Ham Ahle Sunnat Wa Jamaa'at Ke Nazdeek Ambiya Wa Auliya Se Madad Maa'ngne Ka Aqeedah Na To Zarooriyaat e Deen Ka Aqeedah Hai Aur Na Hi Zarooriyaat e Ahle Sunnat Ka Aqeedah Hai Balke Furu Wa Zanni Aqeedah Hai, Aur Furu Wa Zanni Aqaa'id Me'n Za'eef Hadees Bhi Qaabil e Qabool Hoti Hai.
Islaam Ki Ibtedaayi 3 Sadiyo'n Se Lekar 7vi Sadi Hijri Tak Tamaam Ahle Islaam Me'n Ambiya Wa Saaliheen Se Talab e Ma'oonat, Fariyaad Khwaahi Keliye Inhe'n Waseela Banaana Ek Haqeeqat Saabit Rahi Aur Bila Tafreeq Jamhoor Muslimeen Iske Jawaaz Wa Istehsaan Par Qaulan Wa Amalan Muttahid Wa Muttafiq Rahe, Khairul Quroon Me'n Sahaaba Wa Taaba'een Wa Taba Taaba'een Radiallaahu Anhum, Kitaab Wa Sunnat Ke Haamileen Khud 7vi Sadi Hijri Ke Ulama e Raasikheen Wa Fuqaha Wa Mohaddiseen A'laihimur Rehma Ka Yehi Mokkif Raha, Aur Bagair Kisi Ikhtelaaf Ke Rasoolullaah ﷺ Ke Saheeh Wa Haqeeqi Ja Nasheen Aaj Bhi Isi Paakeezah Mokkif Par Gaamzan Hai'n, Inme'n Se Kisi Ne Bhi Ambiya Wa Sulaha Se "Istemdaad Wa Tawassul" Ko Islaami Tasawwur e Tauheed Ke Munaafi Nahee'n Jaana, Gairullaah Se Madad Ke Jawaaz Keliye Jab Aap In Baato'n Ko Samjhe'nge To Masla Aur Bhi Waazeh Ho Jaayega Ke Ambiya e Kiraam Wa Auliya e Kiraam Se Madad Maa'ngna Jaa'iz Hai, Jabke Uska Aqeedah Yeh Ho Ke Haqeeqi Imdaad To Rab Ta'aala Hi Ki Hai, Yeh Hazraat Uske Mazhar Hai'n Aur Musalmaan Ka Yehi Aqeedah Hota Hai, Koi Jaahil Bhi Kisi Wali Ko Khuda Nahee'n Samajhta.
Sabse Pehle Ham Istemdaad Wa Iste'aanat Se Kya Muraad Hai Iske Baare Me'n Jaanne Ki Koshish Kare'nge.
Allaah Paak Ko Haqeeqi Madadgaar Jaante Huwe Ambiya e Kiraam A'laihimus Salaatu Wassalaam Aur Auliya e Kiraam A'laihimur Rehma Se Madad Maa'ngna "Istemdaad" Kehlaata Hai Aur "Iste'aanat" Ka Bhi Yehi Matlab Hai, Gairullaah Se Madad Ka Jawaaz Qur'aan Wa Hadees Se Saabit Hai.
Sureh Tehreem Ki Aayat No.4 Me'n Allaah Paak Ka Farmaan Hai,
Tarjuma - To Beshak Allaah Unka Madadgaar Hai Aur Jibra'eel Aur Nek Imaan Waale Aur Uske Ba'ad Farishte Madad Par Hai'n.
Iss Aayat Me'n Allaah Paak Ne Farishto'n Aur Nek Bando'n Ko Madadgaar Kaha Hai.
Allaah Paak Sureh Aale Imraan Ki Aayat No.52 Me'n Irshaad Farmaata Hai,
Tarjuma - Kaha Maseeh Ne Kaun Hai Jo Madad Kare Meri Taraf Allaah Ki Kaha Hawaariyo'n Ne Ham Madad Kare'nge Allaah Ke Deen Ki.
Iss Aayat Me'n Farmaaya Gaya Ke Hazrat Isa A'laihissalaam Ne Apne Hawaariyo'n Se Khitaab Karke Farmaaya Ke Mera Madadgaar Kaun Hai ? Hazrat Maseeh Ne Gairullaah Se Madad Talab Ki.
Allaah Paak Sureh Maa'idah Ki Aayat No.2 Me'n Irshaad Farmaata Hai,
Tarjuma - Aur Neki Aur Parhezgaari Par Ek Doosre Ki Madad Karo Aur Gunaah Aur Zyaadati Par Baaham Madad Na Do.
Iss Aayat Me'n Ek Doosre Ki Madad Karne Ka Hukm Diya Gaya.
Allaah Paak Sureh Maa'idah Ki Aayat No.55 Me'n Irshaad Farmaata Hai,
Tarjuma - Tumhaare Dost (Madadgaar) Nahee'n Magar Allaah Aur Uska Rasool Aur Imaan Waale Ke Namaaz Qaayem Karte Hai'n Aur Zakaat Dete Hai'n Aur Allaah Ke Huzoor Jhuke Huwe Hai'n.
Hazrat Moosa A'laihissalaam Ko Jab Tableeg Keliye Fir'aon Ke Paas Jaane Ka Hukm Huwa To Arz Kiya,
Tarjuma - Aur Mere Liye Mere Ghar Waalo'n Me'n Se Ek Wazeer Karde Woh Kaun Mera Bhaayi Haaroon Usse Meri Kamar Mazboot Kar. (Sureh Taaha, Aayat No.29/30/31)
Rab Ta'aala Ne Yeh Na Farmaaya Ke Tumne Mere Siwa Sahaara Kyu'n Liya, Mai'n Kya Kaafi Nahee'n Hoo'n Balke Unki Darkhwaast Manzoor Farma Li, Ma'loom Huwa Ke Bando'n Ka Sahaara Lena Sunnat e Ambiya Hai.
Allaah Paak Sureh Nisa Ki Aayat No.64 Me'n Farmaata Hai,
Tarjuma - Aur Hamne Koi Rasool Na Bheja Magar Isliye Ke Allaah Ke Hukm Se Uski Itaa'at Ki Jaaye Aur Agar Jab Woh Apni Jaano'n Par Zulm Kare'n To Aye Mehboob Tumhaare Huzoor Hazir Ho'n Aur Phir Allaah Se Mu'aafi Chaahe'n Aur Rasool Unki Shafaa'at Farmaaye To Zaroor Allaah Ko Bahot Tauba Qabool Karne Waala Maherbaan Paaye'n.
Ab Ahaadees Se Daleele'n Mulaaheza Farmaaye'n.
Nabi e Paak ﷺ Madadgaar Hai'n Aur Yeh Koi Naya Aqeedah Nahee'n Hai Balke Yeh Aqeedah Hame'n Sahaaba e Kiraam Se Mila Hai, Yeh Aqeedah Sahaaba e Kiraam Ka Tha Ke Allaah Ke Rasool ﷺ Iss Ummat Ke Sabse Bade Madadgaar Hai'n, Unke Bhi Madadgaar Hai'n Aur Qayaamat Tak Aane Waale Tamaam Momineen Ke Bhi Madadgaar Hai'n, Jisko Yeh Badmazhab Shirk Qaraar Dete Hai'n, Ab Yeh Dekhiye Wahaabiyo'n Ka Aqeedah Hai Ke Aap Agar Beemaar Ho Jaaye'n To Aap Kisi Bhi Ambiya Wa Auliya Se Madad Talab Nahee'n Kar Sakte Hai'n, Aap Kisi Allaah Ke Mehboob Bande Ko Apni Baargaah Me'n Waseela Nahee'n Bana Sakte Hai'n, Yeh Badmazhabo'n Ke Nazdeek Shirk Hai Lekin Sahaabi Ke Nazdeek Yeh Shirk Nahee'n Hai, Lehaaza Aapko Faisla Karna Hai Ke Aapko Kiski Itteba Karni Hai, Sahaabi Ki Ya Wahaabi Ki ?
Saheeh Muslim Me'n Hai Ke Hazrat Asma Bint Abi Bakar Radiallaahu Anha Ke Gulaam Ka Naam Abdullaah Tha Aur Woh Hazrat Ata Ke Ladke Ke Maamu'n The, Woh Kehte Hai'n Hazrat Asma Radiallaahu Anha Ne Mujhe Hazrat Abdullaah Bin Umar Radiallaahu Anhu Ke Paas Bheja Aur Kaha Ke Mujhe Ma'loom Huwa Hai Aap 3 Cheezo'n Ko Haraam Qaraar Dete Hai'n, Kapdo'n Me'n Naqsh Wa Nigaar Ko, Surkh Gaddo'n (Mattress) Ko Aur Maah e Rajab Ke Mukammal Roze Rakhne Ko.
Hazrat Abdullaah Bin Umar Radiallaahu Anhu Ne Farmaaya, Aapne Jo Rajab Ke Muta'alliq Kaha Hai To Jo Shakhs Poore Rajab Ke Roze Rakhta Ho Woh Unko Haraam Kaise Keh Sakta Hai Aur Jo Kuchh Kapdo'n Par Naqsh Wa Nigaar Ke Baare Me'n Kaha Hai To Mai'n Ne Hazrat Umar Bin Khattaab Radiallaahu Anhu Ko Farmaate Huwe Suna Ke Mai'n Ne Rasoole Akram ﷺ Se Suna, Aap Farmaate The Resham Woh (Mard) Pahenta Hai Jiska (Aakherat Me'n) Koi Hissa Nahee'n, To Mujhe Darr Hai Ke Naqsh Wa Nigaar Ka Isi Se Ta'alluq Na Ho Aur Jahaa'n Tak Surkh Gaddo'n (Mattress) Ki Baat Hai To Hazrat Abdullaah Bin Umar Radiallaahu Anhu Ka Gadda Bhi Surkh Hai, Raawi Kehte Hai'n Mai'n Hazrat Asma Radiallaahu Anha Ke Paas Waapas Aaya Aur Unko Tamaam Baat Bataayi To Unho'n Ne Farmaaya, Yeh Rasoole Akram ﷺ Ka Jubba Hai Chunaanche Unho'n Ne Ek Tayalsee Jubba Mujhe Dikhaaya Jiski Aasteeno'n Aur Girebaan Par Reshmi Naqsh Wa Nigaar Bane Huwe The, Unho'n Ne Farmaaya Yeh Jubba Hazrat Aa'yesha Siddeeqa Radiallaahu Anha Ke Paas Tha Jab Unka Wisaal Huwa To Yeh Mere Qabze Me'n Aagaya, Nabi e Akram ﷺ Isko Pahente The Aur Ham Ise Dho Kar Mareezo'n Ko Pilaate Hai'n Aur Iske Zariye Shifa Talab Ki Jaati Hai. (Muslim Shareef, Kitaabul Libaas, Jild No.3, Safha No.1641, Hadees No.5298)
Ab Dekhiye Hazrat Asma Radiallaahu Anha Sahaabiya Ka Aqeedah Kya Hai Ke Huzoor e Paak ﷺ Jo Jubbe Ko Pahen Le Woh Jubba Bhi Logo'n Ko Shifa Deta Hai Aur Logo'n Ki Beemaariyo'n Me'n Shifa Yaabi Keliye Madadgaar Saabit Hota Hai.
Hazrat Rabee'ah Bin Ka'ab (Bin Maalik) Aslami Radiallaahu Anhu Ne Kaha Ke Mai'n (Khidmat Keliye) Rasoolullaah ﷺ Ke Saath (Suffa Me'n Aapke Qareeb) Raat Guzaara Karta Tha (Jab Aap Tahajjud Keliye Uthte To) Mai'n Wazu Ka Paani Aur Doosri Zarooriyaat Lekar Aapki Khidmat Me'n Haazir Hota (Ek Martaba) Aapne Mujhe Farmaaya (Kuchh) Maa'ngo, To Mai'n Ne Arz Ki, Ke Mai'n Aapse Jannat Me'n Aapki Hamraahi Maa'ngta Hoo'n, Aapne Farmaaya, Ya Iske Siwa Kuchh Aur ? Mai'n Ne Arz Ki Bas Yehi, To Aapne Farmaaya, Tum Apne Mu'aamle Me'n Sajdo'n Ki Kasrat Se Meri Madad Karo. (Muslim Shareef, Hadees No.1094)
Isse Saabit Huwa Ke Hazrat Rabee'ah Ne Huzoor ﷺ Se Jannat Maa'ngi To Yeh Na Farmaaya Ke Tumne Khuda Ke Siwa Mujhse Jannat Maa'ngi Tum Mushrik Hogaye Balke Farmaaya Woh To Manzoor Hai Kuchh Aur Bhi Maa'ngo, Yeh Gair e Khuda Se Madad Maa'ngna Hai, Phir Lutf Yeh Hai Ke Huzoor ﷺ Bhi Farmaate Hai'n, Aye Rabee'ah ! Tum Bhi Iss Kaam Me'n Meri Itni Madad Karo Ke Zyaadah Nawaafil Padha Karo Yeh Bhi Gairullaah Se Talab e Madad Hai, Isi Hadees e Paak Ke Maatahet Ash'atul Lam'aat Me'n Hai, Sawaal Ko Mutlaq Farmaaya Aur Farmaaya Kuchh Maa'ng Lo Kisi Khaas Cheez Se Muqayyad Na Farmaaya, Ma'loom Hota Hai Ke Saara Mu'aamla Huzoor ﷺ Hi Ke Dast e Kareema Me'n Hai Jo Chaahe Jisko Chaahe Apne Rab Ke Hukm Se Dede. (Ash'atul Lam'aat, 1/396, Ba Hawaala Sa'eedul Haq Sharah Ja Al-Haq,1/472)
Hadees Shareef Me'n Hazrat Sayyaduna Utba Bin Gazwaan Radiallaahu Anhu Se Riwaayat Hai Ke Huzoor e Purnoor ﷺ Farmaate Hai'n, Jab Tum Me'n Se Kisi Ki Koi Cheez Gum Ho Jaaye Aur Madad Chaahe Aur Aisi Jagah Ho Jahaa'n Koi Hamdam Nahee'n To Use Chaahiye Ke Yoo'n Pukaare Aye Allaah Ke Bando ! Meri Madad Karo, Aye Allaah Ke Bando ! Meri Madad Karo, Ke Allaah Ke Kuchh Bande Hai'n Jinhe'n Yeh Nahee'n Dekhta. (Mo'jamul Kabeer, 15/117, Hadees No.290)
Is Hadees Pak Me Bhi Gairullaah Se Madad Maa'ngne Ka Hukm Diya Ja Raha Hai.
Musannaf Ibne Abi Shayba, Kitaabul Fazaa'il, 7/482, Hadees No.35 & Wafaaul Wafa, 2/1374 Me'n Hai Ke Ameerul Momineen Hazrat Umar Faarooq Ke Daur e Khilaafat Me'n Qahet Padh Gaya To Sahaabi e Rasool Hazrat Bilaal Bin Haaris Ne Sultaan e Do Jahaa'n Rasoolullaah ﷺ Ki Qabr e Anwar Par Haazir Hokar Arz Ki, Ya Rasoolallaah ﷺ ! Apni Ummat Keliye Baarish Ki Du'aa Farma Deejiye Woh Halaak Ho Rahi Hai, Rasoolullaah ﷺ Ne Khwaab Me'n Unse Irshaad Farmaaya, Tum Hazrat Umar Ke Paas Jaake Mera Salaam Kaho Aur Bashaarat Dedo Ke Baarish Hogi Aur Yeh Bhi Keh Do Ke Woh Narmi Ikhtiyaar Kare, Hazrat Bilaal Bin Haaris Baargah e Khilaafat Me'n Haazir Huwe Aur Khabar Dedi, Hazrat Umar Faarooq Radiallaahu Anhu Yeh Sunke Rone Lage, Phir Farmaaya, Ya Rab ! Mai'n Kotaahi Nahee'n Karta Magar Usi Cheez Me'n Ke Jisse Mai'n A'ajiz Hoo'n.
Musnad e Imaam Ahmad Bin Hambal, 9/148, Hadees No.23646 Me'n Hai Ke Marwaan Ne Apne Zamaana e Tasallut Me'n Ek Saahab Ko Dekha Ke Rasoolullaah ﷺ Ki Qabr e Anwar Par Apna Muh Rakhe Huwe Hai'n, Marwaan Ne (Unki Gardan Mubaarak Pakad Kar) Kaha, Jaante Ho Kya Karrahe Ho ? Iss Par Un Saahab Ne Unki Taraf Mutawajjeh Ho Kar Farmaaya, Haa'n, Mai'n Kisi Ee'nt Pat'thar Ke Paas Nahee'n Aaya Hoo'n, Mai'n To Rasoolullaah ﷺ Ke Huzoor Haazir Huwa Hoo'n, Mai'n Ne Rasoolullaah ﷺ Ko Farmaate Huwe Suna, "Deen Par Na Rowo Jab Uska Ahel Uss Par Waali Ho, Haa'n Uss Waqt Deen Par Rowo Jabke Na Ahel Waali Ho, Yeh Sahaabi e Rasool Hazrat Abu Ayyoob Ansaari Radiallaahu Anhu The.
Tafseer e Madaarik, Sureh Nisa, Aayat No.64, Safha No. 236 Me'n Hai Ke Rasoolullaah ﷺ Ki Wafaat Shareef Ke Ba'ad Ek Aa'rabi Roza e Aqdas Par Haazir Huwa Aur Roza e Anwar Ki Khaak Apne Sar Par Daali Aur Arz Karne Laga, Ya Rasoolallaah ﷺ ! Jo Aapne Farmaaya, Hamne Suna Aur Jo Aap Par Naazil Huwa, Usme Yeh Aayat Bhi Hai "Sureh Nisa, Aayat No.64" Mai'n Ne Beshak Apni Jaan Par Zulm Kiya Aur Mai'n Aapki Baargaah Me'n Allaah Se Apne Gunaah Ki Bakhshish Chaahne Haazir Huwa Hoo'n To Mere Rab Se Mere Gunaaho'n Ki Bakhshish Karaa'iye, Iss Par Qabr Shareef Se Nida Aayi Ke Tujhe Bakhsh Diya Gaya.
Imaam Bukhaari, Al Adabul Mufrad, Safha No.217, Hadees No. 990, Saudi Arabian Nuskha, Baab - Agar Kisi Ka Paao'n Sun Ho Jaaye To Woh Kya Kare Ke Tahet Likhte Hai'n Ke Hazrate Abdur Rahmaan Bin Sa'ad Radiallaahu Anhu Kehte Hai'n Ke "Hazrat Abdullaah Ibne Umar Radiallaahu Anhu Ka Paao'n (Leg) Sun Hogaya, Ek Shakhs Unke Pass Aaya Aur Kaha Ke Uss Shakhs Ko Yaad Keejiye Jisse Aap Sabse Zyaadah Pyaar Karte Ho, To Hazrat Abdullaah Ibne Umar Radiallaahu Anhu Ne Farmaaya "Ya Muhammada" Aur Unka Paao'n (Leg) Achchha Hogaya.
Imaam Muwaaqidi Paidaa'ish 130 Hijri, Futhush Shaam Me'n Likhte Hai'n Ke Ja'ng e Yarmuk Jo Hazrat Umar Faarooq Radiallaahu Anhu Ke Khilaafat Ke Zamaane Me'n Huwi, Hazrat Sharjil Bin Husna Radiallaahu Anhu Ko Jab Dushmano'n Ne Gher Liya Aur Unpar Hamla Kardiya To Hazrat Qais Bin Humairah Ne Kaha "Aye Allaah Ki Madad Naazil Ho, Ya Muhammadu, Ya Muhammadu, Ya Mansooru, Ummatahu Ummata".
Ibne Kaseer, Al Bidaaya Wan Nihaaya, Jild No. 6, Safha No. 209 Me'n Likhte Hai'n Ke Jab Bhi Hazrat Siddeeq e Akbar Radiallaahu Anhu Ke Zamaane Me'n Sahaaba Ko Koi Zaroorat Padti To Sahaaba Kehte "Ya Muhammada".
Mohtaram Qaari'een : Jaisa Ke Aapne Dekha Aur Allaah Ki Taufeeq Se Aap Samajh Bhi Gaye Ho'nge, Bas Aap Faraq Ko Samajh Jaaye Masla Waazeh Ho Jaayega, Faraq Yeh Hai Ke Ambiya e Kiraam Wa Auliya e Kiraam Se Madad Maa'ngna Jaa'iz Hai Jabke Uska Aqeedah Yeh Ho Ke Haqeeqi Imdaad To Rab Ta'aala Hi Ki Hai, Yeh Hazraat Uske Mazhar Hai'n Aur Musalmaano'n Ka Yehi Aqeedah Hota Hai Koi Jaahil Bhi Kisi Wali Ko Khuda Nahee'n Samajhta.
Iske Ba'ad Waale Part Me'n A'imma Wa Muhaddiseen Wa Akaabir Ulama Ke Aqwaal Pesh Kiye Jaaye'nge Use Zaroor Padhiye Aur Share Bhi Kariye.
By Alahazrat Foundation Research Team - 7710809266/9892708816
