Chand Akaabir A'imma Wa Mohaddiseen Aur Mustanad Ulama Ke Hawaale Diye Jaarahe Hai'n Jinse Yeh Haqeeqat Waazeh Hoti Hai Ke Gairullaah Se Madad Maa'ngna Jaa'iz Hai.
Haafiz Abul Qaasim Sulemaan Bin Ahmad Al-Tabraani (Wisaal 360 Hijri) Riwaayat Karte Hai'n,
Hazrat Ummul Momineen Maimoona Radiallaahu Anha Bayaan Farmaati Hai'n Ke Nabi e Akram ﷺ Ne Ek Raat Mere Yahaa'n Qayaam Kiya, Aap ﷺ Wazu Keliye Uthe To Mai'n Ne Aapko Wazu Ke Dauraan Irshaad Farmaate Huwe Suna, Mai'n Haazir Hoo'n, Madad Ko Paho'ncha, Tumhaari Madad Kardi Gayi, Jab Aap Baahar Tashreef Laaye To Mai'n Ne Arz Kiya, Ya Rasoolallaah ﷺ ! Mai'n Ne Aap ﷺ Ko Haalat e Wazu Me'n 3 Baar "Mai'n Haazir Hoo'n, Madad Ko Paho'ncha, Tumhaari Madad Kardi Gayi" Kehte Huwe Suna, Goya Aap Kisi Insaan Se Guftagu Farma Rahe The, Kya Aap ﷺ Ke Saath Koi Tha, Farmaaya Haa'n, Bani Ka'ab Ka Rajiz (Rajizia Sher Kahne Wala) Mujhe Madad Keliye Pukaar Raha Tha. (Mo'jamul Kabeer Tabraani, Hadees No.1052)
Iss Hadees e Paak Me'n Waazeh Saboot Hai Ke Huzoor ﷺ Rajiz Radiallaahu Anhu Ko Dekh Bhi Rahe The, Unki Aawaaz Bhi Sun Rahe The Aur "Madad Ko Paho'ncha, Tumhaari Madad Kardi Gayi" Farma Kar Unki Madad Farma Rahe The, Iss Hadees e Mubaaraka Me'n Ilm e Gaib e Mustafa ﷺ Ke Saath Istemdaad Ka Bhi Saboot Hai, Ma'loom Huwa Ke Aap ﷺ Apne Gulaamo'n Ki Dastageeri Farmaate Hai'n Aur Unke Gamo'n Ko Door Farmaate Hai'n Aur Iss Hadees e Mubaaraka Me'n Yeh Bhi Waazeh Huwa Ke Sahaaba e Kareem Radiallaahu Anhum Ajma'een Door Wa Daraaz Maqaam Se Huzoor ﷺ Ko Nida (Pukaara) Bhi Karte The Aur Madad Bhi Talab Karte The.
Imaam e Aa'zam Abu Haneefa Alaihir Rehma (Wisaal 150 Hijri).
Khairul Quroon Ke Iss Azeem Imaam, Imaam e Aa'zam Abu Haneefa Alaihir Rehma Ke Nazdeek Huzoor Nabi e Akram ﷺ Ko Waseela Banaana Na Sirf Durust Hai Balke Aap ﷺ Se Istemdaad Karna Bhi Jaa'iz Hai, Unho'n Ne Apne Shohra e Aafaaq Na'tiya Manzoom Kalaam "Qaseeda e No'maan" Safha No.200" Me'n Saraahat Ke Saath Huzoor Taajdaar e Kaa'inaat ﷺ Se Tawassul Wa Istemdaad Kiya Hai Jiska Ek Misra Yoo'n Hai,
Tarjuma - Ya Rasoolallaah ﷺ (Mai'n Aapke Jood O Ata Ka Ummeedwaar Hoo'n) Aur Makhlooq Me'n Abu Haneefa Keliye Aapke Siwa Koi Madadgaar Nahee'n.
Khateeb Bagdaadi (463 Hijri) Aur Bahot Se A'imma Ki Tehqeeq Ke Mutaabiq Imaam Shaafayi Alaihir Rehma Jab Bagdaad Me'n Hote To Husool e Barkat Ki Garz Se Imaam e Aa'zam Abu Haneefa Alaihir Rehma Ki Qabar Mubaarak Ki Ziyaarat Karte, Khateeb Bagdaadi Naqal Karte Hai'n Ke Imaam Shaafayi, Imaam Abu Haneefa (Wisaal 150 Hijri) Ke Mazaar Ki Barkaat Ke Baare Me'n Khud Apna Tajruba Bayaan Karte Huwe Farmaate Hai'n,
Tarjuma - Mai'n Imaam Abu Haneefa Ki Zaat Se Barkat Haasil Karta Hoo'n Aur Rozaana Unki Qabar Par Ziyaarat Keliye Aata Hoo'n, Jab Mujhe Koi Zaroorat Aur Mushkil Pesh Aati Hai To 2 Rak'at Namaaz Padh Kar Unki Qabar Par Aata Hoo'n Aur Uske Paas (Khade Ho Kar) Haajat Bar Aari Keliye Allaah Paak Se Du'aa Karta Hoo'n, Pas Mai'n Wahaa'n Se Nahee'n Hat'ta Yahaa'n Tak Ke (Qabar Ki Barkat Ke Sabab) Meri Haajat Poori Ho Chuki Hoti Hai. (Khateeb Bagdaadi Fee Taareekh Bagdaad, 1/123, Safha No.94, 1/41)
Imaam Gazaali (Wisaal 505 Hijri) Ne Farmaaya Ke Jisse Zindagi Me'n Madad Maa'ngi Jaati Hai Usse Unki Wafaat Ke Ba'ad Bhi Madad Maa'ngi Jaaye, Ek Buzurg Ne Farmaaya Ke 4 Shakhso'n Ko Hamne Dekha Ke Woh Qabro'n Me'n Bhi Wohi Amal Karte Hai'n Jo Zindagi Me'n Karte The Ya Zyaadah Ek Jamaa'at Kehti Hai Ke Zindah Ki Madad Zyaadah Qawi Hai Aur Mai'n Kehta Hoo'n Ke Murdah Ki Imdaad Zyaadah Qawi Hai, Auliya Ki Hukoomat Jahaano'n Me'n Hai Aur Yeh Nahee'n Hai Magar Unki Rooho'n Ko Kyu'nke Arwaah Baaqi Hai. (Sa'eedul Haq, 1/472, Bawaala Ash'atul Lam'aat, 1/715)
Nabi e Kareem ﷺ Ke Haajat Rawaayi, Mushkil Kushaayi Aur Imdaad Farmaane Ka Silsila Bahot Wasee Wa Kushaadah Hai, Iss Mauzu Par Jaleelul Qadr Imaam Hazrat Allaama Abu Abdullaah Muhammad Bin Moosa Maaliki Maraaqashi (Wisaal 682 Hijri) Ne Poori Kitaab Tasneef Farmaayi Hai Jisse Kayi Ulama Wa Mohaddiseen Ne Istefaada Kiya Hai, Inhee'n Ki Ek Ibaarat Se Iss Unwaan Ki Wus'at Ko Samjha Ja Sakta Hai Jaisa Ke Likhte Hai'n,
Tarjuma - Agar Iss Tarah Ke Waaqe'aat Ko Jama Kiya Jaaye To Unka Ahaata Karne Me'n Qalam Ghis Jaaye'n, Dawaate'n Khushk Ho Jaaye'n Aur Kaapiyaa'n Aur Ragister Khatam Ho Jaaye'nge. (Misbaahus Zilaam, 102)
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai (Isi Tarah Gairullaah Se Madad Maa'ngne Se Muta'alliq Bhi Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
