Sabse Pehli Baat To Yeh Yaad Rakhe'n Ke Aurato'n Ka Mazaaraat e Auliya e Kiraam Ya Deegar Musalmaano'n Ki Qabro'n Ki Ziyaarat Karne Ke Ta'alluq Se Ulama e Ahle Sunnat Wa Jamaa'at Ke Darmiyaan Ikhtelaaf Paaya Jaata Hai, Ya'ni Ba'az Ulama e Ahle Sunnat Ne Aurato'n Keliye Qabro'n Ki Ziyaarat Se Mana Farmaaya Hai Aur Ba'az Ulama e Ahle Sunnat Ne Aurato'n Keliye Bhi Qabro'n Ki Ziyaarat Ko Jaa'iz Bataaya, Aur Fiqhe Hanafi Ki Mash'hoor Kitaab "Raddul Muhtaar" Me'n Yehi Jawaaz Ka Qaul Ikhtiyaar Kiya, Magar Isme'n Yeh Bhi Likha Hai Jiska Khulaasa Yeh Hai Ke,
"Lekin Aurate'n Apne Rishtedaaro'n Ki Qabro'n Par Jaaye'ngi To Rona Peetna Kare'ngi Isliye Aurato'n Ko Apne Rishtedaaro'n Ki Qabro'n Par Jaana Mana Hai Aur Saalehee'n, Auliya e Kiraam Ke Mazaaraat Par Aurate'n Barkat Haasil Karne Keliye Jaaye'n To Boodhi Aurato'n Keliye To Koi Harj Wa Pareshaani Nahee'n (Kyu'nke Boodhi Aurat Ki Wajah Se Fitna Phailne Ka Khatrah Bilkul Nahee'n Ke Baraabar Hai) Lekin Jawaan Aurato'n Keliye Mazaaraat e Auliya e Kiraam Ki Ziyaarat Ko Jaana Bhi Mana Hai (Kyu'nke Jawaan Aurato'n Ki Wajah Se Fitna Phailne Ka Bahot Zyaadah Imkaan Hai). (Raddul Muhtaar Ma Durrul Mukhtaar 2/242)
Sadrush Sharee'ah Badrut Tareeqa Allaama Mufti Muhammad Amjad Ali Aa'zami Alaihir Rehma Likhte Hai'n,
"Aurato'n Keliye Ba'az Ulama Ne Ziyaarat e Quboor Ko Jaa'iz Bataaya "Durre Mukhtaar" Me'n Yehi Qaul Ikhtiyaar Kiya Magar Azeezo'n Ki Qabro'n Par Jaaye'ngi To Jaza Wa Faza (Rona, Peetna) Kare'ngi Lehaaza Mamnu Hai Aur Saalehee'n Ki Qabro'n Par Barkat Keliye Jaaye To Boodhiyo'n Keliye Harj Nahee'n Aur Jawaano'n Keliye Mamnu.
Phir Likhte Hai'n, Aur Aslam (Zyaadah Saheeh) Yeh Hai Ke Aurate'n Mutlaqan Mana Ki Jaaye'n Ke Apno'n Ki Qabro'n Ki Ziyaarat Me'n To Wohi Jaza Wa Faza Hai Aur Saaleheen Ki Qabro'n Par Ya Ta'zeem Me'n Had Se Guzar Jaaye'ngi Ya Be Adabi Kare'ngi Ke Aurato'n Me'n Yeh Dono'n Baate'n Bakasrat Paayi Jaati Hai. (Bahaare Sharee'at, 1854)
Jo Ulama e Kiraam Qabro'n Ki Ziyaarat Ko Aurato'n Keliye Jaa'iz Qaraar Dete Hai'n, Woh Kehte Hai'n,
Jiska Khulaasa Hai Ke, Islaam Ke Ibtedaayi Daur Me'n Jabke Aurato'n Ki Tarbiyat Mukammal Islaami Tareeqe Par Nahee'n Huwi Thi To Aurate'n Qabro'n Par Jaakar Noha Karti Thi, Baal Nochti Thi Aur Seena Peet'ti Thi Isliye Aurato'n Ko Qabro'n Ki Ziyaarat Se Mana Kar Diya Gaya Aur Shuru Islaam Me'n To Mardo'n Ko Bhi Qabro'n Ki Ziyaarat Se Mana Kiya Gaya Tha, Lekin Jab Musalmaan Aurate'n Bhi Islaam Ki Ta'leem Wa Tarbiyat Se Mukammal Tareeqe Se Aaraasta Ho Gayi Aur Unke Qaul Wa Amal Me'n Bhi Sahaaba e Kiraam Ki Tarah Mukammal Inqilaab Aa Gaya To Nabi e Kareem ﷺ Ne Mardo'n Ki Tarah Aurato'n Ko Bhi Qabro'n Ki Ziyaarat Ki Ijaazat Inaayat Farmaayi, Lekin Haa'n Aaj Bhi Koi Aurat Ya Mard Zamaana e Jaahiliyat Ki Tarah Qabro'n Par Jaakar Gair Sharayi Harkaat Kare To Aise Mard Wa Aurat Keliye Ab Bhi Qabro'n Ki Ziyaarat Mana Hai Aur Agar Gair Sharayi Harkaat Na Kare To Mard Wa Aurat Dono'n Keliye Ijaazat Hai Aur Nabi e Kareem ﷺ Ka Farmaan Hai.
"Mai'n Ne Tumko Qabro'n Ki Ziyaarat Se Mana Kiya Tha Ab Unki Ziyaarat Kiya Karo" . (Saheeh Muslim, Hadees No.977)
Woh Kehte Hai'n (Ya'ni Jo Jaa'iz Qaraar Dete Hai'n) Ke Hadees Me'n Mutlaq Ijaazat Di Gayi Hai Yeh Nahee'n Kaha Gaya Ke Mardo'n Ko Ijaazat Hai Aurato'n Ko Nahee'n To Jab Iss Hadees Me'n Ijaazat Aa'm Hai To Iss Aa'm Ijaazat Me'n Mard Wa Aurat Dono'n Shaamil Hai Agar Iss Aa'm Ijaazat Se Aurato'n Ko Khaarij Kare'nge To Koi Daleel e Khaas Chaahiye Jo Iss Aa'm Ijaazat Waali Hadees Ke Ba'ad Ki Ho Jo Ke Hamaare Paas Nahee'n.
Ab Woh Hadees Dekhe'n ! Jisme'n Aurato'n Ko Qabro'n Ki Ziyaarat Se Mana Kiya Gaya Hai,
"Hazrat Abu Hurairah Radiallaahu Anhu Ne Kaha Ke Rasoolullaah ﷺ Ne Qabro'n Ki Kasrat Se Ziyaarat Karne Waali Aurato'n Par La'nat Farmaayi Hai." (Tirmizi Shareef, Hadees No.56)
Ab Jo Ulama Aurato'n Ko Qabro'n Ki Ziyaarat Ki Ijaazat Dete Hai'n Unka Kehna Hai Ke Pehli Baat To Yeh Dekhe Ke Hadees Ke Lafz "Kasrat Se Ziyaarat Karne Waali" Aur Gaur Kare Yeh Mubaalga Ka Sega Hai Ya'ni Bahot Zyaadah Qabro'n Par Jaane Waali Aurato'n Par La'nat Farmaayi, Maslan Jis Tarah Namaaz, Rozah Aur Baaqi Ibaadaat Me'n Mubaalga Karna Jaa'iz Nahee'n Isi Tarah Ziyaarat e Quboor Me'n Mubaalga Karna Jaa'iz Nahee'n Balke Had Ae'tedaal Ka Hukm Hai.
Imaam Tirmizi Alaihir Rehma Ne Iss Hadees Ke Tahet Jo Baat Likhi Hai Woh Qaabil e Zikr Hai, Mai'n Samajhta Hoo'n Iss Masle Ko Samajhne Keliye Kaafi Hai, Chunaanche Imaam Tirmizi Likhte Hai'n Ke "Ba'az Ahle Ilm Ka Khayaal Hai Ke Yeh Jo Aurato'n Par La'nat Ki Gayi Hai Qabro'n Ki Ziyaarat Par To Yeh La'nat Nabi e Kareem ﷺ Ke Qabro'n Ki Ziyaarat Ki Ijaazat Dene Se Pehle Ki Baat Hai Ab Ba'ad Me'n Jab Nabi e Kareem ﷺ Ne Uski (Qabro'n Ki Ziyaarat Ki) Ijaazat Dedi To Ab Iss Ijaazat Me'n Mard Aur Aurate'n Dono'n Shaamil Hai'n Aur Ba'az Ulama Kehte Hai'n Ke Aurato'n Ki Ziyaarat e Quboor Isliye Makrooh Hai Ke Unme'n Sabr Kam Aur Be Sabri Zyaadah Hoti Hai. (Tirmizi Shareef, 2/362)
To Imaam Tirmizi Alaihir Rehma Ke Baqaul Ma'loom Huwa Ke Ba'az Ulama Kehte Hai'n Ke Agar Be Sabri Ka Iz'haar Na Ho, Seena Peetna Na Ho Aur Baal Nochna Ya Girebaan Phaadna Na Ho Aur Fitna Wa Fasaad Ka Khatrah Na Ho To Phir Aurate'n Bhi Isi Tarah Qabro'n Aur Mazaaro'n Ki Ziyaarat Kar Sakti Hai Jis Tarah Mard Qabro'n Aur Mazaaro'n Ki Ziyaarat Karte Hai'n Isi Liye Woh Kehte Hai'n Choo'nke Qabro'n Ki Ziyaarat Nabi e Kareem ﷺ Ki Sunnat Hai To Yeh Sunnat e Nabvi Mard Wa Aurat Dono'n Keliye Hai.
Nabi e Kareem ﷺ Qabro'n Ki Ziyaarat Karte The Ispar Ek Hadees Mulaaheza Kare'n,
Hazrat Aa'yesha Radiallaahu Anha Riwaayat Karti Hai'n Ke Huzoor Nabi e Akram ﷺ (Ki Jab Mere Yahaa'n Baari Hoti To Nabi e Kareem ﷺ) Raat Ke Aakhri Hisse Me'n Baqee Ke Qabrastaan Me'n Tashreef Le Jaate Aur (Baqee Qabrastaan Waalo'n Se Yoo'n) Farmaate, Tum Par Salaamati Ho, Aye Momino'n Ke Ghar Waalo ! Jis Cheez Ka Tumse Wa'dah Kiya Gaya Hai Woh Tumhaare Paas Aa Gayi Ke Jise Kal Ek Muddat Ba'ad Paaoge Aur Agar Allaah Paak Ne Chaaha To Ham Bhi Tumse Anqareeb Milne Waale Hai'n, Aye Allaah ! Baqee Garqad (Ahle Madeena Ke Qabrastaan) Waalo'n Ki Magferat Farma. (Muslim Shareef, Hadees No.(974) 102)
Isi Tarah Ziyaarat e Quboor Ki Fazeelat Par Ek Hadees Mulaaheza Kare'n,
"Hazrat Abu Hurairah Radiallaahu Anhu Bayaan Karte Hai'n, Ke Rasoolullaah ﷺ Ne Farmaaya, Ya'ni Jo Koi Bhi Har Jum'ah Ko Apne Waalidain Ya Maa'n Baap Me'n Se Kisi Ek Ki Qabar Ki Ziyaarat Kare Usko Bakhsh Diya Jaata Hai Aur Use Nek Musalmaan Likha Jaata Hai." (Tabraani, Al Mo'jamul Waseet, Hadees No.6114)
Aur Bhi Deegar Ahaadees Maujood Hai'n Jo Ke Qabro'n Ki Ziyaarat Ke Jawaaz Par Dalaalat Karti Hai'n Jiske Umoom Se Istedlaal Karte Huwe Ba'az Ulama Kehte Hai'n Ke Iss Umoom Me'n Aurate'n Bhi Shaamil Hai'n, Lekin Haa'n Woh Ulama Jo Jawaaz Ka Qaul Karte Hai'n Saath Woh Yeh Bhi Kehte Hai'n Ke Yeh Ahtiyaat Zaroori Hai Ke Aurate'n Ba Pardah Ho Neez Aurato'n Ke Saath Koi Mehram Ho Taake Koi Fitna Paida Na Ho Agar Kisi Bhi Soorat Me'n Fitna Aur Buraayi Ka Andesha Ho To Phir Aurato'n Ko Chaahiye Ke Apne Ghar Hi Se Isaale Sawaab Kare'n.
By Alahazrat Foundation Research Team - 7710809266/9892708816
