Kashf Aur Ilhaam Kise Kehte Hai'n?
To Jaan Leejiye Ke Kashf Aur Ilhaam Ki Ta'reef Ka Khulaasa Yeh Hai,
Kashf :- Woh Noor Hai Jo Dil Me'n Zaahir Hota Hai Aur Iske Zariye Haqaa'iq Munkashif (Khul) Ho Jaate Hai'n.
Ilhaam :- Uss Nek Khayaal Ya Saheeh Baat Ko Kehte Hai'n Jo Allaah Paak Bande Ke Dil Me'n Daal De, Bagair Iske Ke Woh Nabi Ho Ya Uspar Wahi Naazil Hoti Ho.
(Risaala Qushairiya, Safha No.176, Ahyaa'ul Uloom, 3/38)
Tamaam Makaatib e Fikr Iss Baat Ko Maante Hai'n Ke Kashf Aur Ilhaam Bar Haq Hai, Ahle Sunnat Wa Jamaa'at Ise Maante, Deobandiyo'n Ne Ba Qaa'idah Iss Mauzu Par Kitaabe'n Likhi Hai'n, Ahle Tashayyu Bhi Ise Maante Hai'n, Raha Masla Gair Muqallideen Aur Wahaabiyo'n Ka, To Iss Silsile Me'n Unke Muqtada Aur Peshwa Ibne Taimiya Ka Hawaala Pesh Kiya Jaata Hai, Ibne Taimiya Ki Kitaab "Aqeedatul Waastiya" Ke Safha No.161 Aur 162 Par Ahle Sunnat Wa Jamaa'at Ke Usool Zikr Karte Huwe Likhta Hai Ke, Ahle Sunnat Ke Usoolo'n Me'n Se Yeh Usool Hai Ke Woh Auliya Allaah Ki Karaamaat Ki Tasdeeq Karte Hai'n, Aur Allaah Rabbul Izzat Ne Auliya Allaah Ke Haatho'n Jo Khwaariq e Aa'daat Jaari Farmaayi Hai'n Unki Bhi Tasdeeq Karte Hai'n, Jaise Mukaashifaat, Qudrat Aur Taaseer Ke Qabeel Se Jo Karaamaat Auliya Allaah Se Saadir Hoti Hai'n.
Ibne Taimiya Ne Aqeedatul Waastiya Ke Alaawah Apni Kitaab "Majmu'ah Al-Fataawa" (Jild No.11, Baab Tasawwuf) Me'n Bhi Kashf, Ilhaam, Mukaashifa Aur Mukhaataba Ki Tafseel Bayaan Ki Hai, Aur Waazeh Kiya Hai Ke Yeh Sab Bar Haq Hai'n, Iss Silsile Me'n Unho'n Ne Qur'aan e Majeed Ki Aayaat e Tayyabaat Aur Saheeh Bukhaari Wa Saheeh Muslim Ki Ahaadees Se Dalaa'il Bhi Pesh Kiye Hai'n Ke Allaah Rabbul Izzat Gair Ambiya Ko Bhi Bataur e Karaamat Yeh Shaan Ata Farmaata Hai Ke Unke Dil Me'n Ilhaam Farmaata Hai Aur Unpar Ba'az Haqaa'iq Munkashif Farma Deta Hai, Jise Kashf Aur Ilhaam Kaha Jaata Hai.
Saabeqa Ummato'n Ke Auliya Aur Nek Afraad Par Bhi Allaah Paak Ne Ilhaam Farmaaya Aur Unhe'n Kashf Ki Daulat Ata Ki, Jaisa Ke Qur'aan e Majeed Me'n Iska Waazeh Zikr Maujood Hai.
Chunaanche Sureh Qasas Me'n Allaah Paak Irshaad Farmaata Hai,
Tarjuma:- "Aur Hamne Moosa Ki Maa'n Ko Ilhaam Farmaaya Ke Use Doodh Pila, Phir Jab Tujhe Usse Andesha Ho To Use Dariya Me'n Daal De Aur Na Darr Aur Na Gam Kar, Beshak Ham Ise Teri Taraf Phair Laaye'nge Aur Use Rasool Banaaye'nge". (Sureh Qasas, Aayat No.7)
Isi Tarah Sureh Maa'idah Me'n Farmaaya,
Tarjuma:- "Aur Jab Mai'n Ne Hawaariyo'n Ke Dil Me'n Daala Ke Mujh Par Aur Mere Rasool Par Imaan Laao, To Bole Ham Imaan Laaye Aur Gawaah Reh Ke Ham Musalmaan Hai'n". (Sureh Maa'idah, Aayat No.111)
Aur Sureh Nahal Me'n Irshaad Farmaaya,
Tarjuma :- "Aur Tumhaare Rab Ne Shahed Ki Makkhi Ko Ilhaam Kiya Ke Pahaado'n Me'n Ghar Bana, Aur Darakhto'n Me'n Aur Chhato'n Me'n". (Sureh Nahal, Aayat No.68)
Isi Tarah Hazrat Mariyam Alaihissalaam Ke Baare Me'n Sureh Aale Imraan Me'n Farmaaya,
Tarjuma :-"Aur Jab Farishto'n Ne Kaha, Aye Mariyam Beshak Allaah Ne Tujhe Chun Liya Aur Khoob Suthra Kiya Aur Aaj Saare Jahaa'n Ki Aurato'n Se Tujhe Pasand Kiya". (Sureh Aale Imraan, Aayat No.42)
Aur Sureh Hood Me'n Hazrat Ibraaheem Alaihissalaam Ki Ahliya Ka Waaqe'ah Bayaan Farmaaya Gaya.
Tarjuma:- Aur Uski Beewi Khadi Thi Woh Ha'nsne Lagi To Hamne Use Is'haaq Ki Khushkhabri Di Aur Is'haaq Ke Peechhe Ya'qoob Ki, Boli Haaye Kharaabi Kya Mere Bachcha Hoga Aur Mai'n Boodhi Hoo'n Aur Yeh Hai'n Mere Shauhar Boodhe Beshak Yeh To Achambhe Ki Baat Hai, Farishte Bole Kya Allaah Ke Kaam Ka Achambha Karti Ho Allaah Ki Rehmat Aur Uski Barkate'n Tum Par Aye Uss Ghar Waalo Beshak Wohi Hai Sab Khoobiyo'n Waala Izzat Waala. (Sureh Hood, Aayat No.71 Ta 73)
Ab Sawaal Yeh Paida Hota Hai Ke Hazrat Moosa Alaihissalaam Ki Waalidah Ko Wahi Ki Gayi, Hazrat Mariyam Alaihissalaam Ke Paas Farishte Aaye, Aur Hazrat Isa Alaihissalaam Ke Hawaariyo'n Ko Bhi Wahi Ki Gayi To Kya Yeh Wahi, Wahi e Nabuwwat Thi? Agar Yeh Wahi e Nabuwwat Hoti To Woh Sab Nabi Hote, Haalaa'nke Aisa Nahee'n Hai.
Kashf Aur Ilhaam Ka Saboot Qur'aan Wa Sunnat Se Maujood Hai, Aur Kashf Ko Deobandi Maante Hai'n, Wahaabi Maante Hai'n, Ahle Sunnat Wa Jamaa'at Maante Hai'n, Ahle Tashayyo Maante Hai'n, Algarz Tamaam Makaatib e Fikr Kashf Aur Ilhaam Ke Qaa'il Hai'n, Lekin Ba'az Log Ise Khatme Nabuwwat Par Daaka Zani Qaraar Dekar Khatme Nubuwwat Ke Mukhaalif Aur Aynti Masla Banaakar Pesh Karte Hai'n, Haalaa'nke Qur'aan e Paak Se Iske Dalaa'il Maujood Hai'n (Jaisa Ke Upar Zikr Huwa).
Neez Ahaadees e Tayyaba Me'n Nabi e Paak ﷺ Ne Apni Ummat Ko Iss Mu'aamle Me'n Ba Khabar Farmaaya Hai, Isse Pehle Ke Mai'n Ahaadees Aapke Saamne Pesh Karu'n, Yeh Baat Zahen Nasheen Rahe Ke Jaisa Ke Ibteda Me'n Arz Kiya Gaya, Saabeqa Ummato'n Ke Auliya Par Allaah Rabbul Izzat Ki Taraf Se Jo Ilhaam Huwa, Woh Ilhaam e Nabuwwat Nahee'n Tha, Agar Woh Ilhaam Wahi e Nabuwwat Qaraar Diya Jaaye To Laazim Aayega Ke Woh Sab Nabi Thehre'n, Haalaa'nke Ham Unhe'n Nabi Nahee'n Maante, Jaise Hazrat Moosa Alaihissalaam Ki Waaledah, Hazrat Isa Alaihissalaam Ke Hawaari, Aur Hazrat Mariyam Alaihissalaam, In Sabke Paas Farishte Aaye Aur Allaah Paak Ne Inhe'n Ilhaam Farmaaya, Magar Woh Nabi Nahee'n Hai'n.
Isse Ma'loom Huwa Ke Auliya Ko Hone Waala Ilhaam, Nubuwwat Nahee'n Hota, Wahi e Nabuwwat Aur Ilhaam Me'n Waazeh Faraq Hai.
Wahi e Nabuwwat Qatayi Hoti Hai, Jabke Ilhaam Zanni Hota Hai,
Wahi e Nabuwwat Ki Tableeg Nabi Par Farz Hai, Jabke Ilhaam Ko Logo'n Tak Paho'nchaana Farz Nahee'n,
Wahi e Nabuwwat Ka Inkaar Kufr Hai, Jabke Ilhaam Ka Inkaar Kufr Nahee'n,
Wahi e Nabuwwat Sharee'at Wa Ahkaam Ke Akhaz Ka Zariya Hai, Jabke Ilhaam Wa Kashf Ahkaam Seekhne Ka Zariya Nahee'n.
Agar Kisi Ko Kashf Ya Ilhaam Ho To Use Kitaab Wa Sunnat Par Parkha Jaayega, Agar Woh Kitaab Wa Sunnat Ke Mutaabiq Ho To Qabool Kiya Jaayega, Aur Agar Mukhaalif Ho To Radd Kar Diya Jaayega, Yoo'n Hi Wahi e Nubuwwat Aur Kashf Aur Ilhaam Ke Darmiyaan Kayi Buniyaadi Furooq Maujood Hai'n, Magar Ba'az Log In Dono'n Ko Khalat Malat (Mila Dena) Karke Galat Masla Awaam Ke Saamne Pesh Karne Ki Naapaak Koshish Karte Hai'n.
Kashf Aur Ilhaam Ka Saboot (Bukhaari Wa Muslim Se) :-
Hazrat Abu Hurairah Radiallaahu Anhu Bayaan Karte Hai'n Ke Rasoolullaah ﷺ Ne Farmaaya, Tumse Pehli Ummato'n Me'n Muhaddas Huwa Karte The, Aur Agar Meri Ummat Me'n Koi Aisa Shakhs Hai To Woh Hazrat Umar Radiallaahu Anhu Hai'n.
Zakariya Bin Zaa'id Ne Apni Riwaayat Me'n Sa'ad Se Yeh Izaafa Naqal Kiya Ke Abu Salma Ne Hazrat Abu Hurairah Radiallaahu Anhu Se Riwaayat Ki Ke Nabi e Kareem ﷺ Ne Farmaaya,
Tumse Pehle Bani Israa'eel Ki Ummato'n Me'n Kuchh Aise Log Hote The Jo Nabi Nahee'n Hote The, Phir Bhi Farishte Unse Kalaam Karte The, Jo Unme'n Se (Bani Israa'eel Ke Afraad The Jinke Saath Farishte Kalaam Karte The Woh Saahibul Ilhaam The Muhaddasoon The Malhumoon The Jinko (Ilhaam Kiya Jaata Tha) Pas Agar Meri Ummat Me'n Koi Aisa Hai To Woh Hazrat Umar Radiallaahu Anhu Hai'n.
(Bukhaari Shareef, Kitaab Fazaa'il As'haabun Nabi, Baab Manaaqib Umar Bin Khattaab, Hadees No.3689, Saheeh Muslim 6204)
Mohaddiseen Ne Iss Hadees Ki Sharah Me'n Ise Karaamaat Ki Asal Aur Daleel Qaraar Diya Hai, Aur Isse Saabit Kiya Hai Ke Yeh Hazrat Faarooq e Aa'zam Radiallaahu Anhu Ke Manaaqib Me'n Se Hai, Jisse Hazrat Umar Faarooq e Aa'zam Radiallaahu Anhu Ka Muhaddas Aur Saahib e Ilhaam Hona Saabit Hota Hai.
A'imma Ki Tasreehaat :-
Imaam Badruddeen Ayni Rahimahullaah Apni Kitaab (Umdatul Qaari Sharah Saheeh Bukhaari Jild No.16, Safha No.86) Me'n Likhte Hai'n.
Iss Hadees Me'n Auliya Ki Karaamat Ka Bayaan Hai, Aur Yeh Karaamaat Qayaamat Tak Khatam Hone Waali Nahee'n Balke Qayaamat Tak Jaari Wa Saari Rahe'ngi.
Imaam Ibne Hajar Asqalaani Rahimahullaah Apni Kitaab (Fat'hul Baari Sharah Saheeh Bukhaari Jild No.6, Safha No.640) Me'n Likhte Hai'n.
Karaamaat Aur Ilhaam Itne Logo'n Se Waaqe Huwe Hai'n Ke Inka Shumaar Mumkin Nahee'n (Unko Gina Nahee'n Ja Sakta).
Ibne Taimiya Apne (Majmu'ah Al-Fataawa, Jild No.11, Safha No.65) Par Sayyaduna Hazrat Umar Faarooq e Aa'zam Radiallaahu Anhu Ke Mulhim Aur Muhaddas e Ummat Hone Ka Zikr Karte Huwe Likhte Hai'n Ke Iss Ummat Me'n Muhaddaseen Ke Sardaar, Mukhaatabeen Ke (Ya'ni Woh Log Jinke Saath Farishte Khitaab Karte Hai'n) Unke Sardaar Aur Malhumeen Ke Sardaar Hazrat Umar Bin Khattaab Radiallaahu Anhu Hai'n.
Ab Aa'iye Ilm e Ladunni Ko Samjhe Insha Allaah Kashf Wa Ilhaam Ko Aasaani Ke Saath Samajh Jaaye'nge.
Ilm e Ladunni Ki Wazaahat :-
Ilm e Ladunni Woh Khaas Ilm Hai Jo Kisi Waaste Ke Bagair Mahez Allaah Paak Ki Taraf Se Ata Hota Hai, Bilkhusoos Baatini Umoor, Haqaa'iq e Ashiya, Aur Allaah Paak Ki Zaat, Sifaat Aur Af'aal Se Muta'alliq Uloom Wa Asraar Wagairah, Jo Ilm Kisi Insaan Ke Sikhaane Se Haasil Ho Woh Ilm e Ladunni Nahee'n, Balke Ilm e Ladunni Woh Hai Jo Ma'roof Asbaab e Tehseel Ke Bagair Allaah Paak Ki Khusoosi Ata Se Haasil Ho, Iski Muta'addid Soorate'n Hai'n, Wahi, Ilhaam, Kashf Aur Firaasat Wagairah, Wahi Ambiya e Kiraam Ke Saath Khaas Hai, Ilhaam Umooman Auliya e Kiraam Ko Hota Hai, Aur Kashf Aur Firaasat Momineen Ko Unke Imaan Ke Darje Ke Mutaabiq Naseeb Hoti Hai.
Yeh Bhi Waazeh Rahe Ke Jo Shakhs Apne Ilm Par Amal Karta Hai Aur Gunaaho'n Wa Duniyaawi Alaa'isho'n Se Dil Ko Paak Rakhta Hai, Uske Dil Par In Uloom Ke Munkashif Hone Ka Imkaan Zyaadah Hota Hai, Lehaaza Jo Shakhs In Uloom Ka Talabgaar Ho Use Chaahiye Ke Du'aa Ke Saath Saath Amal e Saaleh Ikhtiyaar Kare.
Tafseer e Kabeer Me'n Hai,
Tarjuma :- Allaah Paak Ka Yeh Farmaan Ke, "Aur Hamne Use Apne Paas Se Ilm Ata Kiya" Iss Baat Par Dalaalat Karta Hai Ke Yeh Uloom Hazrat Khizar Alaihissalaam Ko Allaah Paak Ki Taraf Se Bagair Kisi Waaste Ke Haasil Huwe The, Aur Soofiya e Kiraam Un Uloom Ko Jo Mukaashifaat Ke Zariye Haasil Ho'n Uloom e Ladunniya Kehte Hai'n. (Tafseer e Kabeer, Jild No.21, Safha No.482)
Imaam Gazaali Rahimahullaah Likhte Hai'n,
Tarjuma :- Har Ilm Dar Haqeeqat Allaah Paak Hi Ki Taraf Se Hota Hai, Lekin Ba'az Uloom Makhlooq Ke Zariye Sikhaaye Jaane Se Haasil Hote Hai'n, Isliye Aise Ilm Ko Ilm e Ladunni Nahee'n Kaha Jaata, Balke Ilm e Ladunni Woh Hai Jo Kisi Ma'roof Khaarji Sabab Ke Bagair Dil Ke Raaz Par Munkashif Ho Jaaye. (Ahyaa'ul Uloomuddeen, Jild No.3, Safha No.24)
Mash'hoor Muhaddis Hazrat Allaama Mulla Ali Qaari Rahimahullaah Likhte Hai'n.
Tarjuma :- Ilm Momin Ke Dil Me'n Aane Waala Woh Noor Hai Jo Aqwaal e Muhammadiya, Af'aal e Ahmadiya Aur Ahwaal e Mehmoodiya Ke Nabvi Taaq Me'n Rakhe Huwe Charaago'n Se Haasil Hota Hai, Aur Isi Ke Zariye Bandah Allaah Paak, Uski Sifaat, Uske Af'aal Aur Uske Ahkaam Ki Taraf Hidaayat Paata Hai, Agar Yeh Ilm e Bashar Ke Waaste Se Haasil Ho To Kasbi Kehlaata Hai, Aur Agar Bashar Ka Waasta Na Ho To Ilm e Ladunni Kehlaata Hai, Ilm e Ladunni Ki Mazeed Aqsaam Hai'n, Wahi, Ilhaam Aur Firaasat. (Mirqaatul Mafaateeh, Jild No.1, Safha No.280)
Mufti Ahmad Yaar Khaan Rahimahullaah Likhte Hai'n, Ilm Noor e Ilaahi Hai Jo Bande Ko Ata Hota Hai, Agar Bashar Ke Zariye Haasil Ho To Kasbi Kehlaata Hai, Warna Ladunni, Ladunni Ki Kayi Qisme'n Hai'n, Wahi, Ilhaam, Firaasat Wagairah, Wahi Ambiya Alaihimus Salaam Se Khaas Hai, Ilhaam Auliya Allaah Keliye, Aur Firaasat Har Momin Ko Baqadar e Imaan Naseeb Hoti Hai, Firaasat Aur Ilhaam Wohi Mo'tabar Hai'n Jo Khilaaf e Shara Na Ho'n, Aur Jo Khilaaf e Shara Ho'n Woh Waswasa Hai'n. (Mir'aatul Manaajeeh, Jild No.1, Safha No.182)
Mohtaram Qaari'een !
In Tamaam Dalaa'il Ko Bagaur Padhne Ke Ba'ad Yeh Haqeeqat Roz e Roshan Ki Tarah Waazeh Ho Jaati Hai Ke Kashaf Aur Ilhaam Bar Haq Hai.
By Alahazrat Foundation Research Team - 7710809266/9892708816
