Auliya e Kiraam Alaihimur Rehma Ki Qabro'n Par Mazaaraat Banaane Ke Ta'alluq Se Ham Ahle Sunnat Wa Jamaa'at Ka Nazariya Wa Aqeedah Yeh Hai Ke Yeh Na To Zarooriyaat e Deen Me'n Se Hai Na Zarooriyaat e Ahle Sunnat Wa Jamaa'at Me'n Se Hai Balke Yeh Ek Mustahab Aur Jaa'iz Amal Hai Jo Ke Furu Me'n Se Hai.
Yaad Rahe ! Musalmaan 2 Tarah Ke Hai'n, Ek To Aa'm Momineen Aur Doosre Ulama, Mashaa'ikh, Auliya Allaah Jinki Ta'zeem Wa Tauqeer Dar Haqeeqat Islaam Ki Ta'zeem Hai, Aa'm Momineen Ki Qabro'n Ko Pukhta Banaana Ya Unpar Qubba Wagairah Banaana Choo'nke Be Faa'idah Hai Isliye Mana Hai, Haa'n Uspar Mitti Wagairah Daalte Rehna Chaahiye Taake Uska Nishaan Na Mit Jaaye, Faateha Wagairah Padhi Ja Sake, Jaa'iz Hai, Aur Ulama, Mashaa'ikh e Izaam, Auliya Allaah Jinki Mazaaraat Par Khalqat Ka Hujoom Rehta Hai, Log Wahaa'n Baith Kar Qur'aan Khwaani Wa Faateha Wagairah Padhte Hai'n, Saahib e Qabr Ke Iz'haar e Azmat Keliye Uske Aas Paas Saaye Keliye Qubba Wagairah Banaana Shar'an Jaa'iz Hai Balke Sunnat e Sahaaba Se Saabit Hai.
Allaama Ismaa'eel Haqqi Alaihir Rehma Qur'aan e Kareem Ki Sureh Tauba Aayat No.18 Ke Tahet Farmaate Hai'n Ke Ulama Aur Auliya Saaliheen Ki Qabro'n Par Imaarat Banaana Jaa'iz Kaam Hai Jabke Usse Maqsood Logo'n Ki Nigaaho'n Me'n Azmat Paida Karna Ke Log Uss Qabr Waale Ko Haqeer Na Jaane'n. (Tafseer Roohul Bayaan, Sureh Tauba, Tehtul Aayah 3, 18/400)
Hadees Shareef Me'n Hai Ke Jab Usmaan Bin Maz'oon Radiallaahu Anhu Ka Inteqaal Huwa To Unka Janaazah Le Jaaya Gaya Aur Woh Dafan Kiye Gaye To Nabi e Akram ﷺ Ne Ek Shakhs Ko Ek Pat'thar Utha Kar Laane Ka Hukm Diya (Taake Use Alaamat Ke Taur Par Rakha Jaaye) Woh Utha Na Saka To Aap ﷺ Uski Taraf Uth Kar Gaye Aur Apni Dono'n Aasteene'n Chadhaayee'n, Kaseer (Raawi) Kehte Hai'n Ke Muttalib Ne Kaha, Jisne Rasoolullaah ﷺ Se Yeh Hadees Mujhse Riwaayat Ki Hai Woh Kehte Hai'n, Goya Mai'n Aap ﷺ Ke Dono'n Haatho'n Ki Safedi Jis Waqt Ke Aapne Use Khola Dekh Raha Hoo'n, Phir Aap ﷺ Ne Usko Utha Kar Unke Sar Ke Qareeb Rakha Aur Farmaaya, Iske Zariye Mujhe Mere Apne Bhaayi Ki Qabr Ki Shanaakht Rahegi Aur Mere Ahle Khaana Me'n Se Jo Bhi Faut Hoga Mai'n Use Iske Qareeb Dafan Karoo'nga. (Sunan Abu Daawood, Kitaabul Janaa'iz, Jild No.3, Safha No.212, Hadees No.3206)
Bukhaari Shareef Kitaabul Janaa'iz Babul Jareed Alal Qabr Me'n Ta'leeqan Hai Ke Hazrat Khaarja Farmaate Hai'n Ham Zamaana e Usmaan Me'n The.
Ham Me'n Bada Koodne Waala Woh Tha Jo Usmaan Ibne Maz'oon Ki Qabr Ko Phalaa'ng Jaata. (Bukhaari Shareef, Hadees No.1361)
Mohtaram Qaari'een ! Abu Daawood Shareef Ki Riwaayat Se Ma'loom Huwa Ke Hazrat Usmaan Ibne Maz'oon Radiallaahu Anhu Ki Qabr Ke Sirhaane Pat'thar Tha Aur Bukhaari Ki Iss Riwaayat Se Ma'loom Huwa Ke Khud Qabr e Usmaan Ka Taweez (Mazaar Numa Shakl) Uss Pat'thar Ka Tha Aur Dono'n Riwaayaat Iss Tarah Jama Ho Sakti Hai'n Ke Abu Daawood Me'n Jo Aaya Ke Qabr Ke Sirhaane Par Pat'thar Lagaaya Uske Ma'na Yeh Nahee'n Ke Qabr Se Alaaheda Sar Ke Qareeb Khada Kardiya Balke Yeh Hai Ke Khud Qabr Me'n Hi Sar Ki Taraf Usko Lagaaya Ya Matlab Yeh Ke Qabr Saari Uss Pat'thar Ki Thi Magar Sirhaane Ka Zikr Kiya, In Dono'n Ahaadees Se Yeh Saabit Huwa Ke Agar Kisi Khaas Qabr Ka Nishaan Qaayem Rakhne Keliye Qabr Oo'nchi Kardi Jaaye Ya Pat'thar Wagairah Se Pukhta Kardi Jaaye To Jaa'iz Hai Taake Ma'loom Ho Ke Yeh Kisi Buzurg Ki Qabr Hai.
Allaama Ibne Aa'bideen Shaami Alaihir Rehma Farmaate Hai'n Ke Agar Mayyat Mashaa'ikh Aur Ulama Aur Saadaat e Kiraam Me'n Se Ho To Uski Qabr Par Imaarat Banaana Makrooh Nahee'n Hai. (Raddul Muhtaar, Kitaabus Salaat, 3/170)
Mulla Ali Qadri Mirqaat Sharah Mishqaat Me'n Farmaate Hai'n Ke Salaf Ne Ulama Wa Mashaa'ikh Ki Quboor Par Imaarat Banaane Ki Ijaazat Di Hai.(Mirqaat Sharah Mishkaat, 4/69)
Shaykh Abdul Haq Muhaddis e Dahelvi Alaihir Rehma Farmaate Hai'n Ke 550 Hijri Me'n Jamaaluddeen Asfahaani Ne Ulama e Kiraam Ki Maujoodgi Me'n Sandal Ki Lakdi Ki Jaali Uss Deewaar Ke Aas Paas Banaayi Aur 557 Hijri Me'n Ba'az Isaayi Aabido'n Ki Shakl Me'n Madeena Munawwara Aaye Aur Surang Laga Kar Na'sh Mubaarak Ko Zameen Se Nikaalna Chaaha, Huzoor ﷺ Ne 3 Baar Baadshaah Ko Khwaab Me'n Farmaaya, Lehaaza Baadshaah Ne Unko Qatl Karaaya Aur Rauze Ke Aas Paas Paani Tak Buniyaad Khod Kar Seesa Laga Kar Usko Bhar Diya, Phir 678 Hijri Me'n Sultaan Qalaawo'n Saalihi Ne Yeh Sabz Gumbad Jo Ab Tak Maujood Hai Banwaaya. (Sayidul Haq Fi Takhreeji Ja'al Haq, Safha No.598)
In Ibaaraat Se Yeh Ma'loom Huwa Ke Rauza e Mutahhara Sahaaba e Kiraam Ne Banwaaya Tha, Agar Koi Kahe Yeh To Huzoor ﷺ Ki Khusoosiyat Hai To Kaha Jaayega Ke Iss Rauze Me'n Hazrat Siddeeq Wa Faarooq Radiallaahu Anhum Bhi Dafan Hai Aur Hazrat Isa Alaihissalaam Bhi Dafan Ho'nge Lehaaza Yeh Khusoosiyat Na Rahi. (Ja Al-Haq Hissa Awwal, Safha No.598)
Kuchh Log Kehte Hai'n Ke Yeh Kaam (Qabro'n Par Mazaar Banaana) Sirf Hind Wa Paak Me'n Hi Hai To Mai'n Unhe'n Bataana Chaahta Hoo'n, Alhamdulillaah Poori Duniya Me'n Auliya e Kiraam Ke Mazaaraat Wa Maqaabir Sadiyo'n Se Maujood Hai'n Jo Salaf Saaliheen Ke Amal Par Shaahid Hai'n, Khud Hamaare Pyaare Aaqa Wa Maula Muhammad Mustafa ﷺ Ke Rauza e Mubaaraka Par Sabz Sabz Gumbad Qaayem Hai Isse Bad Kar Jawaaz Ki Aur Kya Daleel Chaahiye, Ulama Wa Sulaha Sadiyo'n Se Wahaa'n Haazir Hote Hai'n Aur Unke Saamne Yeh Gumbad Bana Huwa Hai Jo Bila Shubah Jawaaz Ki Daleel Hai.
Qabr Ko Pukhta Banaane Ka Kya Matlab Hai ? Iske Baare Me'n Agar Ham Jaan Gaye To Masla Waazeh Ho Jaayega, Mayyat Ke Saath Qabr Ke Muttasil Hisse Ko Pukhta Karna Makrooh Hai, Agar Qabr Baahar Se Pukhta Aur Andar Se Kachchi Ho To Isme'n Koi Harj Nahee'n Hai Ya'ni Andar Se Qabr Ko Pukhta Karna Makrooh Hai Baahar Se Pukhta Karne Me'n Koi Harj Nahee'n Hai.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai (Isi Tarah Qabro'n Par Mazaaraat Banaane Ka Masla Bhi Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
