Qaari'een Hazraat ! Aqaa'id Se Muta'alliq Awwalan (Pehle) Chand Akaabireen e Ahle Sunnat Wa Jamaa'at Ki Chand Ibaarate'n Mulaaheza Farmaale'n Aur Achchi Tarah Samajh Le'n Taake Aqaa'id Ki Shanaakht (Pehchaan) Aur Uska Hukm Samajhne Me'n Aasaani Ho Sake,
(1) Shehzaada e Aa'la Hazrat Imaam e Ahle Sunnat, Hujjatul Islaam Hazrat Allaama Mufti Muhammad Haamid Raza Khaan Qaadri Barkaati A'laihir Rehma "Fataawa Haamidya" Me'n Aqaa'id Se Muta'alliq Likhte Hai'n, Maani Huwi Baate'n 4 Qism Ki Hoti Hai'n,
(1) Zarooriyaat e Deen Jinka Munkir Kaafir, Inka Saboot Qur'aan e Azeem Ya Hadees e Mutawaatir Ya Ijma e Qat'ayyatud Dalaalaat Waazehatul Ifaadaat Se Hota Hai Jinme'n Na Shube (Shak) Ko Gunjaa'ish Na Taaweel Ko Raah.
(2) Zarooriyaat e Mazhab e Ahle Sunnat Wa Jamaa'at Jinka Munkir Gumraah Bad Mazhab, Inka Saboot Bhi Daleel e Qatayi Se Hota Hai Agarche Be Ahtemaal Taaweel Baab e Takfeer Masdood Hai.
(3) Saabetaat e Mohkama Jinka Munkir Baad Wuzuh Amre Khaati Wa Aasim Qaraar Paata Hai, Inke Saboot Ko Daleel e Zanni Kaafi Jabke Iska Mafaad Akbar Raaye Ho Ke Jaanib e Khilaaf Ko Matrooh Wa Muzmahil Karde, Yahaa'n Hadees e Aahaad Saheeh Ya Hasan Kaafi Aur Qaul e Sawaad e Aa'zam Aur Jamhoor Ulama e Sanad Waafi (Beshak Jamaa'at Par Allaah Ka Daste Qudrat Hai).
(4) Zanniyaat e Mohtamela, Jinke Munkir Ko Sirf Mukhti Kaha Jaaye, Unke Liye Aisi Daleel e Zanni Bhi Kaafi Jisne Jaanib e Khilaaf Keliye Gunjaa'ish Bhi Rakhi Ho.
Har Baat Apne Hi Martabe Ki Daleel Chaahti Hai Jo Farq e Maraatib Na Kare Aur Ek Martabe Ki Baat Ko Usse Aa'la Darje Ki Daleel Maa'nge Jaahil Bewakoof Hai Ya Makkaar Fayelsoof. (Fataawa Haamidya, Safha No.134, Naashir Zaawiya Publisher Darbaar Maarket Laahor)
(2) Gazaali e Zamaa'n Allaama Sayyad Ahmad Sa'eed Kaazmi Amrohuwi A'laihir Rehma Aqaa'id Ke Aqsaam Wa Ahkaam Aur Dalaa'il Se Muta'alliq Ahem Nuqaat Bayaan Karte Huwe Likhte Hai'n,
Ba'az Log Kam Ilmi Aur Na Waaqfiyat Ki Wajah Se Har Masla e Shar'iyya Par Nusoos e Qat'iyya Aur Qur'aan Wa Hadees Se Dalaa'il e Sareeha Talab Karte Hai'n, Aur Keh Diya Karte Hai'n Ke Mutlaqan Baab e Aqaa'id Me'n Bajuz Nasse Qatayi Qur'aan Wa Hadees Ki Sareeh Ibaarat Ke Koi Cheez Qaabil e Qabool Nahee'n, Haalaa'nke Unka Yeh Kehna Qat'an Galat Aur Be Buniyaad Hai, Yaad Rakhiye Qatayi Daleel Aur Qur'aan Wa Hadees Ki Sareeh Qatayi Ibaarate'n Sirf Un Aqaa'id Keliye Zaroori Hai'n Jo Qatayi Ho'n Aur Jin Par Madaar e Imaan Ho, Aur Baaqi Rahe Aqaa'id e Zanniya To Unke Liye Zanni Daleele'n Pesh Ki Jaaye'ngi, Sharah Aqaa'id e Nasfi Me'n "Tafzeel Rusul" Par Kalaam Karte Huwe Shaareh Allaama Farmaate Hai'n, Iss Amr Me'n Koi Khafa Nahee'n Ke Yeh Masla Zanni Hai, Jispar Zanni Dalaa'il Par Iktefa Karliya Jaata Hai, (Sharah Aqaa'id e Nasfi, Safha No.126). Isi Tarah "Nibraas" Sharah "Sharah Aqaa'id" Me'n Safha No.24 Par Aqaa'id Ki 2 Qisme'n Qatayi Aur Zanni Bayaan Farmaayee'n, Aur Isi Mazmoon Ko Waazeh Farmaaya, Neez Isi Nibraas Sharah Aqaa'id Ki Sharah Me'n Safha No.598 Par Manqoola Baala Ibaarat Ke Tahet Bahot Tafseel Se Farmaaya,
Tarjuma :- Shaareh Ke Jawaab Ka Ma Haasil Yeh Hai Ke Masaa'il e Ae'teqaadiya Ki 2 Qisme'n Hai'n, Ek Woh Jisme'n Yaqeen Matloob Ho, Jaise Waajib Ta'aala Ki Wehdat, Aur Nabi e Kareem ﷺ Ka Sidq, Doosri Woh Jisme'n Zan Par Iktefa Karliya Jaaye Jaise (Tafzeel Rusul) Yehi Malsa, Daleel e Zanni Me'n Jin Masaa'il Par Iktefa Na Jaa'iz Hai Woh Sirf Pehli Qism Ke Masaa'il Hai'n, Jinme'n Yaqeen Matloob Hota Hai, Bakhilaaf Doosri Qism Me'n Jisme'n Sirf Zan Matloob Hota Ho, Unme'n Daleel e Zanni Par Bila Shuba Iktefa Jaa'iz Hai, Ahkaam Ka Bhi Yehi Haal Hai Ke Hukm Jitna Qawi Hoga Uski Daleel Bhi Utni Qawi Hogi.
Aqaa'id Wa Ahkaam Ke Ba'ad Fazaa'il Wa Manaaqib Ki Taraf Aayiye To Isme'n Bhi Tanazzul Ikhtiyaar Karna Padega, Ya'ni Za'eef Hadeese'n Bhi Iss Baab Me'n Mo'tabar Hogi, Jaisa Ke Mohaddiseen Ne Ja Baja Iski Tasreeh Farmaayi Hai, Aur A'imma Fuqaha Ne Fazaa'il e Aa'maal Me'n Za'eef Tareen Ahaadees Ko Ma'mool Biha Qaraar Diya Hai, Dekhiye Masah Raqba (Wazu Me'n Gardan Par Masah Karne) Ki Hadees Aisi Za'eef Shadeed Hai Ke Ba'az Mohaddiseen Ne Ise Mauzu Tak Keh Diya, Lekin A'imma Aur Fuqaha Ne Ise Bhi Ma'mool Bihi Maana Aur Aajtak Iss Par Amal Hota Chala Aaraha Hai.
Fazaa'il Wa Manaaqib Me'n Za'eef Ka Mo'tabar Hona Muttafiq A'laih Hai, Allaama Ibne Hajar, Mulla Ali Qaari, Shaah Abdul Haq Dahelvi Wagairahum Ulama Ki Tasreehaat Khusoosan Mohaddiseen Wa Fuqaha e Ahnaaf Ne Saaf Saaf Farmaaya Hai, Jisse Koi Ahle Ilm Be Khabar Nahee'n, Dekhiye Afzalul Qur'aa, Muqaddama Mishqaat, Mauzoo'aat e Kabeer, Qufwul Asar, Bilkhusoos Aisi Soorat Me'n Jabke Hadees Ka Mazmoon Qawi Hadees Ke Mazmoon Se Mazboot Ho, Laaziman Iss Hadees e Za'eef Ko Fazaa'il Wa Manaaqib Me'n Qaabil e Ahtejaaj (Daleel) Samjha Jaayega. (Masla e Zille Nabi ﷺ Par Tehqeeqi Nazar Aur Dalaa'il Nafi Wa Isbaat Ka Jaa'iza, Safha No.1 to 8)
By Alahazrat Foundation Research Team - 7710809266/9892708816
