Ham Ahle Sunnat Wa Jamaa'at Ka Aqeedah Aur Nazariya Hai Ke Ambiya e Kiraam A'laihimus Salaatu Wassalaam Ke Alaawah Auliya e Kiraam A'laihimur Rehma Ko Bhi Allaah Paak Ba'az Ilm e Gaib Ata Farmaata Hai, Lekin Yaad Rahe Yeh Aqeedah Zarooriyaat e Deen Se Nahee'n Balke Zarooriyaat e Ahle Sunnat Wa Jamaa'at Se Hai, Ya'ni Jo Shakhs Mutlaqan Inkaar Karde Ke Auliya e Kiraam Ko Kuchh Bhi Ilm e Gaib Allaah Paak Ata Nahee'n Karta Aisa Shakhs Sunniyat Se Khaarij Hai.
Alahazrat Imaam e Ahle Sunnat Imaam Ahmad Raza Khaan Qaadri Barelvi A'laihir Rehma Ka Mash'hoor e Zamaana Risaala "Khaalisul Ae'teqaad" Ki "Tamheed" Banaam "Rimaahul Qahhaar Ala Kufril Kuffaar" Me'n Likha Hai Ke Auliya e Kiraam A'laihimur Rehma Ko Bhi Kuchh Uloom e Gaib Milte Hai'n Magar Ba Wasaatat Rusul A'laihimus Salaatu Wassalaam, Firqa e Mo'tazela Ke Sirf Rasoolo'n Keliye Ittela Gaib Maante Aur Auliya e Kiraam Radiallaahu A'nhum Ka Uloom e Gaib Ka Aslan Hissa Nahee'n Maante Gumraah Wa Mubtade Hai'n. (Fataawa Razviya Mutarjim, Jild No.29, Safha No.416)
Mazkoorah Aqeede Par Bahot Si Daleele'n Maujood Hai'n Unme'n Se Chand Dalaa'il Mulaaheza Farmaaye'n.
Hazrat Abu Bakar Radiallaahu A'nhu Ne Bataaya Ke Pet Me'n Beta Hai Ya Beti :-
Ummul Momineen Hazrat Aa'yesha Siddeeqa Radiallaahu A'nha Bayaan Farmaati Hai'n Ke Hazrat Abu Bakar Siddeeq Radiallaahu A'nhu Ne Unko Apne Gaaba Ke Maal Se 20 Wasq Khajoore'n Ata Farmaayee'n, Phir Jab Unki Wafaat Ka Waqt Qareeb Aaya To Unho'n Ne Farmaaya, Aye Beti ! Mujhe Apne Ba'ad Tamaam Logo'n Ki Banisbat Tumhaara Khush Haal Hona Sabse Zyaadah Pasand Hai Aur Apne Ba'ad Tumhaara Ta'ngdast Hona Mujh Par Sabse Zyaadah Shaaq Hai, Aur Mai'n Ne Tumko Darakht Par Lagi Huwi Khajooro'n Me'n Se 20 Wasq Khajoore'n Dee'n Thi, Agar Tum Un Khajooro'n Ka Andaazah Karke Darakhto'n Se Tod Letee'n To Woh Tumhaari Ho Jaatee'n, Ab Aajke Din Woh Waaris Ka Maal Hai, Wafaat Ke Waqt Aur Ab Tumhaare 2 Bhaayi Aur 2 Behne'n Hai'n, Ab Tum Iss Maal Ko Kitaabullaah Ke Mutaabiq Taqseem Karlena, Hazrat Aa'yesha Radiallaahu A'nha Farmaati Hai'n, Mai'n Ne Kaha, Aye Mere Abba Jaan ! Agar Yeh Maal Isse Bahot Zyaadah Bhi Hota To Mai'n Isko Chhod Deti Magar Meri Bahen To Sirf Ek Hai Aur Woh Hazrat Asma Radiallaahu A'nha Hai'n To Doosri Bahen Kaunsi Hai'n ? Hazrat Abu Bakar Radiallaahu A'nhu Ne Farmaaya Woh (Tumhaari Doosri Bahen) Unki Zauja Binte Khaarja Radiallaahu A'nha Se Paida Ho'ngi. (Mota Imaam Maalik, Jild No.2, Safha No.483, Hadees No.2939)
Mazkoorah Hadees Ki Tashreeh Me'n Allaama Muhammad Bin Abdul Baaqi Zurqaani A'laihir Rehma (Wafaat 1122 Hijri) Likhte Hai'n Ke Hazrat Abu Bakar Siddeeq Radiallaahu A'nhu Ke Gumaan Ke Mutaabiq Unki Zauja Binte Khaarja Radiallaahu A'nha Se Ek Ladki Paida Huwi Uska Naam Umme Kulsum Tha. (Sharah Zurqaani Alal Mota, Jild No.4, Safha No.86)
Hazrat Jaabir Radiallaahu A'nhu Ke Waalid Ne Jihaad Me'n Raat Ko Bataaya Tha Ke Kal Mai'n Shaheed Ho Jaau'nga :-
Hazrat Jaabir Radiallaahu A'nhu Bayaan Karte Hai'n Ke Jab Gazwa e Ohad Pesh Aaya To Mere Waalid Ne Mujhe Raat Ko Bulaaya Aur Kaha, Mera Yehi Gumaan Hai Ke Nabi e Kareem ﷺ Ke As'haab Me'n Se Jo Shaheed Ho'nge Mai'n Unme'n Sabse Pehle Shaheed Ho Jaau'nga Aur Mai'n Jinko Chhod Kar Jaau'nga Unme'n Rasoolullaah ﷺ Ke Ba'ad Mujhe Sabse Zyaadah Azeez Tum Ho Pas Mujh Par Qarz Hai, So Tum Mera Qarz Ada Kardena Aur Tum Apni Behno'n Ke Saath Nek Sulook Karna, Phir Subah Huwi To Sabse Pehle Woh Shaheed The, Aur Unke Saath Ek Aur Shakhs Ko Bhi Qabar Me'n Dafan Kiya Gaya, Mera Dil Isse Khush Nahee'n Huwa Ke Mai'n Unko Doosre Shakhs Ke Saath Rakhu'n, Pas Mai'n Ne 6 Maheene Ba'ad Unko Qabar Se Nikaal Liya, Pas Woh Usi Tarah The Jaise Uss Waqt Unko Rakha Tha, Albatta Kaan Thoda Sa Mutagayyar Huwa Tha. (Bukhaari Shareef, Kitaabul Janaa'iz, Jild No.2, Safha No.93, Hadees No.1351)
Hazrat Umar Faarooq e Aa'zam Radiallaahu A'nhu Ne Madeena e Munawwarah Me'n Rehte Huwe Maqaam e Nahaawand Par Maujood Islaami Lashkar Ki Pareshaani Dekh Kar Uski Madad Farmaayi :-
Hazrat Ibne Umar Radiallaahu A'nhu Se Riwaayat Hai Ke Hazrat Umar Faarooq Radiallaahu A'nhu Ne Ek Lashkar Rawaana Kiya, Aur Saariya Naami Shakhs Ko Uska Ameer Muqarrar Kiya, Uss Asna Me'n Ke Umar Radiallaahu A'nhu Khutba Irshaad Farma Rahe The Ke Aap Radiallaahu A'nhu Zor Se Kehne Lage, Aye Saariya ! Pahaad Ki Taraf, Phir Lashkar Ki Taraf Se Ek Qaasid Aaya To Usne Kaha, Ameerul Momineen ! Hamaara Dushman Se Muqaabla Huwa To Usne Hame'n Shikast Se Do Chaar Kardiya Tha Magar Achaanak Kisi Ne Zor Se Aawaaz Di, Aye Saariya ! Pahaad Ko Na Chhodo, Hamne Apni Pushte'n Pahaad Ki Jaanib Karlee'n To Allaah Paak Ne Unhe'n Shikast Se Do Chaar Kardiya. (Mishqaat Shareef, Hadees No.5954).
Yeh 3 Riwaayato'n Se Waazeh Hogaya Ke Auliya e Kiraam Ko Bhi Allaah Paak Ba'az Ilm e Gaib Ata Farmaata Hai, Neez Mufassireen Wa Muhaddiseen Ne Bhi Auliya e Kiraam Ko Milne Waale Ilm e Gaib Ki Wazaahat Farmaayi Hai.
Tafseer "Roohul Bayaan" Me'n Hai Ke Allaah Ke Rasoolo'n Ke Alaawah Bhi Gaib Par Muttala Hote Hai'n, Ambiya Ke Waaste Se Ya Allaah Paak Ba'az Auliya e Kiraam Ko Mustaqbil Me'n Hone Waale Ba'az Gaibi Waaqe'aat Par Farishte Ke Waaste Se Khabar Deta Hai, Lehaaza Iss Aayat Ke Zariye Allaah Paak Ki Yeh Muraad Nahee'n Hai Ke Rasoolo'n Ke Alaawah Koi Gaib Par Muttala Nahee'n Hota, Kyu'nke Yeh Baat Zaahir Hai Ke Kabhi Allaah Paak Rasoolo'n Ke Alaawah Ko Bhi Gaib Par Muttala Farma Deta Hai. (Tafseer Roohul Bayaan, Jild No.1, Safha No.201, Tafseer Sureh Jinn, Tehtul Aayah 26/27/28)
Aur Kitaab "Irshaadus Saari Sharah Saheeh Bukhaari" Me'n Hai Ke Allaah Paak Ke Siwa Koi Nahee'n Jaanta Ke Qayaamat Kab Aayegi Haa'n ! Allaah Paak Ke Pasandeedah Rasool Ke Allaah Paak Apne Gaib Me'n Se Jis Par Chaahe Unko Muttala Farma Deta Hai Aur Wali Nabi Ke Taabe Hai Woh Nabi Se (Ilm e Gaib) Leta Hai. (Irshaadus Saari Sharah Saheeh Bukhaari, Safha No.186)
In Tamaam Dalaa'il Se Waazeh Huwa Ke Auliya e Kiraam A'laihimur Ridwaan Ko Allaah Paak Ba'az Ilm e Gaib Ata Farmaata Hai.
By Alahazrat Foundation Research Team - 7710809266/9892708816
