Ambiya e Kiraam A'laihimus Salaatu Wassalaam Wa Auliya e Izaam Rahima Humullaahu Ta'aala Ka Waseela Lene Ke Baare Me'n Musalmaano'n Ka Aqeedah Kya Hai Neez Tawassul Ka Kya Matlab Hai Iske Baare Me'n Ham Dalaa'il Ki Roshni Me'n Jaante Hai'n,
Ambiya e Kiraam A'laihimus Salaam Aur Auliya e Kiraam A'laihimur Rehma Se Tawassul Ka Matlab Yeh Hai Ke Haajato'n Ke Poora Hone Aur Mataalib Ke Haasil Hone Keliye In Mehboob Hastiyo'n Ko Allaah Paak Ki Baargaah Me'n Waseela Aur Waasta Banaaya Jaaye Kyu'nke Inhe'n Allaah Paak Ki Baargaah Me'n Hamaari Nisbat Zyaadah Qurb Haasil Hai, Allaah Paak Inki Du'aa Poori Farmaata Hai Aur Inki Shafaa'at Qabool Farmaata Hai, Dunyawi Aur Ukhrawi Haajato'n Ko Poora Karne Keliye Allaah Paak Ki Baargaah Me'n Inse Tawassul Shar'an Jaa'iz Hai Lekin Yaad Rahe Ke Yeh Aqeedah Ahle Sunnat Wa Jamaa'at Ke Nazdeek Furu Aqaa'id Me'n Se Hai Jiske Saboot Keliye Khabar e Waahid Bhi Kaafi Hai Ya Phir Aisi Aayaat Bhi Kaafi Hai'n Jinke Muraadi Ma'ni Me'n Ahle Sunnat Wa Jamaa'at Ka Ikhtelaaf Ho.
Waseela Banaana Qur'aan Wa Sunnat Se Saabit Hai, Allaah Paak Irshaad Farmaata Hai,
Tarjuma - Aye Imaan Waalo ! Allaah Se Daro Aur Uski Taraf Waseela Dhoo'ndo. (Sureh Maa'idah, Aayat No.35)
Hadees e Paak Me'n Hai Ke Sarkaar ﷺ Ne Khud Ek Naabeena Shakhs Ko Ek Du'aa Ke Zariye Waseele Ki Ta'leem Irshaad Farmaayi,
Chunaanche Tirmizi Shareef Me'n Hazrat Usmaan Bin Hunaif Radiallaahu A'nhu Se Riwaayat Hai Ke Ek Naabeena Baargaah e Risaalat ﷺ Me'n Haazir e Khidmat Huwa Aur Arz Ki Ke Aap ﷺ Allaah Paak Se Du'aa Kare'n Ke Woh Mujhe Aa'nkh Waala Karde, Huzoor ﷺ Ne Farmaaya, Agar Tu Chaahe To Mai'n Tere Liye Du'aa Karu'n Aur Agar Tu Chaahe To Sabar Kar Ke Woh Tere Liye Behtar Hai, Arz Ki Ke Du'aa Farmaaye'n, Huzoor ﷺ Ne Use Hukm Diya Ke Achcha Wazu Karo, 2 Rak'at Namaaz Padho Aur Yeh Du'aa Karo, "Aye Allaah Mai'n Tujhse Maa'ngta Hoo'n Aur Teri Taraf Muhammad ﷺ Ke Waseele Se Tawajjoh Karta Hoo'n Jo Nabi e Rehmat ﷺ Hai'n, Ya Rasoolallaah ﷺ ! Mai'n Aapke Waseele Se Apne Rab Ki Taraf Apni Iss Haajat Me'n Tawajjoh Karta Hoo'n Tu Ise Poori Farma De, Aye Allaah Paak ! Mere Baare Me'n Nabi e Akram ﷺ Ki Shafaa'at Qabool Farma". (Tirmizi Shareef, 5/461, Hadees No.3578)
(Raavi Bayaan Farmaate Hai'n) Ke Woh Shakhs Jab Aapke Farmaane Ke Mutaabiq Du'aa Karke Khada Huwa Woh Aa'nkh Waala Hogaya (Ya'ni Uski Aa'nkh Ki Roshni Waapas Aagayi). (Mo'jamul Kabeer, 9/31, Hadees No.8311)
Mohtaram Qaari'een : Yeh To Ambiya e Kiraam A'laihimus Salaam Se Waseele Ke Saboot Par Dalaa'il Pesh Kiye Gaye Ab Auliya Ka Waseela Lena Jaa'iz Hai Ispar Daleel Dekhe'n,
Ulama e Kiraam Farmaate Hai'n Ke Allaah Paak Ki Mehboob Hastiyo'n Se Tawassul Jaa'iz Hai Khwaah Woh Duniyawi Zindagi Me'n Ho'n Ya Barzakhi Zindagi Ki Taraf Muntaqil Ho Chuke Ho'n,
Auliya e Kiraam A'laihimus Salaam Ka Waseela Lena Iske Saboot Me'n Kayi Riwaayaat Pesh Ki Ja Sakti Hai'n,
Upar Naabeena Sahaabi Radiallaahu A'nhu Ke Tawassul Karne Ke Baare Me'n Jo Hadees Bayaan Ki Gayi Hai Uske Baare Me'n Hadees Ki Mustanad Kitaabo'n Me'n Hai Ke Sahaaba e Kiraam A'laihimur Ridwaan Nabi e Kareem ﷺ Ke Iss Duniya Se Wisaal e Zaahiri Farmaane Ke Ba'ad Bhi Logo'n Ko Ispar Amal Ki Ta'leem Diya Karte The. (Majmauz Zawaa'id, Kitaabus Salaat, Baab Salaatul Haajah, 2/279, Hadees No.3668)
Isi Tarah Mishqaat Baabul Karamaat Me'n Hazrat Abul Jauza Radiallaahu A'nhu Se Farmaate Hai'n Ke Madeena Ke Log Sakht Qahet Me'n Mubtala Hogaye To Unho'n Ne Hazrat Aa'yesha Radiallaahu A'nha Se Shikaayat Ki, Unho'n Ne Farmaaya Ke Nabi e Kareem ﷺ Ki Qabar Ki Taraf Gaur Karo, Usse Ek Taaq Aasmaan Ki Taraf Bana Do Hatta Ke Qabre Anwar Aur Aasmaan Ke Darmiyaan Chhat Na Rahe, To Logo'n Ne Aisa Kiya To Khoob Barsaaye Gaye (Ya'ni Khoob Baarish Huwi) Hatta Ke Chaarah Ug Gaya Aur Oo'nt Mote Hogaye Hatta Ke Charbi Se Goya Ke Phat Pade'n To Uss Saal Ka Naam Phatan Ka Saal Rakha Gaya. (Mishqaat Shareef, 3/1676, Hadees No.5950)
Hadees Shareef Me'n Hai Ke Mus'ab Bin Sa'ad Ne Bayaan Kiya Ke Hazrat Sa'ad Bin Abi Waqaas Radiallaahu A'nhu Ka Khayaal Tha Ke Unhe'n Bahot Se Doosre Sahaaba Par (Apni Maaldaari Aur Bahaaduri Ki Wajah Se) Fazeelat Haasil Hai To Nabi e Kareem ﷺ Ne Farmaaya Ke Tum Log Sirf Apne Kamzor Ma'zoor Logo'n Ki Du'aao'n Ke Nateeje Me'n Allaah Ki Taraf Se Madad Paho'nchaaye Jaate Ho Aur Unhi Ki Du'aao'n Se Rizq Diye Jaate Ho. (Bukhaari Shareef, Kitaabul Jihaad, Hadees No.2896)
Hadees Shareef Me'n Hai Ke Hazrat Jaabir Bin Abdullaah Radiallaahu A'nhuma Ne Aur Unse Hazrat Abu Sa'eed Khudri Radiallaahu A'nhu Ne Bayaan Kiya Ke Nabi e Kareem ﷺ Ne Farmaaya, Logo'n Par Ek Aisa Zamaana Aayega Ke Jihaad Keliye Fauj Jama Hogi, Poochha Jaayega Ke Fauj Me'n Koi Aise Buzurg Bhi Hai'n Jinho'n Ne Rasoolullaah ﷺ Ki Sohbat Uthaayi Ho ? Unse Kaha Jaayega Ke Haa'n Hai To Unke Waseele Se Fateh Ki Du'aa Maa'ngi Jaayegi, Phir Ek Jihaad Hoga Aur Poochha Jaayega, Kya Fauj Me'n Koi Aise Shakhs Hai'n Jinho'n Ne Rasoolullaah ﷺ Ke Kisi Sahaabi Ki Sohbat Uthaayi Ho ? Unse Kaha Jaayega Ke Haa'n Hai'n To Unke Waseele Se Fateh Ki Du'aa Maa'ngi Jaayegi, Phir Unki Du'aa Ki Barkat Se Fateh Hogi. (Bukhaari Shareef, Hadees No.3594)
Ab Chand Akaabir A'imma Wa Mohaddiseen Aur Mustanad Ulama Ke Hawaale Diye Jaarahe Hai'n Jinse Yeh Haqeeqat Waazeh Hoti Hai Ke Huzoor Nabi e Akram ﷺ Aur Auliya Wa Saaliheen Ko Allaah Paak Ki Baargaah e Qudsiya Me'n Waseela Banaana Jamhoor Ummat Ka Aqeedah Raha Hai Aur Insha Allaah Ta Qayaamat Rahega.
Imaam e Aa'zam Abu Haneefa A'laihir Rehma (Wisaal 150 Hijri) Khairul Quroon Ke Iss Azeem Imaam Ke Nazdeek Huzoor Nabi e Akram ﷺ Ko Waseela Banaana Na Sirf Durust Hai Balke Aap ﷺ Se Istemdaad Karna Bhi Jaa'iz Hai, Unho'n Ne Apne Shohra e Aafaaq Na'tiya Manzoom Kalaam "Qaseeda e No'maaniya" (Safha 200) Me'n Saraahat Ke Saath Huzoor Taajdaar e Kaa'inaat ﷺ Se Tawassul Wa Istemdaad Kiya Hai Jiska Ek Misra Yoo'n Hai,
(Ya Rasoolallaah ﷺ ! Mai'n Aapke Jood Wa Ata Ka Ummeedwaar Hoo'n Aur) Makhlooq Me'n Abu Haneefa Keliye Aapke Siwa Koi Nahee'n).
Imaam Maalik A'laihir Rehma (Wisaal 179 Hijri) Ke Hawaale Se Saheeh Sanad Ke Saath Ek Waaqe'ah Qaazi Ayaaz A'laihir Rehma (Wisaal 544 Hijri) Ne "Ash-Shifa" Me'n, Allaama Subki Ne "Shifaa'us Siqaam Fee Ziyaarati Khairil Anaam" Me'n, Imaam Samhoodi Ne "Khulaasatul Wafa" Me'n, Imaam Qastalaani Ne "Al-Mawaahibul Ladunniya" Me'n, Ibne Jama Ne "Hidaayatus Saalik" Me'n Aur Ibne Hajar Haytami Makki Ne "Al-Jauharul Munazzam" Me'n Riwaayat Kiya Hai, Woh Bayaan Karte Hai'n Ke Ek Martaba Khaleefa Abu Ja'far Mansoor (Wisaal 158 Hijri) Madeena e Munawwarah Aaya Aur Imaam Maalik Se Dariyaaft Kiya Ke Mai'n Ziyaarat e Qabre Nabvi Ke Waqt Du'aa Karte Huwe Apna Rukh Ka'ba Ki Taraf Karu'n Ya Huzoor Nabi e Kareem ﷺ Ki Taraf ? Imaam Maalik Ne Jawaab Diya,
Tarjuma - (Aye Ameer !) Tu Huzoor Nabi e Akram ﷺ Ki Jaanib Se Muh Kyu'n Pherta Hai Haalaa'nke Woh Tumhaare Liye Aur Tumhaare Jadde Aa'la Hazrat Aadam A'laihissalaam Keliye Roze Qayaamat Waseela Hai'n ? Balke Tu Aap ﷺ Ki Jaanib Mutawajjeh Ho, Aur Aap ﷺ Ki Shafaa'at Ka Taalib Ho Ke Aap ﷺ Allaah Paak Ke Saamne Teri Shafaa'at Farmaaye'n, Allaah Paak Ne Farmaaya Hai, "(Aur Aye Habeeb !) Agar Woh Log Jab Apni Jaano'n Par Zulm Kar Baithe The Aapki Khidmat Me'n Haazir Ho Jaate Aur Allaah Se Mu'aafi Maa'ngte Aur Rasool (ﷺ) Bhi Unke Liye Magferat Talab Karte To Woh (Iss Waseela Aur Shafaa'at Ki Bina Par) Zaroor Allaah Ko Tauba Qabool Farmaane Waala Nihaayat Maherbaan Paate". (Surah, Nisa, Aayat No,64)
Imaam Shaafayi A'laihir Rehma (Wisaal 204 Hijri) Allaama Ibne Hajar Haytami Ne Apni Tasneef e Lateef "Assawayiqul Muharraqati Ala Ahli Rifdi Waddalali Wazzindiqati Safha No.180" Me'n Imaam Shaafayi A'laihir Rehma Ka Woh Sher Bhi Naqal Kiya Hai Jisme'n Aapne Ahle Bait e Nabvi Ko Waseela Banaaya Hai.
Shaah Abdul Haq Muhaddis e Dehlavi A'laihir Rehma (Wisaal 1052 Hijri) Ne "Ash'atul Lam'aat Sharah Mishqaatul Masaabeeh 2/923" Me'n Hazrat Moosa Kaazim Rehmatullaah A'laih Ki Qabre Anwar Ke Hawaale Se Imaam e Shaafayi Ka Darje Zail Qaul Naqal Karte Hai'n Ke "Hazrat Moosa Kaazim Rehmatullaah A'laih Ki Qabre Anwar Qabooliyat e Du'aa Keliye Tiryaaq e Mujarrab Hai".
Imaam Ahmad Bin Hambal A'laihir Rehma (Wisaal 241 Hijri) Waseele Ke Ta'alluq Se Allaama Yoosuf Bin Ismaa'eel Nab'haani (Wisaal 1350 Hijri) Ne "Shawahidul Haqqi Fil Istigaasati Bi Sayyidil Khalq" Me'n Likha Hai Ke Imaam Ahmad Bin Hambal A'laihir Rehma Imaam Shaafayi Ko Waseela Banaate The.
Imaam Ahmad Bin Hambal Ne Apni Musnad Me'n Hazrat Maula Ali Radiallaahu A'nhu Se Marwi Riwaayat Bayaan Ki Hai Ke Huzoor Nabi e Akram ﷺ Ne Farmaaya, Shaam Me'n 40 Mard Abdaal Hamesha Maujood Rahe'nge Jinke Waseele Wa Barkat Se Baarishe'n Barasti Hai'n, Dushmano'n Par Fateh Haasil Hoti Hai Aur Shaam Waalo'n Se Azaab Door Hota Hai. (Musnad e Imaam Ahmad Bin Hambal, 1/112)
Allaama Ibne Jareer Tabri (Wisaal 310 Hijri) Ne Sureh Baqarah Ki Aayat No.89 Ki Tafseer Me'n Hazrat Ibne Abbaas Radiallaahu A'nhu Ke Hawaale Se Naqal Kiya Hai Ke "Yahoodi Huzoor Nabi e Akram ﷺ Ki Be'sat Se Qabl Aap ﷺ Ke Waseele Se Du'aa Kiya Karte The. (Tabri, Jaame'ul Bayaan Fee Tafseeril Qur'aan, 1/325)
Imaam Abu Mansoor Muhammad Bin Mehmood Maatureedi (Wisaal 333 Hijri) Ne Sureh Baqarah Ki Aayat No.89 Ki Tafseer Me'n Bayaan Kiya Hai Ke Be'sat e Nabvi ﷺ Se Qabl Yahood Aap ﷺ Ke Tawassul Se Allaah Paak Se Madad Talab Karte.
In Tamaam Dalaa'il Se Yeh Baat Roze Roshan Ki Tarah Ayaa'n Hogayi Ke Ambiya e Kiraam A'laihimus Salaam Aur Auliya e Kiraam A'laihimur Rehma Ka Waseela Qable Wisaal Aur Ba'ad e Wisaal Lena Jaa'iz Hai Aur Yehi Musalmaano'n Ka Aqeedah Hai.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai (Isi Tarah Ambiya e Kiraam A'laihimus Salaam Aur Auliya e Kiraam Ka Waseela Lene Ka Aqeedah Bhi Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
