Alahazrat Imaam e Ahle Sunnat Imaam Ahmad Raza Khaan Qaadri Barelvi A'laihir Rehma Farmaate Hai'n,
Tu Zindah Hai Wallaah Tu Zindah Hai Wallaah
Meri Chashme Aa'lam Se Chhup Jaane Waale
Mazkoorah She'r Se Hi Samajh Me'n Aagaya Hoga Ke Ham Ahle Sunnat Wa Jamaa'at Ka Aqeedah Kya Hai, To Iss Baare Me'n Aqeedah Yeh Hai Ke Nabi e Kareem ﷺ Apni Qabre At'har Me'n Zindah Hai'n, Mazeed Iss Aqeede Ko Waazeh Andaaz Me'n Alahazrat Imaam Ahmad Raza Khaan Qaadri Barelvi A'laihir Rehma Ne "Fataawa Razviya" Me'n Bahot Se Maqaamaat Par Tehreer Farmaaya Hai Jisme'n Se Ek Maqaam Par Yoo'n Tehreer Farmaate Hai'n Ke "Hazraat e Ambiya e Kiraam A'laihimus Salaatu Wassalaam Hayaat Wa Mamaat (Zindagi Aur Maut) Har Haalat Me'n Tayyab Wa Taahir Hai'n, Balke Unke Liye Maut Mahez Aani (Ek Pal Keliye) Tasdeeq e Wa'da e Ilaahiya Keliye Hai, Phir Woh Hamesha Hayaat e Haqeeqi Wa Duniyaawi Roohaani Wa Jismaani Ke Saath Zindah Hai Jaisa Ke Ahle Sunnat Wa Jamaa'at Ka Aqeedah Hai". (Fataawa Razviya, Jild No.3, Safha No.404 Se 407)
Jo Shakhs Aqeeda e Hayaatunnabi ﷺ Ka Munkir Hai Woh Gumraah Bad Deen Hai, Chunaanche Alahazrat Imaam e Ahle Sunnat Imaam Ahmad Raza Khaan Qaadri Barelvi A'laihir Rehma Se Jab Ek Shakhs Ke Muta'alliq Sawaal Huwa Ke "Hayaatunnabi Hone Se Khaalid Ko Inkaar Hai (Uska Kya Hukm Hai?)" To Jawaab Dete Huwe Likhte Hai'n Ke "Khaalid Gumraah Bad Deen Hai Use Imaam Banaana Jaa'iz Nahee'n, Huzoor Purnoor Sayyad e Aa'lam ﷺ Balke Jamee Ambiya e Kiraam A'laihimus Salaatu Wassalaam Ki Hayaat (Ba'ad e Wisaal) Qur'aan Wa Hadees Wa Ijma Se Saabit Hai. (Fataawa Razviya Mutarjim, Jild No.6, Safha No.525)
Ma'loom Huwa Ke Yeh Aqeedah Zarooriyaat e Deen Me'n Se Nahee'n Hai Warna Munkir Ko Gumraah Bad Deen Nahee'n Balke Kaafir Kaha Jaata Lekin Kaafir Hone Ka Fatwa Alahazrat Imaam e Ahle Sunnat Ne Nahee'n Diya Balke Gumraah Bad Deen Hone Ka Fatwa Diya To Waazeh Hogaya Ke Yeh Aqeedah Zarooriyaat e Ahle Sunnat Wa Jamaa'at Me'n Se Hai Jiska Munkir Agarche Kaafir Nahee'n Hota Magar Gumraah Bad Deen Zaroor Hota Hai.
Ab Hayaatunnabi ﷺ Se Muta'alliq Chand Dalaa'il Mulaaheza Farmaaye'n Lekin Isse Pehle Yeh Jaan Le'n Ke Tan Se Sar Ka Ta'alluq Khatam Hogaya Aur Rooh Ka Jism Se Parwaaz Kar Jaane Ke Ba'ad Jab Raah e Khuda Me'n Shaheed Hone Waale Nufoos e Qudsiya Ko Madeena Ke Kuchh Logo'n Ne Murdah Kaha To Allaah Paak Ne Un Shohada e Kiraam Ko Murdah Kehne Se Hi Nahee'n Balke Murdah Sochne, Murdah Gumaan Karne, Murdah Khayaal Karne Se Bhi Sakhti Ke Saath Mana Farma Diya Aur Irshaad Farmaaya,
Tarjuma - Aur Jo Allaah Ki Raah Me'n Maare Gaye Hargiz Unhe'n Murdah Na Khayaal Karna Balke Woh Apne Rab Ke Paas Zindah Hai Rozi Paate Hai'n. (Sureh Aale Imraan, Aayat No.169)
Aur Isme'n Koi Shak Wa Shubah Nahee'n Ke Ambiya e Kiraam Shohada e Kiraam Se Badarjaha Afzal Wa Aa'la Hai'n To Jab Gair Ambiya Shohada e Kiraam Ko Murdah Kehna Balke Murdah Khayaal Karna Mana Hai To Ambiya e Kiraam A'laihimus Salaatu Wassalaam Ko Badarja Aula Murdah Kehna Murdah Tasawwur Karna Mana Hoga Yeh Ek Khuli Haqeeqat Hai Jiska Bayaan Khud Ahaadees e Saheeha Me'n Bhi Waarid Hai.
Haa'n ! Yeh Baat Durust Aur Ek Haqeeqat Hai Ke Wa'da e Ilaahiya Ke Mutaabiq Har Insaan Ko Maut Ka Mazah Chakhna Hai Chunaanche Ambiya e Kiraam A'laihimus Salaatu Wassalaam Par Bhi Ek Lamhe Keliye Maut Taari Huwi Magar Phir Allaah Paak Ne Unhe'n Aisi Zindagi Ata Farma Di Jo Iss Duniyaawi Zindagi Se Laakho'n Darja Afzal Hai Lehaaza Allaah Paak Ke Nabi Apni Qabro'n Me'n Zindah Hai'n, Rozi Diye Jaate Hai'n, Namaaz Padhte Hai'n, Zaa'ireen Ke Salaam Ka Jawaab Dete Hai'n Aur Mukhtalif Maqaamaat Par Rab Ki Ata Se Aate Jaate Hai'n.
1- Muslim Shareef, Jild No.4, Safha No.1875, Hadees No.2375
Tarjuma - Hazrat Anas Radiallaahu A'nhu Se Marwi Hai Ke Nabi e Akram ﷺ Ne Irshaad Farmaaya Ke Mai'n Hazrat Moosa A'laihissalaam (Ki Qabar) Ke Paas Se Guzra (To Mai'n Ne Dekha Ke) Woh Apni Qabar Me'n Khade Hokar Namaaz Padh Rahe The.
Doosri Riwaayat Ke Mutaabiq Rasoolullaah ﷺ Ne Farmaaya, Me'raaj Ki Raat Mai'n Hazrat Moosa A'laihissalaam (Ki Qabar) Ke Paas Se Guzra.
Ma'loom Huwa Ke Allaah Ke Nabi Apni Qabro'n Me'n Zindah Hai'n Aur Namaaz Padhte Hai'n.
2- Ibne Maaja Shareef, Jild No.1, Safha No.524, Hadees No.1637
Hazrat Abu Darda Radiallaahu A'nhu Se Marwi Hai Ke Rasoolullaah ﷺ Ne Irshaad Farmaaya, Tum Log Juma'h Ke Din Mere Upar Kasrat Se Darood Bhejo, Isliye Ke Juma'h Ke Din Farishte Haazir Hote Hai'n Aur Jo Koi Mujh Par Darood Bhejega Uska Darood Mujh Par Uske Faarig Hote Hi Pesh Kiya Jaayega, Mai'n Ne Arz Kiya, Kya Wisaal Ke Ba'ad Bhi ? To Nabi e Akram ﷺ Ne Farmaaya Haa'n, Wisaal Ke Ba'ad Bhi, Beshak Allaah Paak Ne Zameen Par Haraam Kardiya Hai Ke Woh Ambiya Ka Jism Khaaye, Allaah Ke Nabi Zindah Hai Unko Rozi Milti Hai.
Ma'loom Huwa Ke Allaah Paak Ke Nabi Zindah Hai'n, Unka Jism Bhi Salaamat Hai Aur Sunte Bhi Hai'n Aur Unhe'n Rizq Bhi Diya Jaata Hai, Imaam Baihaqi A'laihir Rehma Ne Hayaatunnabi ﷺ Ke Mauzu Par Ek Mukammal Risaala Tasneef Farmaaya Hai Jiska Naam Unho'n Ne "Hayaatul Ambiya Fee Quboorihim" Rakha Hai Jisme'n Mukhtalif Ahaadees e Mubaaraka Se Saabit Farmaaya Hai Ke Ambiya e Kiraam A'laihimus Salaatu Wassalaam Apni Qabro'n Me'n Zindah Hai'n. Mazeed Tafseel Keliye Iss Risaale Ka Mutaale'ah Farmaaye'n.
By Alahazrat Foundation Research Team - 7710809266/9892708816
