne Naaraaz Hote Huwe Kaha, Hame'n Ujrat Kam Mili Haalaa'nke Hamne Kaam Zyaadah Kiya." Aur Yeh Ma'loom Hai Ke Unke Kaam Ki Zyaadati, Unke Waqt Ke Taweel, Aur Hamaare Waqt Ke Mukhtasar Hone Ki Wajah Se Hai, Pas Agar Asar Ka Waqt Misl (Awwal) Se Shuru Ho Jaaye To Asar Ka Waqt Zohar Ke Waqt Se Taweel Ho Jaayega, Aur Isse Tashbeeh Be Ma'ni Hokar Reh Jaayegi, Isliye Ke Uss Waqt Nasaara Zyaadah Kaam Karne Waale Na Ho'nge, Pas Yeh Iss Baat Par Dalaalat Karta Hai Ke Zohar Ka Waqt Asar Ke Waqt Se Wasee Hai. (Sharah Mukhtasar At-Tahaawi, Jild No.1, Safha No.496/497)
Iss Hadees Ki Wajah Se Imaam Abu Haneefa Alaihir Rehma Ka Kehna Hai Ke Namaaz e Asar Ka Waqt Do Misl Se Shuru Hota Hai, Jaisa Ke Aqwaal Guzar Chuke, Neez Dekhiye, (Sharah Ibne Maaja Lil Muglataayi, Safha No.999, 1002, Nukhab Al Afkaar Lil Ayni, Jild No.3, Safha No.141)
Ahnaaf Ne Bhi Ahtiyaat Ko Raajeh Qaraar Dete Huwe, Yehi Kaha Ke Asar Ka Waqt 2 Misl Par Shuru Hota Hai, Kyu'nke Huzoor ﷺ Aur Sahaaba e Kiraam Asar Ki Namaaz Ko Taakheer Se (Ya'ni Do Misl Ke Ba'ad) Padhte The.
Dalaa'il Darj e Zail Hai'n,
Daleel No.1 :-
Imaam Bukhaari (Wafaat 256 Hijri) Farmaate Hai'n,
Tarjuma :- Hazrat Raafe Bin Khudaij Radiallaahu Anhu Farmaate Hai'n Ke Mai'n Ne Huzoor ﷺ Ko Asar Ki Namaaz Keliye Taakheer Ka Hukm Dete Huwe Suna. (At-Taareekh Al-Ausat Lil Bukhaari, Jild No.2, Safha No.65)
Daleel No.2 :-
Imaam Abu Ja'far Uqaili (Wafaat 322 Hijri) Farmaate Hai'n,
Tarjuma :- Abdul Azeez Bin Uqbah Kehte Hai'n Ke Mai'n Ne Abdullaah Bin Raafe Ke Saath Zarba Me'n Asar Ki Namaaz Ada Ki, Aur Dehaat Waale Asar Ki Namaaz Ko Taakheer Se Ada Karte Hai'n, To Abdullaah Bin Raafe Ne Bhi Asar Ki Namaaz Me'n Taakheer Ki, To Mai'n Ne Kaha, Aapne Yeh Namaaz Ko Mo'akhkhar Kiya Hai, To Unho'n Ne Apne Dono'n Haatho'n Ko Harkat Dete Huwe 2 Ya 3 Martaba Kaha Ke, Mujhe Bid'at Se Kya Lena Dena Hai, Yehi Mere Waalid Ki Namaaz Thi Huzoor ﷺ Ke Saath. (Az Zu'afa Al-Kabeer Lil Uqaili, 3/13, Wal Lafz Lahu, At Taareekh Al-Kabeer Lil Bukhaari, Jild No.5, Safha No.88)
Wazaahat :- Iss Riwaayat Se Ma'loom Huwa Ke Aap ﷺ Asar Ki Namaaz Me'n Taakheer Farmaate The Aur Neez Aane Waali Riwaayat Se Mazeed Wazaahat Hoti Hai Ke 2 Misl Tak Yeh Taakheer Hoti Thi, Ya'ni Aap ﷺ Do Misl Ke Waqt Par Asar Ki Namaaz Padhne Ka Hukm Dete The.
Daleel No.3 :-
Imaam Ibne Abi Khaisama (Wafaat 279 Hijri) Farmaate Hai'n,
Tarjuma :- Hazrat Urwah Kehte Hai'n Ke Mugeerah Bin Sho'ba Radiallaahu Anhu Asar Ki Namaaz Ko Taakheer Se Padha Karte The To Unse Ek Ansaari Ne Kaha, Kya Aapne Rasoolullaah ﷺ Ka Farmaan Nahee'n Suna Ke Aap ﷺ Ne Farmaaya, Mujhse Jibra'eel Alaihissalaam Ne Kaha, Fulaa'n Namaaz Fulaa'n Waqt Me'n Padhiye, Yahaa'n Tak Ke Jibra'eel Alaihissalaam Ne Tamaam Namaazo'n Ke Auqaat Bataaye.
To Hazrat Mugeerah Radiallaahu Anhu Ne Jawaab Diya Ke Kyu'n Nahee'n, Lekin Mai'n Gawaahi Deta Hoo'n Ke Ham Rasoolullaah ﷺ Ke Saath Asar Ki Namaaz Uss Waqt Padhte The Jab Sooraj Safed Aur Saaf Hota Tha, Phir Mai'n Banu Amro Bin Auf Ke Paas Aata To Sooraj Buland Hi Hota, Aur Banu Amro Bin Auf Madeena Se Do Tihaayi Farsakh Door Hai. (Taareekh Ibne Abi Khaisama, Jild No.1, Safha No.179, Hadees No.427, Wa Isnaadihi Hasan)
Iss Riwaayat Se Waazeh Taur Par Ma'loom Hota Hai Ke Hazrat Mugeerah Bin Sho'ba Radiallaahu Anhu Aur Huzoor ﷺ Do Misl Ke Ba'ad Asar Ki Namaaz Ada Farmaate The, Kyu'nke Agar Mugeerah Radiallaahu Anhu Ne Do Misl Se Pehle Asar Ki Namaaz Ada Ki Hoti To Ansaari Sahaabi Ka Unhe'n Hazrat Jibra'eel Alaihissalaam Ki Riwaayat Yaad Dilaana Be Ma'na Hota, Lekin Jab Ansaari Sahaabi Ne Unhe'n Jibra'eel Alaihissalaam Ki Riwaayat Yaad Dilaayi, To Unka Amal Iss Baat Ki Daleel Hai Ke Mugeerah Bin Sho'ba Radiallaahu Anhu Ne Asar Ki Namaaz, Hadees e Jibra'eel Me'n Bataaye Gaye Waqt Ke Mutaabiq Nahee'n Padhi, Ya'ni Do Misl Ke Ba'ad Padhi Thi.
Aur Phir Mugeerah Bin Sho'ba Radiallaahu Anhu Ne Ba Wajood Hadees e Jibra'eel Ka Ilm Hone Ke, Uske Muqaable Me'n Kaha Ke Rasoolullaah ﷺ Ke Saath Asar Ki Namaaz Aisi Haalat Me'n Padhte The Jab Ke Sooraj Saaf Aur Safed Hota Tha.
Saabit Huwa Ke Rasoolullaah ﷺ Aur Sahaaba e Kiraam Asar Ki Namaaz 2 Misl Ke Ba'ad Padhte The, Jab Tak Ke Sooraj Saaf Aur Safed Hota Tha.
A'imma e Fuqaha Ki Ibaaraat :- A'imma Fuqaha Ne Bhi "الشمس بیضاء نقیۃ"(Sooraj Saaf Aur Safed Ho) Waali Riwaayat Ko Asar Ki Taakheer Par Ya'ni 2 Misl Ke Ba'ad Ka Waqt Muraad Liya Hai,
1 - Siqa, Haafiz, Faqeeh Imaam Muhammad (Wafaat 189 Hijri) Farmaate Hai'n,
Tarjuma :- Asar Ki Namaaz, Jaldi Padhne Ki Ba Nisbat Taakheer Se Padhna Afzal Hai, Jab Tak Ke Sooraj Saaf Aur Safed Ho Aur Usme'n Zardi Daakhil Na Huwi Ho, Aur Yehi Imaam Abu Haneefa Aur Hamaare Aa'm Fuqaha Ka Qaul Hai. (Muatta Imaam Muhammad, Hadees No.1008)
Ek Aur Maqaam Par Kehte Hai'n Ke,
Hamaare Nazdeek Asar Ki Namaaz Jaldi Padhne Ki Ba Nisbat Taakheer Se Padhna Afzal Hai, Jabke Aise Waqt Me'n Padhi Jaaye Ke Sooraj Saaf Aur Safed Ho Aur Usme'n Zardi Daakhil Na Huwi Ho, Aksar Hadeeso'n Me'n Yehi Aaya Hai, Aur Yehi Imaam Abu Haneefa Ka Qaul Hai Aur Ba'az Fuqaha Ne Kaha Ke, Asar Ko Asar Isliye Kaha Jaata Hai Ke Use Din Ke Aakhri Waqt Me'n Padha Jaata Hai Aur Taakheer Ki Jaati Hai. (Muatta Imaam Muhammad, Hadees No.4)
2 - Sudooq, Faqeeh Shamsul A'imma, Imaam Sarakhsi (Wafaat 483 Hijri) Farmaate Hai'n,
Tarjuma :- Aur Hamaari Daleel Hazrat Ibne Mas'ood Radiallaahu Anhu Ki Hadees Hai, Woh Farmaate Hai'n Ke Huzoor ﷺ Asar Ki Namaaz Uss Waqt Padhte The, Jab Sooraj Safed Aur Saaf Hota, Aur Usme'n Aapne Asar Ki Taakheer Bayaan Farmaayi Hai. (Al-Mabsoot, Jild No.1, Safha No.147)
2 - Siqa, Mujtahid Imaam Abu Bakar Jasaas Al Raazi (Wafaat 370 Hijri) Ne Bhi "الشمس بیضاء نقیۃ" Ki Ek Riwaayat Se Taakheer Al-Asar Par Istedlaal Kiya Hai. (Sharah Mukhtasar Al Tahaawi Lil Jasaas, Jild No.1, Safha No.514)
Saabit Huwa Ke Ahaadees Me'n "الشمس بیضاء نقیۃ" Se Muraad 2 Misl Ka Waqt Hi Hai, Neez Un Riwaayaat Me'n "Taakheer Al-Asar" Ki Bhi Saraahat Hai, Jisse Uska 2 Misl Ka Waqt Hona Aur Bhi Waazeh Hota Hai,
Daleel No.4 :-
Tarjuma :- Imaam Abu Daawood (Wafaat 275 Hijri) Farmaate Hai'n,
Tarjuma :- Hazrat Ali Bin Shaibaan Radiallaahu Anhu Kehte Hai'n Ke Ham Log Madeena Me'n Hazrat ﷺ Ke Paas Aaye, To Aap ﷺ Asar Ki Namaaz Mo'akhkhar Karke Padhte The, Jab Tak Ke Sooraj Saaf Aur Safed Hota. (Sunan Abi Daawood, Hadees No.408)
Wazaahat :- Iss Riwaayat Ko Zikr Karne Ke Ba'ad, Imaam Badruddeen Ayni (Wafaat 855 Hijri) Farmaate Hai'n,
Tarjuma :- Yeh Hadees Iss Baat Par Dalaalat Karti Hai Ke Nabi e Akram ﷺ Asar Ki Namaaz Uss Waqt Ada Farmaate The, Jab Har Cheez Ka Saaya Uske Do Misl Ho Jaata Tha, Aur Yeh Hadees Imaam Abu Haneefa Ki Daleel Hai Unke Mukhaalifeen Par. (Sharah Sunan Abi Dawood Lil Ayni, Jild No.2, Safha No.268)
Imaam Tirmizi (Wafaat 279) Farmaate Hai'n,
Tarjuma :- Hazrat Umme Salma Radiallaahu Anha Farmaati Hai'n Ke Rasoolullaah ﷺ Zohar Ki Namaaz, Ba Nisbat Tumhaare, Jaldi Ada Farmaate The, Aur Aap Log Asar Ki Namaaz, Ba Nisbat Rasoolullaah ﷺ Ke, Jaldi Ada Karte Ho. (Sunan Tirmizi, Jild No.1, Safha No.302, Hadees No.161)
Wazaahat :- Iss Hadees Par Imaam Tirmizi (Wafaat 279 Hijri) Ne "Taakheer Al-Asar" Ka Unwaan Lagaaya Hai, Ma'loom Huwa Imaam Tirmizi Ke Nazdeek, Yeh Hadees Taakheer Al-Asar Par Dalaalat Karti Hai, Imaam Muglataayi (Wafaat 762) Ne Iss Hadees Ko Taakheer Al-Asar Ke Mustadlaat Me'n Zikr Kiya Hai. (Sharah Ibne Maaja Lil Muglataayi, Safha No.1001) Yehi Baat Mulla Ali Qaari Ne Bhi Tehreer Farmaayi Hai Ke " Yeh Hadees Taakheer Al-Asar Ke Istehbaab Par Dalaalat Karti Hai. (Mirqaatul Mafaateeh, Jild No.2, Safha No.538, Hadees No.619)
Imaam Ibne Abi Shayba (Wafaat 235 Hijri) Farmaate Hai'n,
Tarjuma :- Hazrat Abu Hurairah Radiallaahu Anhu Asar Ki Namaaz Mo'akhkhar Kiya Karte The, Yahaa'n Tak Ke Mai'n Kehta Ke Sooraj Zard Ho Gaya. (Musannaf Ibne Abi Shayba, Hadees No.3328)
Imaam Muhammad (Wafaat 189 Hijri) Farmaate Hai'n,
Hazrat Abu Hurairah Radiallaahu Anhu Farmaate Hai'n Ke Tu Asar Ki Namaaz Uss Waqt Ada Kar Jab Tera Saaya 2 Misl Ho Jaaye. (Muatta Imaam Muhammad, Jild No.1, Muatta Imaam Maalik, Hadees No.9)
Imaam Ibne Abi Shayba (Wafaat 235 Hijri) Farmaate Hai'n,
Tarjuma :- Abdullaah Bin Mas'ood Radiallaahu Anhu Se Manqool Hai Ke Woh Asar Ki Namaaz Taakheer Se Ada Kiya Karte The. (Musannaf Ibne Abi Shayba, Hadees No.3310)
Imaam Ibne Abi Shayba Farmaate Hai'n,
Tarjuma :- Hazrat Ali Radiallaahu Anhu Asar Ko Taakheer Se Ada Farmaate The Yahaa'n Tak Ke Sooraj Deewaaro'n Par Buland Ho Jaata. (Musannaf Ibne Abi Shaiba, Hadees No.3327)
Imaam Ibne Abi Shayba Farmaate Hai'n,
Tarjuma :- Faqeeh Al-Iraaq, Imaam Ibraaheem Nakhayi Kehte Hai'n, Tumse Pehle Log (Sahaaba e Kiraam Aur Taaba'een) Tumhaare Muqaable Me'n Asar Ki Namaaz Zyaadah Taakheer Se Ada Karte The. (Musannaf Ibne Abi Shaiba, Hadees No.3331)
Khulaasa e Kalaam Yeh Hai Ke Ahnaaf Ne Ahtiyaat Ko Raajeh Qaraar Dete Huwe, Yehi Kaha Ke Asar Ka Waqt 2 Misl Par Shuru Hota Hai, Kyu'nke Huzoor ﷺ Aur Sahaaba e Kiraam Asar Ki Namaaz Ko Taakheer Se (Ya'ni 2 Misl Ke Ba'ad) Padhte The Jaisa Ke Tafseel Uper Guzar Chuki.
By Alahazrat Foundation Research Team - 7710809266/9892708816
