Ambiya e Kiraam Ma'soom Hote Hai'n, Iske Baare Me'n Musalmaano'n Ka Aqeedah Aur Nazariya Yeh Hai Ke Ambiya e Kiraam A'laihimus Salaam Ma'soom Hai, Aur Yeh Aqeedah Zarooriyaat e Deen Me'n Se Hai Jiska Munkir Kaafir Hai.
Imaam e Ahle Sunnat Imaam Ahmad Raza Khaan Qaadri Barelvi A'laihir Rehma Likhte Hai'n, Musalmaan Hamesha Yeh Baat Zahen Nasheen Rakhe Ke Hazraat Ambiya e Kiraam A'laihimus Salaatu Wassalaam Kabeerah Gunaaho'n Se Mutlaqan Aur Gunaahe Sageerah Se Amadan (Jaan Boojh Kar) Irtekaab Aur Har Aise Amr Se Jo Khalq (Makhlooq) Keliye Baa'ise Nafrat Ho Aur Makhlooq e Khuda Unke Baa'is Unse Door Bhaage Neez Aise Af'aal Se Jo Wajaahat Wa Murawwat Aur Mo'azzizeen Ki Shaan Wa Martabe Ke Khilaaf Hai, Qable Nabuwwat (Ae'laan e Nabuwwat Se Pehle) Aur Ba'ad e Nabuwwat Bil Ijma Ma'soom Hai'n. (Fataawa Razviya Mutarjum, Jild No.29, Safha No.365)
Hazrat Sadrush Sharee'ah Allaama Amjad Ali A'laihir Rehma Farmaate Hai'n, "Nabi Ka Ma'soom Hona Zaroori Hai" Aur Ismat e Ambiya Ke Yeh Ma'ni Hai Ke Unke Liye Hifze Ilaahi (Allaah Ki Hifaazat) Ka Wa'dah Ho Jinke Sabab Unse Sudoor e Gunaah Muhaal Hai, Ambiya e Kiraam A'laihimus Salaam Shirk Wa Kufr Aur Har Aise Amr Se Jo Khalq Keliye Baa'ise Nafrat Ho Jaise Kizb Wa Khayaanat (Jhoot Aur Dhoka) Aur Jahel Wagairah Sifaat e Zameema Neez Aise Af'aal Se Jo Wajaahat Aur Murawwat Ke Khilaaf Hai'n, Qable Nabuwwat Aur Ba'ad e Nabuwwat Bil Ijma Ma'soom Hai'n Aur Kabaa'ir "Gunaaho'n" Se Bhi Mutlaqan Ma'soom Hai'n Aur Haq Yeh Hai Ke Ta'mudan (Jaan Boojh Kar) Sagaa'ir Gunaaho'n Se Bhi Qable Nabuwwat Aur Ba'ad e Nabuwwat Ma'soom Hai'n. (Bahaare Sharee'at, Hissa 1, Safha No.40/41)
Ab Qur'aan Shareef Se Dalaa'il Mulaaheza Keejiye,
1- Sureh Hijr, Aayat No.42
Tarjuma - Beshak Mere Bando'n Par Tera Kuchh Qaabu Nahee'n Siwa Un Gumraaho'n Ke Jo Tera Saath De'n.
Aur Shaitaan Ne Khud Bhi Iqraar Kiya Tha Ke,
2- Sureh Hijr, Aayat 39/40
Tarjuma - Bola Aye Rab Mere ! Qasam Uski Ke Tu Ne Mujhe Gumraah Kiya Mai'n Unhe'n Zameen Me'n Bhulaawe Du'nga Aur Zaroor Mai'n Un Sabko Be Raah Kardu'nga. Magar Jo Unme'n Tere Chune Huwe Bande Hai'n.
In Dono'n Aayato'n Se Ma'loom Huwa Ke Ambiya e Kiraam A'laihimus Salaam Tak Shaitaan Ki Paho'nch Nahee'n, Aur Woh Unhe'n Na To Gumraah Kar Sake Aur Na Be Raah Chala Sake, Phir Unse Gunaah Kyu'nk Kar Sarzad Ho'n ! Ta'ajjub Hai Ke Shaitaan To Ambiya e Kiraam A'laihimus Salaam Ko Ma'soom Maan Kar Unko Behkaane Se Apni Ma'zoori Zaahir Kare Magar Iss Zamaane Ke Kuchh Be Deen Log Un Hazraat (Ambiya e Kiraam A'laihimus Salaam) Ko Mujrim Maane Yaqeenan Yeh Shaitaan Se Badtar Hai'n. (Ja Al-Haq, Safha No.408)
Ab Hadees Shareef Se Daleel Mulaaheza Keejiye,
1- Muslim Shareef, Jild No.4, Safha No.2167, Hadees No.2814
Tarjuma - Hazrat Abdullaah Bin Mas'ood Radiallaahu A'nhu Se Riwaayat Hai Ke Rasoolullaah ﷺ Ne Irshaad Farmaaya, Tum Me'n Se Har Ek Aadmi Ke Saath Uska Jin Saathi Muqarrar Kiya Gaya Hai, Sahaaba e Kiraam Ne Arz Kiya, Aapke Saath Bhi Aye Allaah Ke Rasool Nabi e Akram ﷺ ? Aapne Irshaad Farmaaya, Aur Mere Saath Bhi Magar Allaah Ne Meri Ispar Madad Farmaayi To Woh Musalmaan Hogaya Pas Woh Mujhe Neki Hi Ka Hukm Karta Hai.
2- Abu Daawood Shareef, Jild No.3, Safha No.318, Hadees No.3646
Tarjuma - Hazrat Abdullaah Bin Amro Bin Aa's Radiallaahu A'nhu Farmaate Hai'n Ke Mai'n Har Uss Hadees Ko Jo Rasoolullaah ﷺ Se Sunta Yaad Rakhne Keliye Likh Leta To Quresh Ke Logo'n Ne Mujhe Likhne Se Mana Kardiya Aur Kaha, Kya Tum Rasoolullaah ﷺ Se Har Suni Huwi Baat Ko Likh Lete Ho ? Haalaa'nke Rasoolullaah ﷺ Bashar Hai'n, Gusse Aur Khushi Dono'n Haalato'n Me'n Baate'n Karte Hai'n, To Mai'n Ne Likhna Chhod Diya, Phir Rasoolullaah ﷺ Se Iska Zikr Kiya, Nabi e Akram ﷺ Ne Apni U'ngli Se Apne Muh Shareef Ki Taraf Ishaarah Kiya Aur Irshaad Farmaaya, Likha Karo, Qasam Uss Zaat Ki Jiske Qabza e Qudrat Me'n Meri Jaan Hai, Iss (Muh) Se Haq Baat Ke Siwa Kuchh Nahee'n Nikalta.
3- Tirmizi Shareef, Jild No.3, Safha No.467, Hadees No.1172
Tarjuma - Hazrat Jaabir Radiallaahu A'nhu Bayaan Karte Hai'n Ke Nabi e Akram ﷺ Ne Irshaad Farmaaya, Jis Aurat Ka Khaawind Maujood Na Ho Uss Aurat Ke Paas Mat Jaao Kyu'nke Shaitaan Insaan Ke Khoon Ki Jagah Me'n Gardish Karta Hai, Logo'n Ne Arz Ki, Kya Aapka Bhi ? Nabi e Akram ﷺ Ne Irshaad Farmaaya Haa'n ! Lekin Allaah Ne Uss "Shaitaan" Ke Khilaaf Meri Madad Ki Aur Usne Islaam Qabool Karliya.
In Tamaam Dalaa'il Se Ma'loom Huwa Ke Nabi e Akram ﷺ Gunaaho'n Se Ma'soom Hai'n, Mazeed Ma'loomaat Keliye Ulama e Ahle Sunnat Wa Jamaa'at Ki Kitaabo'n Ka Mutaale'ah Farmaaye'n.
By Alahazrat Foundation Research Team - 7710809266/9892708816
