Sabse Pehle Ham Namaaz e Witr Padhne Ka Tareeqa Jaante Hai'n,
Namaaz e Isha Ke Farz, Sunnate'n Aur Nawaafil Ada Karne Ke Ba'ad 3 Rak'at Witr Waajib Ada Kare'n, Namaaz e Witr Ki Niyat Bhi Aa'm Namaazo'n Ki Tarah Hai, Witr Padhne Ka Tareeqa Thode Se Farq Ke Saath Wohi Hai Jo Namaaz e Magrib Ka Hai, Ya'ni 2 Rak'at Par Tashah'hud Keliye Baithe'n, Uske Ba'ad Teesri Rak'at Keliye Khade Ho Jaaye'n, Aur Usme'n Sureh Faateha Padhe'n Aur Sureh Milaane Ke Ba'ad Allaahu Akbar Keh Kar Dono'n Haatho'n Ko Kaano'n Ki Law Tak Uthaakar Phir Baa'ndh Le'n Aur Aurat Apne Haatho'n Ko Kandho'n Tak Uthaakar Seene Par Rakhe, Uske Ba'ad Du'aa e Qunoot Padhe'n.
Witr Ki Namaaz 3 Rak'aat Hai'n Mustanad Dalaa'il Ki Roshni Me'n Mulaaheza Keejiye,
Mohtaram Qaari'een e Kiraam :- Gair Muqallid Wahaabi Hazraat Apni Zimme Lagaayi Gayi Duty Ke Mutaabiq Har Islaami Malse Par Ummat e Muslima Se Alag Thalag Raasta Ikhtiyaar Karte Hai'n, Unhee'n Me'n Se Ek Namaaz e Witr Bhi Hai Jiske Muta'alliq Yeh Log Aedi Choti Ka Zor Lagaate Hai'n, Kehte Hai'n Ke Namaaz e Witr Ek Rak'at Hai, Aa'iye Dalaa'il Ki Roshni Me'n Padhte Hai'n Ke Namaaz e Witr Ki Kitni Rak'aat Hai'n Ek Ya 3, Jab Aap Mukammal Dalaa'il Padhle'n To Sochiyega Zaroor Aakhir Gair Muqallid Wahaabi Hazraat Ka Kya Banega Aur Yeh Kiske Mission Par Hai'n,
Hazrat Ubayi Bin Ka'ab Radiallaahu Anhu Se Marwi Hai Ke Nabi e Kareem ﷺ Witr Ki 3 Rak'at Ada Farmaate The Aur Salaam Aakhir Hi Me'n Pherte The.
(Sunan Nisaayi Mutarjim, Jild Awwal, 613, Hadees No.1700)
Jaise Aur Namaazo'n Me'n Aakhri Rak'at Me'n Salaam Phera Jaata Hai Waise Hi Witr Me'n Bhi Aakhri Rak'at Me'n Salaam Phera Jaaye 2 Rak'at Par Nahee'n.
Ummul Momineen Hazrat Aa'yesha Radiallaahu Anha Farmaati Hai'n Ke Nabi e Kareem ﷺ Ramzaan Aur Gair Ramzaan Me'n 11 Rak'at Se Zaa'id Nahee'n Padhte The, Nabi e Kareem ﷺ Chaar Rak'at (Tahajjud) Ada Karte, Phir Aap 3 Rak'at (Witr) Ada Farmaate. (Saheeh Bukhaari, Kitaabut Tahajjud, Jild Awwal, Hadees No.1077, Safha No.472)(Saheeh Muslim Shareef, Jild Awwal, Hadees No.1620 Safha No.573)
Hazrat Abdullaah Bin Abbaas Radiallaahu Anhuma Ek Taweel Hadees Naqal Farmaate Hai'n Ke Nabi e Kareem ﷺ Ne 3 Martaba 2 - 2 Rak'at Karke 6 Rak'at (Tahajjud) Padhi Aur Uske Ba'ad Nabi e Kareem ﷺ Ne 3 Rak'at Witr Ada Kiye. (Muslim Shareef Jild Awwal, Kitaab, Hadees No.1696, Safha No.597)
Hazrat Ubayi Bin Ka'ab Radiallaahu Anhu Farmaate Hai'n Ke Sarwar e Kaa'inaat ﷺ Namaaz e Witr Ki Pehli Rak'at Me'n Sureh Aa'la, Doosri Rak'at Me'n Sureh Kaafiroon Aur Teesri Rak'at Me'n Sureh Ikhlaas Padhte Aur Teeno'n Rak'ato'n Ke Aakhir Me'n Salaam Pherte The. (Sunan Nisaayi, Jild Awwal, Hadees No.1702 Safha No.540)
Hazrat Ali Radiallaahu Anhu Farmaate Hai'n Ke Nabi e Kareem ﷺ 3 Rak'at Witr Padhte The, Imaam Tirmizi Alaihir Rehma Ne Kaha, Ahle Ilm Sahaaba e Kiraam Wa Taaba'een e Kiraam Radiallaahu Anhum Ka Yehi Maz'hab Hai. (Jaame Tirmizi, Jild Awwal, Abwaabul Witr, Hadees No.448)
Sayyaduna Abdullaah Ibne Abbaas Radiallaahu Anhuma Witr Ki 3 Rak'ato'n Me'n 3 Soorate'n Tilaawat Farmaate, سَبِّحِ اسْمَ رَبِّكَ الْاَعْلَی Aur قُلْ یٰۤاَیُّهَا الْكٰفِرُوْنَ Aur قُلْ هُوَ اللّٰهُ اَحَدٌ
(Sunan Nisaayi, Jild Awwal, Hadees No.1706 Safha No.541)
Ummul Momineen Hazrat Aa'yesha Siddeeqa Radiallaahu Anha Se Daryaaft Kiya Gaya Ke Nabi e Kareem ﷺ Witro'n Me'n Kya Padhte The To Unho'n Ne Farmaaya, Pehli Rak'at Me'n سَبِّحِ اسْمَ رَبِّكَ الْاَعْلَی, Doosri Me'n قُلْ یٰۤاَیُّهَا الْكٰفِرُوْنَ Aur Teesri Me'n قُلْ هُوَ اللّٰهُ اَحَدٌ Padhte The. (Sunan e Ibne Maaja, Jild Awwal, Hadees No.1224 Safha No.336)
Hazrat Abdullaah Bin Mas'ood Radiallaahu Anhu Se Marwi Hai Ke Nabi e Kareem ﷺ Ne Farmaaya,
Tarjuma :- Din Ke Witro'n Ya'ni Namaaz e Magrib Ki Tarah Raat Ke Witro'n Ki Bhi 3 Rak'aat Hai'n. (Sunan Daar e Qutni Jild No.2 Safha No.27, Hadees No.1235)
Jaleelul Qadr Taabayi Aur Hazrat Sayyiduna Abu Bakar Siddeeq Radiallaahu Anhu Ke Pote Hazrat Qaasim Bin Muhammad Hazrat Abdullaah Bin Umar Radiallaahu Anhuma Se Riwaayat Karte Hai'n Ke Nabi e Kareem ﷺ Ne Farmaaya,
Tarjuma :- Raat Ki Namaaz Ki 2 - 2 Rak'ate'n Hai'n, Jab Tum Faarig Hona Chaaho To Ek Rak'at Aur Padhlo, Yeh Tumhaari Padhi Huwi Namaaz Ko Witr Bana Degi, Iske Ba'ad Hazrat Sayyaduna Abu Bakar Siddeeq Radiallaahu Anhu Ke Pote Hazrat Qaasim Bin Muhammad Radiallaahu Anhu Apna Qaul Yoo'n Bayaan Karte Hai'n, Jabse Mai'n Ne Hosh Sambhaala To Hamne Logo'n Ko 3 Witr Padhte Huwe Hi Dekha Hai. (Saheeh Bukhaari, Kitaabul Witr,Jild No.1 Safha No.337, Raqam : 948)
Witr Ki Namaaz Waajib Hai :- Namaaz e Witr Ka Wujoob Ahaadees e Tayyaba Se Saabit Hai, Chunaanche Iss Baare Me'n Muta'addid Riwaayate'n Kutub e Ahaadees Me'n Maujood Hai'n, Inme'n Se Chand Saaf Aur Sareeh Riwaayate'n Pesh e Khidmat Hai'n,
Hazrat Abu Ayyoob Ansaari Radiallaahu Anhu Se Riwaayat Hai Ke, Rasoolullaah ﷺ Ne Farmaaya, Witr Waajib Hai.(Al-Mustadrik, Kitaabul Witr, Hadees No.1132)
Hazrat Abdullaah Bin Buraidah Apne Waalid Se Riwaayat Karte Hai'n Ke, Rasoolullaah ﷺ Ne Farmaaya, Witr Waajib Hai, To Jo Witr Na Padhe Woh Ham Me'n Se Nahee'n Hai. (Sunan Abi Dawood, Kitaabus Salaat,Raqamul Hadees: 1419), (Al-Mustadrik, Raqamul Hadees : 1126), (Musannaf Ibne Abi Shayba, Hadees No.6934)
Hazrat Amro Bin Sho'aib Radiallaahu Anhuma Se Riwaayat Hai Ke, Rasoolullaah ﷺ Ne Farmaaya, Beshak Allaah Ne Tumhaari Namaazo'n Me'n Ek Namaaz Ka Izaafa Farmaaya, Aur Woh Witr Hai. (Musannaf Ibne Abi Shaiba, Hadees No.929)
Hazrat Abu Sa'eed Khudri Radiallaahu Anhu Bayaan Karte Hai'n Ke, Nabi e Kareem ﷺ Ne Irshaad Farmaaya Ke Jo Shakhs Witr (Padhne Se Pehle) So Jaaye Ya Witr Padhna Bhool Jaaye To Jis Waqt Yaad Aaye Padhle. (Tirmizi Shareef, Kitaabus Salaat, Hadees No.465), (Ibne Maaja Shareef, Hadees No.1188)
Deen Ka Adna Soojh Boojh Rakhne Waala Shakhs Bhi Jaanta Hai Ke Sunnat Namaazo'n Ki Qaza Nahee'n Hoti Aur Iss Hadees e Mubaaraka Me'n Witr Chhodne Par Qaza Ka Hukm Diya Gaya Hai, To Saabit Huwa Ke Witr Ki Namaaz Sunnat Nahee'n Aur Iske Farz Hone Ka Koi Qaa'il Nahee'n To Yaqeeni Taur Par Ma'loom Huwa Ke Yeh Waajib Hi Hai, Rahi Yeh Baat Ke Ba'az Ahaadees Me'n Aaya Ke Nabi e Kareem ﷺ Ne Witr Ki Namaaz Sawaari Par Ada Farmaayi, Jabke Farz Wa Waajib Namaaze'n Sawaari Par Ada Karna Durust Nahee'n, To Iska Jawaab Yeh Hai Ke Woh Namaaz Witr Ke Waajib Hone Se Pehle Ka Waaqe'ah Hai Ya Phir Woh Uzar Ki Bina Par Tha Jaisa Ke Rasoole Akram ﷺ Ne Keechad Wagairah Ke Uzar Ki Buniyaad Par Ba'az Martaba Farz Namaaz Sawaari Par Padhi, To Iska Yeh Matlab Nahee'n Ke Yeh Farz Nahee'n Raha, Baher Haal In Tamaam Riwaayato'n Se Witr Ka Waajib Hona Roz e Roshan Ki Tarah Zaahir Ho Gaya, Musalmaan Keliye To Huzoor ﷺ Ki Ek Hi Riwaayat Kaafi Hai Magar Jo In Sab Riwaayato'n Ke Hone Ke Baawajood Nahee'n Maane To Uska Koi Ilaaj Nahee'n, Mazkoorah Baala Riwaayato'n Me'n Saaf Saaf Lafzo'n Me'n Gin Gin Kar Waazeh Andaaz Me'n Bataaya Gaya Ke Huzoor ﷺ Witr Ki Namaaz 3 Rak'at Ada Farmaaya Karte The, Pehli Rak'at Me'n Fulaa'n Soorat Doosri Me'n Fulaa'n Aur Teesri Me'n Fulaa'n, Ab Aap Khud Sochiye Ke Agar Witr Me'n Sirf Ek Hi Rak'at Hoti To Doosri Aur Teesri Rak'at Ki Baat Kahaa'n Se Aati? Neez Hazrat Aa'yesha Radiallaahu Anha Ne Bayaan Farmaaya Ke, Ramzaan Ho Ya Gair Ramzaan, Huzoor ﷺ Ki Aa'dat Yehi Thi Ke Aap ﷺ Aath Rak'aat Tahajjud Aur 3 Rak'aat Witr Ada Farmaaya Karte The, Lehaaza Woh Log Jo Namaaz Padhne Me'n Badi Diqqat Aur Pareshaani Samajhte Hai'n Aur Ek Hi Rak'at Witr Padh Kar Bhaagna Chaahte Hai'n, Unhe'n Apni Nafsaani Khwaahishaat Se Nikal Kar Huzoor ﷺ Ke Daa'imi Amal Ki Pairwi Karni Chaahiye Kyu'nke Ek Sachche Musalmaan Ki Nishaani Yehi Hai.
By Alahazrat Foundation Reasearch Team - 7710809266/9892708816
