Aa'iye Sabse Pehle Witr Ki Rak'aat Kitni Hai'n Uske Dalaa'il Mulaaheza Farmaaye'n.
Hazrat Ubayi Bin Ka'ab Radiallaahu Anhu Se Marwi Hai Ke Nabi e Kareem ﷺ Witr Ki 3 Rak'at Ada Farmaate The Aur Salaam Aakhir Hi Me'n Pherte The.
(Sunan e Nisaayi Mutarjim, Jild Awwal, 613, Hadees No.1700)
Hazrat Abdullaah Bin Abbaas Radiallaahu Anhuma Ek Taweel Hadees Naqal Farmaate Hai'n Ke Nabi e Kareem ﷺ Ne 3 Martaba 2 - 2 Rak'at Karke 6 Rak'at (Tahajjud) Padhi Aur Uske Ba'ad Nabi e Kareem ﷺ Ne 3 Rak'at Witr Ada Ki. (Muslim Shareef Jild Awwal, Hadees No.1696, Safha No.597)
Hazrat Ubayi Bin Ka'ab Radiallaahu Anhu Farmaate Hai'n Ke Sarwar e Kaa'inaat ﷺ Namaaz e Witr Ki Pehli Rak'at Me'n Sureh Aa'la, Doosri Rak'at Me'n Sureh Kaafiroon Aur Teesri Rak'at Me'n Sureh Ikhlaas Padhte Aur Teeno'n Rak'ato'n Ke Aakhir Me'n Salaam Pherte The. (Sunan Nisaayi, Jild Awwal, Hadees No.1702 Safha No.540)
Hazrat Ali Radiallaahu Anhu Farmaate Hai'n Ke Nabi e Kareem ﷺ 3 Rak'at Witr Padhte The, Imaam Tirmizi Alaihir Rehma Ne Kaha, Ahle Ilm Sahaaba e Kiraam Wa Taaba'een e Kiraam Radiallaahu Anhum Ajma'een Ka Yehi Maz'hab Hai. (Jaame Tirmizi, Jild Awwal, Abwaabul Witr, Hadees No.448)
Ab Aa'iye Witr Ki Namaaz Padhne Ka Tareeqa Dalaa'il Se Mulaaheza Farmaaye'n.
Witr Ki Kaifiyat Yeh Hai Ke 2 Tashah'hud Aur Ek Salaam Se Ada Kiya Jaaye, Ahaadees Me'n Namaaz e Witr Ko Magrib Ki Tarah Ada Karne Ka Hukm Diya Gaya Hai, Lehaaza Namaaz e Witr 2 Qa'do'n Aur Ek Salaam Se Ada Ki Jaayegi, Faraq Itna Hai Ke Witr Ki Teeno'n Rak'ato'n Me'n Qir'aat e Faateha Aur Doosri Sureh Padhna Hoga, Teesri Rak'at Me'n Sureh Faateha Aur Koi Sureh Ya Koi Aayat Padhne Ke Ba'ad Dono'n Haatho'n Ko Allaahu Akbar Kehte Huwe Kaano'n Tak Uthaaye, Phir Naaf Ke Neeche Baa'ndh Le, Uske Ba'ad Du'aa e Qunoot Padhe.
Hazrat Abdullaah Bin Mas'ood Radiallaahu Anhu Farmaate Hai'n Ke Mai'n Ne Apni Waalidah Ko Bheja Ke Aap ﷺ Ke Ghar Raat Guzaare'n Aur Dekhe'n Aap ﷺ Witr Kis Tarah Padhte Hai'n, Chunaanche Unho'n Ne Aap ﷺ Ke Haa'n Raat Guzaari, Pas Aap ﷺ Ne Raat Me'n Jitna Allaah Ko Manzoor Huwa Namaaz Padhi, Jab Raat Ka Aakhri Hissa Huwa (To) Aap ﷺ Ne Witr Padhne Ka Iraadah Kiya, To Pehli Rak'at Me'n Surah A'ala Aur Doosri Rak'at Me'n Sureh Kaafiroon Padhi Phir Qa'dah Kiya, Phir Salaam Phere Bagair Khade Hogaye Aur Teesri Rak'at Me'n Sureh (Ikhlaas) Padhi, Yahaa'n Tak Ke Jab Usse Faarig Huwe To Takbeer Kahi, Du'aa e Qunoot Padhi Aur Jo Allaah Ko Manzoor Tha Du'aaye'n Ki Aur Takbeer Kahi, Ruku Kiya. (Al Istee'aab Li-Ibne Abdul Barr,Safha No.934,Hadees No.742)
Isi Tarah Ek Aur Hadees e Paak Hai Jisse Namaaz e Witr Padhne Ka Tareeqa Ma'loom Hota Hai.
Hazrat Abdullaah Bin Umar Radiallaahu Anhu Se Marwi Hai Farmaate Hai'n, Nabi e Kareem ﷺ Ne Irshaad Farmaaya, Din Ki Witr Namaaz e Magrib Hai, Raat Ki Witr Namaaz e Magrib Ki Tarah Ada Karo.
Iss Hadees Ko Imaam Ahmad Bin Hambal Ne Apni Musnad Me'n 4847 Ke Tahet Zikr Kiya, Imaam Nasaayi Ne Sunanul Kubra Me'n 1382 Ke Tahet Zikr Kiya, Gair Muqallid Wahabi Molvi Albaani Ne "Saheehul Jaame" Me'n Hadees No.6720 Ke Tahet Zikr Kiya Aur Iss Hadees Ko Saheeh Qaraar Diya.
Mohtaram Qaari'een ! Iss Hadees e Paak Se Namaaz e Witr Padhne Ka Tareeqa Ma'loom Hota Hai Ke Witr Ki Namaaz, Namaaz e Magrib Ki Tarah Ada Ki Jaayegi, Aap Hadees Par Gaur Kare'n, Hadees Me'n Zikr Ho Raha Hai Ke Magrib Ki Namaaz Din Ki Witr Hai, Jab Tum Raat Me'n Witr Ada Karna Chaaho To Magrib Ki Namaaz Ki Tarah Witr Ada Karo, Ya'ni Jis Tarah Magrib Ki Namaaz Ada Ki Jaati Hai Usi Tarah Witr Ko Bhi Ada Karo, Jis Tarah Magrib Ki 3 Rak'aat Farz Ada Karte Ho Usi Tarah 3 Rak'aat Witr Bhi Ada Karo, Magrib Me'n Jis Tarah 2 Rak'at Ke Ba'ad Qaa'da e Ula Hai Jisme'n Tashah'hud Padhi Jaati Hai Aur Phir Teesri Rak'at Keliye Khada Hote Hai'n Usi Tarah Jab Witr Ki Namaaz Padho To 2 Rak'at Ke Ba'ad Tashah'hud Ke Miqdaar Baitho Aur Tashah'hud Padho Aur Phir Teesri Rak'at Keliye Khade Ho Jaao, Yeh Hadees e Paak Ek To Witr Ki Rak'aat Ko Bata Rahi Hai Ke Witr Ki Rak'aat 3 Hai, Neez Yeh Bhi Bata Rahi Hai Ke Witr Ki Namaaz Kis Tarah Padhni Chaahiye, Ya'ni Namaaz e Magrib Ki Tarah Padhni Chaahiye.
Ummul Momineen Hazrat Aa'yesha Radiallaahu Anha Kehti Hai'n Ke Rasoolullaah ﷺ Namaaz Ko Takbeer e Tehreema "Allaahu Akbar" Aur "Sureh Faateha" Ki Qir'aat Se Shuru Karte The, Aur Jab Aap ﷺ Ruku Karte To Na Apna Sar Oo'ncha Rakhte Aur Na Use Jhukaaye Rakhte Balke Darmiyaan Me'n Rakhte, Aur Jab Ruku Se Apna Sar Uthaate To Sajda Na Karte Yahaa'n Tak Ke Seedhe Khade Ho Jaate, Aur Jab Sajde Se Sar Uthaate To Doosra Sajdah Na Karte Yahaa'n Tak Ke Bilkul Seedhe Baith Jaate Aur Har 2 Rak'at Ke Ba'ad "Attahiyyaat" Padhte.
Yeh Hadees e Paak "Saheeh Muslim, Hadees No.498" Ke Tahet Mazkoor Hai, "Sunan Ibne Maaja, Hadees No.812" Ke Tahet Mazkoor Hai, "Musnad Ahmad, Hadees No.31" Ke Tahet Mazkoor Hai, "Sunan Daarmi, Hadees No.1272" Ke Tahet Mazkoor Hai, Aur Iss Hadees Ko Gair Muqallid Wahabio Ke Imaam Albaani Ne Saheeh Qaraar Diya Hai Neez Ek Aur Wahabio Ke Baaba Shaykh Zubair Ali Zaee Ne Bhi Iss Hadees Ko Saheeh Qaraar Diya Hai.
Mohtaram Qaari'een ! Mazkoorah Hadees e Paak Aap ﷺ Kis Tarah Namaaz Ada Farmaate The Iske Baare Me'n Hai, Jisme'n Zikr Hai Ke Aap ﷺ Har 2 Rak'at Ke Ba'ad "Attahiyyaat" Ya'ni Tashah'hud Padhte The, Isse Witr Ki Namaaz Padhne Ka Waazeh Tareeqa Bhi Ma'loom Hogaya Ke Har 2 Rak'at Ke Ba'ad Tashah'hud Me'n Baithna Hai, Phir Tashah'hud Padhna, Phir Teesri Rak'at Keliye Khada Hona Hai.
Sahaaba e Kiraam Radiallaahu Anhum Ajma'een Witr Ko Magrib Ki Tarah Ada Karte The :-
Haafiz Ibne Hajar Apni Kitaab "Fat'hul Baari" Me'n Likhte Hai'n,
Muhammad Bin Nasr Ne Hazrat Abdullaah Bin Mas'ood Radiallaahu Anhu, Hazrat Anas Radiallaahu Anhu Aur Hazrat Abul Aa'liya Rahimahullaah Se Riwaayat Kiya Hai Ke Unho'n Ne 3 Rak'aat e Witr Usi Tarah Ada Kiye Jaise Magrib Ki Namaaz Padhi Jaati Hai. (Fat'hul Baari Sharah Saheeh Bukhaari, Li-Ibne Hajar, 2/481)
Mohtaram Qaari'een ! Upar Mazkoorah Saare Dalaa'il Iss Baat Ka Waazeh Saboot Pesh Karti Hai'n Ke Witr Ki Namaaz Padhne Ka Jo Tareeqa Hai Woh Tareeqa Namaaz e Magrib Padhne Ke Tareeqe Ki Tarah Hai Ya'ni 2 Rak'at Ke Ba'ad Tashah'hud Ki Miqdaar Baithe'nge, Tashah'hud Padhe'nge, Phir Uske Ba'ad Teesri Rak'at Keliye Khade Ho Kar Sureh Faateha Aur Uske Saath Koi Aur Sureh Ya Koi Aayat Padh Kar "Allaahu Akbar" Kehte Huwe Haath Ko Kaano'n Ki Law Tak Utha Kar Naaf Ke Neeche Baa'ndh Le'nge, Phir Uske Ba'ad Du'aa e Qunoot Padhe'nge, Yehi Saheeh Tareeqa Hai Witr Ki Namaaz Padhne Ka.
Imaam Abu Bakar Ibne Abi Shayba Apni Kitaab "Musannaf Ibne Abi Shayba, Hadees No.30326" Me'n Saheeh Sanad Ke Saath Bayaan Karte Hai'n Ke Abu Abdur Rahmaan Kehte Hai'n, Hame'n Hazrat Abdullaah Ibne Mas'ood Radiallaahu Anhu Ne Du'aa e Qunoot Sikhaayi, Ya'ni Du'aa e Qunoot Witr Me'n Padhe, Aur Woh Yeh Hai.
"اَللّٰهُمَّ إِنَّا نَسْتَعِيْنُکَ وَنَسْتَغْفِرُکَ، وَنُؤْمِنُ بِکَ وَنَتَوَکَلُّ عَلَيْکَ، وَنُثْنِی عَلَيْکَ الْخَيْرَ، وَنَشْکُرُکَ وَلَا نَکْفُرُکَ، وَنَخْلَعُ وَنَتْرُکُ مَنْ يَفْجُرُکَ. اَللّٰهُمَّ اِيَّاکَ نَعْبُدُ وَلَکَ نُصَلِّی وَنَسْجُدُ وَاِلَيْکَ نَسْعٰی وَنَحْفِدُ، وَنَرْجُوْا رَحْمَتَکَ، وَنَخْشٰی عَذَابَکَ اِنَّ عَذَابَکَ بِالْکُفَّارِ مُلْحِقٌ."
By Alahazrat Foundation Research Team - 7710809266/9892708816
