(1) Mujhe Nahee'n Ma'loom Allaah A'zzowajal Ne Jab Mujhe Duniya Me'n Kuchh Na Diya To Mujhe Paida Hi Kyu'n Kiya, Aisa Kehne Waala Kaafir Ho Jaata Hai, Kyu'nke Aap Allaah A'zzowajal Par Ae'teraaz Nahee'n Kar Sakte, Kyu'nke Woh Aapka Khaaliq Hai Aur Khaaliq Par Ae'teraaz Nahee'n Kiya Jaata, Aur Khaaliq Ke Faislo'n Par Sawaal Uthaana Kufr Hai.
(2) Kisi Miskeen Ne Apni Mohtaaji Ko Dekh Kar Yeh Kaha, Ya Allaah A'zzowajal ! Fulaa'n Bhi Tera Bandah Hai, Use Tu Ne Kitni Ne'mate'n De Rakhi Hai'n, Aur Ek Mai'n Bhi Tera Bandah Hoo'n, Mujhe Kis Qadar Ranj Wa Takleef Deta Hai, Aakhir Yeh Kya Insaaf Hai, Aisa Kehna Bhi Kufr Hai, Aisa Kehne Waala Allaah A'zzowajal Ko Insaaf Karne Waala Nahee'n Maan Raha, Isliye Aisa Kehne Waala Bhi Kaafir Hai, Kyu'nke Allaah A'zzowajal Sabse Bada Insaaf Karne Waala Hai, Haa'n Aapko Jo Rajn Wa Gam Ya Pareshaani Paho'nchti Hai Ya To Woh Aapke Bure Aa'maal Ka Nateeja Hai Ya Phir Allaah A'zzowajal Ki Jaanib Se Aazmaa'ish Hai.
(3) Kuchh Log Kehte Hai'n Ke Allaah A'zzowajal Sabr Karne Waalo'n Ke Saath Hai Mai'n Kehta Hoo'n Yeh Sab Bakwaas Hai, Aisa Kehna Qur'aan e Paak Ki Aayat Ka Inkaar Hai, Kyu'nke Allaah A'zzowajal Qur'aan e Paak Me'n Farmaata Hai Ke "Allaah Saabiro'n Ke Saath Hai" (Sureh Baqarah, Aayat No.153) Aur Iss Jumle Me'n Qur'aan e Paak Ki Iss Aayat Ko Ma'aaz Allaah Bakwaas Kaha Jaaraha Hai, Aisa Kehna Bhi Kufr Hai.
(4) Jin Logo'n Ko Mai'n Pyaar Karta Hoo'n Woh Pareshaani Me'n Rehte Hai'n Aur Jo Mere Dushman Hote Hai'n Allaah A'zzowajal Unko Bahot Khush Haal Rakhta Hai, Aisa Kehna Bhi Kufr Hai.
(5) Kaafiro'n Aur Maaldaaro'n Ko Raahate'n Aur Gareebo'n Aur Naadaaro'n Par Aafate'n, Allaah Ke Ghar Ka To Saara Nizaam Hi Ulta Hai, Aisa Kehne Waala Kaafir Hai.
(6) Agar Kisi Ne Beemaari, Be Rozgaari, Gurbat Ya Kisi Museebat Ki Wajah Se Allaah A'zzowajal Par Ae'teraaz Karte Huwe Kaha, Aye Mere Rab ! Tu Mujh Par Kyu'n Zulm Karta Hai, Haalaa'nke Mai'n Ne To Koi Gunaah Kiya Hi Nahee'n, Aisa Kehne Waala Bhi Kaafir Hai. Kyu'nke Aqeeda e Tauheed Yeh Hai Ke Allaah A'zzowajal Zulm Karne Se, Jhoot Bolne Se, Wa'dah Khilaafi Karne Se, Neez Har Woh Kaam Jo Ayb Me'n Shumaar Hota Hai Usse Allaah A'zzowajal Paak Hai, Aur Zulm Karna Yeh Ek Ayb Hai.
Astagfirullaah, La Elaaha Ellallaah Muhammadur Rasoolullaah ﷺ
Guzaarish :- Agar Aapko Koi Kufriya Kalimaat Bakte Huwe Nazar Aaye To Uski Islaah Kare'n Aur Usko Bataaye'n Ke Aise Kufriya Jumle Kehne Waala Kaafir Ho Jaata Hai, Usko Tauba Karke Phirse Kalma Padhna Padega, Agar Shaadi Shudah Hai To Phirse Nikaah Karna Padega, Aur Agar Kisi Peer Se Mureed Tha To Phirse Mureed Hona Padega.
By Alahazrat Foundation Research Team - 7710809266/9892708816
