Namaaz Me'n Sajde Me'n Jaane Aur Sajde Se Khade Hone Ka Sunnat Tareeqa Yeh Hai Ke Sajde Me'n Jaate Huwe Sabse Pehle Woh Uzwo (Jism Ka Part) Rakhe Jo Zameen Se Zyaadah Qareeb Hai Aur Sajde Se Uthte Huwe Woh Uzwo Sabse Pehle Uthaaye Jo Aasmaan Se Zyaadah Qareeb Hai, Lehaaza Sajde Me'n Jaate Huwe Sabse Pehle Paao'n Ke Ghutne Rakhe Phir Haath Aur Phir Chehrah, Aur Chehreh Me'n Bhi Pehle Naak Aur Phir Peshaani, Aur Sajde Se Uthte Huwe Uske Bilkul Bar'aks Pehle Chehrah Uthaaye Phir Haath Aur Phir Ghutne, Aur Jamhoor Ulama e Kiraam Ka Yehi Maz'hab Hai Ke Sajdah Karne Waala Pehle Zameen Par Ghutne Rakhega Aur Phir Uske Ba'ad Haath Rakhega, Aur Jab Sajde Se Uthega To Pehle Haath Uthaayega Aur Phir Ghutne.
Dalaa'il Mulaaheza Farmaaye'n :-
Hazrat Waa'il Bin Hujr Radiallaahu Anhu Se Riwaayat Hai, Farmaate Hai'n Ke Mai'n Ne Sarkaar e Do Aa'lam ﷺ Ko Dekha Ke Jab Aap Sajdah Karte, To Haatho'n Se Pehle Ghutne Rakhte, Aur Jab Sajde Se Qayaam Keliye Uthte, Ghutno'n Se Pehle Haatho'n Ko Uthaate. (Sunan e Abu Dawood, Jild No.01, Safha No.222, Hadees No:838 & Sunan e Tirmizi, Jild No.01, Safha No.329, Hadees No:268 & Sunan e Ibne Maaja, Jild No.01, Safha No.286, Hadees No:882 & Saheeh Ibne Khuzaima, Jild No.01, Safha No.342, Hadees No:626)
Isse Agli Riwaayat Me'n Yehi Mazmoon Alfaaz Ke Faraq Ke Saath Hazrat Waa'il Bin Hujr Radiallaahu Anhu Se Marwi Hai, Aap Farmaate Hai'n Ke Sarkaar e Do Aa'lam ﷺ Jab Sajdah Farmaate, To Hatheliyo'n Se Pehle Aap Alaihis Salaatu Was Salaam Ghutne Zameen Par Rakhte. (Sunan e Abu Dawood, Jild No.01, Safha No.222, Hadees No:839, Matboo'ah Bairoot)
Isi Hadees Par Jamhoor Ulama Ka Amal Hone Ke Muta'alliq Imaam Tirmizi Likhte Hai'n Ke Aksar Ahle Ilm Ka Amal Isi Par Hai, Aur Unki Raaye Yeh Hai Ke Sajde Me'n Jaate Waqt Haatho'n Se Pehle Ghutno'n Ko Rakhe, Aur Uthte Waqt Ghutno'n Se Pehle Haatho'n Ko Uthaaye. (Sunan e Tirmizi, Jild No.01, Safha No.329, Hadees No:268)
Hatta Ke Hazrat Abu Hurairah Radiallaahu Anhu Se Khud Hazrat Waa'il Bin Hujr Radiallaahu Anhu Ke Mawaafiq Hadees e Paak Marwi Hai, Chunaanche Allaama Tahaawi Alaihir Rehma Likhte Hai'n Ke Jab Tum Me'n Se Koi Sajdah Kare To Haatho'n Se Pehle Ghutno'n Ko Rakhe, Oo'nt Ki Tarah Na Baithe, Yeh Riwaayat Uss Riwaayat Ke Khilaaf Hai Jo Ke Aa'raj Ne Hazrat Abu Hurairah Radiallaahu Anhu Se Riwaayat Ki, Aur Iss Hadees Ka Ma'ni Yeh Hai Ke Pehle Haatho'n Ko Na Rakho, Jis Tarah Oo'nt Baithte Huwe Rakhta Hai. (Sharah Ma'aani Al-Aasaar, Jild No.01, Safha No.255)
Aur Usool e Hadees Ke Mutaabiq Jab Ek Raawi Se Riwaayat Me'n Ikhtelaaf Ho, Aur Doosre Raawi Se Ikhtelaaf e Riwaayat Na Ho, To Jis Raawi Se Ikhtelaaf e Riwaayat Na Ho, Uss Raawi Ki Riwaayat Ko Lena Aula (Zyaadah Behtar) Hota Hai, Allaama Tahaawi Alaihir Rehma Likhte Hai'n Ke Jab Huzoor e Akram ﷺ Se Iske Muta'alliq Ahaadees Mukhtalif Ho Gayee'n Ke Sajde Me'n Jaate Waqt Pehle Haatho'n Ko Rakhe Ya Ghutno'n Ko, To Hamne Usme'n Gaur Wa Fikr Kiya, Pas In Riwaayaat Me'n Tas'heeh Ki Sabeel Yehi Hai Ke Hazrat Waa'il Radiallaahu Anhu Se Riwaayat Mukhtalif Nahee'n, Ikhtelaaf Hazrat Abu Hurairah Radiallaahu Anhu Se Marwi Hai, Pas Yahaa'n Zaroor Hazrat Waa'il Radiallaahu Anhu Ki Jo Riwaayat Hai Uspar Hazrat Waa'il Aur Hazrat Abu Hurairah Radiallaahu Anhuma Dono'n Ka Ittefaaq Hai, Pas Yoo'n Ikhtelaaf Khatam Ho Gaya Aur Hazrat Waa'il Radiallaahu Anhu Se Marwi Riwaayat Saabit Ho Gayi. (Sharah Ma'aani Al-Aasaar, Jild No.01, Safha No.255,)
Allaama Ayni Alaihir Rehma Ne Bhi Wohi Farmaaya Hai Jo Imaam Tahaawi Ki Upar Mazkoorah Baala Ibaarat Hai. (Sharah Sunan e Abi Dawood Lil Ayni, Jild No.04, Safha No.25)
Shaah Abdul Haq Mohaddis e Dehlawi Alaihir Rehma, Lama'aatut Tanqeeh Aur Fat'hur Rahmaan (Jiska Asal Naam Fat'hul Mannaan Hai) Me'n Likhte Hai'n Ke Yeh Hadees Pehli Hadees (Pehle Ghutne Rakhne Waali Riwaayat) Ke Khilaaf Hai, Iss Hadees Par Amal Karte Huwe Imaam Maalik, Auzaayi, Ek Riwaayat Ke Mutaabiq Imaam Ahmad Aur Mohaddiseen Ki Ek Jamaa'at Ne Yeh Mauqif Ikhtiyaar Kiya, Jabke Pehli Ya'ni Haatho'n Se Pehle Ghutne Rakhne Waali Waa'il Bin Hujr Ki Riwaayat Par Jamhoor A'imma, Imaam e Aa'zam, Imaam
Shaafayi Aur Imaam Ahmad Ne Amal Karte Huwe Isi Mauqif Ko Ikhtiyaar Kiya, Aur Farmaaya Waa'il Bin Hujr Ki Riwaayat Hazrat Abu Hurairah Ki Riwaayat Se Asbat (Zyaadah Saabit) Hai, Ke Usool Yeh Hai Jab 2 Riwaayato'n Me'n Iss Tarah Ikhtelaaf Ho Jaaye Ke Unke Maabain Tatbeeq Mumkin Na Ho, To Aqwa (Zyaadah Qawi) Riwaayat Par Amal Kiya Jaata Hai.
Saheeh Ibne Khuzaima Me'n Marwi Hai Ke Huzoor e Akram ﷺ Jab Sajdah Farmaate To Pehle Ghutno'n Ko Rakhte, Hazrat Sa'ad Bin Abi Waqaas Radiallaahu Anhu Se Bhi Isi Tarah Marwi Hai Jaisa Ke Musannaf Ibne Abi Shaiba Aur Imaam Bayhaqi Ne Sunan Me'n Ise Riwaayat Kiya, Aur Ba'az Shuruh Me'n Hazrat Abu Sa'eed Ki Riwaayat Me'n Yeh Mazkoor Hai Ke Ham Sajde Me'n Jaate Waqt Ghutno'n Se Pehle Haatho'n Ko Rakhte The Phir Hame'n Pehle Ghutno'n Ko Rakhne Ka Hukm Diya Gaya, Iss Riwaayat Ke Mutaabiq Hazrat Waa'il Ki Riwaayat Hazrat Abu Hurairah Ki Riwaayat Ki Naasikh Hogi Jaisa Ke Mo'allif Ya'ni Saahib e Masaabeeh Ne Farmaaya.
Ise Mehfooz Karlo, Neez Yeh Bhi Kaha Gaya Hai Ke Hazrat Abu Hurairah Ki Riwaayat Ke Oo'nt Ki Tarah Na Baitho Aur Phir Farmaaya Ke Ghutno'n Se Pehle Haatho'n Ko Rakho, Me'n Tazaad Hai, Shaayed Ke Yeh Raawiyo'n Ke Wahem Ki Wajah Se Ho, Aur Unho'n Ne Wala Yaza Ko WalYaza Se Tabdeel Kar Diya Ho, Kyu'nke Jab Ghutno'n Se Pehle Haatho'n Ko Rakhega To Goya Ke Woh Oo'nt Ki Tarah Baithega, Kyu'nke Oo'nt Baithte Waqt Ghutno'n Se Pehle Haatho'n Ko Hi Rakhta Hai, Pas Yeh Hazrat Waa'il Ki Hadees Ke Mawaafiq Ho Gaya, Mazeed Yeh Ke Hazrat Abu Hurairah Radiallaahu Anhu Se Yeh Bhi Marwi Hai Ke Jab Tum Me'n Se Koi Sajdah Kare To Haatho'n Se Pehle Ghutno'n Ko Rakhe, Oo'nt Ki Tarah Na Baithe, Ise Toor Bishti Ne Zikr Kiya. (Lam'aatut Tanqeeh, Jild No.03, Safha No.33 & 34)(Fat'hur Rahmaan, Jild No.02, Safha No.153 & 154)
Mohtaram Qaari'een :- In Tamaam Dalaa'il Se Hame'n Jo Sahi Masla Ma'loom Hota Woh Yehi Hai Ke Namaaz Me'n Sajde Me'n Jaane Aur Sajde Se Khade Hone Ka Sunnat Tareeqa Yeh Hai Ke Sajde Me'n Jaate Huwe Sabse Pehle Paao'n Ke Ghutne Rakhe Phir Haath Aur Phir Chehrah, Aur Chehre Me'n Bhi Pehle Naak Aur Phir Peshaani, Aur Sajde Se Uthte Huwe Uske Bilkul Bar'aks Pehle Chehrah Uthaaye Phir Haath Aur Phir Ghutne, Aur Jamhoor Ulama e Kiraam Ka Yehi Tareeqa Raha Hai.
By Alahazrat Foundation Research Team - 7710809266/9892708816
