Yaad Rahe Ke Yeh Masla Aqaa'id Se Ta'alluq Nahee'n Rakhta Balke Yeh Ek Furuyi Ikhtelaafi Masla Hai.
Imaam e Aa'zam Abu Haneefa Alaihir Rehma Ke Nazdeek Namaaz Me'n Naaf Ke Neeche Haath Baa'ndhna Sunnat Hai, Aur Unke Iss Amal Ki Daleel Hadeeso'n Me'n Maujood Hai.
1- Musannaf Ibne Abi Shayba, Hadees No.3959.
Tarjuma :- Imaam Bukhaari Wa Muslim Ke Ustaad Hadees Bayaan Karte Hai'n Ke Waa'il Ibne Hujar Radiallaahu Anhu Farmaate Hai'n, Ke Mai'n Ne Nabi e Kareem ﷺ Ko Namaaz Padhte Huwe Dekha To Aap ﷺ Ne Apne Daaye'n Haath Ko Baaye'n Haath Par Naaf Ke Neeche Rakha. (Saheeh Hadees)
2- Musannaf Ibne Abi Shayba, Hadees No.3942.
Tarjuma :- Hajjaaj Bin Hassaan Kehte Hai'n Ke Mai'n Ne Abu Mijliz Se Suna Ya Mai'n Ne Unse Poochha, Namaaz Me'n Kis Tarah Haath Baa'ndhe Jaaye'n, Unho'n Ne Kaha Daaye'n Haath Ka Nichla Hissa Baaye'n Haath Ke Upar Waale Hisse Par Rakhna Hai Aur Un Dono'n Ko Naaf Ke Neeche Rakhna Hai. (Saheeh Hadees)
3- Tirmizi Shareef, Hadees No.252
Tarjuma :- Hazrat Hulb Radiallaahu Anhu Kehte Hai'n Ke Rasoolullaah ﷺ Hamaari Imaamat Karte To Baaye'n Haath Ko Apne Daaye'n Haath Se Pakadte.
Imaam Tirmizi Kehte Hai'n, 1- Hulb Radiallaahu Anhu Ki Hadees Hasan Hai, 2- Iss Baab Me'n Waa'il Bin Hujar, Gutaif Bin Haaris, Ibne Abbaas, Ibne Mas'ood Aur Sohail Bin Sa'ad Radiallaahu Anhum Se Bhi Ahaadees Aayi Hai'n, 3- Sahaaba e Kiraam, Taaba'een Aur Unke Ba'ad Ke Ahle Ilm Ka Amal Isi Par Hai Ke Aadmi Namaaz Me'n Daahena Haath Baaye'n Haath Par Rakhe, Aur Ba'az Ki Raaye Hai Ke Unhe'n Naaf Ke Upar Rakhe Aur Ba'az Ki Raaye Hai Ke Naaf Ke Neeche Rakhe, Unke Nazdeek In Sabki Gunjaa'ish Hai. (Saheeh Hadees)
4- Abu Daawood Shareef, Hadees No.757.
Tarjuma :- Jareer Zubbi Kehte Hai'n Ke Mai'n Ne Hazrat Ali Radiallaahu Anhu Ko Dekha Ke Woh Apne Daahene Haath Se Baaye'n Haath Ka Paho'ncha (Gatta) Pakde Huwe Naaf Ke Upar Rakhe Huwe Hai'n.
Mohtaram Qari'een :- In Tamaam Dalaa'il Se Maloom Hota Hai Ke Namaaz Me'n Haath Baa'ndhne Ka Sunnat Tareeqa Naaf Ke Neeche Haath Baa'ndhna Hai.
By Alahazrat Foundation Research Team - 7710809266/9892708816
