Auliya e Kiraam Ki Aqsaam :- Auliya e Kiraam Ki Kaseer Aqsaam Hai'n Jaisa Ke Hazrat Abu Darda Radiallaahu Anhu Se Marwi Hai Ke Beshak Ambiya e Kiraam Zameen Ke Autaad The, Jab Nabuwwat Ka Silsila Khatam Huwa To Allaah Paak Ne Ummat e Muhammadiya ﷺ Me'n Se Ek Qaum Ko Unka Naa'ib Banaaya Jinhe'n Abdaal Kehte Hai'n, Woh Hazraat (Faqat) Rozah Wa Namaaz Aur Tasbeeh Wa Taqdees Me'n Kasrat Ki Wajah Se Logo'n Se Afzal Nahee'n Huwe Balke Apne Husn e Akhlaaq, Wara Wa Taqwa Ki Sachchaayi, Niyat Ki Achchhaayi, Tamaam Musalmaano'n Se Apne Seene Ki Salaamati, Allaah Paak Ki Raza Keliye Hilm, Sabr Aur Danishmandi, Bagair Kamzori Ke Aa'jizi Aur Tamaam Musalmaano'n Ki Khair Khwaahi Ki Wajah Se Afzal Huwe Hai'n, Pas Woh Ambiya e Kiraam Ke Naa'ib Hai'n, Woh Aisi Qaum Hai'n Ke Allaah Paak Ne Unhe'n Apni Zaat e Paak Keliye Muntakhab Kiya Aur Apne Ilm Aur Raza Ke Liye Khaas Kar Liya Hai, Woh 40 Siddeeq Hai'n, Jinme'n Se 30 Rehmaan Azzowajal Ke Khaleel Hazrat Ibraaheem Alaihissalaam Ke Yaqeen Ki Misl Hai'n, Unke Zariye Se Ahle Zameen Se Balaaye'n Aur Logo'n Se Museebate'n Door Hoti Hai'n, Unke Zariye Se Hi Baarish Hoti Aur Rizq Diya Jaata Hai, Unme'n Se Koi Usi Waqt Faut Hota Hai Jab Allaah Paak Uski Jaanasheeni Keliye Kisi Ko Parwaana De Chuka Hota Hai, Woh Kisi Par La'nat Nahee'n Bhejte, Apne Maatehto'n Ko Aziyat Nahee'n Dete, Unpar Dast Daraazi Nahee'n Karte, Unhe'n Haqeer Nahee'n Jaante, Khud Par Fauqiyat Rakhne Waalo'n Se Hasad Nahee'n Karte, Duniya Ki Hirs Nahee'n Karte, Dikhaawe Ki Khaamoshi Ikhtiyaar Nahee'n Karte, Takabbur Nahee'n Karte Aur Dikhaawe Ki Aa'jizi Bhi Nahee'n Karte, Woh Baat Karne Me'n Tamaam Logo'n Se Achchhe Aur Nafs Ke Ae'tebaar Se Zyaadah Parhezgaar Hai'n,
Sakhaawat Unki Fitrat Me'n Shaamil Hai, Aslaaf Ne Jin (Na Munaasib) Cheezo'n Ko Chhoda Unse Mehfooz Rehna Unki Sifat Hai, Unki Yeh Sifat Juda Nahee'n Hoti Ke Aaj Khashiyat Ki Haalat Me'n Ho'n Aur Kal Gaflat Me'n Pade Ho'n Balke Woh Apne Haal Par Hameshgi Ikhtiyaar Karte Hai'n, Woh Apne Aur Apne Rab Paak Ke Darmiyaan Ek Khaas Ta'alluq Rakhte Hai'n, Jahaa'n Tak Doosre Kisi Ki Rasaayi Nahee'n, Unke Dil Allaah Paak Ki Raza Aur Shauq Me'n Aasmaan Ki Taraf Buland Hote Hai'n, (Phir Yeh Aayat Tilaawat Farmaayi)
Tarjuma:- Yeh Allaah Ki Jamaa'at Hai, Sunlo ! Allaah Ki Jamaa'at Hi Kaamiyaab Hai. (Surah Mujadalah, 22) (Nawaadirul Usool, 1/209, Hadees No.301)
Hazrat Shureh Bin Ubaid Rehmatullaah Alaih Farmaate Hai'n, Hazrat Ali Al-Murtaza Karramallaahu Ta’aala Wajhahul Kareem Ke Paas Shaam Waalo'n Ka Zikr Huwa To Unse Arz Ki Gayi Ke Unpar La'nat Keejiye, Aapne Irshaad Farmaaya, Nahee'n ! Mai'n Ne Huzoor e Aqdas ﷺ Ko Irshaad Farmaate Huwe Suna Hai Ke Abdaal Shaam Me'n Ho'nge,
Woh Hazraat 40 Mard Hai'n, Jab Unme'n Se Ek Wafaat Paata Hai To Allaah Paak Uski Jagah Doosre Ko Badal Deta Hai, Unki Barkat Se Baarishe'n Barasti Hai'n, Unke Zariye Dushmano'n Par Fateh Haasil Hoti Hai Aur Unki Barkat Se Shaam Waalo'n Se Azaab Door Hota Hai. (Musnad Imaam Ahmad, Wa Min Musnad Ali Bin Abi Taalib Radiallaahu Anhu, 1/238, Hadees No.896)
Auliya e Kiraam Ki Aqsaam Ke Baare Me'n Akaabir Ulama Wa Muhaddiseen Ne Bada Tafseeli Kalaam Farmaaya Hai, Allaama Suyooti Rehmatullaah Alaih Ne Qutub, Abdaal Wagairah Ke Wajood Par Ek Kitaab Tasneef Farmaayi Hai,
Allaama Nab'haani Rehmatullaah Alaih Ki Iss Mauzoo Par Mash'hoor Kitaab “Jaame Karaamaat e Auliya” Zakheem Tareen Kitaab Hai.
Allaama Nab'haani Rehmatullaah Alaih Ke Kalaam Ki Roshni Me'n Yahaa'n Chand Mash'hoor Aqsaam Bayaan Ki Jaati Hai'n,
(1) Aqtaab:- Yeh Qutub Ki Jama Hai, Qutub Use Kehte Hai'n Jo Khud Ya Kisi Ke Naa'ib Ke Taur Par Haal Aur Maqaam Dono'n Ka Jaame Ho.
(2) A’imma:- Yeh Woh Hazraat Hai'n Ke Jo Qutub Ke Inteqaal Ke Ba'ad Uske Khaleefa Bante Hai'n Aur Woh Qutub Keliye Wazeer Ki Tarah Hote Hai'n, Har Zamaane Me'n Inki Te'daad 2 Hoti Hai.
(3) Autaad:- Har Zamaane Me'n Unki Te'daad 4 Hoti Hai, Isse Kam Ya Zyaadah Nahee'n Hote, Unme'n Se Ek Ke Zariye Allaah Paak Mashriq Ki Hifaazat Farmaata Hai, Doosre Ke Zariye Magrib Ki, Teesre Ke Zariye Shumaal Ki Aur Chauthe Ke Zariye Junoob Ki Hifaazat Farmaata Hai Aur Unme'n Se Har Ek Ki Apne Hisse Me'n Wilaayat Hoti Hai.
(4) Abdaal:- Unki Te'daad 7 Hoti Hai, Isse Kam Ya Zyaadah Nahee'n Hote, Allaah Paak Unke Zariye Saato'n Barre Aa'zam Ki Hifaazat Farmaata Hai, Inhe'n Abdaal Isliye Kehte Hai'n Ke Jab Yeh Kisi Jagah Se Kooch Karte Hai'n Aur Kisi Maslehat Aur Qurbat Ki Wajah Se Uss Jagah Apna Qaayem Maqaam Chhodne Ka Iraadah Karte Hai'n To Wahaa'n Aise Aadmi Ko Naamzad Karte Hai'n Ke Jo Unka Ham Shakal Ho Aur Jo Koi Bhi Uss Ham Shakal Ko Dekhe To Woh Use Asli Shakhs Hi Samjhe Haalaa'nke Woh Ek Roohaani Shakhsiyat Hota Hai Jise Abdaal Me'n Se Koi Badal Qasdan Wahaa'n Thehraata Hai, Jin Auliya Me'n Yeh Quwwat Hoti Hai, Unhe'n Abdaal Kehte Hai'n.
(5) Rijaalul Gaib :- Ahlullaah Ki Istelaah Me'n Yeh Woh Log Hai'n Jo Rab Ki Baargaah Me'n Intehaayi Aa'jizi Ka Iz'haar Karte Hai'n Aur Tajalliyaat e Rehmaan Ke Galbe Ke Sabab Aahista Aawaz Ke Siwa Kuchh Kalaam Nahee'n Karte, Hamesha Isi Haal Me'n Rehte Hai'n, Chhupe Huwe Hote Hai'n Pehchaane Nahee'n Jaate, Allaah Paak Ke Siwa Kisi Se Munaajaat Nahee'n Karte Aur Uske Siwa Kisi Ke Mushaahede Me'n Mashgool Nahee'n Hote, Ba'az Auqaat Isse Muraad Woh Log Hote Hai'n Ke Jo Insaani Nigaaho'n Se Posheedah Ho'n Aur Kabhi Iska Itlaaq Nek Aur Momin Jinnaat Par Hota Hai, Ba'az Auqaat Inse Muraad Woh Log Hote Hai'n Jo Zaahiri Hawaas Se Ilm Aur Rizq Wagairah Nahee'n Lete Unhe'n Gaib Se Yeh Cheeze'n Ata Hoti Hai'n. (Jaame Karaamaat e Auliya, 1/69, 74)
