Buzurgaan e Deen Ke Shat'hiyaat Aise Aqwaal Wa Af'aal Ko Kehte Hai'n Jo Unse Bekhudi, Galba e Haal, Me'n Saadir Ho Jaate Ho'n, Jo Bazaahir Sharee'at Ke Khilaaf Ho'n,
Buzurgo'n Ke Shat'hiyaat Ke Baare Me'n Ulama e Keraam Ka Nazariya Yeh Raha Hai Ke Jinki Zindagi Sharee'at Par Amal Me'n Guzri Ho Aur Jinka Ilm Wa Fazl Ummat Ke Darmiyaan Mash'hoor Wa Ma'roof Ho Agar Unse Kuchh Aise Kalmaat Saadir Ho Jaate Hai'n Jo Bazaahir Khilaaf e Sharee'at Ma'loom Hote Hai'n To Unki Taaweel Ki Jaayegi Agar Mumkin Ho, Agar Mumkin Na Ho To Phir Uske Ma'ni Wa Maf'hoom Ko Allaah Ke Supurd Kar Diya Jaayega Aur Iss Baare Me'n Unko Ma'zoor Samajh Kar Unpar Kufr Wa Gumraahi Ka Fatwa Nahee'n Lagaaya Jaayega, Lekin Uss Galati Me'n Unki Pairwi Nahee'n Ki Jaayegi, Ya'ni Kisi Aur Shakhs Ko Aise Alfaaz Ya Jumle Bolne Ki Qat'an Ijaazat Nahee'n Hogi.
Chand Dalaa'il Mulaaheza Farmaaye'n,
"Muslim Shareef" Me'n Hadees e Paak Hai,
Tarjuma :- Hazrat Anas Bin Maalik Radiallaahu Anhu Ne Hadees Bayaan Ki Ke Rasool Allaah ﷺ Ne Irshaad Farmaaya, Jab Allaah Ka Bandah Uske Huzoor Tauba Karta Hai To Allaah Paak Uss (Ki Tauba) Par Tum Me'n Se Uss Shakhs Se Bhi Zyaadah Khush Hota Hai Jo Apni Sawaari Par Kisi Chatyal Maidaan (Sehra) Me'n Ho Aur Woh Sawaari Usse Chhoot Kar Bhaag Jaaye Jabke Uska Khaana Aur Paani Bhi Usi Par Ho, Woh Uss (Ke Milne) Se Bilkul Na Ummeed Ho Jaaye Aur Ek Darakht Ke Paas Aakar Uske Saaye Me'n Let Jaaye, Iss Haal Me'n Ke Woh Apni Sawaari Se (Poori Tarah) Maayoos Ho Chuka Ho, Woh Usi Aa'lam Me'n Ho Ke Achaanak Use Apne Paas Khada Paaye, To Woh Uski Nakeel Pakadle, Phir Khushi Ki Shiddat Me'n (Be Khud Hokar) Kahe, Aye Allaah ! Tu Mera Bandah Hai Aur Mai'n Tera Rab Hoo'n, Usne Khushi Ki Shiddat Ki Wajah Se (Lafzo'n Ki) Yeh Galati Ki.
(Muslim Shareef, Jild No.4, Safha No.2104, Hadees No.2747, Naashir Daaru Ihyaa'it Taraasil Arabi Bairoot)
Tawajjoh Deejiye ! Iss Hadees Shareef Me'n Jo Lafz Hai Ke Woh Bandah Be Khudi Me'n Kahe, Aye Allaah ! Tu Mera Bandah Hai Aur Mai'n Tera Rab Hoo'n, Bataaya Jaaye Kya Yeh Jumla Durust Hai? Kya Ham Me'n Se Koi Bandah Agar Yeh Jumla Kahega To Uspar Fatwa Lagega Ya Nahee'n? To Jawaab Hoga Bilkul Fatwa Lagega, Magar Iss Hadees Se Saabit Hai Ke Be Khudi Me'n Kisi Bande Ne Aisa Jumla Kaha To Uspar Fatwa Nahee'n Lagega Balke Aise Bande Se To Allaah Mohabbat Karta Hai, Pas Ma'loom Huwa Ke, "Be Khudi" Me'n "Galba e Haal" Me'n Agar Zabaan Se Galat Jumle Nikal Jaaye'n To Uspar Fatwa Nahee'n Lagta, Lehaaza Auliya Allaah, Soofiya e Kiraam Ki Zabaan Se Bhi Galba e Haal Me'n Be Khudi Ki Kaifiyat Me'n Koi Galat Jumla Nikal Jaaye To Uspar Bhi Fatwa Nahee'n Lagta,
Iss Hadees Ki Tashreeh Me'n Imaam Qaazi Ayaaz Maaliki Alaihir Rehma (Wafaat 544 Hijri) Apni Kitaab Me'n Likhte Hai'n,
Tarjuma :- Nabi e Akram ﷺ Ka Yeh Farmaana Ke, Uss Shakhs Ne Khushi Ki Shiddat Me'n Keh Diya, Aye Allaah ! Tu Mera Bandah Hai Aur Mai'n Tera Rab Hoo'n, Isse Yeh Saabit Hota Hai Ke Insaan Uss Jaisi Haalat Me'n, Ya'ni Sakht Hairat, Ghabraahat Ya Mad'hoshi Ke Aa'lam Me'n, Jo Kuchh Keh Guzre, Insha Allaah Uspar Uska Mawaakhezah (Pakad) Nahee'n Hoga, Aur Isi Tarah Iss Waaqe'ah Ko Bayaan Karna Bhi Durust Hai Agar Uska Maqsad Ilmi Rahnumaayi Aur Sharayi Faa'idah Haasil Karna Ho, Na Ke Mazaaq Udaane, Naqal Utaarne Ya Lagw (Bekaar) Maqsad Keliye, Kyu'nke Nabi e Kareem ﷺ Ne Khud Ise Bayaan Farmaaya Hai, Aur Agar Iss Baat Ka Naqal Karna Hi Na Pasandeedah Ya Bura Hota To Nabi e Kareem ﷺ Ise Hargiz Bayaan Na Farmaate. (Sharah Saheeh Muslim Lil Qaazi Ayaaz, Al Musamma "Ikmaalul Mo'lim Be Fawaa'ide Muslim" Jild No.08, Safha No.245, Kitaabut Tauba, Naashir Daarul Wafa Misr)
Isi Tarah "Muslim Shareef" Hi Me'n Ek Aur Hadees Hai,
Tarjuma :- Hazrat Abu Hurairah Radiallaahu Anhu Se Riwaayat Hai Ke Rasoolullaah ﷺ Ne Irshaad Farmaaya, Ek Shakhs Ne Apni Jaan Par Bahot Zulm Kiye The, Jab Uski Maut Ka Waqt Aaya To Usne Apne Beto'n Ko Wasiyat Ki Ke, Jab Mai'n Mar Jaaoo'n To Mujhe Jala Dena, Phir Mujhe Pees Daalna, Phir Meri Raakh Ko Samandar Me'n Hawa Ke Supurd Kar Dena, Allaah Ki Qasam ! Agar Allaah Ne Mujh Par Qudrat Paaliya (Ya'ni Mujhe Pakad Liya) To Woh Mujhe Aisa Azaab Dega Jo Kisi Aur Ko Na Diya Hoga, Nabi e Kareem ﷺ Ne Irshaad Farmaaya, Un Beto'n Ne Uske Saath Aisa Hi Kiya, Phir Allaah Paak Ne Zameen Se Farmaaya, Jo Kuchh Tu Ne Liya Hai Use Waapas Karde, To Woh Shakhs Achaanak (Dobaarah Zindah Hokar) Khada Tha, Allaah Paak Ne Usse Poochha, Tujhe Iss Harkat Par Kis Baat Ne Majboor Kiya? Usne Kaha, Aye Mere Rab ! Tere Khauf Ne, To Allaah Paak Ne Isi Wajah Se Use Mu'aaf Kar Diya. (Muslim Shareef, Jild No.4, Safha No.2110, Hadees No.2754, Kitaabut Tauba, Naashir Daaru Ihyaa'it Taraasil Arabi Bairoot)
Tawajjoh Keejiye ! Iss Hadees Se Waazeh Aur Saaf Hai Ke Uss Shakhs Ne Bazaahir Allaah Ki Qudrat Ka Inkaar Kar Diya Aur Allaah Ki Qudrat Ka Inkaar Kufr Hai, Ab Bataaye'n Jab Yeh Kufr Hai To Uss Insaan Ki Bakhshish Kaise Huwi? To Wajah Yeh Hai Ke Jis Waqt Uss Insaan Ne Yeh Baat Kahi Uss Lamhe Uspar Khauf e Khuda Itna Zyaadah Gaalib Tha Ke Uski Aqal Hairaan Reh Gayi, Usi Galba e Haal Me'n Usse Iss Tarah Ka Jumla Nikla Aur Allaah Paak Ne Uski Niyat Aur Uske Dil Ke Sachche Khauf Ko Qabool Farmaaya Aur Uski Bakhshish Ho Gayi, Ma'loom Huwa Agar Galba e Haal Me'n Koi Khilaaf e Sharee'at Baat Zabaan Se Nikal Jaati Hai To Uspar Fatwa Nahee'n Lagta Hai,
Iss Hadees Ki Tashreeh Me'n Imaam Qaazi Ayaaz Maaliki (Wafaat 544 Hijri) Apni Kitaab Me'n Likhte Hai'n,
Tarjuma :- Imaam (Abu Abdullaah Muhammad Bin Ali Bin Umar Tameemi Maazri) Farmaate Hai'n, Iss Hadees Ko Iss Ma'ni Par Mehmool Karna (Ya'ni Yeh Samajhna) Durust Nahee'n Hai Ke Uss Shakhs Ne Apne Qaul "Agar Allaah Mujh Par Qaadir Ho Gaya" Se Allaah Ki "Qudrat" Muraad Li Thi (Ya'ni Use Allaah Ki Qudrat Par Shak Tha) Kyu'nke Jo Shakhs Allaah Paak Ke Ilm Aur Qudrat Ke Baare Me'n Shak Kare Woh (Daa'irah e Islaam Se Khaarij Ya'ni Kaafir Hai) Jab Ke Hadees Ke Aakhir Me'n Zikr Hai Ke Allaah Paak Ne Usse Poochha, Tujhe Iss Kaam Par Kis Cheez Ne Ubhaara? To Usne Arz Kiya, "Aye Mere Rab ! Tere Khauf Ne" Aur Isi Wajah Se Allaah Paak Ne Use Bakhsh Diya, (Isse Saabit Hota Hai Ke Woh Momin Tha Kyu'nke) Kaafir Na To Allaah Se Darta Hai Aur Na Hi Allaah Use Mu'aaf Farmaata Hai, Chunaanche Jab Yeh Saabit Ho Gaya Ke Iss Hadees Ka Woh (Zaahiri) Ma'ni Lena Saheeh Nahee'n, To Phir Uske Do Me'n Se Ek Ma'ni Muraad Liye Jaaye'nge,
Ya To Isse Muraad Yeh Hai Ke, Agar Allaah Ne Mujh Par Azaab Ka Faisla (Taqdeer) Kar Diya, (Arabi Lugat Me'n) Qadar Aur Qaddar Ek Hi Ma'ni Me'n Iste'maal Hote Hai'n, Phir Isse Muraad "Ta'ngi Karna" Hai (Ya'ni Agar Allaah Ne Mujh Par Girift Me'n Ta'ngi Ki), Jaisa Ke Allaah Paak Ka Farmaana Hai, (Tarjuma - Pas Allaah Ne Uspar Uska Rizq Ta'ng Kar Diya), Isi Tarah Hazrat Yoonus Alaihissalaam Ke Baare Me'n Allaah Ke Farmaan Ka Bhi Yehi Matlab Hai (Ke Unho'n Ne Samjha Ke Ham Unpar Ta'ngi Nahee'n Kare'nge),
Imaam Qaazi Ayaaz Maaliki Farmaate Hai'n, Uss Shakhs Ke Iss Qaul Ki Taaweel Me'n Ikhtelaaf Paaya Jaata Hai, Ek To Wohi (Do Taaweelaat) Hai'n Jo Upar Guzree'n, Aur Ek Qaul Yeh Bhi Hai Ke, Usne Yeh Baat Iss Haal Me'n Kahi Thi Ke Woh Apne Kalaam Par Qaabu Nahee'n Rakhta Tha Aur Na Hi Un Alfaaz Ke Zaahiri Ma'ni Ka Aqeedah Rakhta Tha, Balke Yeh Alfaaz Uss Khauf Aur Sakht Be Chaini Ki Wajah Se (Zabaan Se Nikal Gaye) The Jo Uspar Gaalib Aa Chuki Thi, Isi Liye Allaah Ne Uspar Girift Nahee'n Farmaayi, Kyu'nke Woh Mad'hoshi Ki Kaifiyat Me'n Tha, Bilkul Isi Tarah Jaise Uss Doosre Shakhs Ka Mu'aamla Tha Jisne Khushi Ki Shiddat Aur Achaanak Milne Waali Musarrat Ki Wajah Se Hosh Wa Hawaas Kho Diye The Aur (Galati Se) Keh Diya Tha, Tu Mera Bandah Hai Aur Mai'n Tera Rab Hoo'n. (Sharah Saheeh Muslim Lil Qaazi Ayaaz, Ikmaalul Mo'lim Bi Fawaa'ide Muslim, Jild No.08, Safha No.255-256, Kitaabut Tauba)
Isi Tarah Iss Hadees Ki Tashreeh Me'n Imaam Nawwi (Wafaat 676 Hijri) Apni Kitaab Me'n Likhte Hai'n,
Tarjuma :- Ulama Ne Iss Hadees Ki Taaweel (Wazaahat) Me'n Ikhtelaaf Kiya Hai, Ek Giroh Ka Kehna Hai Ke Yeh Durust Nahee'n Ke Iss Baat Ko Allaah Ki Qudrat Ki Nafi Par Mehmool Kiya Jaaye (Ya'ni Yeh Samjha Jaaye Ke Woh Allaah Ki Qudrat Ka Munkir Tha) Kyu'nke Allaah Paak Ki Qudrat Me'n Shak Karne Waala Kaafir Hota Hai, Jabke Hadees Ke Aakhir Me'n Saraahat Hai Ke Uss Shakhs Ne Yeh Sab Kuchh Allaah Ke Khauf Ki Wajah Se Kaha Tha, Aur Kaafir Allaah Paak Se (Iss Tarah) Nahee'n Darta Aur Na Hi Kaafir Ko Bakhsha Jaata Hai, Lehaaza Ulama Ke Nazdeek Iss Kalaam Ki 2 Taaweele'n Ho Sakti Hai'n,
Pehli Taaweel "Agar Allaah Ne Mujh Par Azaab Ka Faisla Kar Liya" Ka Matlab Hai Ke Arabi Me'n "Qadar" (Takhfeef Ke Saath) Aur "Qaddar" (Tashdeed Ke Saath) Dono'n Ek Hi Ma'ni (Faisla Karne) Me'n Iste'maal Hote Hai'n,
Doosri Taaweel : Yahaa'n "Qadar" Ka Matlab Ta'ngi Karna Hai, Jaisa Ke Allaah Paak Ka Irshaad Hai, "Uspar Uska Rizq Ta'ng Kar Diya Gaya"
Hazrat Yoonus Alaihissalaam Ke Waaqe'ah Me'n Bhi Iska Ka Ek Matlab Yehi (Ta'ngi Karna) Liya Gaya Hai,
Deegar Giroho'n Ki Aaraa Aur Ulama Ke Ek Giroh Ka Kehna Hai Ke Lafz Apne Zaahiri Ma'ni Par Hi Hai, Lekin Yeh Baat Uss Shakhs Ne Uss Waqt Kahi Jab Uske Hawaas Qaabu Me'n Nahee'n The Aur Woh Kalaam Ki Haqeeqat Aur Uske Ma'ni Ka Qasad Nahee'n Kar Raha Tha, Balke Uspar Khauf, Dehshat Aur Shadeed Ghabraahat Iss Qadar Gaalib Thi Ke Uski Sochne Samajhne Aur Gaur Wa Fikr Karne Ki Salaahiyat Khatam Ho Chuki Thi, Woh Uss Waqt Ek Gaafil Aur Bhoolne Waale Ke Hukm Me'n Tha, Aur Aisi Haalat Me'n Insaan Ki Girift Nahee'n Hoti,
Yeh Bilkul Waisa Hi Hai Jaise Uss Shakhs Ne Kaha Tha Jispar Apni Gumshudah Sawaari Milne Par Khushi Iss Qadar Gaalib Aayi Ke Usne (Galati Se) Keh Diya, "Aye Allaah ! Tu Mera Bandah Hai Aur Mai'n Tera Rab Hoo'n," Usne Mad'hoshi Aur Sahw Ki Haalat Me'n Yeh Kaha Tha, Isliye Uspar Kufr Ka Hukm Nahee'n Laga, Muslim Ke Alaawah Deegar Riwaayaat Me'n Iss Hadees Ke Alfaaz Yoo'n Hai'n, "Taake Mai'n Allaah Se Ojhal Ho Jaaoo'n, Yeh Iss Baat Ki Daleel Hai Ke Uska Qaul (Bazaahir Qudrat Ki Nafi Par) Sakht Ghabraahat Ki Haalat Me'n Tha,
Aur Ulama Ke Teesre Giroh Ka Kehna Hai Ke Yeh Arabi Zabaan Ke Mijaaz Aur Kalaam Ke Khoobsurat Usloob Me'n Se Hai Jise "Shak Ko Yaqeen Ke Saath Milaana" Kehte Hai'n, Jaise Qur'aan Me'n Hai, "Aur Beshak Ham Ya Tum Hidaayat Par Hai'n" Uski Soorat Shak Waali Hai Magar Muraad Yaqeen Hai,
Ulama Ke Chauthe Giroh Ka Maanna Yeh Hai Ke Yeh Shakhs Allaah Paak Ki Sifaat Me'n Se Kisi Ek Sifat Se Na Waaqif Tha (Ya'ni Use Yeh Ma'loom Nahee'n Tha Ke Allaah Paak Zarraat Ko Jama Karke Dobaarah Zindah Karne Par Bhi Qaadir Hai. (Sharah Muslim Lil Nawwi, Jild No.17, Safha No.71, Kitaabut Tauba, Naashir Daaru Ihyaa'it Taraasil Arabi Bairoot)
Zaroori Note :- Imaam Qaazi Ayaaz Maaliki Alaihir Rahma Aur Shaareh Muslim Imaam Nawwi Alaihir Rahma Ki Tashreehaat Se Waazeh Aur Saaf Hai Ke Galba e Haal Me'n Ya Be Khudi Me'n Jab Bandah e Momin Se Koi Bazaahir Khilaaf e Sharee'at Baat Saadir Ho Jaaye To Jahaa'n Tak Mumkin Ho Uski Taaweel Ki Jaaye Aur Taaweel Mumkin Na Ho To Bhi Qaa'il Par Kufr Wa Gumraahi Ka Fatwa Nahee'n Lagaaya Jaayega Lehaaza Jab Momin Bande Ko Be Khudi Aur Galba e Haal Par Nazar Karte Huwe Kaafir Wa Gumraah Nahee'n Kaha Jaayega To Badarja e Aula Jin Allaah Ke Nek Bando'n Se Jin Auliya Allaah Se Be Khudi Ya Galba e Haal Me'n Shat'hiyaat Saadir Huwe Hai'n Unko Bhi Kaafir Wa Gumraah Nahee'n Kaha Jaayega,
Sibt e Ibne Jauzi Apni Kitaab Me'n Likhte Hai'n,
Tarjuma :- Fasal (Baab) : Musannif Rahimahullaah Ne Farmaaya, Aur Mai'n Ne Unse Shat'hiyaat (Wajd Wa Masti Ki Haalat Me'n Zabaan Se Nikalne Waale Kalmaat) Aur Da'wo'n Ke Qabeel Ke Kuchh Alfaaz Naqal Kiye Hai'n, Aur Uska Jawaab Mukhtasar Hai, Woh Yeh Ke Mashaa'ikh (Soofiya) Ke Kuchh Ahwaal (Roohaani Kaifiyaat) Hote Hai'n, Jaise Qabz Wa Bast (Ta'ngi Wa Kushaadgi) Ki Haalat, Aur Fana Wa Baqa Ki Haalat, Aur Basa Auqaat Insaan Par Aisi Kaifiyaat Taari Hoti Hai'n Jo Use Maujoodaat (Duniya Wa Maafeeha) Se Gaa'ib (Be Khabar) Kar Deti Hai'n, Aur (Imaam) Junaid Bagdaadi Se Kaha Gaya Ke Abu Yazeed (Bustaami) Ne Kaha Hai, "Sub'haani ! (Meri Zaat Paak Hai !) To Unho'n Ne Farmaaya, Yeh Shakhs Jalaal e Ilaahi Ke Mushaahede Me'n Mustagraq (Khoya Huwa) Hai, Haq Ta'aala (Ki Ma'refat) Ne Use Apne Siwa Kisi Bhi Doosri Cheez Ko Dekhne Se Gaafil Kar Diya Hai, Chunaanche Unho'n Ne (Iss Be Khudi Me'n) Allaah Ki Woh Sifat Bayaan Kardi Jo Sirf Usi (Allaah) Paak Ke Laayeq Hai, Aur Hadees Me'n Hai, Agar Tum Unhe'n Dekho To Yaqeenan Kahoge Ke Yeh Deewaane Hai'n, Aur Agar Woh Tumhe'n Dekhe'n To Kahe'nge Ke Yeh Log Imaan Hi Nahee'n Laaye. (Mir'aatuz Zamaan Fi Tawaarikhil Aa'yaan, Jilld 15, Safha No.442)
Sibte Ibne Jauzi Ki Ibaarat Se Waazeh Aur Saaf Hai Ke Be Khudi Ke Aa'lam Me'n Soofiya e Kiraam Se Shat'hiyaat Saadir Hote Hai'n Jinke Sabab Unki Pakad Nahee'n Hoti Balke Unki Taaweele'n Ki Jaaye'n Mumkin Ho To, Warna Phir Unpar Fatwa Nahee'n Lagega Kyu'nke Yeh Shat'hiyaat Galba e Haal Ki Kaifiyat Me'n Saadir Hote Hai'n,
Imaam Ibne Khuldoon (Wafaat 808 Hijri) Apni Kitaab Me'n Likhte Hai'n,
Tarjuma :- Chauthi Baat Woh Alfaaz Hai'n Jinke Zaahiri Ma'ni Se (Haqeeqat Ke Baare Me'n) Mugaalta Paida Hota Hai, Jo Soofiya Ke Bahot Se A'imma Se Saadir Huwe Hai'n Aur Woh Apni Istelaah Me'n Unhe'n "Shat'hiyaat" (Wajdaani Magloobiyat Me'n Nikalne Waale Alfaaz) Se Ta'beer Karte Hai'n, Unke Zaahiri Alfaaz Par Ae'teraazaat Kiye Jaate Hai'n, Chunaanche (In Alfaaz Ko Sun Kar Log 3 Giroho'n Me'n Bat Gaye Hai'n) Koi Inkaar Karne Waala Hai, Koi Husn e Zan Rakhne Waala Aur Koi Unki Taaweel (Wazaahat) Karne Waala Hai, Baher Haal ! Mujaahedaat Aur Maqaamaat, Aur Unke Nateeje Me'n Haasil Hone Waale Azwaaq Wa Mawaajid (Roohaani Zauq Aur Qalbi Kaifiyaat) Aur Uske Asbaab Me'n Kotaahi Par Nafs Ka Muhaaseba Karne Ke Baare Me'n Jo Kalaam Hai, Usse Kisi Ko Inkaar Ki Gunjaa'ish Nahee'n, Iss Baare Me'n In (Soofiya) Ke Tajarbaat Wa Azwaaq Durust Hai'n Aur In Haqaa'iq Ko Pa Lena Hi Asal Kaamiyaabi (Ayn e Sa'aadat) Hai, Rahi Baat Un Buzrogo'n Ki Karaamaat, Gaib Ki Baato'n Ki Khabar Dene Aur Kaa'inaat Me'n Unke Tasarruf Ke Baare Me'n Guftagu Ki, To Yeh Amr Bar Haq Hai Aur Iska Inkaar Nahee'n Kiya Ja Sakta, Agarche Ba'az Ulama Ne Unke Inkaar Ki Taraf Mailaan Zaahir Kiya Hai, Lekin Yeh Durust Nahee'n.
Mazeed Aage Likhte Hai'n,
Tarjuma :- "Rahi Baat Un Mugaalta Aamez Alfaaz Ki Jinhe'n Woh (Soofiya) "Shat'hiyaat" (Wajdaani Magloobiyat Me'n Nikalne Waale Kalmaat) Se Ta'beer Karte Hai'n Aur Jinki Wajah Se Ahle Shara Unpar Girift Karte Hai'n, To Jaan Lena Chaahiye Ke Un Buzrogo'n Ke Baare Me'n Insaaf Ka Taqaaza Yeh Hai Ke, Woh (Basa Auqaat) Apne Hawaas Se Gaa'ib Ho Jaate Hai'n Aur Unpar Aisi Qalbi Waardaat Taari Ho Jaati Hai'n Jo Unhe'n Apne Qaabu Me'n Kar Leti Hai'n, Yahaa'n Tak Ke Woh Aisi Baate'n Keh Jaate Hai'n Jinka Woh Iraadah Nahee'n Rakhte, Aur Jo Shakhs (Hawaas Se) Gaa'ib Ho Woh Sharayi Taur Par Mukhaatib (Mukallilaf) Nahee'n Rehta, Aur Jo Majboor Ho Woh Ma'zoor Hota Hai,
Chunaanche Soofiya Me'n Se Jis Buzurg Ki Fazeelat Aur Pairwi (Taqwa) Saabit Ho, Uske Aise Kalmaat Ko Nek Niyati Aur Achchhe Maqsad Par Mahmool Kiya Jaayega, Haqeeqat Yeh Hai Ke (Roohaani) Kaifiyaat Aur Wajdaan Ko Alfaaz Me'n Bayaan Karna Bahot Mushkil Hai Kyu'nke Lugat Me'n Unke Liye Alfaaz Waza Nahee'n Kiye Gaye (Yeh Woh Kaifiyaat Hai'n Jinke Liye Zabaan Me'n Alfaaz Maujood Nahee'n), Jaisa Ke Abu Yazeed Bustaami Aur Un Jaise Deegar Buzrogo'n Ke Saath Pesh Aaya, Lekin Jis Shakhs Ki Fazeelat Ma'loom Na Ho Aur Na Hi Woh (Apne Taqwa Me'n) Mash'hoor Ho, To Usse Saadir Hone Waale Aise Kalmaat Par Uski Girift Ki Jaayegi, Bashart Yeh Ke Hame'n Koi Aisi Wajah Ma'loom Na Ho Jo Hame'n Uske Kalaam Ki Taaweel (Wazaahat) Par Aamaadah Kare, Isi Tarah Woh Shakhs Bhi Girift Ke Laayeq Hai Jo Hosh Wa Hawaas Me'n Rehte Huwe Aisi Baate'n Kare Aur Uspar Koi (Wajdaani) Kaifiyat Taari Na Ho. (Taareekh e Ibne Khuldoon, Jild No 1,Safha No 623-624, Naashir Daarul Fikr Bairoot)
Tawajjoh Keejiye ! Imaam Khateeb Bagdaadi Ki Ibaaraat Ne Masla Kitna Waazeh Kar Diya Ke Buzrogo'n Ke Shat'hiyaat Me'n Jahaa'n Tak Mumkin Ho Taaweel Ki Jaaye Taaweel Ki Gunjaa'ish Na To Be Khudi Wa Galba e Haal Ke Sabab Choo'nke Saadir Huwe Isliye Unpar Fatwa Nahee'n Lagaaya Jaayega,
Wahaabiyo'n Ke Imaam Wa Allaama Ibne Taimiya (Wafaat 728 Hijri) Apni Kitaab Me'n Likhte Hai'n,
Tarjuma :- Isi Tarah Soofiya Ke Shuyookh (Buzrogo'n) Me'n Kuchh Aise Log Bhi Huwe Jinpar (Roohaani) Fana Aur Sukr (Be Khudi) Ki Aisi Haalat Taari Ho Jaati Thi Jisse Unki Quwwat e Tameez (Saheeh Wa Galat Me'n Farq Karne Ki Salaahiyat) Kamzor Pad Jaati Thi, Yahaa'n Tak Ke Woh Uss Haalat Me'n Aisi Baate'n Keh Jaate The Ke Jab Woh Hosh Me'n Aate (Sahw Ki Haalat Me'n Hote) To Unhe'n Khud Andaazah Ho Jaata Tha Ke Woh Usme'n Galati Par The, Jaisa Ke Iss Tarah Ki Baate'n Abu Yazeed (Bustaami), Abul Husain Al Noori Aur Abu Bakar Al Shibli Aur In Jaise Deegar Hazraat Se Marwiyaat Me'n Milti Hai'n, Bar'aks Iske, Abu Sulemaan Al Daaraani, Ma'roof Al Karkhi, Fuzail Bin Ayaaz, Balke Imaam Junaid (Bagdaadi) Aur Un Jaise Deegar Akaabireen Ka Mu'aamla Mukhtalif Tha, Kyu'nke Inki Aqle'n Aur Quwwat e Tameez Unke (Roohaani) Ahwaal Me'n Bhi Unke Saath Rehti Thee'n, Isliye Woh Iss Qism Ki Fana, Sukr (Be Khudi) Aur Iss Jaisi Haalato'n Ka Shikaar Nahee'n Hote The. (Majmoo'ah Al-Fatawa, Jilld No.10,Safha No.220-221, Naashir Mamlekatul Arabiyah As Saoodiyah)
Wahaabiyo'n Ke Imaam Wa Allaama Ibne Taimiya Ki Iss Ibaarat Se Waazeh Hai Ke Allaah Ke Waliyo'n Par Kabhi Kabhi Be Khudi Ki Kaifiyat Taari Hoti Hai Aur Uss Haalat Me'n Unse Shat'hiyaat Ka Zahoor Ho Jaata Hai Aur Upar Dalaa'il Likh Chuka Hoo'n Ke Aisi Haalat Me'n Saadir Hone Waale Kalmaat Ki Taaweel Ki Jaayegi Jahaa'n Tak Mumkin Ho Aur Taaweel Mumkin Na Ho Tab Bhi Qaa'il Par Hukm e Kufr Wa Gumraahi Nahee'n Lagaaya Jaayega.
Isi Tarah Wahaabiyo'n Ke Imaam Wa Allaama Ibne Taimiya Apni Kitaab Me'n Ek Jagah Aur Likhte Hai'n,
Tarjuma :- Pas Woh Iss Haalat Me'n Keh Uthte Hai'n "Mai'n Haq Hoo'n" Ya "Meri Paaki Ho" Ya "Jubbe Me'n Allaah Ke Siwa Kuchh Nahee'n" Aur Iss Jaise Deegar Kalmaat, Jabke Woh Mohabbat Ke Uss Wajd Me'n Magloobul Haal (Mast) Hote Hai'n Jo Ke Bagair Kisi Quwwat e Tameez (Hosh Wa Hawaas) Ke Mahez Lazzat Aur Suroor Ki Ek Haalat Hoti Hai. (Majmoo'ah Al-Fatawa, Jild No.2, Safha No.396, Naashir Sa'oodi Arabiya)
Mazeed Ek Jagah Likha Hai,
Tarjuma :- Lekin Ba'az Saahib e Ahwaal Logo'n Ko (Roohaani) Fana e Qaasir (Mehdood Fana) Ki Haalat Me'n Sukr (Be Khudi) Aur Maasiwa (Allaah Ke Siwa Har Cheez) Se Gaibat (Be Khabri) Laaheq Ho Jaati Hai, Aur Yeh Sukr Aqal Wa Tameez Ke Bagair Hi Paaya Jaata Hai, Chunaanche Woh Iss Haalat Me'n Keh Baithta Hai "Meri Paaki Ho" Ya "Jubbe Me'n Allaah Ke Siwa Kuchh Nahee'n" Ya'ni Iss Jaise Deegar Kalmaat, Jo Abu Yazeed Bustaami Ya In Jaise Deegar Saaleheen (Jo Aa'm Haalaat Me'n Bilkul Durust Aqal Wa Sehat Rakhte Hai'n) Se Manqool Hai'n, Aur Aise Magloobul Haal (Be Khud) Shakhs Ke Kalmaat Ko Lapet Diya Jaata Hai (Ya'ni Unse Darguzar Kiya Jaata Hai), Unhe'n (Daleel Ke Taur Par) Aage Riwaayat Nahee'n Kiya Jaata Aur Na Hi (Sharee'at Me'n) Pesh Kiya Jaata Hai, Bashart Yeh Ke Uski Yeh Be Khudi Kisi Mamnoo'ah Ibaadat Ya Kisi Aise Tareeqe Ki Wajah Se Na Ho Jisse Shar'an Mana Kiya Gaya Ho, Lekin Agar (Uss Be Khudi Ka) Sabab Hi Koi Mamnoo'ah Kaam Ho, To Phir Woh Be Khud Shakhs Ma'zoor Nahee'n Maana Jaayega, Aur Iss Mu'aamle Me'n Jismaani Sukr (Nashe) Aur Roohaani Sukr (Be Khudi) Ke Darmiyaan Koi Farq Nahee'n Hai, Kyu'nke Jismo'n Ka Sukr (Nasha) Khaane Aur Peene (Sharaab Wagairah) Se Hota Hai, Nafs Ka Sukr (Khoobsurat Wajaahat Waali) Soorato'n Se Hota Hai, Aur Rooho'n Ka Sukr (Wajd Aafree'n) Aawaazo'n Aur Nagmo'n Se Hota Hai. (Majmoo'ah Al-Fatawa, Jilld No.02, Safha No.461, Naashir Mamlekatul Arabiyah As Saudiyah)
Wahaabiyo'n Ke Imaam Wa Allaama Ibne Taimiya Ki Mazkoorah Baala Ibaaraat Se Waazeh Hai Ke Buzrogo'n Se Shat'hiyaat Saadir Huwe Hai'n Be Khudi Me'n Jaise Hazrat Ba Yazeed Bustaami Alaihir Rehma Wagairah Me'n Jo Wahaabiyo'n Ke Imaam Wa Allaama Ke Nazdeek Saaleheen Me'n Se Hai'n.
Isi Tarah Wahaabiyo'n Ke Imaam Wa Allaama Ibne Taimiya Apni Kitaab Me'n Ek Jagah Aur Likhte Hai:
Tarjuma :- Jaisa Ke Ba'az Aashiqo'n Ke Saath Pesh Aata Hai Ke Woh Apne Ma'shooq (Ki Mohabbat) Me'n Iss Tarah Garq Ho Jaate Hai'n Ke Maasiwa Se Bilkul Gaa'ib (Be Khabar) Ho Jaate Hai'n, Chunaanche Unme'n Se Koi Uss Haalat Me'n Keh Uthta Hai "Mai'n Hi Haq Hoo'n" Ya "Meri Hi Paaki Ho" Ya "Jubbe Me'n Allaah Ke Siwa Kuchh Nahee'n" Aur Inhi Soofiya Me'n Se Kuchh Log Woh Bhi Hai'n Jinpar (Allaah Ki) Rehmat Aur Rija (Ummeed) Ka Haal Iss Qadar Gaalib Aa Gaya Ke Unho'n Ne Keh Diya, Mai'n Jahannam Par Apna Musalla (Jaaye Namaaz) Bichha Doo'nga, Pas Jis Kisi Ne Yeh Baate'n Aqal Zaa'il Ho Jaane (Kho Baithne) Ki Haalat Me'n Kahi Ho'n, Iss Taur Par Ke Woh Kisi Magloobul Haal (Mast) Ya Ishq Me'n Be Khud Wa Mad'hosh Shakhs Ki Tarah Ho Chuka Ho, Aur Woh Sabab Jiski Wajah Se Yeh Haalat Paida Huwi Woh Sharayi Taur Par Mamnu Na Ho, To Uss Shakhs Par Koi Gunaah Nahee'n Hai. (Majmoo'ah Al-Fataawa, Jilld No.10, Safha No.350, Naashir Mamlekatul Arabiyah As Saudiyah)
Wahaabiyo'n Ke Imaam Wa Allaama Ibne Taimiya Ki Mazkoorah Baala Ibaarat Se Waazeh Hai Ke Buzrogo'n Se Shat'hiyaat Saadir Huwi Hai'n Be Khudi Me'n, Jaise Hazrat Ba Yazeed Bustaami Alaihir Rehma Wagairah Me'n Lekin Shat'hiyaat Choo'nke Galba e Haal Be Khudi Me'n Saadir Hote Hai'n Lehaaza Unpar Fatwa Nahee'n Lagaaya Jaayega.
Imaam Asma Wa Rijaal Allaama Zahbi (Wafaat 748 Hijri) Apni Kitaab Me'n Ek Jagah Likhte Hai'n,
Tarjuma :- Mai'n (Zahbi) Kehta Hoo'n, Isi Tarah (Abu Abdul Rahmaan) Sulami Par Unki Kitaab "Haqaa'iqut Tafseer" Ki Tasneef Ki Wajah Se Ilmi Kalaam (Tanqeed) Kiya Gaya, Kaash Ke Unho'n Ne Yeh Kitaab Tasneef Hi Na Ki Hoti, Pas Ham Allaah Ki Panaah Maa'ngte Hai'n Halaaji Ishaaro'n (Mansoor Hallaaj Ke Soofiyaana Nazariyaat) Bustaami Shat'hiyaat (Ba Yazeed Bustaami Ke Mad'hoshaana Kalmaat) Aur Ittehaadiyo'n (Wehdatul Wajood Ke Qaa'ileen) Ke Tasawwuf Se, Haaye Afsos ! Islaam Aur Sunnat Ki Iss Gurbat (Be Kasi Wa Tanhaayi) Par. (Siyar Aa'lamun Nubala"l, Jilld No.13, Safha No.442, Naashir Mo'assesatur Resaalah)
Zaroori Note :- Imaam Zahbi Ki Iss Ibaarat Se Ma'loom Huwa Ke Kalmaat e Shat'hiyaat Ko Galat Kaha Ja Sakta Hai Lekin Jin Buzrogo'n Se Kalmaat e Shat'hiyaat Manqool Hai'n Un Soofiya e Kiraam Par Koi Fatwa Nahee'n Lagaaya Jaata, Tabhi Imaam Zahbi Ne Bhi Nahee'n Lagaaya Balke Imaam Zahbi Ne Hazrat Ba Yazeed Bustaami Alaihir Rehma Ke Muta'alliq Kya Likha Mulaaheza Farmaaye'n,
Imaam Zahbi Likhte Hai'n,
Tarjuma :- Abu Yazeed Bustaami Taifoor Bin Isa Aa'rifeen Ke Sultaan, Abu Yazeed Taifoor Bin Isa Bin Saroshaar Bustaami, (Apne Waqt Ke) Bade Zaahido'n Me'n Se Ek The, Aur 2 Zaahid Bhaa'iyo'n, Aadam Aur Ali Ke Bhaayi The, Unke Dadaa Sharoshaan Majoosi (Aatish Parast) The, Phir Woh Islaam Le Aaye. (Siyar Aa'lamun Nubala, Jild No.13, Safha No.86, Tabqa 14 Se 16, Naashir Mo'assasatur Risaala)
Mazeed Aage Likhte Hai'n,
Tarjuma :- In (Ba Yazeed Bustaami) Se Iss Tarah Ke Kayi Khoobsurat Aur Lateef Nukaat (Hikmate'n) Bhi Manqool Hai'n, Aur Unse Kuchh Aisi Pecheedah Aur Mushkil Baate'n Bhi Marwi Hai'n Jinki (Sharee'at Me'n) Koi Gunjaa'ish Nahee'n Hai, Ab Asal Mu'aamla (Ya Haqeeqat e Haal) Yeh Hai Ke, Ya To Yeh Baate'n Unse Saabit Hi Nahee'n Hai'n, Ya Phir Unho'n Ne Yeh Baate'n Mad'hoshi, (Shauq e Ilaahi Ke) Sukr, Gaibat (Be Khudi) Aur Mahw (Fana Fillaah) Ki Haalat Me'n Kahi Ho'ngi, Lehaaza Aisi Baato'n Ko Lapet Kar Rakh Diya Jaayega (Unpar Khaamoshi Ikhtiyaar Ki Jaayegi) Aur Unse (Deen Me'n) Koi Hujjat (Daleel) Nahee'n Li Jaayegi, Kyu'nke Unka Zaahiri Ma'ni Ilhaad (Aur Kufr) Hai, Jaise Ke (Unka Yeh Kehna), Meri Zaat Paak Hai, (Sub'haani) Aur Iss "Jubbe Me'n Allaah Ke Siwa Koi Nahee'n Hai".
Mazeed Aage Likhte Hai'n,
Tarjuma :- (Abu Abdur Rahmaan) As Sulami Ne "Taareekhus Soofiyah" Me'n Kaha Hai, Abu Yazeed (Bustaami) Ne Tihattar (73) Saal Ki Umar Me'n Wafaat Paayi, Aur Mu'aamlaat (Zohad Wa Taqwa Aur Akhlaaqiyaat) Ke Baare Me'n Unka Kalaam Bahot Khoobsurat Hai,
Phir Unho'n Ne (As Sulami Ne) Kaha, Aur Unse "Shatah" (Wajdaani Be Khudi Ke Kalmaat) Me'n Kuchh Aisi Cheeze'n Bhi Hikaayat Ki Jaati Hai'n Jinme'n Se Ba'az (Sire Se) Saabit Hi Nahee'n Hai'n, Ya (Jhoot Moot) Unke Naam Thop Di Gayi Hai'n, Jabke Woh (Haqeeqat Me'n) Buland Paaya Aur Umdah Ahwaal Ke Maalik The. (Siyar Aa'lamun Nubla, Jilld No.13, Safha No.89, Naashir Mo'assesatur Risaalah)
Imaam Zahbi Ki Mazkoorah Baala Ibaaraat Se Waazeh Aur Saaf Hai Ke Hazrat Ba Yazeed Bustaami Alaihir Rehma Jinki Taraf Shat'hiyaat Mansoob Hai'n Unme'n Ba'az Saabit Hi Nahee'n Aur Kuchh Ko Saabit Bhi Maana Jaaye To Fatwa Nahee'n Lagega Kyu'nke Yeh Sab Shat'hiyaat Be Khudi Ke Aa'lam Me'n Saadir Huwe Hai'n Tabhi Imaam Zahbi Ke Nazdeek Hazrat Ba Yazeed Bustaami Alaihir Rehma Umdah Ahwaal Ke Maalik The.
Imaam Jalaaluddeen Suyooti (Wafaat 911 Hijri) Apni Kitaab Me'n Likhte Hai'n,
Tarjuma :- Unho'n Ne Farmaaya, Aur Jahaa'n Tak Abu Yazeed Bustaami Ke Iss Qaul Ka Ta'alluq Hai Ke "Meri Paaki Ho Meri Shaan Kis Qadar Buland Hai " To Yeh Allaah Paak Ki Taraf Se Hikaayat (Ya'ni Allaah Ka Kalaam Naqal Karne) Ke Andaaz Me'n Hai, Aur Isi Tarah Jis Shakhs (Ya'ni Hazrat Mansoor Hallaaj) Ne "Mai'n Hi Haq Hoo'n" Kaha, Uska Qaul Bhi Hikaayat Par Mehmool Hai (Ke Woh Galba e Haal Me'n Allaah Paak Ka Kalaam Dohra Rahe The) Aur In Aa'rifeen Billaah Ke Baare Me'n Hulool Aur Ittehaad (Zaati Taur Par Khuda Ki Zaat Ke Saath Ek Ho Jaane) Ka Gumaan Tak Nahee'n Kiya Ja Sakta, Kyu'nke Iss Tarah Ka Baatil Aqeedah To Kisi Aa'm Aqalmand Shakhs Ke Baare Me'n Bhi Farz Nahee'n Kiya Jaa Sakta, Cheh Jaayeke In Hastiyo'n Ke Baare Me'n Jo Makhsoos Mukaashifaat, Yaqeen Aur (Roohaani) Mushaahedaat Ke Aa'la Martabe Par Faa'iz Ho'n, Aur Aise Aqal Mando'n Ke Baare Me'n Hulool Aur Ittehaad Ki Galati Ka Gumaan Bhi Nahee'n Kiya Ja Sakta, Jo Apne Zamaane Ke Logo'n Me'n Apne Ilm e Raajeh (Afzal Ilm), Amal e Saaleh, Mujaahedah Aur Hudood e Sharee'at Ki Sakht Hifaazat Karne Me'n Mumtaaz Wa Numaayaa'n The. (Al-Haawi Lil Fataawa, Jilld No.02, Safha No.161, Naashir Daarul Fikr Bairoot)
Imaam Jalaaluddeen Suyooti Alaihir Rahma Ki Ibaarat Se Waazeh Hai Ke Buzrogaan e Deen Se Jo Shat'hiyaat Saadir Huwe Hai'n Unki Jahaa'n Tak Mumkin Ho Taaweel Ki Jaaye Jaisa Ke Khud Allaama Jalaaluddeen Siyuti Alaihir Rahma Ne Taaweel Pesh Ki Aur Taaweel Na Ho Sake To Bhi Un Buzrogo'n Par Fatwa Nahee'n Lagega Balke Un Buzrogo'n Ki Azmat Tasleem Ki Jaayegi.
Nooruddeen Ibne Burhaanuddeen (Wafaat 1044 Hijri) Apni Kitaab Me'n Likhte Hai'n,
Tarjuma :- Aur Ba'az Aa'rifeen, Ya'ni Abu Yazeed Bustaami Ka Yeh Qaul, Meri Zaat Paak Hai, Meri Shaan Kitni Azeem Hai, Aur Unka Yeh Farmaana, "Beshak Mai'n Hi Allaah Hoo'n, Mere Siwa Koi Ma'bood Nahee'n, Pas Meri Hi Ibaadat Karo", Aur Unka Yeh Qaul, "Mai'n Hi Apne Rab Ka Buland Tareen Maqaam Hoo'n", Aur "Mai'n Haq Hoo'n, Aur Woh Mai'n Hai, Aur Mai'n Woh Hoo'n",
Yeh Tamaam Aqwaal Hulool (Khuda Ka Bande Ki Zaat Me'n Sama Jaana) Ke Da'we Se Koi Ta'alluq Nahee'n Rakhte, Balke Inka Yeh Kehna Ke, "Meri Zaat Paak Hai, Beshak Mai'n Hi Allaah Hoo'n", Hikaayat (Bataur e Naqal e Qaul) Par Mehmool Hai, Ya'ni Unho'n Ne Yeh Baat Haq Ta'aala Ki Zabaan Se (Allaah Ki Taraf Se Hikaayat Karte Huwe) Kahi Hai, Bilkul Isi Tarah Jaise Hadees e Paak Me'n Aata Hai, "Allaah Ne Apne Bande Ki Zabaan Par Farmaaya, Allaah Ne Uski Sunli Jisne Uski Ta'reef Ki (Sami Allaahu Liman Hamidah), "Aur Unka Yeh Kehna Ke "Mai'n Apne Rab Ka Buland Tareen Maqaam Hoo'n" Aur "Mai'n Haq Hoo'n" Wagairah, To Unho'n Ne Yeh Isliye Kaha Kyu'nke Unka Sulook (Roohaani Safar) Allaah Paak Tak Paho'nch Chuka Tha, Jahaa'n Woh Tauheed Ke Samandar Me'n Iss Tarah Garq Ho Gaye Ke Allaah Paak Ke Siwa Har Cheez Se Gaa'ib (Be Khabar) Ho Gaye, Ab Unhe'n Kaa'inaat Me'n Allaah Paak Ke Siwa Kuchh Dikhaayi Hi Na Deta Tha, Yeh Dar Asal "Maqaam e Fana" Nafs Ko Mitaane, Poora Mu'aamla Allaah Paak Ke Supurd Karne, Aur Apni Marzi Wa Ikhtiyaar Ko Tark Kar Dene Ka Maqaam Hai, Pas Aa'rif Jab Iss Maqaam Par Paho'nchta Hai, To Basa Auqaat Uske Alfaaz Uss Kaifiyat (Haal) Ko Bayaan Karne Se Qaasir Reh Jaate Hai'n Jo Uspar Taari Hoti Hai, Chunaanche Uski Zabaan Se Aisi Ibaaraat Saadir Ho Jaati Hai'n Jinse (Bazaahir) Hulool Ka Wahem Paida Hota Hai. (Seerat e Halbiya, Jild No.01, Safha No.363/364, Naashir Daarul Kutubul Ilmiyah Bairoot)
Seerat e Halbiya Ki Iss Ibaarat Se Bhi Waazeh Aur Saaf Hai Ke Buzrogaan e Deen Se Jo Shat'hiyaat Saadir Huwe Hai'n Unme'n Taaweel Ki Jaaye Lekin Un Shat'hiyaat Ko Galat Ma'ni Me'n Mehmool Karke Un Buzrogaan e Deen Par La'an Ta'an Nahee'n Karna Chaahiye.
Isi Tarah "Chishty Rasoolullaah" Waala Waaqe'ah Bhi Hai Jisme'n Hazrat Khwaaja Gareeb Nawaaz Alaihir Rehma Apni Khaas Haalat Me'n The Aur Unho'n Ne Apna Kalma Padhwaaya, Lekin Uske Fauran Ba'ad Jab Unki Khaas Haalat Jaati Rahi To Phir Unho'n Ne Kaha Ke Mai'n To Rasoolullaah ﷺ Ka Gulaam Hoo'n, Yeh Waaqe'ah Bhi Shat'hiyaat Par Mabni Hai, Iss Waaqe'ah Ko Lekar Hazrat Khwaaja Gareeb Nawaaz Moinuddeen Chishty Alaihir Rehma Par Koi Fatwa Nahee'n Lagega.
By Alahazrat Foundation Research Team - 7710809266/9892708816
