Azaab e Qabr Aur Tan'eem e Qabr Haq Hai, Yeh Ek Haqeeqat Hai, Azaab e Qabr Aur Tan'eem e Qabr Ka Ta'alluq Choo'nke Mushaahede (Dekhne) Se Nahee'n Balke Iska Ta'alluq Imaan Bil Gaib Se Hai, Isliye Ham Iska Idraak Nahee'n Kar Sakte, Bas Yoo'n Samajh Leejiye Ke Jaise Farishto'n, Jinnaat, Jannat Wa Jahannam Ko Ham Allaah Aur Rasool ﷺ Ke Kehne Se Tasleem Karte Hai'n, Isi Tarah Azaab e Qabr Aur Tan'eem e Qabr Ko Bhi Ham Tasleem Karte Hai'n Isliye Ke Azaab e Qabr Aur Tan'eem e Qabr Ke Muta'alliq Beshumaar Ahaadees e Saheeha Maujood Hai'n, Isliye Azaab e Qabr Aur Tan'eem e Qabr Ka Inkaar Karne Waala Gumraah Hai Ya'ni Ahle Sunnat Wa Jamaa'at Se Khaarij Hai, Ya'ni Yeh Azaab e Qabr Aur Tan'eem e Qabr Ka Aqeedah Zarooriyaat e Ahle Sunnat Wa Jamaa'at Se Hai.
Azaab e Qabr Aur Tan'eem e Qabr Ke Ta'alluq Se Ulama e Kiraam Ke Aqwaal Mulaaheza Farmaa'iye :-
Hazrat Sayyaduna Imaam Ahmad Bin Hambal Rehmatullaah A'laih Ne Farmaaya, Azaab e Qabr Haq Hai Iska Inkaar Gumraah Aur Gumraahgar Ke Siwa Koi Nahee'n Karega. (Tabqaatul Hanaabala, Jild No.1, Safha No.173)
Imaam Jalaaluddeen Suyuti "Sharahus Sudoor" Me'n Farmaate Hai'n Ke Ba Ittefaaq Ahle Sunnat Azaab e Qabr Aur Asaa'ish e Qabr (Raahat Wa Aaram) Ka Mahal Rooh Aur Badan Dono'n Me'n Hai'n. (Sharahus Sudoor, Safha No.76)
Allaama Amjad Ali Aa'zami A'laihir Rehma "Bahaare Sharee'at" Me'n Tehreer Farmaate Hai'n Ke Azaab Wa Tan'eem e Qabr Ka Inkaar Wohi Karega Jo Gumraah Hai. (Bahaare Sharee'at, Hissa 1, Safha No.115)
Yaad Rahe ! Azaab Wa Tan'eem e Qabr Se Muraad Barzakh Me'n Hone Waala Azaab Wa Sawaab Hai, Aa'lam e Barzakh Me'n Azaab Wa Sawaab Ko Azaab e Qabr Wa Tan'eem e Qabr Se Ta'beer Isliye Kiya Jaata Hai Ke Aa'm Taur Par Mayyat Ko Qabr Me'n Hi Dafan Kiya Jaata Hai Warna Jise Allaah Paak Ne Azaab Ya Sawaab Dene Ka Iraadah Farmaaya Hai Use Azaab Ya Sawaab Zaroor Hoga Chaahe Woh Qabr Me'n Dafan Ho Ya Na Ho Khwaah Use Darindo'n Ne Kha Liya Ho Ya Use Jala Kar Uski Khaak Hawa Me'n Uda Di Gayi Ho.
Ab Qur'aan Shareef Se Dalaa'il Mulaaheza Keejiye.
1- Sureh Momin, Aayat No.46
Tarjuma - Aag Jis Par Subah Wa Shaam Pesh Kiye Jaate Hai'n Aur Jis Din Qayaamat Qaayem Hogi Hukm Hoga Fir'aon Waalo'n Ko Sakht Tar Azaab Me'n Daakhil Karo.
Iss Aayat Ki Tafseer Me'n Imaam Fakhruddeen Raazi A'laihir Rehma Farmaate Hai'n Ke Iss Aayat Se Hamaare Ulama Ne Azaab e Qabr Ke Isbaat (Saabit Hone Par) Istedlaal Kiya Hai. (Tafseer e Kabeer, Jild No.27, Safha No.521)
Upar Jo Aayat e Kareema Pesh Huwi Woh Azaab e Qabr Ke Ta'alluq Se Thi, Ab Qabr Me'n Raahat Wa Aaraam Ke Ta'alluq Se Aayat e Kareema Pesh Ki Jaati Hai.
2- Sureh Aale Imraan, Aayat No.170
Tarjuma - Shaad Hai'n Uspar Jo Allaah Ne Unhe'n Apne Fazl Se Diya Aur Khushiyaa'n Mana Rahe Hai'n Apne Pichhlo'n Ki Jo Abhi Unse Na Mile Ke Unpar Na Kuchh Andesha Hai Aur Na Kuchh Gam.
Iss Aayat Me'n Shohada e Kiraam Ke Baare Me'n Farmaaya Jaaraha Hai Ke Woh Allaah Paak Ke Fazl Wa Karam, In'aam Wa Ahsaan, Ae'zaaz Wa Ikraam Aur Maut Ke Ba'ad Aa'la Qism Ki Zindagi Diye Jaane Par Khush Hai, Neez Uspar Khush Hai Ke Allaah Paak Ne Unhe'n Apna Muqarrab Banaaya, Jannat Ka Rizq Aur Uski Ne'mate'n Ata Farmaayi Aur Jannat Ki Manzile'n Haasil Karne Keliye Shahaadat Ki Taufeeq Ata Farmaayi, Neez Iss Baat Par Bhi Khushi Mana Rahe Hai'n Ke Unke Ba'ad Duniya Me'n Reh Jaane Waale Unke Musalmaan Bhaayi Duniya Me'n Imaan Aur Taqwe Par Qaayem Hai'n, Aur Jab Woh Bhi Shaheed Ho Kar Unke Saath Mile'nge To Woh Bhi Un Karam Nawaaziyo'n Ko Paaye'nge Aur Qayaamat Ke Din Aman Aur Chain Ke Saath Uthaaye Jaaye'nge.
Ab Hadees Shareef Se Daleel Mulaaheza Keejiye.
1- Bukhaari Shareef, Jild No.2, Safha No.99, Hadees No.1375)
Tarjuma - Hazrat Bara Bin Aa'zib Radiallaahu A'nhu Hazrat Abu Ayyoob Ansaari Radiallaahu A'nhu Se Bayaan Karte Hai'n Ke Nabi e Kareem ﷺ Baahar Nikle, Uss Waqt Sooraj Guroob Ho Chuka Tha, Pas Aap A'laihissalaam Ne Aawaaz Suni To Farmaaya Yahood Ko Unki Qabr Me'n Azaab Horaha Hai.
In Tamaam Dalaa'il Se Ma'loom Huwa Ke Azaab e Qabr Haq Hai, Qabr Me'n Gunehgaaro'n Ko Azaab Bhi Hoga Aur Neko'n Ko Raahat Wa Aaraam Bhi Naseeb Hoga.
Allaah Paak Se Du'aa Hai Ke Hame'n Qabr Ki Tamaam Aazmaa'isho'n Se Mehfooz Rakhe. Aameen
By Alahazrat Foundation Research Team - 7710809266/9892708816
