Urs Ke Lugvi Ma'ni Hai "Shaadi" Isi Liye Dulhan Ko "Uroos" Kehte Hai'n, Buzurgaan e Deen Ki Taareekh e Wafaat Ko Isliye Urs Kehte Hai'n Ke Jab Munkar Nakeer Qabr Me'n Mayyat Ka Imtehaan Lete Hai'n Aur Woh Kaamiyaab Hota Hai To Kehte Hai'n, Tu Uss Dulhan Ki Tarah So Ja Jisko Siwaaye Uske Pyaare Ke Koi Nahee'n Utha Sakta. (Mishkaatul Masaabeeh, Hadees No.130)
Kyu'nke Uss Din Munkar Nakeer Ne Unko Uroos Kaha Isliye Woh Din Roz e Urs Kehlaaya Ya Isliye Ke Woh Jamaal e Mustafa ﷺ Ke Dekhne Ka Din Hai Ke Munkar Nakeer Dikha Kar Poochhte Hai'n Ke Tu Inko Kya Kehta Tha Aur Woh To Khalqat Ke Dulha Hai'n, Tamaam Aa'lam Unhi Ke Dam Ki Bahaar Hai Aur Wisaal e Mehboob (Ya'ni Mehboob Se Milne Ka Din) Urs Ka Din Hai Lehaaza Yeh Din Urs Kehlaaya, Urs Ki Haqeeqat Sirf Iss Qadar Hai Ke Har Saal Taareekh e Wafaat Par Buzurgaan e Deen Ke Urs Me'n Zikrullaah, Na'at Khwaani Aur Qur'aan e Paak Ki Tilaawat Aur Iske Alaawah Deegar Nek Kaam Karke Unko Isaale Sawaab Kiya Jaata Hai Aur Isaale Sawaab Ke Jaa'iz Wa Mustahsan Hone Ke Dalaa'il Isaale Sawaab Waale Chapter Me'n Zikr Kiye Ja Chuke Hai'n.
Buzurgaan e Deen Auliya e Kiraam Rahima Humullaahu Ta'aala Ka Urs Manaane Ka Maqsad Unki Yaad Manaana Aur Unko Isaale Sawaab Karna Hota Hai Isliye Unke Urs Ka Ine'qaad Karna Shar'an Jaa'iz Wa Mustahsan Aur Ajar Wa Sawaab Ka Zariya Hai.
Yaad Rahe Urs Se Hamaari Muraad Wohi Urs Hai'n Jo Sharee'at e Mutahhara Ke Mutaabiq Manaaye Jaate Hai'n, Haa'n Gair Sharayi Umoor To Woh Har Jagah Na Jaa'iz Hai'n Aur Yeh Na Jaa'iz Kaam Urs Ke Alaawah Bhi Ho'n To Na Jaa'iz Hai'n Aur Sharee'at Ke Ahkaam Ki Ma'mooli Si Samajh Boojh Rakhne Waala Musalmaan Unhe'n Jaa'iz Nahee'n Keh Sakta, Un Khuraafaat Se Door Rehna Chaahiye Aur Jahaa'n Tak Ho Sake Musalmaano'n Ko Bhi Usse Bachaana Chaahiye.
Yaad Rahe Ham Ahle Sunnat Wa Jamaa'at Ke Nazdeek Buzurgaan e Deen Ka Urs Manaane Ke Muta'alliq Jo Aqeedah Wa Nazariya Hai Woh Aqeedah Wa Nazariya Na Zarooriyaat e Deen Se Hai Na Zarooriyaat e Ahle Sunnat Se Hai Balke Yeh Ek Mustahab Wa Jaa'iz Amal Hai Jo Ke Furu Me'n Se Hai.
Hazrat Uqba Bin Aa'mir Radiallaahu Anhu Se Riwaayat Hai Ke Nabi e Akram ﷺ Ek Din Baahar Nikle Aur Ohad Me'n Shaheed Ho Jaane Waalo'n Par Namaaz Padhi Jaisa Ke Aap Mayyat Par Namaaz Padhte The, Phir Aap Mimbar Shareef Par Tashreef Laaye Aur Farmaaya, Mai'n Tumhaare Liye (Fart) Muqaddam Hoo'n Aur Mai'n Tum Par Gawaah Hoo'n Aur Allaah Ki Qasam Mai'n Apne Hauz Ko Ab Dekh Raha Hoo'n Aur Zameen Ke Khazaano'n Ki Ku'njiyaa'n Mujhe Di Gayi Hai'n Ya Farmaaya Zameen Ki Ku'njiyaa'n Aur Beshak Mai'n Allaah Ki Qasam Tum Par Shirk Karne Ka Khauf Nahee'n Rakhta Lekin Mujhe Tum Par Yeh Khauf Hai Ke Tum Duniya Me'n Ragbat Karne Lag Jaaoge. (Bukhaari Shareef, Jild No.1, Safha No.451, Hadees No.4042)
Iss Hadees Ke Muta'alliq Shaariheen e Hadees Ne Tehqeeq Ke Saath Likha Hai Ke Yeh Nabi e Kareem ﷺ Ke Wisaal Waale Saal Ka Waaqe'ah Hai, Choo'nke Yeh Hadees Aage Bhi Bukhaari Me'n Riwaayat Ki Gayi Hai Jisme'n Sahaabi Kehte Hai'n Ke Mimbar Par Khitaab Karte Huwe Yeh Huzoor ﷺ Ka Aakhri Manzar Tha Jo Hamne Dekha, Hadees Me'n Yeh Alfaaz Bhi Aaye Hai'n Ke Huzoor ﷺ Ne Aise Namaaz Padhi Jaise Alwada Karne Waala Padhta Hai, Ispar Mohaddiseen Ne Kaha Ke Yeh Aakhri Saal Ka Waaqe'ah Hai, Goya Uss Waqt Jab Aap ﷺ Unke Mazaaraat Par Tashreef Laaye Shohada e Ohad Ko 8 Saal Beet Chuke The.
Huzoor ﷺ Ne Tamaam Sahaaba Ko Saath Liya Aur Ek Poora Ijtema Shohada e Ohad Ki Ziyaarat Keliye Gaya, Lehaaza Ijtemaayi Taur Par Mazaaraat Ki Ziyaarat Ko Jaana Sunnat e Rasoolullaah ﷺ Huwa, Aapke Saath Se'nkdo'n Sahaaba The Jinhe'n Aap ﷺ Ne Khitaab Kiya, Goya Se'nkdo'n Sahaaba Ka Ijtema Huwa To Phir Mazaar e Wali Aur Mazaar e Shaheed Par Se'nkdo'n Ka Ijtema Aur Ziyaarat Karna Yeh Bhi Sunnat Hai Aur Isi Ko Urs Kehte Hai'n, Goya Huzoor ﷺ Ne Shohada e Ohad Ka Urs Manaaya Tha.
Sawaal Paida Hota Hai Ke Isse Urs Kahaa'n Se Saabit Hai ? Hadees Ka Agla Hissa Iss Baat Ko Waazeh Karraha Hai Ke Jab Aap ﷺ Ne Wahaa'n Namaaz Padh Li Ya Du'aa Farmaayi (Shaariheen e Hadees Ke Haa'n Dono'n Ma'ni Aaye Hai'n), Aap ﷺ Mimbar Ki Taraf Mutawajjeh Huwe Aur Mimbar Par Qayaam Farma Kar Khitaab Kiya,
Choo'nke Mimbar Par Khade Ho Kar Khitaab Kiya, Isse Ma'loom Hota Hai Ke Sahaaba Ki Te'daad Kaseer Thi, Kyu'nke Agar Te'daad Kam Hoti To Mimbar Par Qayaam Farma Kar Khitaab Ki Zaroorat Wa Haajat Na Thi, Isse Yeh Andaazah Hota Hai Ke Sahaaba Ki Kaseer Te'daad Aap ﷺ Ke Saath Thi Aur Un Tamaam Ko Saath Lekar Mazaaraat e Shohada e Ohad Par Aaye, Shohada e Ohad Ki Quboor Me'n Mimbar Ki Maujoodgi Se Ma'loom Hota Hai Ke Mimbar Saath Lekar Gaye The Ya Ma'ngwaaya Gaya Tha, Goya Jaate Huwe Yeh Iraadah Tha Ke Sirf Ziyaarat Hi Nahee'n Hogi Balke Khitaab Bhi Hoga,
Ma'loom Huwa Jab Mazaar Ki Ziyaarat Ho, Se'nkdo'n Ka Ijtema Ho, Mimbar Lage Aur Mimbar Par Khitaab Ho, Yeh Tamaam Ajza Mil Jaaye'n To Isi Ko Urs Ka Naam Diya Jaata Hai, Isse Waazeh Huwa Ke Nabi e Akram ﷺ Ne Wafaat Se Pehle Mazaaraat Par Haazri Ke Aadaab Sikha Diye, Goya Shohada, Auliya, Saaliheen Ke Mazaar Par Jaana, Unki Ijtemaayi Ziyaarat Karna, Khitaab Karna, Zikr Wa Azkaar Aur Wa'az Wa Naseehat Karna Sunnat e Rasool ﷺ Hai.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai (Isi Tarah Buzurgaan e Deen Ke Urs Manaane Ka Masla Bhi Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
