Aqeedah "Aqad" Se Bana Hai Jiske Ma'ni Girah Baa'ndhne Ke Hai'n. (Doctor Ibraaheem Anees, Al-Mo'jamul Waseet, Jild No.2, Safha No.614)
Aqeede Se Muraad Kisi Shay Ki Aisi Tasdeeq Karna Hai (Ya'ni Maanna Hai) Jisme'n Koi Shak Na Ho, Aqeede Ko Imaan Ke Mafhoom Me'n Bhi Liya Jaata Hai, Isse Muraad Un Haqaa'iq Ki Bila Shak Wa Shuba Tasdeeq Karna Hai Jinki Ta'leem Allaah Rabbul Izzat Ne Bawaasta e Risaalat Hame'n Ata Farmaayi.
Aqeede Ki Sharayi Ta'reef :- Allaah A'zzowajal Par, Uske Farishto'n Par, Uski Kitaabo'n Par, Uske Rasoolo'n Par, Yaum e Aakherat Aur Achchi Buri Taqdeer Par Imaan Rakhna Hai, Aur Inhe'n Arkaan e Imaan Bhi Kaha Jaata Hai.
Aqeede Ka Ilm Bahot Ahem Hai, Isme'n Allaah A'zzowajal Ki Zaat Wa Sifaat, Ambiya e Kiraam A'laihimus Salaatu Wassalaam Ke Fazaa'il Wa Ahwaal, Qayaamat Aur Uske Muta'alliqaat Ko Bayaan Kiya Jaata Hai, Jisme'n Yeh Bayaan Hota Hai Ke Allaah A'zzowajal Ki Zaat Wa Sifaat Ke Baare Me'n Musalmaano'n Ko Kya Aqeedah Rakhna Chaahiye, Ambiya e Kiraam A'laihimus Salaatu Wassalaam, Hazraat e Sahaaba Aur Auliya e Kiraam Ridwaanullaahi A'laihim Ajma'een Ke Muta'alliq Kya Aqeedah Hona Chaahiye, Qayaamat Wa Ahwaal e Qayaamat Kya Hai'n, Jannat Wa Dozakh Kise Kehte Hai'n, Aur Inke Muta'alliq Kya Aqeedah Rakhna Chaahiye, Kin Kin Cheezo'n Par Imaan Laana Zaroori Hai Aur Kin Cheezo'n Ka Inkaar Aadmi Ko Kufr Wa Gumraahi Ke Ghade Me'n Phe'nk Deta Hai Aur Kaunse Aise Af'aal Hai'n Jinke Karne Se Aadmi Daayera e Islaam Se Khaarij Ho Jaata Hai.
Imaam e Rabbaani Mujaddid e Alfsaani Rehmatullaah A'laih Farmaate Hai'n, Sharee'at Ke 2 Hisse Hai'n, Aqeedah Aur Amal, Aqaa'id Ke Usool Hai'n To Aa'maal Uski Fara, Jiske Aqaa'id Durust Nahee'n Woh Nijaat Nahee'n Pa Sakta Aur Uske Haq Me'n Azaab e Ilaahi Se Khulaasi (Chhutkaare) Ka Tasawwur Bhi Nahee'n Kiya Ja Sakta, Jabke Bad Amal Ki Nijaat Ka Ahtemaal Hai Aur Uska Mu'aamla Allaah A'zzowajal Ki Mashiyyat Ke Hawaale Hai, Agar Woh Chaahe To Usko Saza De (Chaahe Na De) Jabke (Dozakh) Ki Aag Me'n Hamesha Rehna Bad Aqeedah Keliye Makhsoos Hai. (Maktoobaat e Imaam e Rabbaani, Maktoob No.71, Jild No.3, Safha No.43)
Mazeed Farmaate Hai'n, Har Aa'qil Baaligh Par Sabse Pehle Yeh Zaroori Hai Ke Apne Aqeede Ko Ulama e Ahle Sunnat Ke Bayaan Kardah Aqeedo'n Ke Mawaafiq Kare, Kyu'nke Aakherat Me'n Nijaat Inhi Buzurgo'n Ke Bayaan Kardah Aqeedo'n Ki Pairwi Me'n Hai, Uss Roz Nijaat Sirf Inhi Buzurgo'n Ke Pairokaaro'n Ko Naseeb Hogi. (Maktoobaat e Imaam e Rabbaani, Maktoob No.193, Jild No.1, Safha No.431)
Mohtaram Qaari'een ! Yaad Rakhiye, Aqeedah Hi Imaan Wa Kufr Ki Buniyaad Hai, Ya'ni Aqeedah Agar Islaami Hai To Insaan Momin Hai Warna Kaafir, Imaan Agar Yaqeeni Kaamiyaabi Ka Zaamin Hai To Kufr Yaqeeni Na Kaami Ka Sabab, Aqaa'id Ki Islaah Wa Durustagi Ke Bagair Achche Se Achcha Amal Bhi Allaah Paak Qabool Nahee'n Farmaata, Yehi Wajah Hai Ke Hamaare Buzurg Iski Durusti Ka Khud Bhi Khayaal Rakhte Aur Doosro'n Ko Bhi Tawajjo Dilaate Rehte.
Aa'la Hazrat Imaam Ahmad Raza Khaan Faazil e Barelvi A'laihir Rehma Farmaate Hai'n, Fisq Aqeedah (Aqeede Ki Kharaabi) Fisq Amal (Amal Ki Kharaabi) Se Kahee'n Zyaadah Buri Hai. (Fataawa Razviya, Jild No.19, Safha No.396)
Jis Tarah Jismaani Amraaz Hote Hai'n, Usi Tarah Kuchh Baatini Amraaz Bhi Hote Hai'n, Jismaani Amraaz Zaahiri Sehat Wa Tandrusti Keliye Nuqsaan Deh Hote Hai'n Aur Baatini Amraaz Imaan Aur Roohaani Zindagi Keliye Zehre Qaatil Hote Hai'n, In Baatini Amraaz Me'n Sabse Badtar Aqeede Ki Kharaabi Ka Marz Hai.
By Alahazrat Foundation Research Team - 7710809266/9892708816
