Har Musalmaan Ko Allaah A'zzowajal Ke Baare Me'n Yeh Aqeedah Rakhna Zaroori Hai,
(1) Allaah A'zzowajal Ek Hai, Koi Uska Shareek (Partner) Nahee'n, Na Zaat Me'n, Na Sifaat Me'n, Na Af'aal (Work) Me'n, Na Ahkaam Me'n, Na Asma Me'n, Woh Waajibul Wajood Hai Ya'ni Uska Wajood Zaroori Hai Aur Adam Muhaal, Qadeem Hai, Ya'ni Hamesha Se Hai, Azali Ke Bhi Yehi Ma'ni Hai'n, Baaqi Hai, Ya'ni Hamesha Rahega Aur Isi Ko Abadi Bhi Kehte Hai'n, Wohi Ibaadat Ke Laayeq Hai, Uske Siwa Kisi Ki Bhi Ibaadat Nahee'n Ki Ja Sakti.
(2) Allaah A'zzowajal Be Parwaah Hai, Kisi Ka Mohtaaj Nahee'n Lekin Tamaam Jahaan Uska Mohtaaj Hai.
(3) Allaah A'zzowajal Ki Zaat Ka Idraak (Ahsaas) Aqlan Muhaal (Na Mumkin) Hai Ke Jo Cheez Samajh Me'n Aati Hai Aqal Usko Muheet Hoti Hai (Ya'ni Gher Leti Hai) Lekin Usko Koi Ihaata (Cover) Nahee'n Kar Sakta Albatta Uske Af'aal (Work) Ke Zariye Se Ijmaalan (Short Me'n) Uski Sifaat, Phir Un Sifaat Ke Zariye Se Ma'refat e Zaat (Knowledge) Haasil Hoti Hai.
(4) Allaah A'zzowajal Ki Sifate'n Na Ayn Hai'n Na Gair, Ya'ni Sifaat Usi Zaat Hi Ka Naam Ho Aisa Nahee'n, Aur Na Usse Kisi Tarah Nahwe Wajood Me'n Juda Ho Sake'n Ke Nafse Zaat Ki Muqtaza Hai'n Aur Ayn e Zaat Ko Laazim. (Ya'ni Kisi Bhi Taur Par Sifat, Zaat Se Juda Ho Kar Nahee'n Paayi Ja Sakti), (Bila Tashbeeh Isko Yoo'n Samjhe'n Ke Phool Ki Khushbu Phool Ki Sifat Hai Jo Phool Ke Saath Hi Paayi Jaati Hai, Magar Uss Khushbu Ko Ham Phool Nahee'n Kehte, Aur Na Hi Use Phool Se Juda Keh Sakte Hai'n)
(5) Jis Tarah Allaah A'zzowajal Ki Zaat Qadeem Azali Abadi Hai, Sifaat Bhi Qadeem Azali Abadi Hai'n.
(6) Allaah A'zzowajal Ki Sifaat Na Makhlooq Hai'n Na Zere Qudrat Daakhil.
(7) Allaah A'zzowajal Ki Zaat Wa Sifaat Ke Siwa Sab Cheeze'n Haadis Hai'n, Ya'ni Pehle Na Thee'n Phir Maujood Huwee'n.
(8) Sifaat e Ilaahi Ko Jo Makhlooq Kahe Ya Haadis Bataaye Gumraah Bad Deen Hai.
(9) Jo Aa'lam Me'n Se Kisi Cheez Ko Qadeem Maane Ya Uske Hudoos Me'n Shak Kare Woh Kaafir Hai.
(10) Allaah A'zzowajal Na Kisi Ka Baap Hai, Na Beta Hai, Na Uski Beewi Hai, Jo Use Baap Ya Beta Bataaye Ya Uske Liye Beewi Saabit Kare Kaafir Hai, Balke Jo Mumkin Bhi Kahe Gumraah Bad Deen Hai.
(11) Allaah A'zzowajal "Hayi" Hai, Ya'ni Khud Zindah Hai Aur Sabki Zindagi Uske Haath Me'n Hai, Jise Jab Chaahe Zindah Kare Aur Jab Chaahe Maut De.
(12) Allaah A'zzowajal Har Mumkin Par Qaadir Hai, Koi Mumkin Uski Qudrat Se Baahar Nahee'n.
(13) Jo Cheez Muhaal Hai, Allaah A'zzowajal Usse Paak Hai Ke Uski Qudrat Use Shaamil Ho, Ke Muhaal Use Kehte Hai'n Jo Maujood Na Ho Sake Aur Jab Maqdoor Hoga To Maujood Ho Sakega, Phir Muhaal Na Raha, Ise Yoo'n Samjho Ke Doosra Khuda Muhaal Hai Ya'ni Nahee'n Ho Sakta, To Yeh Agar Zer e Qudrat Ho To Maujood Ho Sakega To Muhaal Na Raha Aur Isko Muhaal Na Maanna Wehdaaniyat Ka Inkaar Hai, Yoo'n Hi Fana e Baari Muhaal Hai, Agar Tehte Qudrat Ho To Mumkin Hogi Aur Jiski Fana Mumkin Ho Woh Khuda Nahee'n, To Saabit Huwa Ke Muhaal Par Qudrat Maanna Allaah A'zzowajal Ki Uloohiyat Se Hi Inkaar Karna Hai.
(14) Har Maqdoor Keliye Zaroor Nahee'n Ke Maujood Ho Jaaye, Albatta Mumkin Hona Zaroori Hai Agarche Kabhi Maujood Na Ho.
(15) Allaah A'zzowajal Har Kamaal Wa Khoobi Ka Jaame Hai Aur Har Woh Cheez Jisme'n Ayb Wa Nuqsaan Ho Usse Paak Hai, Ya'ni Ayb Wa Nuqsaan Ka Allaah A'zzowajal Me'n Hona Muhaal Hai, Balke Jis Baat Me'n Na Kamaal Ho, Na Nuqsaan, Woh Bhi Allaah A'zzowajal Keliye Muhaal Hai, Jaise Jhoot, Daga, Khayaanat, Zulm, Jahaalat, Behayaayi Wagairha Uyoob Uspar Qat'an Muhaal Hai'n Aur Yeh Kehna Ke Jhoot Par Qudrat Hai Ya'ni Allaah A'zzowajal Jhoot Bol Sakta Hai, Muhaal Ko Mumkin Thehraana Aur Khuda Ko Aybi Bataana Balke Khuda Se Inkaar Karna Hai Aur Yeh Samajhna Ke Muhaalaat Par Qaadir Na Hoga To Qudrat Naaqis Ho Jaayegi Baatil Mahez Hai, Ke Isme'n Qudrat Ka Kya Nuqsaan ! Nuqsaan To Uss Muhaal Ka Hai Ke Ta'alluq e Qudrat Ki Usme'n Salaahiyat Nahee'n.
(15) Hayaat, Qudrat, Sunna, Dekhna, Kalaam, Ilm, Iraadah Allaah A'zzowajal Ki Zaati Sifaat Hai'n, Magar Kaan, Aa'nkh, Zabaan Se Uska Sunna, Dekhna, Kalaam Karna Nahee'n, Ke Yeh Sab Ajsaam Hai'n Aur Ajsaam (Ya'ni Jism, Body) Se Woh Paak Hai, Har Dheemi Se Dheemi Aawaaz Ko Sunta Hai, Har Baareek Se Baareek Ko Ke Khurdbeen Se Mehsoos Na Ho Woh Dekhta Hai, Balke Uska Dekhna Aur Sunna Inhi Cheezo'n Par Munahsir Nahee'n, Har Maujood Ko Dekhta Hai Aur Har Maujood Ko Sunta Hai.
(16) Misl Deegar Sifaat Ke Kalaam Bhi Qadeem Hai, Haadis Wa Makhlooq Nahee'n, Jo Qur'aan e Kareem Ko Makhlooq Maane Hamaare Imaam e Aa'zam Wa A'imma Radiallaahu A'nhum Ne Use Kaafir Kaha, Balke Sahaaba Radiallaahu A'nhum Se Uski Takfeer Saabit Hai,
(17) Allaah A'zzowajal Ka Kalaam Aawaaz Se Paak Hai, Aur Yeh Qur'aan e Kareem Jisko Ham Apni Zabaan Se Tilaawat Karte Hai'n, Masaahif Me'n Likhte Hai'n, Usi Ka Kalaam Qadeem Bila Saut Hai Aur Yeh Hamaara Padhna Likhna Aur Yeh Aawaaz Haadis, Ya'ni Hamaara Padhna Haadis Hai Aur Jo Ham Ne Padha Qadeem Aur Hamaara Likhna Haadis Aur Jo Likha Qadeem, Hamaara Sunna Haadis Hai Aur Jo Hamne Suna Qadeem, Hamaara Hifz Karna Haadis Hai Aur Jo Hamne Hifz Kiya Qadeem, Ya'ni Mutakallim Qadeem Hai Aur Tajalli Haadis (Mutajalli Ya'ni Kalaam e Ilaahi, Qadeem Hai, Tajalli Ya'ni Hamaara Padhna, Sunna, Likhna, Yaad Karna Yeh Saab Haadis Hai)
(18) Uska Ilm Har Shay Ko Muheet Ya'ni Juz'iyyaat, Kulliyaat, Maujoodaat, Ma'doomaat, Mumkinaat, Muhaalaat, Sabko Azal Me'n Jaanta Tha Aur Ab Jaanta Hai Aur Abad Tak Jaanega, Ashiya Badalti Hai'n Aur Uska Ilm Nahee'n Badalta, Dilo'n Ke Khatro'n Aur Waswaso'n Par Usko Khabar Hai Aur Uske Ilm Ki Koi Inteha Nahee'n.
(19) Allaah A'zzowajal Gaib Wa Shahaadat (Posheedah Aur Zaahir) Sabko Jaanta Hai, Ilm e Zaati Uska Khaassa Hai, Jo Shakhs Ilm e Zaati, Gaib Khwaah Shahaadat Ka Gair e Khuda Keliye Saabit Kare Kaafir Hai, Ilm e Zaati Ke Yeh Ma'ni Hai Ke Khuda Ke Diye Bagair Khud Haasil Ho.
(20) Wohi Har Shay Ka Khaaliq Hai, Zawaat Ho'n Khwaah Af'aal, Sab Usi Ke Paida Kiye Huwe Hai'n.
(21) Haqeeqatan Rozi Paho'nchaane Waala Wohi Hai, Malaa'ika Wagairaham Wasaa'il Wa Wasaa'it Hai'n.
(22) Har Bhalaayi, Buraayi Allaah A'zzowajal Ne Apne Ilm e Azali Ke Mawaafiq Muqaddar Farma Di Hai, Jaisa Hone Waala Tha, Jaisa Karne Waala Tha, Apne Ilm Se Jaana Aur Wohi Likh Diya To Yeh Nahee'n Ke Jaisa Usne Likh Diya Waisa Hamko Karna Padta Hai, Balke Jaisa Ham Karne Waale The Waisa Usne Likh Diya, Zaid Ke Zimma Buraayi Likhi Isliye Ke Zaid Buraayi Karne Waala Tha, Agar Zaid Bhalaayi Karne Waala Hota To Uske Liye Bhalaayi Likhta To Uske Ilm Ya Uske Likh Dene Ne Kisi Ko Majboor Nahee'n Kardiya, Taqdeer Ka Inkaar Karne Waalo'n Ko Nabi e Kareem ﷺ Ne Iss Ummat Ka Majoos Bataaya Hai.
(23) Allaah A'zzowajal Jism (Body) Se Paak Hai Ke Jism Hona Makhlooq Ki Sifat Hai Aur Allaah A'zzowajal Jagah (Place) Se Paak Hai Ke Jagah Ya Makaan Me'n Hona Makhlooq Ki Sifat Hai, Agar Koi Allaah A'zzowajal Keliye Jagah Ya Jism Ka Aqeedah Rakhta Hai To Woh Kaafir Hai, Agar Allaah A'zzowajal Ko Aasmaan Me'n Maana Jaaye To Allaah A'zzowajal Ka Makhlooq Ke Andar Hona Saabit Hoga Aur Yeh Na Mumkin Hai Ke Makhlooq Allaah A'zzowajal Ko Ghere Me'n Le Ya Apne Andar Sama Sake, Hamaara Aqeedah Hai Ke Allaah A'zzowajal Maujood Hai,
(Bahaar e Sharee'at, Jild No.1, Safha No.2 Se 27 Tak)
By Alahazrat Foundation Research Team 7710809266/9892708816
