Sureh Maa'idah, Aayat No.6
Tarjuma :- Agar Tum Junubi (Be Gusl) Ho To Khoob Paak Ho Jaao.
Bukhaari Shareef, Hadees No.276
Tarjuma :- Hazrat Maimoona Radiallaahu Anha Ne Bayaan Kiya Ke Mai'n Ne Nabi e Kareem ﷺ Ke Gusl Keliye Paani Rakha, Phir Mai'n Ne Nabi e Kareem ﷺ Par Ek Kapde Se Satar Kiya (Pardah Kiya) Aur Nabi e Kareem ﷺ Ne Apne Dono'n Haatho'n Par Paani Bahaaya, Phir Unko Dhoya, Phir Apne Daaye'n Haath Se Baaye'n Haath Par Paani Daala, Phir Apni Sharmgaah Ko Dhoya, Phir Apna Haath Zameen Par Maara, Phir Usko Mala, Phir Usko Dhoya , Phir Kulli Ki Aur Naak Me'n Paani Daala, Aur Apne Chehre Ko Aur Apni Kalaa'iyo'n Ko Dhoya, Phir Apne Sar Par Paani Daala, Aur Apne Poore Jism Par Paani Bahaaya, Phir Ek Taraf Gaye Aur Apne Dono'n Pairo'n Ko Dhoya, (Phir) Mai'n Ne Nabi e Kareem ﷺ Ko Tauliya Diya, Aapne Usko Nahee'n Liya Aur Chale Gaye Aur Aap Apne Dono'n Haatho'n Ko Jhaad Rahe The.
Gusl Ke Faraa'iz :- Gusl Ke 3 Faraa'iz Hai'n (1) Kulli Karna (2) Naak Me'n Paani Daalna (3) Poore Jism Par Paani Bahaana Ke Jism Ka Koi Bhi Hissa Sookha Nahee'n Rehna Chaahiye Warna Gusl Nahee'n Hoga.
Gusl Ki Sunnate'n :- (1) Gusl Ki Niyat Karna (2) Dono'n Kalaa'iyo'n Tak Haath Dhona (3) Sharmgaah Ki Jagah Ko Dhona (4) Badan Pe Jahaa'n Kahee'n Najaasat (Gandagi) Ho Usko Dhona (5) Namaaz Jaisa Wazu Karna (6) Badan Par Tel Ki Tarah Paani Malna (7) 3 Martaba Seedhe Kaa'ndhe Par Paani Bahaana (8) 3 Baar Ulte Kaa'ndhe Par Paani Bahaana (9) Sar Aur Tamaam Badan Par 3 Baar Paani Bahaana (10) Gusl Karte Waqt Qible Ki Jaanib Chehra Ya Peeth Na Karna (11) Poore Jism Par Haath Malna (12) Aisi Jagah Gusl Karna Jahaa'n Koi Na Dekhe (13) Gusl Karte Waqt Baat Na Karna Aur Na Koi Du'aa Padhe'n (14) Gusl Karne Ke Ba'ad Pairo'n Ko Dhoye.
Gusl Kin Cheezo'n Se Farz Hota Hai :- (1) Mani (Sperm) Ka Apni Jagah Se Shehwat Ke Saath Juda Hokar Nikalna (2) Ahtelaam Ya'ni Sone Ke Ba'ad Utha Aur Jism Ya Kapde Ko Geela Paaya Aur Use Yaqeen Ho Ke Yeh Mani (Gaadhi) Hai To Gusl Waajib Hai (3) Hashfa Ya'ni Uzwe Tanaasul Ke Upari Hisse Ka Aurat Ya Mard Ke Aage Ya Peeche Daakhil Hone Se Gusl Waajib Hota Hai Shehwat Ke Saath Ho Ya Bagair Shehwat Ke (4) Haiz (Period) Khatam Hone Ke Ba'ad Gusl Waajib Hota Hai (5) Nifaas (Delivery Ke Ba'ad Jo Khoon Aata Hai Uske Ba'ad Gusl Waajib Hai)
Agar Aapko Koi Cheez Samajh Me'n Nahee'n Aayi Hai To Aap "Sunni Call Centre" Me'n Call Karke Pooch Sakte Hai'n.
Maulaana Jaami Husain Azhari
Mobile No. 7710809266
Farooque Raza Qadri
Mobile No. 9892708816
By Alahazrat Foundation Research Team
