Aqaa'id e Islaam Ki 2 Qisme'n Hai'n (1) Usool Aqaa'id (2) Furu Aqaa'id
Phir Usool Aqaa'id Ki Bhi 2 Qisme'n Hai'n (1) Zarooriyaat e Deen (2) Zarooriyaat e Ahle Sunnat
Zarooriyaat e Deen Ki Ta'reef :- Deen Ke Aise Aqaa'id Wa Aa'maal Jo Qur'aan e Kareem, Ahaadees e Mutawaatir Ya Ijma e Ummat Se Qatayi Taur Par Saabit Ho'n Aur Jo Nusoos (Qur'aan Wa Hadees) In Aqaa'id Wa Aa'maal Ko Saabit Karne Keliye Laaye Gaye Ho'n Woh Apne Ma'ni Wa Muraad Ko Saaf Aur Waazeh Karte Ho'n Aur Woh Aqaa'id Wa Aa'maal Musalmaano'n Ke Darmiyaan Iss Qadar Mash'hoor Wa Ma'roof Ho'n Ke Khawaas Aur Woh Awaam Jo Ulama Aur Deen Se Ta'alluq Rakhte Hai'n Sabko Ma'loom Ho'n, To Aise Aqaa'id Wa Aa'maal Ko Zarooriyaat e Deen Kehte Hai'n, Jaise Allaah Ek Hai, Hazrat Muhammad ﷺ Aakhri Rasool Hai'n, Namaaz, Rozah, Haj Wagairah Ka Kaare Sawaab Hona Aur Jhoot, Sharaab Noshi Wagairah Ka Gunaah Hona.
Mazkoorah Maf'hoom Ka Saboot Neeche Di Huwi Ibaarato'n Se Khoob Waazeh Hota Hai,
Aa'la Hazrat Imaam Ahmad Raza Khaan Faazil e Barelvi A'laihir Rehma (Wafaat 1340 Hijri) Farmaate Hai'n, Awwal Zarooriyaat e Deen Iska Saboot Qur'aan e Majeed Ya Hadees e Mutawaatir Ya Ijma e Qatayi, Qat'ayyatud Dalaalaat Aur Waazehatul Ifaadaat Se Hota Hai Jinme'n Na Shuba Ki Gunjaa'ish Na Taaweel Ko Raah. (Ae'teqaadul Ahbaab, Safha No.18)
Maulaana Amjad Ali Aa'zami A'laihir Rehma Farmaate Hai'n, Zarooriyaat e Deen Woh Masaa'il e Deen Hai'n Jinko Har Khaas Wa Aa'm Jaante Ho'n, Jaise Allaah A'zzowajal Ki Wehdaaniyat, Ambiya Ki Nabuwwat, Jannat Wa Naar, Hashar Wa Nashar Wagairah. (Bahaare Sharee'at, Jild No.1, Safha No.47)
Mazkoorah Baala Hawaala Jaat Se Waazeh Huwa Ke Awaam Aur Khawaas Ke Darmiyaan Mash'hoor Wa Ma'roof Ho Jaane Waale Wohi Umoor Zarooriyaat e Deen Hai Jinki Dili Tasdeeq Aur Zabaani Iqraar Se Insaan Musalmaan Hota Hai Aur Jinki Takzeeb Wa Inkaar Wa Tauheen Wa Istekhfaaf (Halka Jaanne) Se Kaafir Qaraar Diya Jaata Hai, Neeche Zarooriyaat e Deen Ki Kuchh Misaale'n Di Jaarahi Hai'n.
(1) Allaah A'zzowajal Ki Zaat e Muqaddas Ka Waajibul Wajood Hona (Ya'ni Maujood Hona).
(2) Akela Usi Ka Ibaadat Ka Mustahiq Hona.
(3) Uska Qadeem (Sabse Puraana) Hona, Kisi Ka Mohtaaj Na Hona.
(4) Har Kamaal Wa Khoobi Ka Jaame Hona Maslan Hayi (Zindah) Hona.
(5) Khaaliq (Paida Karne Waala) Hona.
(6) Raaziq (Rizq Dene Waala) Hona.
(7) Muhi (Zindah Karne Waala) Hona.
(8) Mumeet (Maut Dene Waala)Hona.
(9) Aleem (Sab Kuchh Jaanne Waala) Hona.
(10) Qadeer (Qudrat Waala) Hona.
(11) Mureed (Iraadah Karne Waala) Hona.
(12) Mutakallim (Kalaam Karne Waala) Hona.
(13) Baseer (Sab Kuchh Dekhne Waala) Hona.
(14) Samee (Sab Kuchh Sunne Waala) Hona. Wagairah.
(15) Jhoot, Daga, Makr Wa Fareb, Khayaanat, Zulm, Jahel, Aa'jizi, Wagairah Tamaam Aybo'n Se Paak Hona.
(16) Usi Ki Takhleeq Se Aa'lam Ka Wajood Me'n Aana.
(17) Allaah A'zzowajal Ka Jism Wa Jismaaniyaat Aur Jagah Wa Makaan Se Paak Hona.
(18) Aa'lam Ka Jam'ee Ajza Ke Saath Haadis Hona.
(19) Ambiya e Kiraam Ka Nabi Hona.
(20) Nabiyo'n Ka Tableeg Ke Kaamo'n Me'n Galti Aur Nisyaan Se Paak Hona.
(21) Nabiyo'n Ki Ta'zeem Ka Farz Hona Aur Unka Tamaam Makhlooq Se Afzal Wa Aa'la Hona.
(22) Nabiyo'n Ka Ba'az Gaibo'n Par Muttala (Jaanne Waala) Hona.
(23) Nabiyo'n Par Hi Wahi Ka Khaas Hona.
(24) Huzoor Muhammad e Arabi ﷺ Ka Aakhri Nabi Hona.
(25) Huzoor Nabi e Kareem ﷺ Ka Tamaam Makhlooq Hatta Ke Aadam Wa Khaleel A'laihimus Salaam Aur Malakul Maut Wa Shaitaan Se Bhi Bada Aa'lim Hona.
(26) Aasmaani Kitaabo'n Ka Barhaq Hona.
(27) Qur'aan e Paak Ki Ek Ek Aayat Mehfooz Hona.
(28) Farishto'n Ka Maujood Wa Ma'soom Hona Aur Unki Ta'zeem Ka Farz Hona.
(29) Jino'n Ka Maujood Hona.
(30) Maut Ka Barhaq Hona.
(31) Rooh Ka Tanaasukh Ke Taur Par Doosre Ke Badan Me'n Daakhil Na Hona (Ya'ni Doosre Janam Ka Na Hona).
(32) Qayaamat Ka Barhaq Hona.
(33) Hashar Rooh Wa Jism Dono'n Ke Saath Hona.
(34) Aa'maal Ka Hisaab Hona.
(35) Jannat Wa Jahannam Ka Barhaq Hona.
(36) Qatle Nabi A'laihissalaam Wa Tauheen e Nabi, Tauheen e Ka'ba Aur Tauheen e Qur'aan e Paak Ka Haraam Hona.
(37) Namaaz, Rozah, Haj, Zakaat Ka Farz Hona.
(38) Sood, Sharaab, Juwa, Jhoot, Geebat, Chugli, Zina, Chori, Wa'dah Khilaafi, Amaanat Me'n Khayaanat Wa Zulm Ka Haraam Hona.
(39) Kaafir e Qatayi Ko Kaafir Aur Musalmaano'n Ko Musalmaan Jaanna.
Yeh Sab Aur In Jaise Doosre Farz Wa Haraam Jo Kisi Daleel e Qatayi Se Saabit Ho'n Aur Unka Umoor e Deen Se Hona Awaam Khawaas Sabko Ma'loom Ho Saare Zarooriyaat e Deen Hai.
Zarooriyaat e Deen Ka Munkir (Inkaar Karne Waala) Kaafir Hai, Agar Koi Shakhs Zarooriyaat e Deen Me'n Se Kisi Ek Baat Ka Bhi Inkaar Karega Woh Kaafir Ho Jaayega Agarche Woh Laakh Kalma Padhe Ya Hamaare Qible Ki Taraf Muh Karke Namaaz Bhi Padhe Kyu'nke Woh Sharayi Taur Par Ahle Qibla Hai Hi Nahee'n, Jaisa Ke Allaama Abdul Azeez Farhaaruwi A'laihir Rehma Farmaate Hai'n,
Tarjuma :- Ahle Qibla Mutakallimeen Ki Istalaah Me'n Woh Hai Jo Zarooriyaat e Deen Ko Maanta Ho, To Jo Zarooriyaat e Deen Me'n Se Kisi Baat Ka Inkaar Kare Woh Ahle Qibla Nahee'n Agarche Had Darja Ibaadat Guzaar Ho. (Nibraas, Safha No.342)
Aur Huzoor Sadrush Sharee'ah Allaama Amjad Ali Aa'zami A'laihir Rehma Farmaate Hai'n, Kisi Ek Zaroor e Deeni Ke Inkaar Ko Kufr Kehte Hai'n, Agarche Baaqi Tamaam Zarooriyaat Ki Tasdeeq Karta Ho. (Bahaar e Sharee'at, Jild No.1, Safha No 47, Bahawaala Shaami, Jild No.3, Safha 391)
By Alahazrat Foundation Research Team - 7710809266/9892708816
