Ham Ahle Sunnat Wa Jamaa'at Ke Nazdeek Nabi e Kareem ﷺ Ke Naam Par A'ngoothe Choomne Ka Nazariya Aur Aqeedah Na Zarooriyaat e Deen Se Hai Na Zarooriyaat e Ahle Sunnat Se Hai Balke Yeh Ek Jaa'iz Aur Mustahab Amal Hai Jis Par Ajar Wa Sawaab Hai Aur Yeh Furu Me'n Se Hai.
Sarkaar e Do Aa'lam ﷺ Wajhe Takhleeq e Kaa'inaat Hai'n Farsh Geeti (Zameen) Par Unki Tashreef Aawaari Tamaam Makhlooqaat Keliye Ne'mat Aur Sabse Bada Ahsaan e Azeem Hai, Unki Mohabbat Har Insaan Par Laazim Hai Ke Mohabbat Ke Saath Apne Mohsin e Aa'zam Ka Naam Paak Sunkar Apne A'ngoothe Ke Naakhun Ko Choom Kar Aa'nkho'n Se Lagaana Apne Aaqa Se Sachchi Mohabbat Wa Aqeedat Ishq Wa Ulfat Ki Roshan Daleel Hai, Aur Yeh Hazrat Aadam Alaihissalaam Aur Hazrat Siddeeq e Akbar Radiallaahu Anhu Ki Sunnat e Kareema Hai.
Jaisa Ke Allaama Shaykh Ismaa'eel Haqqi Alaihir Rehma Ne Tafseer Roohul Bayaan Me'n Tehreer Farmaaya Hai Ke Jab Hazrat Aadam Alaihissalaam Ko Jannat Ke Andar Nabi e Kareem ﷺ Se Mulaaqaat Ka Shauq Huwa To Allaah Paak Ne Wahi Bheji Ke Woh Tumhaari Pusht Se Aakhri Zamaane Me'n Paida Ho'nge, To Hazrat Aadam Alaihissalaam Ne Arz Kiya Ke Unse Mulaaqaat Karaade, To Allaah Paak Ne Hazrat Aadam Alaihissalaam Ke Dono'n A'ngootho'n Ke Naakhun Me'n Apne Pyaare Habeeb Nabi e Kareem ﷺ Ka Jamaal Misle Aa'eena Zaahir Farmaaya, Hazrat Aadam Alaihissalaam Ne Jab Jamaal e Mustafa Ki Ziyaarat Ki To Mohabbat Se A'ngootho'n Ke Naakhun Ko Choom Kar Aa'nkho'n Par Rakh Liya. (Tafseer Roohul Bayaan, Jild No.7, Safha No.229, Sureh Ahzaab, Aayat No.56 Ke Tahet)
Isi Tafseer Me'n Hazrat Ismaa'eel Haqqi Alaihirrahma Farmaate Hai'n Ke Paigambar e Islaam ﷺ Masjid Me'n Tashreef Laaye Aur Ek Sutoon Ke Qareeb Tashreef Farma Huwe, Hazrat Abu Bakar Siddeeq Radiallaahu Anhu Bhi Baraabar Me'n Baith Gaye, Hazrat Bilaal Radiallaahu Anhu Uthe Aur Azaan Padhna Shuru Kiya, Jab Unho'n Ne "Ash'hadu Anna Muhammadar Rasoolullaah" Kaha To Hazrat Siddeeq e Akbar Radiallaahu Anhu Ne Apne Dono'n A'ngootho'n Ke Naakhun Ko Apni Aa'nkho'n Par Rakh Kar Choom Liya Aur Kaha "Qurratu Ayni Bika Ya Rasoolallaah" (Aye Allaah Ke Rasool Aap Hamaari Aa'nkho'n Ki Thandak Hai'n) Hazrat Bilaal Radiallaahu Anhu Azaan Se Faarig Huwe To Sarkaar e Aqdas ﷺ Ne Farmaaya Aye Abu Bakar ! Jo Shakhs Teri Tarah Karega Allaah Paak Uske Naye Puraane Gunaaho'n Ko Mu'aaf Farma Dega Khwaah Woh Sehwan Ho'n Ya Amadan. (Tafseer Roohul Bayaan, 7/229)
Mazkoorah Baala Dono'n Tafseero'n Se Ma'loom Huwa Ke Rasoolullaah ﷺ Ka Naam e Paak Sunkar Dono'n A'ngootho'n Ko Aa'nkho'n Par Choom Kar Rakhna Abul Bashar Hazrat Aadam Alaihissalaam Aur Hazrat Siddeeq e Akbar Radiallaahu Anhu Ki Sunnat Hai.
Imaam Sakhaawi Alaihir Rehma Farmaate Hai'n Ke Mo'azzin Se Azaan Me'n "Ash'hadu Anna Muhammadar Rasoolullaah" Sunkar A'ngushtaan e Shahaadat (Shahaadat Waali U'ngli) Ke Pore (Kinaare) Jaanib e Baatin Se Choom Kar Aa'nkho'n Par Malna Aur Yeh Padhna Chaahiye "Ash'hadu Anna Muhammadan Abduhu Wa Rasooluhu, Radeetu Billaahi Rabbau Wa Bil Islaami Deenau Wa Bi Muhammadin Nabiyya" (Mai'n Gawaahi Deta Hoo'n Ke Muhammad ﷺ Allaah Ke Bande Aur Uske Rasool Hai'n, Aur Mai'n Allaah Ke Rab Hone Par, Islaam Ke Deen Hone Par Aur Muhammad ﷺ Ke Nabi Hone Par Raazi Hoo'n. (Al-Maqaasidul Hasanah, 1/384, Raqam 1021)
Delmi Ne Iss Hadees Ko "Al-Firdaus Bima Sauril Khitaab" Me'n Hazrat Abu Bakar Radiallaahu Anhu Se Riwaayat Kiya Hai Ke Jab Unho'n Ne Mo'azzin Ko "Ash'hadu Anna Muhammadar Rasoolullaah" Kehte Huwe Suna To Yeh Du'aa Padhi Aur Dono'n A'ngushtaan e Shahaadat Ke Poro'n Ko Choom Kar Aa'nkho'n Se Mala, Yeh Dekh Kar Huzoor Nabi e Akram ﷺ Ne Farmaaya, Jisne Mere Pyaare Dost Ki Tarah Amal Kiya, Uspar Meri Shafa'aat Halaal Hogayi.
Mulla Ali Qaari Alaihir Rehma Iss Hadees Par Tabsera Karte Huwe Farmaate Hai'n Ke Agar Yeh Amal Hazrat Abu Bakar Siddeeq Radiallaahu Anhu Se Saabit Hai To Iss Par Amal Karna Kaafi Hai, Huzoor Nabi e Akram ﷺ Ka Farmaan Hai, Tum Par Mere Ba'ad Meri Sunnat Aur Sunnat e Khulafa e Raashideen Laazim Hai. (Kashful Khulafa, 2/270, Raqam 2296)
A'imma e Fuqaha Bhi Azaan Me'n Huzoor Nabi e Akram ﷺ Ka Naam e Mubaarak Sunkar A'ngoothe Choomne Ko Mustahab Qaraar Dete Hai'n.
Allaama Ibne Aa'bideen Shaami Alaihir Rehma Apne Mash'hoor Wa Ma'roof Fataawa Raddul Muhtaar Ala Durrul Mukhtaar Me'n Farmaate Hai'n Ke Mustahab Hai Ke Azaan Ki Pehli Shahaadat Sunne Par "Sallallaahu Alaika Ya Rasoolallaah" Aur Doosri Shahaadat Sunne Par "Qurratu Ayni Bika Ya Rasoolallaah" Kaha Jaaye Aur Phir Apne Dono'n A'ngootho'n Ke Naakhun Choom Kar Apni Aa'nkho'n Par Rakh Kar Kaho "Allaahumma Matta'ni Bis Sam'ee Wal Basari" Kyu'nke Beshak Huzoor Nabi e Akram ﷺ Aisa Karne Waale Ko Apne Peechhe Jannat Me'n Le Jaaye'nge. (Fataawa Shaami, 1/398)
Allaama Tahtaavi Hanfi Alaihir Rehma Likhte Hai'n Ke Allaama Quhustaani Ne Kanzul Ibaad Se Naqal Kiya Hai Ke Beshak Jab Azaan Me'n Pehli Baar "Ash'hadu Anna Muhammadar Rasoolullaah" Sune To Uske Jawaab Me'n "Sallallaahu Alaika Ya Rasoolallaah" Kahe Aur Doosri Baar Sune To Dono'n A'ngootho'n Ke Naakhun Choomte Huwe Yeh Kahe "Qurratu Ayni Bika Ya Rasoolallaah, Allaahumma Matti'ni Bis Sam'ee Wal Basari" Aisa Karna Mustahab Hai Aur Beshak Huzoor Nabi e Akram ﷺ Aisa Karne Waale Ko Jannat Me'n Apne Saath Le Jaaye'nge. (Tahtaavi, Haashiya Ala Maraqi Yil Falaah, 1/138)
Zaroori Tambeeh - Mumkin Hai Ke Jaa'iz Na Maanne Waale Yeh Keh Kar Saare Dalaa'il Se Chashm Poshi Karne Ki Koshish Kare'n Aur Logo'n Ko Behkaane Me'n Lag Jaaye'n Aur Yeh Kahe'n Ke Yeh Riwaayat Za'eef Hai To Iske Jawaab Keliye Yeh Kaafi Hai Ke Sarwar e Do Aa'lam ﷺ Ke Naam Ko Sunkar A'ngoothe Choomna Fazaa'il e Aa'maal Me'n Se Hai Aur Fazaa'il e Aa'maal Ke Saboot Keliye Za'eef Hadees Bhi Bil Ijma Maqbool Wa Ma'mool Hai Isme'n Kisi Ka Inkaar Nahee'n.
Jaisa Ke Imaam Zainuddeen Abdul Ra'oof Al-Manaavi Ash-Shaafayi Alaihir Rehma (Wisaal 1031) Farmaate Hai'n Ke Huffaaze Ahaadees Wa Ulama e Deen Ka Ittefaaq Hai Ke Fazaa'il e Aa'maal Me'n Za'eef Hadees Par Amal Jaa'iz Hai. (Sharhul Arbayeen Annawawiyyah, 2/11)
Lehaaza Yeh Saabit Hogaya Ke Huzoor ﷺ Ka Naam e Paak Sunkar A'ngootho'n Ko Choomna Aur Aa'nkho'n Par Rakhna Jaa'iz Wa Durust Hai Balke Baa'ise Barkat Aur Jannat Me'n Jaane Ka Zariya Hai.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai (Isi Tarah A'ngoothe Choomne Ka Masla Bhi Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
