Sadiyo'n Se Musalmaan Jum'ah Ke Din Qabrastaan Jaate Hai'n Aur Wahaa'n Par Qur'aan, Zikr Wa Azkaar Karke Isaale Sawaab Karte Hai'n, Lekin Kuchh Log Kehte Hai'n Ke Jum'ah Ke Din Qabrastaan Jaana Bid'at Hai Jabke Woh Log Ilm Nahee'n Rakhte, Aa'iye Ham Aapko Daleel Dete Hai'n Padhiye Aur Share Kariye.
Hazrat Muhammad Bin No'maan Ne Yeh Hadees Marfoo'an Bayaan Ki Ke Nabi e Kareem ﷺ Ne Irshaad Farmaaya Ke Jis Shakhs Ne Har Jum'ah Ke Din Apne Waalidain Ya Unme'n Se Kisi Ek Ki Qabar Ki Ziyaarat Ki, Uski Magferat Kardi Jaayegi Aur Use (Waalidain Ke Saath) Bhalaayi Karne Waala Likh Diya Jaayega. (Sho'bul Imaan Lil Bayhaqi, Jild No.10, Safha No.297, Hadees No.7522, Naashir Maktaba Rushd, Mumbai & Mirqaatul Mafaateeh Sharah Mishkaatul Masaabeeh, Kitaabul Janaa'iz, Baab Ziyaaratul Quboor, Jild No.4, Safha No.1259, Hadees No.1768, Naashir Daarul Fikr Bairoot Libnaan)
Hazrat Ali Bin Husain (Imaam Zainul Aa'bideen Radiallaahu Anhu) Apne Waalid (Imaam Husain Radiallaahu Anhu) Se Riwaayat Karte Hai'n Ke Allaah Ke Nabi ﷺ Ki Saahabzaadi Hazrat Faatema Radiallaahu Anha Har Jum'ah Ko Apne Chacha Hazrat Hamzah Radiallaahu Anhu Ki Qabar Ki Ziyaarat Farmaati Thee'n, Pas Woh Wahaa'n (Namaaz/Du'aa) Padhtee'n Aur Wahaa'n Roti Thee'n. (As-Sunanul Kubra Lil Bayhaqi, Kitaabul Janaa'iz, Abwaabul Buka, Jild No.4, Safha No.131, Hadees No.7208, Naashir Daarul Kutubul Ilmiyah Bairoot Libnaan)
Tashreehi Nukaat :-
Namaaz Padhna :- Yahaa'n Namaaz Se Muraad Janaazah Ki Namaaz Nahee'n Balke, Du'aa, Astagfaar Aur Isaale Sawaab Ke Nawaafil Hai'n, Kyu'nke Qabrastaan Me'n Allaah Ki Raza Keliye Namaaz Padh Kar Uska Sawaab Mayyat Ko Bakhashna Jaa'iz Hai.
Rona :- Isse Muraad Woh Rona Hai Jo Insaani Fitrat Ke Tahet Gam Ki Wajah Se Ho, Na Ke Waawela Karna, Kyu'nke Hazrat Faatema Radiallaahu Anha Ka Amal Sabar Aur Raza Ke Daayere Me'n Tha.
Har Jum'ah :- Yeh Lafz Iss Baat Ki Daleel Hai Ke Aap Radiallaahu Anha Ne Iss Amal Keliye Jum'ah Ke Din Ka Intekhaab Farma Rakha Tha Aur Uspar Madaawmat (Paabandi) Farmaati Thee'n Lehaaza Hazrat Faatema Radiallaahu Anha Ke Amal Se Bhi Jum'ah Mubaarak Ke Din Qabrastaan Jaane Ka Amal Saabit Huwa Jo Ke Ummat e Muslima Keliye Kaafi Hai.
By Alahazrat Foundation Research Team - 7710809266/9892708816
