Aajkal Yeh Sawaal Bad Mazhabo'n Ki Taraf Se Khoob Kiya Jaaraha Hai Aur Jawaab Me'n Kaha Jaaraha Hai Ke Allaah Arsh Par Hai, To Aa'iye Iss Sawaal Ka Jawaab Samajhne Keliye Qur'aan Ki Chand Aayaat Ko Dekhte Hai'n Phir Chand Hadeeso'n Ko Dekhte Hai'n Aur Phir Aqwaal e Aslaaf Ko Dekhte Hai'n Phir Ham Kisi Nateeje Par Paho'nchte Hai'n Ke Jab Ham Se Sawaal Ho Ke Allaah Paak Kahaa'n Hai To Hamaara Jawaab Kya Hona Chaahiye Aur Iss Ta'alluq Se Hamaara Kya Aqeedah Hona Chaahiye To Aa'iye Ham Pehle Alahazrat Imaame Ahle Sunnat Imaam Ahmad Raza Khaan Qaadri Barelvi A'laihir Rehma Ka Qaul Naqal Karte Hai'n,
Alahazrat Imaam e Ahle Sunnat Imaam Ahmad Raza Khaan Barelvi Qaadri A'laihir Rehma Ne Ahle Sunnat Wa Jamaa'at Ka Aqeedah Iss Ta'alluq Se Jo Bayaan Farmaaya Hai Usme'n Se Chand Yeh Hai, Allaah Paak Azal Me'n Jaisa Tha Waisa Hi Ab Hai Aur Waisa Hi Hamesha Hamesha Rahega, Yeh Kabhi Nahee'n Ho Sakta Ke Allaah Paak Pehle Ek Taur Par Ho Phir Badal Kar Aur Haalat Par Ho Jaaye, Allaah Paak Jism Nahee'n Aur Jism Waali Kisi Cheez Ko Usse Lagaao Nahee'n, Allaah Paak Shakal Wa Soorat Se Paak Hai, Allaah Paak Jehat Aur Taraf Se Paak Hai, Ya'ni Jis Tarah Allaah Paak Ke Baare Me'n Yeh Nahee'n Keh Sakte Ke Woh Dehne Baaye'n Ya Neeche Hai Usi Tarah Jehat Ke Ma'ni Par Allaah Paak Ke Baare Me'n Yeh Bhi Nahee'n Keh Sakte Ke Woh Aage Peechhe Ya Upar Hai, Allaah Paak Keliye Jagah Aur Makaan Nahee'n, Isi Tarah Allaah Paak Uthne, Baithne, Utarne, Chadhne, Chalne, Thaherne Jaise Tamaam Awaariz e Jism Wa Jismaaniyaat Se Paak Wa Munazzah Hai, Aur Yeh Sab Ke Sab Aqeede Zarooriyaat e Deen e Islaam Se Hai Ya'ni In Aqaa'id Ka Munkir Kaafir Khaarij e Islaam Hai. (Maakhooz Az Fataawa Razviya Mutarjim, Jild No.29, Safha No.121/122)
Qur'aan Shareef Ki Aayaat 2 Qism Ki Hai'n, Pehli Aayaat e Mohkamaat Jinke Ma'ni Saaf Be Dikkat Hai'n Jaise Allaah Paak Ki Paaki Wa Be Niyaazi Wa Be Misli Ki Aayate'n Maslan
1- Sureh Aale Imraan Aayat No.97.
Tarjuma - Beshak Allaah Saare Jahaan Se Be Niyaaz Hai.
2- Sureh Shoora, Aayat No.11.
Tarjuma - Uske Misl Koi Cheez Nahee'n.
3- Sureh Ikhlaas, Aayat No.4.
Tarjuma - Uske Jod Ka Koi Nahee'n.
In Aayaat Ke Ma'ni Me'n Koi Dikkat Nahee'n, Bilkul Saaf Ma'ni Hai'n, Aisi Aayato'n Par Imaan Laana Zarooriyaat e Deen e Islaam Se Hai.
Doosri Aayaat e Mutashaabehaat Jinke Ma'na Me'n Ishkaal Hai Ya To Zaahir Lafz Se Kuchh Samajh Hi Nahee'n Aata Jaise Huroof e Mukatte'aat "Alif Laam Meem" Wagairah Ya Jo Samajh Me'n Aata Hai Woh Allaah Paak Par Muhaal Hai, Maslan
1- Sureh Taaha, Aayat No.5.
Tarjuma - Woh Bada Maher Waala Usne Arsh Par Istawa Farmaaya.
2- Sureh Yoonus, Aayat No.3.
Tarjuma - Phir Usne Arsh Par Istawa Farmaaya.
In Aayaat Aur In Jaisi Deegar Mutashaabehaat Aayaat Ke Lafzo'n Ke Zaahiri Ma'na Jo Hamaari Samajh Me'n Aate Hai'n Hargiz Muraad Nahee'n, To Phir Sawaal Paida Hota Hai Ke Aakhir In Mutashaabehaat Aayaat Ke Ma'ni Kya Le'n ? To Jawaab Yeh Hai Ke Behtar Hai In Aayaat e Mutashaabehaat Ka Haqeeqi Ilm Allaah Par Chhode'n, Hame'n Hamaare Rab Ne Aayaat e Mutashaabehaat Ke Peechhe Padne Se Mana Farmaaya Aur Unki Ta'ayyun (Muta'ayyan Karna) Muraad Me'n Khauz (Gaur Wa Fikr) Karne Ko Gumraahi Bataaya To Ham Had Se Baahar Kyu'n Qadam Rakhe'n, Balke Ham Qur'aan Ke Bataaye Huwe Raaste Ko Apnaate Hai'n, Qur'aan Shareef Me'n Hai,
Tarjuma - Wohi Hai Jisne Tum Par Yeh Kitaab Utaari Iski Kuchh Aayate'n (Mohkam) Saaf Ma'ni Rakhti Hai'n Woh Kitaab Ki Asal Hai'n Aur Doosri (Aayaat e Mutashaabehaat) Woh Hai'n Jinke Ma'na Me'n Ishtabaah Hai, Woh Jinke Dilo'n Me'n Kaji Hai Woh Ishtabaah Waali Ke Peechhe Padte Hai'n Gumraahi Chaahne Aur Uska Pehlu Dhoo'ndne Ko Aur Uska Theek Pehlu Allaah Hi Ko Ma'loom Hai Aur Pukhta Ilm Waale Kehte Hai'n Ham Ispar Imaan Laaye Sab Hamaare Rab Ke Paas Se Hai Aur Naseehat Nahee'n Maante Magar Aqal Waale. (Sureh Aale Imraan, Aayat No.7)
Ab Chalte Hai'n Iss Taraf Ke Kuchh Log Qaum Ko Dhoka Dete Hai'n Ke Qur'aan Majeed Me'n "Woh Bada Maher Waala Usne Arsh Par Istawa Farmaaya" Ya "Phir Usne Arsh Par Istawa Farmaaya" In Dono'n Aayaat Se Saabit Hai Ke Allaah Paak Ki Zaat Arsh Par Hai Jabke Ham Ahle Sunnat Wa Jamaa'at Kehte Hai'n Ke Mazkoorah Dono'n Aayaat'en Aur In Jaisi Deegar Aayaat Mutashaabehaat Me'n Se Hai'n Aur Jab Mutashaabehaat Me'n Se Hai To Phir Yeh Aqeedah Kaise Bana Le'n Ke Allaah Paak Ki Zaat Arsh Par Hai ? Ho Sakta Hai Koi Dhoka Dete Huwe Kahe Ke Yeh Aayaat Mutashaabehaat Me'n Se Nahee'n Hai'n, To Aa'iye Mufassireen Ki Kutub Dekhte Hai'n Woh Kya Farmaate Hai'n,
Tafseer e Bagvi Me'n Hai Ke "Rahe Ahle Sunnat Woh Yeh Farmaate Hai'n Ke Arsh Par Istawa Allaah Paak Ki Ek Sifat Bila Kaif Hai, Musalmaan Par Farz Hai Ke Uspar Imaan Laaye Aur Uske Ma'ni Ka Ilm Khuda Par Sau'npe. (Tafseer e Bagvi, Jild No.2, Safha No.197)
Tafseer e Nasafi Me'n Hai Ke "Qur'aan e Azeem Ki Ba'az Aayate'n Mohkamaat Hai'n Jinke Ma'ni Saaf Hai'n Ahtemaal Wa Ishtabaah Ko Inme'n Guzar Nahee'n Yeh Aayaat To Kitaab Ki Asli Hai'n Ke Mutashaabehaat Unhee'n Par Hamal Ki Jaaye'ngi Aur Unke Ma'ni Unhee'n Ki Taraf Phere Jaaye'nge Aur Ba'az Doosri Mutashaabehaat Hai'n Jinke Ma'ni Me'n Ishkaal Wa Ahtemaal Hai Jaise Aayat e Kareema "Phir Usne Arsh Par Istawa Farmaaya" Istawa Baithne Ke Ma'ni Par Bhi Aata Hai Aur Qudrat Wa Galba Ke Ma'ni Par Bhi Aur Pehle Ma'ni Allaah Paak Par Muhaal Hai'n Ke Aayaat e Mohkamaat Allaah Paak Ko Baithne Se Paak Wa Munazzah Bata Rahi Hai'n Un Mohkamaat Se Ek Yeh Aayat Hai "Tarjuma - Allaah Ke Misl Koi Cheez Nahee'n" Phir Woh Jinke Dil Haq Se Phire Huwe Hai'n Aur Woh Bad Mazhab Log Huwe Woh To Aayaat e Mutashaabehaat Ke Peechhe Padte Hai'n, Aisi Aayato'n Ki Aad Lete Hai'n Jinme'n Unki Badmazhabi Ke Ma'ni Ka Ahtemaal Ho Sake Jo Aayaat e Mohkamaat Ke Mutaabiq Nahee'n Aur Iss Matlab Ka Bhi Ahtemaal Ho Jo Mohkamaat Ke Mutaabiq Aur Ahle Sunnat Ka Mazhab Hai Badmazhab In Aayaat e Mutashaabehaat Ki Aad Isliye Lete Hai'n Ke Fitna Uthaaye'n Aur Logo'n Ko Sachche Deen Se Behkaaye'n Unke Woh Ma'ni Bataaye'n Jo Apni Khwaahish Ke Mawaafiq Ho'n Aur Unke Ma'ni To Koi Nahee'n Jaanta Magar Allaah, Allaah Hi Ko Khabar Hai Ke Unke Haq Ma'na Kya Hai'n Jin Par Unka Utaarna Waajib Hai. (Tafseer e Nasafi, Jild No.1, Safha No.237)
Kitaab "Al-Asma Wassifaat" Me'n Imaam Bayhaqi Likhte Hai'n Ke "Hamaare As'haab e Mutaqaddimeen Radiallaahu A'nhum Istawa Ke Kuchh Ma'ni Na Kehte The Na Usme'n Aslan Zabaan Kholte Jis Tarah Tamaam Sifaat e Mutashaabehaat Me'n Unka Yehi Mazhab Hai". (Al-Asma Wassifaat Lil Bayhaqi, Jild No.2, Safha No.303, Raqam 864)
Fataawa Aa'lamgeeri Aur Behrur Raa'iq Me'n Hai Ke Allaah Paak Keliye Jagah Aur Makaan Saabit Karna Kufr Hai. (Fataawa Aa'lamgeeri, Jild No.2, Safha No.259 Aur Behrur Raa'iq, Jild No.5, Safha No.120)
Fataawa Qaazi Khaan Me'n Hai Ke Kisi Ne Yeh Kaha Jo Khuda Aasmaano'n Me'n Hai Use Pata Hai Ke Mere Paas Koi Cheez Nahee'n Hai, To Tehqeeq Ke Usne Kufr Kiya Isliye Ke Allaah Makaan Se Paak Hai. (Kyu'nke Usne Allaah Paak Ko Aasmaan Me'n Maana Isliye Uspar Kufr Ka Fatwa Hai). (Fataawa Qaazi Khaan, Jild No.4, Safha No.84)
In Tamaam Aqwaal Se Ma'loom Huwa Ke Istawa Ke Ma'ni Kuchh Na Kiye Jaaye Balke Uspar Imaan Laana Zaroori Hai Aur Uske Ma'na Ki Tafteesh Haraam Yehi Tareeqa Jumla Salaf Saaliheen Ka Hai.
Nateeja Nikla Ke Ham Allaah Paak Ke Baare Me'n Yeh Aqeedah Rakhe'n Ke Allaah Paak Azal Se Hai Hamesha Rahega Aur Allaah Paak Azal Se Jaisa Tha Waisa Hai Waisa Hi Rahega Aur Arsh Makaan Hai Balke Arsh Ko Allaah Paak Ne Paida Kiya Hai Lehaaza Arsh Makhlooq Hai, La Jurm Qat'an Yaqeenan Imaan Laana Padega Ke Arsh Wa Farsh Kuchh Uska Makaan Nahee'n, Na Woh Arsh Me'n Hai Na Ma Tehtus Sara Me'n, Na Kisi Jagah Me'n, Haa'n Uska Ilm Wa Qudrat Wa Sama Wa Basar Wa Mulk Har Jagah Hai.
Tafseer e Madaarik Me'n Sureh Aa'raaf Ki Tafseer Me'n Imaam Bagvi Rehmatullaah A'laih Likhte Hai'n Ke "Beshak Allaah Paak Arsh Se Pehle Maujood Tha Jab Makaan Ka Naam Wa Nishaan Na Tha Aur Woh Ab Bhi Waisa Hi Hai Jaisa Jab Tha Isliye Ke Badal Jaana To Makhlooq Ki Shaan Hai. (Tafseer e Madaarik, Jild No.1, Safha No.573)
Ma'loom Huwa Ke Allaah Paak Arsh Se Pehle Se Bhi Pehle Hai Balke Hadees e Paak Me'n Waazeh Alfaaz Me'n Maujood Hai Ke Allaah Paak Se Pehle Kuchh Na Tha, Mulaaheza Farmaaye'n,
Bukhaari Shareef Me'n Hai "Allaah Paak Tha Aur Uske Siwa Kuchh Na Tha. (Bukhaari Shareef, Jild No.4, Safha No.105, Hadees No.3191)
Ilzaami Jawaab :-
Agar Koi Dhokebaaz Dhoka Dete Huwe Kahe Nahee'n Qur'aan Majeed Me'n Jahaa'n Jahaa'n Istawa Arsh Ki Baat Huwi Hai Woh Mutashaabehaat Me'n Se Nahee'n Hai Na Usme'n Koi Taaweel Karne Ki Zaroorat Hai Balke Zaahiri Ma'ni Par Aqeedah Banaane Ki Zaroorat Hai, To Phir Aise Logo'n Se Sawaal Hai Neeche Di Gayi Aayaat Wa Ahaadees Ka Jo Zaahiri Ma'na Hai Kya Unke Zaahiri Ma'na Par Bhi Tumhaara Aqeedah Hai Ya Nahee'n ?
Qur'aan Majeed Me'n Hai,
Tarjuma - Tum Dono'n Mere Ghar Ko Saaf Karo. (Sureh Baqarah, Aayat No.125)
Dekhe'n ! Yahaa'n Ka'ba Shareef Ko Allaah Paak Ne Apna Ghar Bataaya To Sawaal Yeh Hai Ke Kya Tum Maante Ho Ke Ka'ba Shareef Allaah Paak Ka Zaati Ghar Hai ? Agar Nahee'n To Phir Yeh Kyu'n Kehte Ho Ke Zaat Ke Ae'tebaar Se Allaah Paak Arsh Par Hai ?
Qur'aan Majeed Me'n Hai,
Tarjuma - Allaah Tumhaare Saath Hai Tum Jahaa'n Bhi Ho. (Sureh Hadeed, Aayat No.4)
Dekhe'n ! Yahaa'n Allaah Paak Khud Keh Raha Hai Ke Allaah Tumhaare Saath Hai, To Ab Sawaal Yeh Hai Ke Kya Tum Maante Ho Ke Allaah Paak Zaati Taur Par Ham Bando'n Ke Saath Hai ? Agar Nahee'n To Phir Kyu'n Kehte Ho Ke Zaat Ke Ae'tebaar Se Allaah Paak Arsh Par Hai ?
Qur'aan Majeed Me'n Hai,
Tarjuma - Aur Aye Mehboob Jab Tum Se Mere Bande Mujhe Poochhe'n To Mai'n Nazdeek Hoo'n. (Sureh Baqarah, Aayat No.186)
Dekhe'n ! Yahaa'n Allaah Paak Khud Keh Raha Hai Ke Mai'n Apne Bando'n Ke Qareeb Hoo'n, To Ab Sawaal Yeh Hai Ke Kya Tum Maante Ho Ke Allaah Paak Zaat Ke Ae'tebaar Se Ham Bando'n Ke Qareeb Hai ? Agar Nahee'n To Phir Kyu'n Kehte Ho Ke Allaah Paak Zaat Ke Ae'tebaar Se Arsh Par Hai ? Agar Haa'n To Phir Sawaal Yeh Hai Ke Arsh To Ham Bando'n Se Bahot Door Hai Aur Yahaa'n Hai Ke Allaah Ham Se Bahot Hi Qareeb Hai To Iska Jawaab Kya Hai ?
Hadees Shareef Me'n Hai,
Tarjuma - Rooh Ko Yeh Kaha Jaata Rahega Hatta Ke Woh Uss Aasmaan Tak Paho'nch Jaaye Jisme'n Allaah Paak Hai. (Ibne Maaja Shareef, Jild No.2, Safha No.1423, Hadees No.4262)
Dekhe'n ! Yahaa'n Hadees Shareef Me'n Saaf Likha Huwa Hai Ke Allaah Paak Aasmaan Me'n Hai, To Ab Sawaal Yeh Hai Ke Kya Tum Maante Ho Ke Allaah Paak Zaat Ke Ae'tebaar Se Aasmaan Me'n Hai ? Agar Nahee'n To Phir Kyu'n Kehte Ho Ke Allaah Paak Zaat Ke Ae'tebaar Se Arsh Par Hai ? Agar Haa'n To Phir Bataaye'n Aasmaan Aur Arsh Dono'n Alag Hai'n Ya Ek Hai ? Agar Dono'n Ek Hai To Daleel Pesh Keejiye ! Agar Dono'n Alag Hai To Phir Arsh Aur Aasmaan Dono'n Jagah Allaah Paak Ko Zaat Ke Ae'tebaar Se Maanne Me Pareshaan Kyu'n Ho ?
Hadees Shareef Me'n Hai,
Tarjuma - Nabi e Akram ﷺ Ne Irshaad Farmaaya Ke Jab Koi Shakhs Namaaz Me'n Ho To Apne Muh Ke Saamne Na Thooke Kyu'nke Namaaz Me'n Muh Ke Saamne Allaah Paak Hota Hai. (Bukhaari Shareef, Jild No.1, Safha No.90, Hadees No.406, Kitaabus Salaat)
Dekhe'n ! Yahaa'n Saaf Likha Huwa Hai Ke Allaah Paak Namaaziyo'n Ke Saamne Hota Hai, To Sawaal Yeh Hai Ke Kya Tum Maante Ho Ke Allaah Paak Zaat Ke Ae'tebaar Se Namaaziyo'n Ke Saamne Hai ? Agar Nahee'n To Phir Kyu'n Kehte Ho Ke Allaah Paak Zaat Ke Ae'tebaar Se Arsh Par Hai.
Hadees Shareef Me'n Hai,
Tarjuma - Nabi e Akram ﷺ Ne Lau'ndi Ko Farmaaya, Allaah Kahaa'n Hai ? Uss Lau'ndi Ne Kaha Aasmaan Me'n, Phir Rasoolullaah ﷺ Ne Poochha, Mai'n Kaun Hoo'n ? To Uss Lau'ndi Ne Kaha Aap Rasoolullaah Hai'n, To Rasoolullaah ﷺ Ne Lau'ndi Ke Maalik Ko Farmaaya Isko Aazaad Kardo Kyu'nke Yeh Momina Hai. (Muslim Shareef, Jild No.1, Safha No.381, Hadees No.537)
Dekhe'n ! Hadees Shareef Me'n Saaf Likha Huwa Hai Ke Lau'ndi Ne Jawaab Me'n Kaha Ke Allaah Paak Aasmaan Me'n Hai, To Ab Sawaal Yeh Hai Ke Kya Tum Maante Ho Allaah Paak Zaat Ke Ae'tebaar Se Aasmaan Me'n Hai ? Agar Nahee'n To Phir Kyu'n Kehte Ho Ke Allaah Paak Arsh Par Hai ?
Iss Qism Ki Bahot Si Aayaat Aur Ahaadees Naqal Ki Ja Sakti Hai'n Magar Itne Par Hi Iktefa Kiya Jaata Hai, Aakhir Me'n Bas Itna Arz Hai Ke Ham Ahle Sunnat Wa Jamaa'at Ka Aqeedah Hai Ke Allaah Paak Zaat Ke Ae'tebaar Se Azal Se Jaisa Tha Waisa Hai Waisa Hi Rahega Hamesha Aur Sifaat Ke Ae'tebaar Se Maslan Ba Ae'tebaar Ilm Wa Qudrat, Samee Wa Baseer Ke Allaah Paak Arsh Par Bhi Hai Zameen Par Bhi Hai, Hamaare Saath Bhi Hai, Hamaare Qareeb Bhi Hai, Namaaziyo'n Ke Saamne Bhi Hai Aur Aasmaan Par Bhi Hai.
By Alahazrat Foundation Research Team - 7710809266/9892708816
