Yaad Rahe Ke Mo'azzaz, Mukarram Ash'khaas Aur Waalidain Ke Haath Aur Paa'on Ko Choomna Shar'an Jaa'iz Hai, Jaisa Ke Sahaaba e Kiraam Ne Nabi e Kareem ﷺ Ke Daste Mubaarak Aur Qadam e Mubaarak Ko Bosa Diya Hai Jiska Saboot Hadees Shareef Me'n Maujood Hai.
Aur Yeh Baat Bhi Aapko Yaad Rehni Chaahiye Ke Mukarram Aur Mo'azzaz Ash'khaas Ke Paa'on Aur Haatho'n Ko Choomne Ka Yeh Masla Na Zarooriyaat e Deen Ka Masla Hai Na Zarooriyaat e Ahle Sunnat Wa Jamaa'at Ka Masla Hai Balke Yeh Ek Furooyi Masla Hai.
Haath Aur Paa'on Ko Choomne Se Muta'alliq Chand Ahaadees Wa Aasaar Darj Kiye Jaate Hai'n Mulaaheza Farmaaye'n.
(1) Zaare Bin Aa'mir - Jo Wafad e Abdul Qais Ke Saath Aap ﷺ Ki Baargaah Me'n Haazir Huwe The, Unse Marwi Hai Ke,
Tarjuma:- Jab Ham Madeena e Munawwarah Haazir Huwe To Apni Sawaariyo'n Se Kood Kar Huzoor Nabi e Akram ﷺ Ke Daste Aqdas Aur Paa'on Mubaarak Ko Choomne Lage.
Iss Hadees Ko Sihaah e Sitta Me'n Se Sunan Abi Dawood (Kitaabul Adab, Baab Qublatul Jasad, 4/357, Raqam 5225) Me'n Riwaayat Kiya Gaya Hai, Imaam Tabraani Ne Apni Do Kutub Mo'jamul Kabeer (5/275, Raqam 5313) Aur Mo'jamul Ausat (1/133, Raqam 418) Me'n Riwaayat Kiya Hai.
(2) Imaam Bukhaari Ne "Adabul Mufrad" Me'n Baab Taqbeelur Rajal Qaayem Kiya Hai Ya'ni "Paa'on Ka Bosa Dene Ka Bayaan", Iss Baab Ke Andar Safha No. 339 Par Hadees No.975 Ke Tahet Unho'n Ne Mazkoorah Baala Hadees Ko Hazrat Waaze Bin Aa'mir Radiallaahu Anhu Se In Alfaaz Me'n Riwaayat Kiya Hai, Woh Farmaate Hai'n Ke,
Tarjuma :- "Ham Madeena Haazir Huwe To (Hame'n) Kaha Gaya, Woh Rasoolullaah ﷺ Hai'n, Pas Ham Aap ﷺ Ke Mubaarak Haatho'n Aur Qadmo'n Se Lipat Gaye Aur Unhe'n Bosa Dene Lage",
Yeh Alfaaz Khaas Maf'hoom Ke Haamil Hai'n, Raawi Kehte Hai'n Ke Hamne Sirf Haath Mubaarak Pakadne Par Hi Iktefa Na Kiya Balke Haatho'n Ke Alaawah Paa'on Mubaarak Ko Bhi Bosa Dene Ka Amal Jaari Rakha Haalaa'nke Hamne Aap ﷺ Ke Haath Aur Paa'on Mubaarak Pakad Rakhe The.
(3) Imaam Tirmizi Ne Iss Mazmoon Par Ek Hadees Hazrat Safwaan Bin Assaal Radiallaahu Anhu Se Bayaan Ki Hai, Woh Farmaate Hai'n Ke Qaum e Yahood Ke Ba'az Afraad Huzoor Nabi e Akram ﷺ Ki Khidmat Me'n Haazir Huwe Aur Sawaal Karne Ke Ba'ad Ae'laaniya Gawaahi Di Ke Aap ﷺ Allaah Ke Sachche Rasool Hai'n,
Tarjuma:- Unho'n Ne Aap ﷺ Ke Haath Aur Paa'on Mubaarak Ko Bosa Diya, Aur Kaha, Ham Gawaahi Dete Hai'n Ke Beshak Aap ﷺ Nabi Hai'n.
Iss Hadees Mubaarka Ko Imaam Nisaayi Ne Assunan (7:111, Raqam 4078) Me'n Aur Imaam Ibne Maaja Ne Assunan 2:1221, Raqam 3705) Me'n Riwaayat Kiya Hai, Imaam Tirmizi Ne Iss Hadees Ko Aljaame Me'n 2 Jagah Riwaayat Kiya Hai, Pehli Baar Abwaabul Istizaan Wal Aadaab Me'n Baab Fi Qublatul Yad War Rijal (5:77, Raqam 2733) Me'n Aur Doosri Baar Abwaabut Tafseer Ke Baab Wa Min Sureh Bani Israa'eel (5:305, Raqam 3144) Me'n, Imaam Ahmad Bin Hambal Ne Almusnad (4:239, 240) Me'n, Imaam Haakim Ne Almustadrak (1:52, Raqam 20) Me'n, Imaam Tayaalisi Ne Almusnad (Safah No,160, Raqam 1164) Me'n.
Itne Ajilla Muhaddiseen Ke Iss Hadees Ko Riwaayat Karne Aur Isse Istesh'haad Karne Ke Baawajood Bhi Koi Muta'sib Keh Sakta Hai Ke Yeh Ek Yahoodi Ka Fe'l Tha, Ham Use Kis Tarah Laazmi Shahaadat Ka Darja De Sakte Hai'n, Iss Soch Par Siwaaye Afsos Ke Kya Kaha Ja Sakta Hai Ke Mo'tariz Ko Yahoodi Ka Amal To Nazar Aa Gaya Magar Jiske Saath Kiya Ja Raha Hai Woh Ba Barkat Hasti Nazar Nahee'n Aayi, Huzoor ﷺ Ne Yahood Ko Taqbeel (Choomne) Se Mana Nahee'n Farmaaya To Yeh Aap ﷺ Ki Sunnat e Taqreeri Huwi.
(4) Ibne Taimiya Ke Jaleelul Qadr Shaagird Haafiz Ibne Kaseer Sureh Maa'idah Ki Aayat No.101 Ki Tafseer Me'n Ek Waaqe'ah Bayaan Karte Huwe Likhte Hai'n Ke Ek Baar Huzoor Nabi e Akram ﷺ Kisi Baat Par Khafa Hokar Jalaal Me'n Aa Gaye To,
Tarjuma:- "Hazrat Umar Radiallaahu Anhu Khade Huwe Aur Unho'n Ne Aap ﷺ Ke Qadam Mubaarak Choom Kar Arz Kiya, Ya Rasoolallaah ﷺ ! Ham Allaah Paak Ke Rab Hone, Aapke Nabi Hone Aur Islaam Ke Deen Hone Aur Qur'aan Ke Imaam Wa Raahnuma Hone Par Raazi Hai'n, Hame'n Mu'aaf Farma Deejiye, Allaah Paak Aapse Mazeed Raazi Hoga, Pas Hazrat Umar Radiallaahu Anhu Musalsal Arz Karte Rahe Yahaa'n Tak Ke Aap ﷺ Raazi Ho Gaye",
Iss Riwaayat Ko Deegar Mufassireen Ne Bhi Muta'alliqa (Isi Aayat Ke Tahet) Aayat Ki Tafseer Me'n Bayaan Kiya Hai.
Ab Sawaal Paida Hota Hai Ke Hazrat Umar Radiallaahu Anhu Jaise Jaleelul Qadar Sahaabi Ka Huzoor Nabi e Akram ﷺ Ke Qadam Mubaarak Choomna Aur Khud Taajdaar e Kaa'inaat ﷺ Ka Unhe'n Mana Na Farmaana Kya (M'aaz Allaah) Aqeedah e Tauheed Ki Khilaaf Warzi Tha.
(5) Imaam Muqri (Wafat 381 Hijri) Apni Kitaab Taqbeelul Yad (Safha No, 64, Raqam 5) Me'n Hazrat Buraidah Radiallaahu Anhu Se Ek Waaqe'ah Naqal Karte Huwe Likhte Hai'n Ke Ek Martaba Ek Aa'raabi Baargaah e Risaalat M'aab ﷺ Me'n Haazir Huwa Aur Usne Aakar Arz Kiya, Mai'n Ne Islaam Qabool Kar Liya Hai Lekin Mai'n Kuchh Mazeed Chaahta Hoo'n Taake Mere Yaqeen Me'n Izaafa Ho Jaaye, Phir Huzoor Nabi e Akram ﷺ Ne Ijaazat Di To Aa'raabi Ke Bulaawe Par Ek Darakht Uske Paas Aaya Aur Usne Kaha, Ya Rasoolallaah ﷺ ! Aap Par Salaam Ho, Uske Ba'ad Taweel Riwaayat Hai Aur Aakhir Me'n Aa'raabi Ne Tamaam Nishaaniyaa'n Dekhne Ke Ba'ad Arz Kiya,
Tarjuma :- Aye Allaah Ke Rasool ! Mujhe Ijaazat Deejiye Ke Mai'n Aapka Sar e Aqdas Aur Qadam Mubaarak Choom Loo'n,
Iske Ba'ad Riwaayat Me'n Hai Ke Huzoor Nabi e Akram ﷺ Ne Uss Aa'raabi Ko Ijaazat Farmaayi, Aur Phir Uss Aa'raabi Ne Sajdah Karne Ki Ijaazat Maa'ngi To Aap ﷺ Ne Ijaazat Na Di, Imaam Muqri Ki Riwaayat Kardah Iss Hadees Ko Haafiz Ibne Hajar Asqalaani Ne Fat'hul Baari (11:57) Me'n Naqal Kiya Hai, Neez Allaama Mubaarak Poori Ne Bhi Tohfatul Ahwazi (7:437) Me'n Iss Riwaayat Ko Naqal Kiya Hai.
Yeh Riwaayat Badi Wazaahat Ke Saath Bayaan Kar Rahi Hai Ke Huzoor Nabi e Akram ﷺ Ne Qadam Choomne Ki Ijaazat To Di Lekin Sajdah Karne Ki Ijaazat Nahee'n Di, Agar Qadam Choomna Aur Sajdah Karna Baraabar Hota To Aap ﷺ Kabhi Unke Maabain Faraq Na Farmaate Aur Dono'n Se Mana Farma Dete.
Mohtaram Qaari'een, Jaisa Ke Aapne Aaqa e Naamdaar ﷺ Ke Daste Mubaarak Aur Paa'on Mubaarak Choome Jaane Par Chand Ahaadees Ka Mutaale'ah Kiya, Jisse Yeh Saabit Ho Gaya Hai Ke Qadam Bosi Hargiz Koi Shirkiya Amal Nahee'n, Agar Aisa Hota To Huzoor ﷺ Khud Apni Zaat e Aqdas Keliye Bhi Kabhi Iski Ijaazat Na Dete.
By Alahazrat Foundation Research Team - 7710809266/9892708816
