Allaah Paak Ne Apne Auliya e Kiraam Ko Badi Shaano’n Se Nawaaza Hai, Aur Apne Lutf Wa Karam Se Apne In Bando'n Ko Pasand Farma Kar Khaas Banaaya Hai, Yehi Woh Log Hai'n Jinse Zamaane Ki Zeenat Qaayem Hai, Jinki Ibaadat Ki Mahek Ne Tamaam Aa'lam Ko Khushboodaar Bana Rakha Hai, Jinke Dil Har Waqt Allaah Paak Ki Baargaah Me'n Jhuke Rehte Hain, Aaj Ham Auliya e Kiraam Ke Maqaam Wa Martabe, Unki Shaan Wa Azmat Aur Unki Kuchh Sifaat Ke Baare Me'n Jaanne Ki Koshish Kare'nge Taake Hamaare Dilo'n Me'n Allaah Paak Ke In Dosto'n Aur Muqarrab Bando'n Ki Mohabbat Me'n Mazeed Izaafa Ho Aur Ham Bhi Unke Naqsh e Qadam Par Chalte Huwe Nekiyaa'n Karne Aur Gunaaho'n Se Bachne Ki Koshish Kare'n.
Yaad Rahe “Lafz e Wali" Wila Se Bana Hai Jiska Ma’ni Qurb Aur Nusrat Hai, Waliullaah Woh Hai Jo Faraa'iz Ki Adaayegi Se Allaah Paak Ka Qurb Haasil Kare Aur Allaah Paak Ki Itaa’at Me'n Mashgool Rahe Aur Uska Dil Allaah Paak Ke Noor e Jalaal Ki Ma’refat Me'n Mustagraq Ho, Jab Dekhe Qudrat e Ilaahi Ke Dalaa’il Ko Dekhe, Aur Jab Sune Allaah Paak Ki Aayate'n Hi Sune, Aur Jab Bole To Apne Rab Paak Ki Sana Hi Ke Saath Bole, Aur Jab Harkat Kare, Itaa’at e Ilaahi Me'n Harkat Kare, Aur Jab Koshish Kare To Usi Kaam Me'n Koshish Kare Jo Qurb e Ilaahi Ka Zariya Ho, Allaah Paak Ke Zikr Se Na Thake Aur Chashme Dil Se Khuda Ke Siwa Gair Ko Na Dekhe, Yeh Sifat Auliya Ki Hai, Bandah Jab Iss Haal Par Paho'nchta Hai To Allaah Paak Uska Wali Wa Naasir Aur Mu’een Wa Madadgaar Hota Hai,
Qur'aan Wa Ahadees Me'n Auliya e Kiraam Ki Fazeelate'n Kayi Maqaamaat Par Mazkoor Hai, Unme'n Se Chand Aapke Saamne Pesh Karta Hoon.
Qur'aan e Paak Me'n Irshaad e Khudaawandi Hai,
Tarjuma :- Sunlo ! Beshak Allaah Ke Waliyo'n Par Na Kuchh Khauf Hoga Aur Na Woh Gamgeen Ho'nge, Woh Jo Imaan Laaye Aur Darte Rahe. (Paarah No.11, Sureh Yoonus, Aayat No.62/63)
Mufassireen Ne Iss Aayat Ke Bahot Se Ma’ni Bayaan Kiye Hai'n, Unme'n Se 3 Ma’ni Darj Zail Hai'n,
(1) Mustaqbil Me'n Unhe'n Azaab Ka Khauf Na Hoga Aur Na Maut Ke Waqt Woh Gamgeen Ho'nge.
(2) Mustaqbil Me'n Kisi Na Pasandeedah Cheez Me'n Mubtala Hone Ka Khauf Hoga Aur Na Maazi Aur Haal Me'n Kisi Pasandeedah Cheez Ke Chhootne Par Gamgeen Ho'nge.
(3) Qayaamat Ke Din Unpar Koi Khauf Hoga Aur Na Uss Din Yeh Gamgeen Ho'nge Kyu'nke Allaah Paak Ne Apne Waliyo'n Ko Duniya Me'n Un Cheezo'n Se Mehfooz Farma Diya Hai Ke Jo Aakherat Me'n Khauf Aur Gam Ka Baa'is Banti Hai'n. (Tafseer Siraatul Jinaan, Jild No.4, Safha No.344, 345)
Ek Aur Maqaam Par Allaah Paak Irshaad Farmaata Hai,
Tarjuma :- Beshak Allaah Ki Rehmat Neko'n Ke Qareeb Hai. (Sureh Al-Aa’raaf, Paarah No.8, Aayat No.56)
Ek Aur Maqaam Par Irshaad e Baari Ta’aala Hai,
Tarjuma :- Beshak Allaah Parhezgaaro'n Se Mohabbat Farmaata Hai. (Sureh Taubah, Paarah No.10, Aayat No.4)
Bukhaari Shareef Me'n Ek Hadees e Qudsi Hai, Hadees e Qudsi Uss Hadees Shareef Ko Kehte Hai'n, Jisme'n Farmaan Allaah Paak Ka Hota Hai Aur Zabaan Mustafa Jaan e Rehmat ﷺ Ki Hoti Hai, Doosre Lafzo'n Me'n Yoo'n Samajh Leejiye Ke Aa'm Ahadees Me'n Kalaam Pyaare Aaqa, Madeene Waale Mustafa ﷺ Ka Hota Hai Aur Sahaaba e Kiraam Raawi (Ya'ni Sun Kar Aage Bataane Waale) Hote Hai'n, Jabke Hadees e Qudsi Me'n Kalaam Rabbe Kareem Ka Hota Hai Aur Rasool e Rehmat, Shafi e Ummat ﷺ Raawi Hote Hai'n. Aa'iye ! Bukhaari Shareef Ki Hadees e Qudsi Jaante Hai'n,
Hazrat Abu Hurairah Radiallaahu Anhu Se Riwaayat Hai, Allaah Paak Ke Pyaare Nabi, Makki Madani, Muhammad e Arabi ﷺ Ne Farmaaya, Allaah Paak Farmaata Hai, Jisne Mere Kisi Wali Se Dushmani Rakhi, Mai'n Use Ae'laan e Ja'ng Deta Hoon, Bandah Jin Zaraaye Se Mera Qurb Haasil Karta Hai, Unme'n Mera Sabse Pasandeedah Zariya Faraa'iz (Maslan Namaaz, Rozah, Hajj, Zakaat Wagairah) Hai'n, Aur Mera Bandah Nawaafil Ke Zariye Mera Qurb Haasil Karta Rehta Hai, Karta Rehta Hai, Yahaa'n Tak Ke Mai'n Usse Mohabbat Karne Lagta Hoo'n, Phir Jab Mai'n Usse Mohabbat Karta Hoo'n To Mai'n Uske Kaan Ban Jaata Hoo'n, Jisse Woh Sunta Hai, Mai'n Uski Aa'nkhe'n Ban Jaata Hoo'n, Jisse Woh Dekhta Hai, Mai'n Uske Haath Ban Jaata Hoo'n, Jisse Woh Pakadta Hai, Mai'n Uske Paao'n Ban Jaata Hoo'n, Jinse Woh Chalta Hai, Agar Woh Mujhse Maa'ngta Hai To Mai'n Use Deta Hoo'n, Agar Woh Meri Panaah Leta Hai To Mai'n Use Panaah Deta Hoo'n. (Bukhaari Shareef, Kitaabur Riqaaq, Baabul Tawaazo, Safha No.1597, Hadees No.6502)
Mash'hoor Mufassar e Qur'aan, Hakeemul Ummat Mufti Ahmad Yaar Khaan Na'eemi Rahmatullaah Alaih Iss Hadees e Paak Ki Sharah Me'n Farmaate Hai'n, (Matlab Yeh Hai Ke Jab Bandah Allaah Paak Ka Qurb Haasil Karte Karte, Uska Mehboob Ho Jaata Hai To Ab Yeh Bandah Fana Fi Allaah Ho Jaata Hai, Jisse Khudaayi (Ya'ni Allaah Paak Ki Di Huwi Khaas) Taaqate'n Uske Aa’za Me'n Kaam Karti Hai'n Aur Woh Aise Kaam Kar Leta Hai Jo Aqal Se Wara Hai'n. (Miraatul Manaajeeh, Jild No.3, Safha No.309)
Allaah Paak Ne Hadees e Qudsi Me'n Farmaaya, Tarjuma :- Jo Mere Kisi Wali Se Dushmani Rakhe, Mai'n Use Ae'laan e Ja'ng Deta Hoo'n.
Yeh Hai Allaah Paak Ki Baargaah Me'n Auliya e Kiraam Ka Maqaam Wa Martaba, Jis Bande Ke Dil Me'n Auliya e Kiraam Ki Zarrah Baraabar Bhi Dushmani Ho, Woh Bandah Kabhi Allaah Paak Ka Pasandeedah Bandah Nahee'n Ban Sakta, Aisa Hargiz Nahee'n Ho Sakta Ke Bande Ke Dil Me'n Auliya e Kiraam Ki Dushmani Bhi Ho Aur Woh Uss Dushmani Ke Saath Saath Allaah Paak Ko Raazi Karne Me'n Kaamiyaab Bhi Ho Jaye, Kyu'n ? Isliye Ke Jis Dil Me'n Auliya Ki Dushmani Ho, Allaah Paak Usse Ae'laan e Ja'ng Farmaata Hai.
Sunni Islaami Bhaa'iyo ! Yahaa'n Ek Baat Zaroor Khayaal Me'n Rahe ! Insaan Ka Muqaabla Agar Insaan Ke Saath Ho, Tab Bhi Jeetne Ka Sirf Ahtemaal Hota Hai, Aur Agar Aadmi Apne Khaaliq, Apne Maalik, Apne Raaziq Ke Saath Hi Ja'ng Chhed Le, Isme'n To Jeetne Ka Sawaal Hi Paida Nahee'n Hota, Shikast, Zillat, Ruswaayi Aur Duniya Wa Aakherat Ki Tabaahi Yaqeeni Hai, Namrood Ne Allaah Paak Ke Saath Ja'ng Karni Chaahi Thi, Uss Badbakht Ne Hazaaro'n Ki Fauj Jama Ki, Asleha Uthaaya, Teer, Talwaare'n, Jo Kuchh Tayyaari Woh Kar Sakta Tha, Woh Tayyaari Ki, Maidaan Me'n Nikal Aaya.
Iss Bad Anjaam Ne Allaah Paak Ke Saath To Kya Ja'ng Karni Thi, Allaah Paak Ne Apni Makhlooq Me'n Se Ek Chhoti Si Makhlooq Machchharo’n Ko Bheja, Itne Machchhar Aaye Ke Unho'n Ne Sooraj Ko Dhaa'np Diya, Din Ke Waqt Andhera Ho Gaya, In Machchharo’n Ne Namrood Ki Fauj Ko Kaat'na Shuru Kiya Aur Poori Fauj Ka Gosht, Post Sab Kha Gaye, Saari Ki Saari Fauj Haddiyo'n Ka Dhaa'ncha Ban Kar Gir Gayi. Aakhir Me'n Ek Machchhar Namrood Ke Dimaag Me'n Chala Gaya, Kitaabo'n Me'n Likha Hai, 400 Saal Tak Woh Machchhar Namrood Ko Kaat'ta Raha Aur Iski Wajah Se Namrood Ke Sar Me'n Joote Padte Rahe. (Tafseer Ibne Kaseer, Paarah No. 3, Sureh Baqarah, Zer e Aayat 258, Jild No.1, Safha No.694)
Yeh Hai Allaah Paak Ke Saath Ja'ng Ka Anjaam. Lehaaza Har Koi Gaur Karle, Auliya e Kiraam Ke Saath Dushmani Paalni Hai, Inka Bugz Dil Me'n Rakhna Hai To Pehle Soch Le, Yeh Koi Chhota Jurm Nahee'n Hai, Auliya e Kiraam Se Dushmani Rakhna, Asal Me'n Allaah Paak Ke Saath Ae'laan e Ja'ng Hai Aur Jo Allaah Paak Ke Saath Ae'laan e Ja'ng Karta Hai, Uski Duniya Bhi Tabaah Ho Jaati Hai, Aakherat Bhi Barbaad Hokar Reh Jaati Hai.
Waliullaah Ki Alaamaat :- Ulama Ne “Waliullaah” Ki Kaseer Alaamaat Bayaan Farmaayi Hai'n, Jaise Mutakallimeen Ya'ni Ilm e Kalaam Ke Maahir Ulama Kehte Hai'n “Wali" Woh Hai Jo Saheeh Aur Daleel Par Mabni Ae'teqaad Rakhta Ho Aur Sharee'at Ke Mutaabiq Nek Aa’maal Baja Laata Ho.
Ba'az Aa'rifeen Ne Farmaaya Ke Wilaayat Qurb e Ilaahi Aur Hamesha Allaah Paak Ke Saath Mashgool Rehne Ka Naam Hai, Jab Bandah Iss Maqaam Par Paho'nchta Hai To Usko Kisi Cheez Ka Khauf Nahee'n Rehta Aur Na Kisi Shay Ke Faut Hone Ka Gam Hota Hai.
Hazrat Abdullaah Bin Abbaas Radiallaahu Anhuma Ne Farmaaya Ke Wali Woh Hai Jisko Dekhne Se Allaah Paak Yaad Aaye, Yehi Tabari Ki Hadees Me'n Bhi Hai.
Ibn e Zaid Ne Kaha Ke Wali Wohi Hai Jisme'n Woh Sifat Ho Jo Usse Agli Aayat Me'n Mazkoor Hai, Tarjuma :- Ya'ni Imaan Wa Taqwa Dono’n Ka Jaame Ho.
Ba'az Ulama Ne Farmaaya Ke Wali Woh Hai'n Jo Khaalis Allaah Keliye Mohabbat Kare'n, Auliya Ki Yeh Sifat Bakasrat Ahadees Me'n Zikr Huwi Hai.
Ba'az Buzurgaan e Deen Ne Farmaaya, Wali Woh Hai'n Jo Taa’at, Ya'ni Farmaa’n Bardaari Se Qurb e Ilaahi Ki Talab Karte Hai'n Aur Allaah Paak Karaamat Se Unki Kaarsaazi Farmaata Hai, Ya Woh Jinki Hidaayat Ka Daleel Ke Saath Allaah Paak Kafeel Ho Aur Woh Allaah Paak Ka Haq e Bandagi Ada Karne Aur Uski Makhlooq Par Rahem Karne Keliye Waqf Ho Gaye. (Tafseer e Khaazin, Sureh Yoonus, Tehtul Aayah 62, 2/322–323)
Sadrul Afaazil Mufti Na'eemuddeen Muraadaabaadi Rahmatullaah Alaih Farmaate Hai'n, “Yeh M'aani Aur Ibaaraat Agarche Judaagaana Hai'n Lekin Inme'n Ikhtelaaf Kuchh Bhi Nahee'n Hai, Kyu'nke Har Ek Ibaarat Me'n Wali Ki Ek Ek Sifat Bayaan Kardi Gayi Hai Jise Qurb e Ilaahi Haasil Hota Hai, Yeh Tamaam Sifaat Usme'n Hoti Hai'n, Wilaayat Ke Darje Aur Maraatib Me'n Har Ek Apne Darje Ke Baqadre Fazl Wa Sharf Rakhta Hai. (Tafseer Khazaa'inul Irfaan, Sureh Yoonus, Tehtul Aayah 62, Safha No. 405)
By Alahazrat Foundation Research Team - 7710809266/9892708816
