Ohad Pahaad Jitna Sawaab :-
Tarjuma - Hazrat Abu Hurairah Radiallaahu Anhu Se Riwaayat Hai Ke, Nabi e Kareem ﷺ Ne Irshaad Farmaya Hai, Jo Shakhs (Imaan Ka Taqaaza Samajh Kar Aur Husool e Sawaab Ki Niyat Se) Apne Ghar Se Janaaze Ke Saath Chale, Namaaz e Janaazah Padhe Aur Dafan Hone Tak Janaaze Ke Saath Rahe Uske Liye Do Qeeraat Sawaab Hai Jisme'n Se Har Qeeraat Ohad (Pahaad) Ke Baraabar Hai Aur Jo Shakhs Sirf Janaaze Ki Namaaz Padh Kar Waapas Aajaaye To Uske Liye Ek Qeeraat Sawaab Hai, (Muslim Shareef, Safha No.472, Hadees No.945)
Namaaz e Janaazah Baa'is e Ibrat Hai :-
Tarjuma :- Hazrat Abu Zar Gaffaari Radiallaahu Anhu Ka Irshaad Hai, Mujhse Nabi e Kareem ﷺ Ne Farmaaya, Qabro'n Ki Ziyaarat Karo Taake Aakherat Ki Yaad Aaye Aur Murde Ko Nehlaao Ke Faani Jism (Ya'ni Murdah Jism) Ka Chhoona Bahot Badi Naseehat Hai Aur Namaaz e Janaazah Padho Taake Yeh Tumhe'n Gamgeen Kare Kyu'nke Gamgeen Insaan Allaah Paak Ke (Rahmat) Ke Saaye Me'n Hota Hai Aur Neki Ka Kaam Karta Hai, (Al Mustadrak Lil Haakim, Jild No.1, Safha No.711, Hadees No.1435)
Mayyat Ko Nehlaane Wagairah Ki Fazeelat :- Tarjuma - Maula e Kaa'inaat Hazrat Ali Radiallaahu Anhu Se Riwaayat Hai Ke Nabi e Kareem ﷺ Ne Irshaad Farmaaya Ke Jo Kisi Mayyat Ko Nehlaaye, Kafan Pehnaaye, Khushbu Lagaaye, Janaazah Uthaaye, Namaaz Padhe Aur Jo Naaqis Baat Nazar Aaye Use Chhupaaye Woh Apne Gunaaho'n Se Aisa Paak Ho Jaata Hai Jaisa Jis Din Maa'n Ke Pet Se Paida Huwa Tha, (Ibne Maaja, Jild No.1, Safha No.201, Hadees No.1462)
Janaazah Dekh Kar Padhne Ka Wird :-
Tarjuma - Hazrat Maalik Bin Anas Radiallaahu Anhu Ko Ba'ad e Wafaat Kisi Ne Khwaab Me'n Dekh Kar Poochha, Allaah Paak Ne Aapke Saath Kya Sulook Farmaaya? Kaha, Ek Kalme Ki Wajah Se Bakhsh Diya Jo Hazrat Usmaan Gani Radiallaahu Anhu Janaazah Ko Dekh Kar Kaha Karte The, (Woh Kalma Yeh Hai)
سُبْحٰنَ الْحَیِّ الَّذِی لا یَمُوت
(Ya'ni Woh Zaat Paak Hai Jo Zindah Hai Use Kabhi Maut Nahee'n Aayegi) Lehaaza Mai'n Bhi Janaazah Dekh Kar Yehi Kaha Karta Tha, Yeh Kalma Kehne Ke Sabab Allaah Paak Ne Mujhe Bakhsh Diya, (Ihyaa'ul Uloom, Jild No.5, Safha No.266)
Nabi e Kareem ﷺ Ne Sabse Pehla Janaazah Kiska Padha :- Namaaz e Janaazah Ki Ibteda Hazrat Aadam Alaihissalaam Ke Daur Se Huwi Hai, Farishto'n Ne Hazrat Aadam Alaihissalaam Ke Janaaza e Mubaaraka Par 4 Takbeere'n Padhi Thee'n, Islaam Me'n Wujoob e Janaazah Ka Hukm Madeena e Munawwarah Me'n Naazil Huwa, Hazrat As'ad Bin Zuraarah Radiallaahu Anhu Ka Wisaal Mubaarak Hijrat Ke Ba'ad 9ve'n Maheene Ke Aakhir Me'n Huwa Aur Yeh Pehle Sahaabi Ki Mayyat Thi Jis Par Nabi e Kareem ﷺ Ne Namaaz e Janaazah Padhi, (Maakhooz Az Fataawa Razviya, Jild No.5, Safha No.375 - 376)
Namaaz e Janaazah Farz e Kifaaya Hai :- Namaaz e Janaazah "Farz e Kifaaya" Hai Ya'ni Koi Ek Bhi Ada Karle To Sab Baree'uz Zimma Ho Gaye Warna Jin Jinko Khabar Paho'nchi Thi Aur Nahee'n Aaye Woh Sab Gunahgaar Ho'nge, Iske Liye Jamaa'at Shart Nahee'n, Ek Shakhs Bhi Padhle To Farz Ada Ho Gaya, Iski Farziyat Ka Inkaar Kufr Hai, (Bahaar e Sharee'at, Jild No.1, Safha No.825, Aa'lamgeeri, Jild No.1, Safha No.162, Durre Mukhtaar, Jild No.3, Safha No.120)
Namaaz e Janaazah Me'n 2 Rukn Aur 3 Sunnate'n Hai'n :- 2 Rukn Yeh Hai'n, (1) Chaar Baar "Allaahu Akbar" Kehna (2) Qayaam (Khade Hokar Namaaz e Janaazah Ada Karna), (Durre Mukhtaar Jild No.3, Safha No.124)
Isme'n 3 Sunnat e Mo'akkedah Yeh Hai'n, (1) Sana (2) Darood Shareef (3) Mayyat Keliye Du'aa, (Bahaar e Sharee'at, Jild No.1, Safha No.829)
Namaaz e Janaazah Ka Tareeqa :- Muqtadi Iss Tarah Niyat Kare, Mai'n Niyat Karta Hoo'n Iss Janaaze Ki Namaaz Ki Waaste Allaah Paak Ke, Du'aa Iss Mayyat Keliye, Peechhe Iss Imaam Ke, (Fataawa Taataar Khaaniya, Jild No.2, Safha No.153), Ab Imaam Wa Muqtadi Pehle Kaano'n Tak Haath Uthaaye'n Aur "Allaahu Akbar" Kehte Huwe Fauran Hasb e Ma'mool Naaf Ke Neeche Baa'ndh Le'n Aur Sana Padhe'n, Isme'n "Wata Aa'la Jadduka" Ke
Ba'ad
وَجَلَّ ثَنَاؤُکَ وَلَا اِلٰـہَ غَیْرُکَ
Padhe'n Phir Bagair Haath Uthaaye "Allaahu Akbar" Kahe'n, Phir Darood e Ibraaheem Padhe'n, Phir Bagair Haath Uthaaye "Allaahu Akbar" Kahe'n Aur Du'aa Padhe'n, (Imaam Takbeere'n Buland Aawaaz Se Kahe Aur Muqtadi Aahista, Baaqi Tamaam Azkaar Imaam Wa Muqtadi Sab Aahista Padhe'n), Du'aa Ke Ba'ad Phir "Allaahu Akbar" Kahe'n Aur Haath Latka De'n, Phir Dono'n Taraf Salaam Pher De'n, Salaam Me'n Mayyat Aur Farishto'n Wa Haazireen e Namaaz Ki Niyat Kare, Usi Tarah Jaise Aur Namaazo'n Ke Salaam Me'n Niyat Ki Jaati Hai, Yahaa'n Itni Baat Zyaadah Hai Ke Mayyat Ki Bhi Niyat Kare, (Bahaar e Sharee'at Jild No.1, Safha No.829, 835)
By Alahazrat Foundation Research Team - 7710809266/9892708816
