Ahle Sunnat Wa Jamaa'at Ka Aqeedah Hai Ke Jumla Ahle Bait e At'haar Se Mohabbat Karna Zaroori Hai, Unki Ta'zeem Wa Tauqeer Aur Adab Wa Ahteraam Musalmaano'n Ka Deen Hai, Jo Ahle Bait e At'haar Se Mohabbat Na Kare Woh Sunni Nahee'n Ho Sakta.
Ahle Bait e At'haar Me'n Kaun Kaun Shaamil Hai'n :- Ahle Bait e At'haar Me'n Rasoolullaah ﷺ Ki Woh Aal Wa Aulaad Muraad Hai'n Jin Par Sadqa Haraam Hai, Unme'n Sayyaduna Ali Radiallaahu A'nhu Ki Aulaad, Sayyaduna Ja'far Radiallaahu A'nhu Ki Aulaad, Sayyaduna Aqeel Radiallaahu A'nhu Ki Aulaad, Sayyaduna Abbaas Radiallaahu A'nhu Ki Aulaad, Banu Haaris Bin Abdul Muttalib Aur Nabi e Akram ﷺ Ki Tamaam Azwaaj e Mutahharaat Aur Banaat e Taaheraat Radiallaahu A'nhum Shaamil Hai'n.
Saadaat e Kiraam Me'n Kaun Kaun Shaamil Hai'n :- Ahle Bait e At'haar Me'n Saadaat e Kiraam Shaamil Hai'n Lekin Saadaat e Kiraam Me'n Ahle Bait e At'haar Me'n Se Har Ek Shaamil Nahee'n Balke Saadaat e Kiraam Me'n Ahle Bait e At'haar Me'n Se Hazrat Ali Radiallaahu A'nhu Ki Sirf Woh Aulaade'n Shaamil Hai'n Jo Hazrat Faatima Radiallaahu A'nha Se Hai'n, Phir Saadaat e Kiraam Me'n Qayaamat Tak Hazraat e Hasnain e Kareemain Radiallaahu A'nhuma Ki Aulaade'n Shaamil Hai'n.
Chunaanche Alahazrat Imaam e Ahle Sunnat Imaam Ahmad Raza Khaan Qaadri Barelvi A'laihir Rehma Likhte Hai'n Ke Haa'n Allaah Paak Ne Yeh (Siyaadat Ki) Fazeelat Khaas Imaam Hasan Wa Imaam Husain Aur Unke Haqeeqi Bhaayi Behno'n Ko Ata Farmaayi Ke Woh Rasoolullaah ﷺ Ke Bete Thehre, Phir Unki Jo Khaas Aulaad Hai Unme'n Bhi Wohi Qaa'idah Aa'm Jaari Huwa Ke Apne Baap Ki Taraf Mansoob Ho'n, Isliye Sibtain Kareemain Ki Aulaad Sayyad Hai'n Na Ke Banaat e Faatima Radiallaahu A'nha Ki Aulaad Ke Woh Apne Waalido'n Hi Ki Taraf Nisbat Ki Jaaye'ngi. (Fataawa Razviya Mutarjim, Jild No.13, Safha No.368, Masla No.119)
Alahazrat Imaam e Ahle Sunnat A'laihir Rehma Ne Goya Saadaat e Izaam Ka Ta'aarruf Pesh Farmaaya Hai Ke Saadaat Kise Kehte Hai'n ? To Mukhtasar Magar Jaame Andaaz Me'n Bataaya Ke Siyaadat Ek Azeem Ne'mat Hai Iski Badi Fazeelat Hai Aur Siyaadat Ki Fazeelat Se Allaah Paak Ne Sirf Aur Sirf Aulaad e Faatima Hi Ko Maala Maal Kiya Baaqi Aur Kisi Ki Aulaad Ko Nahee'n, Ya'ni Aulaad e Faatima Radiallaahu A'nha Me'n Se Aulaad e Hasnain Kareemain Radiallaahu A'nhuma Ki Aulaad Siyaadat Ki Fazeelat Se Maala Maal Huwee'n Aur Yeh Silsila Qayaamat Tak Chalta Rahega Ke Jo Bhi Imaam e Hasan Wa Husain Radiallaahu A'nhuma Ki Aulaad Se Ho'nge Woh Siyaadat Ki Fazeelat Se Maala Maal Ho'nge Aur Saadaat Kehlaaye'nge.
Ab Akaabireen e Ahle Sunnat Wa Jamaa'at Ki Chand Ibaarate'n Mulaaheza Farmaaye'n :-
Gausul Aa'lam Mehboob e Yazdaani Mujaddid e Waqt Hazrat Sayyad Makhdoom Ashraf Jahaa'ngeer Simnaani Chishti A'laihir Rehma Ne Likha Ke Ahle Bait e At'haar Aur Aqraba Sarkaar e Mustafa ﷺ Ka Ahteraam Har Momin Par Laazmi Hai Aur Jo Aale At'haar Ki Azmat Nahee'n Rakhta Uska Imaan Za'eef Hai Aur Woh Huzoor Sayyad Yaumun Nushoor (ﷺ) Ki Har Qism Ki Rehmat Se Mehroom Hai Hatta Ke Shafaa'at Se Bhi Usko Hissa Milna Dushwaar Hai. (Bahawaala Tafseerul Hasanaat Az Sayyad Muhammad Ahmad Qaadri Ashrafi Laahori Rehmatullaah A'laih, Tafseer Sureh Shoora, Aayat No.23)
Alahazrat Imaam e Ahle Sunnat Imaam Ahmad Raza Khaan Qaadri Barelvi A'laihir Rehma Baargaah e Rabbul Aa'lameen Me'n Yoo'n Arz Karte Hai'n,
Hubbe Ahle Bait De Aale Muhammad Keliye
Kar Shaheed e Ishq Hamzah Peshwa Ke Waaste
2 Jahaa'n Me'n Khaadim e Aale Rasoolullaah Kar
Hazrat e Aale Rasoole Muqtada Ke Waaste
(Hadaa'iq e Bakhshish)
Alahazrat Imaam e Ahle Sunnat A'laihir Rehma Ek Jagah Aur Likhte Hai'n Ke Ham To Bihamdillaah Sarkaar Ahle Bait (Kiraam) Ke Gulaamaan e Khaan Zaad Hai'n (Aur Mouroosi Khidmatgaar, Khidmatguzaar Hai). (Fataawa Razviya Mutarjim, Jild No.29, Safha No.377, Risaala Ae'teqaadul Ahbaab)
Neez Alahazrat Imaam e Ahle Sunnat Imaam Ahmad Raza Khaan Qaadri Barelvi A'laihir Rehma Ek Aur Jagah Likhte Hai'n Ke Yeh Faqeer e Zaleel Bihamdihi Ta'aala Hazraat e Saadaat e Kiraam Ka Adna Gulaam Wa Khaakpa Hai, Unki Mohabbat Wa Azmat Zariya Nijaat Shafaa'at Jaanta Hai. (Fataawa Razviya Mutarjim, Jild No.29, Safha No.588/589, Masla No.167)
Mufassir e Qur'aan Sadrul Afaazil Hazrat Sayyad Na'eemuddeen Qaadri Ashrafi Muraadaabaadi A'laihir Rehma Likhte Hai'n Ke Huzoor Sayyad e Aa'lam ﷺ Ki Mohabbat Aur Huzoor Nabi e Kareem ﷺ Ke Aqaarib Ki Mohabbat Deen Ke Faraa'iz Me'n Se Hai. (Tafseer Khazaa'inul Irfaan Ma Kanzul Imaan, Sureh Shoora, Aayat No.33)
Saadaat e Kiraam Ki Mohabbat Ka Mutaalba Khud Allaah Paak Ne Kiya Hai, Rabbul Aa'lameen Irshaad Farmaata Hai,
Tarjuma - Aye Mehboob Aap Kahiye Ke Mai'n Iss (Tableeg e Risaalat) Par Tum Se Koi Ujrat Talab Nahee'n Karta Siwaaye Qaraabatdaaro'n Ki Mohabbat Ke.
Mazkoorah Baala Aayat Ki Tafseer Me'n Hazrat Sa'eed Bin Jubair Ne Kaha Ke Qurba Se Muraad Aale Muhammad ﷺ Hai'n. (Tafseer Tibyaanul Qur'aan, Az Allaama Gulaam Rasool Sa'eedi A'laihir Rehma, Tafseer Sureh Shoora, Aayat No.23)
Ahle Bait e Izaam Ki Mohabbat Ka Mutaalba Apni Ummat Se Rasoolullaah ﷺ Ne Bhi Kiya Hai,
Hazrat Abdullaah Bin Abbaas Radiallaahu A'nhuma Kehte Hai'n Ke Allaah Ke Nabi ﷺ Ne Farmaaya, Aye Logo ! Allaah Se Mohabbat Karo Kyu'nke Woh Tumhe'n Apni Ne'mate'n Khila Raha Hai, Aur Mohabbat Karo Mujhse Allaah Ki Khaatir, Aur Mere Ahle Bait Se Meri Khaatir. (Tirmizi Shareef, Hadees No.3789)
Neez Hadees e Paak Me'n Hai Ke Aye Logo ! Apni Aulaad Ko 3 Cheeze'n Sikhaao, Apne Nabi "Muhammad Mustafa ﷺ" Se Mohabbat, Ahle Bait Se Mohabbat Aur Qur'aan Padhna. (Al-Jaame'us Sageer, Az Allaama Jalaaluddeen Suyuti, Jild No.1, Safha No.51, Raqam 311)
Hazrat Ali Radiallaahu A'nhu Se Marwi Hai, Farmaate Hai'n Ke Rasoolullaah ﷺ Ne Irshaad Farmaaya, Jo Mere Ahle Bait Me'n Se Kisi Ke Saath Achcha Sulook Karega Mai'n Roz e Qayaamat Uska Sila Use Ata Farmaau'nga. (Kanzul Ummaal, Jild No.12, Safha No.95, Hadees No.34152)
Hazrat Usmaan Bin Affaan Radiallaahu A'nhu Se Marwi Hai Ke Nabi e Akram ﷺ Ne Irshaad Farmaaya, Jo Shakhs Aulaad e Abdul Muttalib Me'n (Se) Kisi Ke Saath Duniya Me'n Neki Kare Uska Sila Dena Mujh Par Laazim Hai Jab Woh Roz e Qayaamat Mujh Se Milega. (Taareekh e Bagdaad, Jild No.11, Safha No.311)
Hazrat Ali Radiallaahu A'nhu Se Marwi Hai Ke Nabi e Akram ﷺ Ne Irshaad Farmaaya, Sabse Pehle Mere Paas Hauz e Kausar Par Aane Waale Mere Ahle Bait Hai'n Aur Meri Ummat Se Mere Chaahne Waale. (Kanzul Ummaal, Jild No.12, Safha No.100, Hadees No.34177, Bahawaala Fataawa Razviya, Jild No.23, Safha No.247, Masla No.66)
Ahle Bait e Nabi Me'n Se Koi Bhi Jahannami Nahee'n :-
Hadees e Paak Me'n Hai Ke Nabi e Akram ﷺ Ne Irshaad Farmaaya Ke Mai'n Ne Apne Rab A'zzowajal Se Sawaal Kiya Ke Mere Ahle Bait Me'n Se Kisi Ko Dozakh Me'n Na Daale Usne Meri Yeh Muraad Ata Farmaayi. (Kanzul Ummaal, Hadees No.33149, Bahawaala Fataawa Razviya, Jild No.15, Safha No.731)
Ahle Bait Azaab Se Bari Hai'n :-
Hadees e Paak Me'n Hai Ke Hazrat Ibne Abdullaah Bin Abbaas Radiallaahu A'nhuma Se Riwaayat Hai Ke Rasoolullaah ﷺ Ne Hazrat Faatima Radiallaahu A'nha Se Irshaad Farmaaya, Beshak Allaah Paak Na Tujhe Azaab Farmaayega Na Teri Aulaad Ko. (Al-Mo'jamul Kabeer Lit Tabraani, Hadees No.11685)
Ahle Bait e Nabi Jahannam Ki Aag Me'n Nahee'n Ja Sakte :-
Tafseer e Qurtubi Me'n Saahib e Tafseer e Qurtubi Ne Aayat
"وَلَسَوۡفَ یُعۡطِیۡکَ رَبُّکَ فَتَرۡضٰی"
Ki Tafseer Me'n Hazrat Abdullaah Bin Abbaas Radiallaahu A'nhuma Ne Farmaaya Ke Allaah Paak Ne Huzoor e Aqdas ﷺ Se Raazi Kar Dene Ka Wa'dah Farmaaya Aur Muhammad ﷺ Ki Raza Isme'n Hai Ke Unke Ahle Bait (At'haar) Se Koi Dozakh Me'n Na Jaaye. (Tafseer e Qurtubi, Sureh Duha, Aayat No.4/5 Tak, Bahawaala Fataawa Razviya Mutarjim, Jild No.15, Safha No.731/732)
Hadees e Paak Me'n Hai Ke Hazrat Abdullaah Bin Mas'ood Radiallaahu A'nhu Se Marwi Hai Ke Nabi e Akram ﷺ Ne Irshaad Farmaaya, Faatima (Meri Beti Ka) Isliye Naam Huwa Ke Allaah Paak Ne Use Aur Uski Nasal Ko Roze Qayaamat Aag Se Mehfooz Farma Diya. (Mawaahibul Ladunniya, Jild No.1, Safha No.482)
Ahle Bait Ki Ta'zeem Na Karne Waale Par La'nat Aur Wa'eed :-
Hadees e Paak Me'n Hai Ke Nabi e Akram ﷺ Ne Irshaad Farmaaya, Jise Pasand Ho Ke Uski Umar Me'n Barkat Ho Khuda Use Apni Di Huwi Ne'mat Se Behramand Kare To Use Laazim Hai Ke Mere Ba'ad Mere Ahle Bait Se Achcha Sulook Kare, Jo Aisa Na Kare Uski Umar Ki Barkat Ud Jaaye Aur Qayaamat Me'n Mere Saamne Kaala Muh Lekar Aaye. (Kanzul Ummaal, Jild No.12, Safha No.99, Hadees No.34171)
Isi Tarah Ek Aur Hadees e Paak Me'n Hai Ke Nabi e Akram ﷺ Ne Irshaad Farmaaya, Beshak Allaah Paak Ki 3 Hurmate'n Hai'n Jo Unki Hifaazat Kare Allaah Paak Uske Deen Wa Duniya Mehfooz Rakhe, Aur Jo Unki Hifaazat Na Kare Allaah Uske Deen Ki Hifaazat Farmaaye Na Duniya Ki, Ek Islaam Ki Hurmat, Doosri Meri Hurmat, Teesri Meri Quraabat Ki Hurmat. (Kanzul Ummaal, Jild No.1, Safha No.77, Hadees No.308)
Ek Aur Hadees e Paak Me'n Hai Ke Nabi e Akram ﷺ Ne Irshaad Farmaaya, Beshak Faatima Ne Apni Paarsaayi Ki Hifaazat Ki To Allaah Paak Ne Uspar Aur Uski Aulaad Par Dozakh Ki Aag Haraam Farma Di. (Mustadrak, Hadees No.4726, Bahawaala Fataawa Razviya Mutarjim, Jild No.29, Safha No.641, Masla No.201)
By Alahazrat Foundation Research Team - 7710809266/9892708816
