Duniya Me'n Bahot Se Giroh (Firqe) Paaye Jaate Hai'n Magar Ham Musalmaano'n Ko Pukhta Yaqeen Karlena Chaahiye Ke Jannati Giroh (Jamaa'at) Ahle Sunnat Wa Jamaa'at Hai, Lehaaza Ham Sabko Chaahiye Ke Mukammal Taur Par Ahle Sunnat Wa Jamaa'at Ko Mazbooti Se Thaam Le Aur Deegar Giroho'n (Firqo'n) Ki Baato'n Par Qat'an Dhyaan Na De'n Balke Jo Shakhs Yeh Nazariya Pesh Kare Ke Saare Giroh (Firqe) Jannati Hai'n Ya Kaunsa Jannati Hai Hame'n Nahee'n Ma'loom Yeh Gumraah Kun Baate'n Hai'n Aur Aisa Insaan Khud Gumraah Hai.
Ab Dalaa'il Mulaaheza Farmaaye'n Taake Ahle Sunnat Wa Jamaa'at Ke Jannati Giroh (Jamaa'at) Hone Ki Tashaffi e Qalb Bhi Ho Jaaye Aur Apne Nazariye Par Dalaa'il Ka Ilm Bhi Ho Jaaye.
1- Tirmizi Shareef, Hadees No.264.
Tarjuma - Rasoolullaah ﷺ Ne Farmaaya, Bani Israa'eel 72 Firqo'n Me'n Bat Gaye Aur Meri Ummat 73 Firqo'n Me'n Bat Jaayegi Aur Ek Firqe Ko Chhod Kar Baaqi Sabhi Jahannam Me'n Jaaye'nge, Sahaaba Ne Arz Kiya, Ya Rasoolallaah ﷺ ! Yeh Kaunsi Jamaa'at Hogi ? Aapne Farmaaya, Yeh Woh Log Ho'nge Jo Mere Aur Mere Sahaaba Naqshe Qadam Par Ho'nge.
2 - Abu Daawood Shareef, Hadees No.4597.
Tarjuma - Rasoolullaah ﷺ Ne Farmaaya, Khabardaar ! Tumse Pehle Ahle Kitaab 72 Firqo'n Me'n Taqseem Hogaye The Aur Yeh Millat 73 Firqo'n Me'n Taqseem Hogi, 72 Aag Me'n Jaaye'nge Aur Ek Firqa Jannat Me'n Jaayega Yehi "Al-Jamaa'ah" Hoga.
Iss Hadees Shareef Se Bilkul Waazeh Hai Ke Sirf Ek Giroh (Jamaa'at) Hi Jannati Hai, Iss Hadees Par Ham Ahle Sunnat Ka Imaan Hai, Iss Sabab Ham Ahle Sunnat Kehte Hai'n Ke Sirf Ek Hi Giroh (Jamaa'at) Jannati Hai Aur Woh Giroh (Jamaa'at) Ahle Sunnat Wa Jamaa'at Ka Hai.
Ya'ni Banaam e Islaam Wa Musalmaan Ahle Sunnat Wa Jamaa'at Hi Ek Aisa Mazhab Wa Maslak Hai Jo Ifraat Wa Tafreet Se Bilkul Khaali Hokar Apni Ahtiyaat Wa Ae'tedaal Pasand Rawish Me'n Har Ek Firqe Se Munfarid Wa Mumtaaz Hai Aur Yehi Ahle Sunnat Wa Jamaa'at Woh Mazhab e Haq Hai Jo Rasoole Akram ﷺ Ki Peshan Goyi Ke Meri Ummat Me'n 73 Firqe Ho'nge Unme'n 72 (Firqe) Jahannami (Ho'nge) Aur Ek (Firqa) Naaji (Nijaat Waala) Hai, Isi Naaji Firqe Ka Doosra Naam Ahle Sunnat Wa Jamaa'at Hai.
Aqwaal e Aslaaf :-
3- Mirqaatul Mafaateeh Sharah Mishqaatul Masaabeeh, Jild No.1, Safha No.259, Kitaabul Imaan)
Tarjuma - Hazrat Mulla Ali Qaari A'laihir Rehma 73 Firqo'n Waali Hadees Ko Bayaan Karke Uski Tashreeh Me'n Ek Jagah Likhte Hai'n Ke Iss Baat Me'n Koi Shak Wa Shubah Nahee'n Hai Ke Jannati Giroh (Jamaa'at) Sirf Ahle Sunnat Wa Jamaa'at Hai.
4 - Al Milala Wal Nihal, Jild No.1, Safha No.11
Tarjuma - Allaama Abul Fateh Muhammad Bin Abdul Kareem Bin Abi Bakar Shehristaani (Wafaat 548 Hijri) Likhte Hai'n Ke Khabar Di Nabi e Akram ﷺ Ne Anqareeb Meri Ummat 73 Firqo'n Me'n Bat Jaayegi Usme'n Nijaat Yaafta Firqa Sirf Ek Hoga Aur Baaqi Halaak Ho'nge Poochha Gaya : Aur Nijaat Yaafta Kaunsa Hoga ? Farmaaya : Ahle Sunnat Wa Jamaa'at, Poochha Gaya : Aur Sunnat Aur Jamaa'at Se Kya Muraad Hai ? Farmaaya : (Jis Tareeqe Par Aaj Mai'n Aur Mere Sahaaba Hai'n).
5 - Tafseer Durre Mansoor, Jild No.2, Safha No.291, Tafseer Sureh Aale Imraan, Aayat No.106.
Tarjuma - Allaama Jalaaluddeen Suyuti A'laihir Rehma Likhte Hai'n Ke Qayaamat Ke Din Ba'az Chehre Khoobsurat Ho'nge Iski Tafseer Me'n Hazrat Ibne Abbaas Radiallaahu A'nhuma Aur Hazrat Abdullaah Bin Umar Radiallaahu A'nhuma Aur Hazrat Abu Sa'eed Khudri Radiallaahu A'nhu Jaise Sahaaba Farmaate Hai'n, Isse Muraad Ahle Sunnat Wa Jamaa'at Hai'n.
6 - Tafseer e Mazhari, Tafseer Sureh Aale Imraan, Aayat No.105/106, Safha No.116.
Tarjuma - Hazrat Ibne Umar Radiallaahu A'nhuma Se Riwaayat Hai Ke Nabi e Akram ﷺ Ne Irshaad Farmaaya Ke Qayaamat Ke Din Ahle Sunnat Ke Chehre Chamakte Ho'nge Aur Bad Mazhabo'n Ke Chehre Siyaah Ho'nge.
7 - Sharhus Sudoor, Safha No.278, Fasal 2)
Tarjuma - Allaama Jalaaluddeen Suyuti A'laihir Rehma Likhte Hai'n Ke Allaama Ismaa'eel Bin Ibraaheem Ne Haakim Abu Ahmad Haakim Rehmatullaah A'laih Ko Ba'ad e Wisaal Khwaab Me'n Dekha Aur Poochha, Kaunsa Firqa Aksar Nijaat Paane Waala Hai ? To Farmaaya Woh Ahle Sunnat Ka Giroh Hai.
Mufassireen Wa Muhaddiseen Aur Fuqaha e Kiraam Ki In Tamaam Ibaaraat Se Saaf Aur Waazeh Hogaya Ke Jannati Giroh Sirf Aur Sirf Ahle Sunnat Wa Jamaa'at Hai.
By Alahazrat Foundation Research Team - 7710809266/9892708816
