Badmazhabo'n Ke Peechhe Namaaz Padhne Ke Ta'alluq Se Musalmaano'n Ka Aqeedah Yeh Hai Ke Un Logo'n Ne Allaah Aur Uske Rasool ﷺ Ki Shaan Me'n Gustaakhiyaa'n Kee'n Aur Apni Kitaabo'n Me'n Chhaapee'n Isliye Makkah Wa Madeena Shareef Ke Ulama e Kiraam Ne Apne Fataawa Me'n Unpar Hukm e Kufr Diya Aur Farmaaya Ke Jo Unke Kufr Me'n (Jaanne Ke Ba'ad) Shak Kare Woh Bhi Kaafir Hai. Isliye Unke Peechhe Koi Bhi Namaaz Jaa'iz Nahee'n.
Fataawa Razviya Me'n Hai Ke Deobandiya Ki Nisbat Ulama e Harmain Shareefain Ne Bil Ittefaaq Farmaaya Ke Woh Murtad Hai'n, Aur Shifaaye Qaazi Ayaaz Wa Bazaaziya Wa Majma'ul Anhaar Wa Durre Mukhtaar Wagairah Ke Hawaale Se Farmaaya Ke Jisne Uske Kufr Wa Azaab Me'n Shak Kiya Woh Bhi Kaafir Ho Gaya. (Fataawa Razviya, 6/621, Matboo'ah Raza Foundation)
Isi Tarah Ek Aur Maqaam Par Aa'la Hazrat Imaam Ahmad Raza Khaan Qaadri Barelvi Rehmatullaah Alaih Farmaate Hai'n Ke Wahaabi Ki Namaaz Na Kisi Ke Peechhe Ho Sakti Hai Na Khud Tanha, Na Uske Peechhe Kisi Ki Ho Sakti Hai Agarche Iska Ham Maz'hab Ho Ke Sehat e Namaaz Keliye Pehli Shart Islaam Hai Aur Wahaabiya Tauheen e Khuda Wa Rasool Ke Sabab Islaam Se Khaarij Hai'n. (Fataawa Razviya 6/623, Matboo'ah Raza Foundation)
Ab Dalaa'il Mulaaheza Farmaaye'n,
Bid'ati Ke Baare Me'n Saheeh Bukhaari Me'n Hai Ke Ibraaheem Taimi Ne Apne Waalid e Maajid Se Riwaayat Ki Hai Ke Hazrat Ali Radiallaahu Anhu Ne Farmaaya Ke Hamaare Paas Koi Kitaab Nahee'n Hai Jise Ham Padhe'n, Siwa Allaah Ki Kitaab Qur'aan Ke Aur Iske Alaawah Yeh Saheefa Bhi Hai, Bayaan Kiya Ke Phir Woh Saheefa Nikaale To Usme'n Zakhmo'n (Ke Qasaas) Aur Oo'nto'n Ki Zakaat Ke Masaa'il The, Raawi Ne Bayaan Kiya Ke Isme'n Yeh Bhi Tha Ke Ayr Se Saur Tak Madeena Haram Hai Jisne Iss Deen Me'n Koi Nayi Baat Paida Ki Ya Nayi Baat Karne Waale Ko Panaah Di To Uspar Allaah Aur Farishto'n Aur Insaano'n Sabki La'nat Hai Aur Qayaamat Ke Din Uska Koi Nek Amal Maqbool Na Hoga Aur Jisne Apne Maaliko'n Ki Ijaazat Ke Bagair Doosre Logo'n Se Mawaalaat Qaayem Karli To Uspar Farishto'n Aur Insaano'n Sabki La'nat Hai, Qayaamat Ke Din Uska Koi Nek Amal Maqbool Nahi Hoga Aur Musalmaano'n Ka Zimma (Qaul Wa Qaraar, Kisi Ko Panaah Dena Wagairah) Ek Hai, Ek Adna Musalmaan Ke Panaah Dene Ko Bhi Qaayem Rakhne Ki Koshish Ki Jaayegi, Pas Jisne Kisi Musalmaan Ki Di Huwi Panaah Ko Toda, Uspar Allaah Ki, Farishto'n Aur Insaano'n Sabki La'nat Hai Qayaamat Ke Din Uska Koi Nek Amal Maqbool Nahee'n Kiya Jaayega. (Bukhaari Shareef, Kitaabul Faraa'iz, Jild No.8 Safha No.154, Hadees No.6755)
Saheeh Bukhaari Ki 6755 Number Hadees Bayaan Kar Rahi Hai Ke Bid'ati Ka Na Farz Qabool Hai Na Nafil Qabool Hai.
Wahaabiyo'n Ka Bahot Bada Imaam Naasiruddeen Albaani Usne Yeh Tehkeem Ki Hai, "At Targeeb Wat Tarheeb" Isme'n Riwaayat Number 53 Hai Ke "Sayyaduna Abdullaah Ibne Abbaas Radiallaahu Anhuma Farmaate Hai'n Ke Rasoolullaah ﷺ Ne Farmaaya, Allaah Rabbul Izzat Inkaar Farmaata Hai Ke Allaah Kisi Bid'ati Ke Amal Ko Qabool Kare Hatta Ke Woh Apni Bid'at Ko Chhod De. (Saheeh At Targeeb Wat Tarheeb, Hadees No.53)
Ya'ni Jab Tak Woh Apni Bid'at Ko Nahee'n Chhodta Bid'ati Ka Allaah Ki Baargaah Me'n Koi Amal Qabool Nahee'n Hai.
Mohtaram Qaari'een, At Targeeb Wat Tarheeb Se Aur Saheeh Bukhaari Ki 6755 Number Hadees Se Yeh Saabit Huwa Ke Bid'ati Ka Amal Hi Allaah Ki Baargaah Me'n Qabool Nahee'n Hai.
Sunan Abu Dawood Me'n 481 Number Hadees Me'n Hai Ke Hazrat Abu Sahla Saa'ib Bin Khilaad Radiallaahu Anhu Jo Nabi e Kareem ﷺ Ke As'haab Me'n Se Hai'n, Woh Bayaan Karte Hai'n, Ek Shakhs Jo Logo'n Ki Imaamat Karta Tha, Usne Qibla Ki Simt Me'n Thook Diya, Nabi e Kareem ﷺ Mulaaheza Farma Rahe The, Jab Woh Faarig Huwa To Rasoolullaah ﷺ Ne Farmaaya, Yeh Shakhs Tum Logo'n Ko Namaaz Na Padhaaye, Uske Ba'ad Uss Shakhs Ne Logo'n Ko Namaaz Padhaane Ka Iraadah Kiya, To Logo'n Ne Use Rok Diya, Aur Nabi e Kareem ﷺ Ke Farmaan Ke Baare Me'n Use Bataaya, Usne Iss Baat Ka Tazkerah Nabi e Kareem ﷺ Ki Baargaah Me'n Kiya, To Nabi e Kareem ﷺ Ne Irshaad Farmaaya Ji Haa'n (Mai'n Ne Iss Baat Ka Hukm Diya Hai) Raawi Kehte Hai'n Ke Mera Khayaal Hai Riwaayat Me'n Yeh Alfaaz Bhi Hai'n (Ke Rasoolullaah ﷺ Ne Irshaad Farmaaya) Tumne Allaah Aur Uske Rasool Ko Iza Paho'nchaayi Hai. (Abu Daawood Shareef, Kitaabus Salaat, Jild No.1, Safha No.358, Hadees No.481)
Ab Iss Hadees Se Masla Yeh Ma'loom Huwa Ke Jo Shakhs Allaah Aur Uske Rasool Ki Na Farmaani Karta Hai Ya Woh Shakhs Jo Allaah Aur Uske Rasool Ko Aziyat Paho'nchaata Hai Uske Peechhe Namaaz Padhne Se Khud Rasoolullaah ﷺ Ne Roka Hai.
Abu Saaleh Ne Hazrat Abu Hurairah Radiallaahu Anhu Se Riwaayat Ki Hai Ke Rasoolullaah ﷺ Ne Farmaaya Imaam Zaamin Aur Mo'azzin Amaanatdaar Hote Hai'n, Aye Allaah ! Imaamo'n Ko Hidaayat De Aur Mo'azzi'no'n Ki Magferat Farma. (Abu Daawood Shareef, Kitaabus Salaat, Hadees No.517, Jild No.1 Safha No.389)
Iss Hadees Se Fuqaha Ne Yeh Masla Bayaan Kiya Hai Ke Imaam Woh Ho Jo Khair Waala Ho Aur Saalehul Aqeedah Ho Aur Saalehul Amal Ho.
Hazrat Abdullaah Bin Umar Ke Hawaale Se "Imaam Daar Qutni" Ne Apni Kitaab "Sunan Daar Qutni" Me'n 1863 Number Hadees Marfoo'an Bayaan Ki Hai Ke Hazrat Abdullaah Bin Umar Radiallaahu Anhu Farmaate Hai'n, Ke Rasoolullaah ﷺ Ne Farmaaya Ke Tum Apne Imaam Un Logo'n Ko Banaao Jo Tum Me'n Se Behtar Log Hai'n Tumhaare Imaam Tumhaare Aur Tumhaare Rab Ke Darmiyaan Tumhaare Numaa'inde Hai'n.
Iss Hadees Se Ma'loom Huwa Ke Imaam Woh Shakhs Ho Jo Behtar Ho, Saalehul Aqeedah Ho Aur Saalehul Amal Ho.
Imaam Haakim Hazrat Mursad Ibne Abi Mursad Radiallaahu Anhu Se 5048 Number Hadees Me'n Aur Imaam Tabraani "Al Mo'jamul Kabeer Tabraani" Me'n Hadees No.17165 Me'n Riwaayat Karte Hai'n Ke Sayyaduna Mursad Ibne Abi Mursad Radiallaahu Anhu Farmaate Hai'n Ke Rasoolullaah ﷺ Ne Farmaaya Ke Agar Tum Yeh Pasand Karo Ke Tumhaari Namaaz Qabool Ki Jaaye To Tumhe'n Woh Shakhs Namaaz Padhaaye Jo Tum Me'n Se Behtar Hai, (Ya'ni Saalehul Amal, Saalehul Aqeedah, Muttaqi Parhezgaar Shakhs Namaaz Padhaaye) Kyu'nke Tumhaara Jo Imaam Hai Woh Tumhaare Aur Tumhaare Rab Ke Darmiyaan Tumhaara Numaa'indah Hai. (Al-Mustadrak Saheehain, Hadees No.5048 & Al-Mo'jamul Kabeer Tabraani, Hadees No.17165)
Sunan Ibne Maaja Me'n Ek Hadees Paak Maujood Hai Jo Hazrat Jaabir Bin Abdullaah Radiallaahu Anhu Se Marwi Hai, Hadees Paak Taweel Hai Isi Hadees Ka Ek Tukda Mai'n Aap Ke Saamne Pesh Karta Hoo'n, Iss Hadees Paak Me'n Saraahat Ke Saath Maujood Hai Ke Nabi e Paak ﷺ Ne Irshaad Farmaaya Ke Koi Faajir Kisi Momin Ki Amaamat Na Kare. (Sunan Ibne Maaja, Hadees No.1081)
Mohtaram Qaari'een e Kiraam ! Jaisa Ke Aapne Dalaa'il Mulaaheza Kiye, In Tamaam Dalaa'il Se Jo Hame'n Ma'loom Hota Hai Woh Yehi Ma'loom Hota Hai Ke Jiska Aqeedah Durust Na Ho Ya Jo Nek Na Ho Gunehgaar Ho To Aise Shakhs Ke Peechhe Namaaz Padhna Durust Nahee'n Hai.
Aapse Guzaarish Hai Ke Jab Aap Kisi Masjid Me'n Ya Kisi Jagah Jamaa'at Ke Saath Namaaz Padhne Ka Iraadah Kar Rahe Ho To Sabse Pehle Aap Par Yeh Laazim Banta Hai Ke Dekhe'n Ke Imaam Kis Tarah Ka Hai, Kya Imaam Ka Aqeedah Sunni Hanafi Barelvi Ke Aqeede Ke Mutaabiq Hai Ya Nahi Hai, Kya Imaam Bid'ati Hai Ya Nahee'n Hai, Kya Imaam Nek Amal Karne Waala Hai Ya Nahi Hai, In Tamaam Cheezo'n Ko Jaa'nchne, Parakhne Ke Ba'ad Hi Uss Imaam Ke Peechhe Namaaz Padhe Jo Sunni Hanafi Barelvi Saalehul Aqeedah Aur Saalehul Amal Ho.
Agar Imaam Chhoti Si Chhoti Masjid Ka Hi Kyu'n Na Ho Agar Uske Aqeede Durust Hai'n To Bila Jhijak Aap Uske Peechhe Namaaz Padh Sakte Hai'n Aur Agar Imaam Badi Se Badi Masjid Ka Hi Kyu'n Na Ho Agar Uske Aqeede Durust Nahee'n Hai To Aap Aise Imaam Ke Peechhe Namaaz Nahee'n Padh Sakte.
By Alahazrat Foundation Reasearch Team - 7710809266/9892708816
