Filme'n Daraame Dekhna Aur Gaane Baaje Sunna Haraam Aur Jahannam Me'n Le Jaane Waala Kaam Hai, Afsos ! Ab To Filmi Geet Likhne Aur Gaane Waale Itne Be Lagaam Hogaye Hai'n Ke Unho'n Ne Rabb e Kaa'inaat A'zzowajal Par Bhi Ae'teraazaat Shuru Kardiye Hai'n, Apni Dukaano'n Aur Hotelo'n Me'n Gaane Baaje Bajaane Waalo'n, Apni Baso'n Aur Caaro'n Me'n Filmi Geet Chalaane Waalo'n, Shaadiyo'n Me'n Recording Karke Bistaro'n Me'n Sisakte Padosi Mareezo'n Aur Nek Hamsaayo'n Ki Aahe'n Lene Waalo'n Aur Be Soche Samjhe Gaane Gungunaane Waalo'n Keliye Lamha e Fikriya Hai, Zara Sochiye To Sahi Filmi Gaano'n Me'n Shaitaan Ne Kya Kya Zaher Ghol Daala Hai, Aur Logo'n Ko Hamesha Hamesha Keliye Jahannami Aur Naari Banaane Keliye Kis Qadar Ayyaari Aur Makkaari Ke Saath Saaz Wa Aawaaz Ke Jaadu Ka Jaal Bichha Daala Hai, Mera Dil Ghabraata Hai, Zabaan Haya Se Ladkhadaati Hai Magar Himmat Karke Ummat e Muslima Ki Behtari Keliye Gaano'n Me'n Bole Jaane Waale Kufriya Ash'aar Pesh Karta Hoo'n.
(1) Seep Ka Moti Hai Tu Ya Aasmaa'n Ki Dhool Hai, Tu Hai Qudrat Ka Karishma Ya Khuda Ki Bhool Hai.
Iss She'r Me'n Ma'aaz Allaah, Allaah A'zzowajal Ko Bhoolne Waala Maana Gaya Hai Jo Ke Sareeh Kufr Hai, Allaah A'zzowajal Bhoolne Se Paak Hai, Chunaanche Sureh Taaha Ki Aayat No.52 Me'n Irshaad Hota Hai,
Tarjuma - Mera Rab (A'zzowajal) Na Behke Na Bhoole.
(2) Dil Me'n Tujhe Bitha Kar Karlu'ngi Band Aa'khe'n, Pooja Karu'ngi Teri Dil Me'n Rahu'ngi Tere.
Isme'n Apne Majaazi Mehboob Ki Pooja Karne Ke Iraade Ka Izhaar Hai Jo Ke Kufr Hai.
(3) Haaye ! Tujhe Chaahe'nge Apna Khuda Banaaye'nge.
Isme'n Allaah A'zzowajal Ke Siwa Kisi Aur Ko Khuda Banaane Ka Iraadah Zaahir Kiya Gaya Hai Jo Ke Sareeh Kufr Hai.
(4) Dil Me'n Ho Tum Aa'nkho'n Me'n Tum Bolo Tumhe'n Kaise Chaahu'n ? Pooja Karu'n Ya Sajdah Karu'n Jaise Kaho Waise Chaahu'n ?.
Isme'n Apne Majaazi Mehboob Ki Pooja Ki Ijaazat Maa'ngi Gayi Hai Jo Ke Kufr Hai Aur Sajde Ki Bhi Ijaazat Talab Ki Gayi Hai, Gair e Khuda Ko Sajda e Ta'zeemi Haraam Aur Sajda e Ibaadat Kufr Hai.
(5) Tumhaare Siwa Kuchh Na Chaahat Kare'nge Ke Jab Tak Jiye'nge Mohabbat Kare'nge, Saza Rab Jo Dega Woh Manzoor Hogi Bas Ab To Tumhaari Ibaadat Kare'nge.
Iss She'r Ke Doosre Misre Me'n 2 Sareeh Kufriyaat Hai'n, (1) Allaah A'zzowajal Ke Azaab Ko Halka Jaana Gaya, (2) Gair e Khuda Ki Ibaadat Ke Iraade Ka Izhaar Hai.
(6) Ya Rab Tu Ne Yeh Dil Toda Kis Mausam Me'n ?
Iss She'r Me'n Allaah A'zzowajal Par Ae'teraaz Ka Pehlu Numaayaa'n Hai Isliye Kufr Hai, Agar Ae'teraaz Hi Maqsood Tha To Kehne Waala Kaafir Wa Murtad Hogaya.
(7) Kaise Kaise Ko Diya Hai Aise Waise Ko Diya Hai, Ab To Chhappar Phaad Maula Apni Jebe'n Jhaad Maula.
Iss She'r Ke Pehle Misre Me'n Ae'teraaz Ka Pehlu Numaayaa'n Hai Jo Ke Kufr Hai Aur Agar Ae'teraaz Hi Maqsood Tha To Kehne Waala Kaafir Hai, Yoo'n Hi Doosre Misre Me'n "Chhappar Phaadna Aur Jebe'n Jhaadna" Agarche Muhaawaratan Bhi Bola Jaata Hai Lekin Allaah A'zzowajal Ki Mubaarak Shaan Me'n Sakht Mana Hai, Aur Agar Allaah A'zzowajal Ko Ajsaam Ki Tarah Jism Waala Maana Aur Use Jeb Waala Libaas Pahenne Waala Ae'teqaad Kiya To Sareeh Kufr Hai, Allaah A'zzowajal Jism Jismaaniyaat Se Paak Hai.
(8) Be Chainiyaa'n Samet Kar Saare Jahaan Ki, Jab Kuchh Na Ban Saka To Mera Dil Banaaya.
Iss She'r Ke Doosre Misre In Alfaaz "Jab Kuchh Na Ban Saka" Me'n Allaah A'zzowajal Ko "Aa'jiz Wa Bebas" Qaraar Diya Gaya Hai Jo Ke Sareeh Kufr Hai.
(9) Duniya Banaane Waale Duniya Me'n Aake Dekh, Sadme Sahe Jo Mai'n Ne Tu Bhi Utha Ke Dekh.
Yeh She'r Kayi Kufriyaat Ka Majmoo'ah Hai, Isme'n Allaah A'zzowajal Par Waazeh Ae'teraaz Aur Uski Tauheen Hai.
(10) Duniya Banaane Waale Kya Tere Man Me'n Samaayi, Tu Ne Kaahe Ko Duniya Banaayi.
Iss She'r Me'n Allaah A'zzowajal Par Ae'teraaz Ka Pehlu Numaayaa'n Hai, Isliye Kufr Hai.
(11) Aye Khuda In Haseeno'n Ki Patli Kamar Kyu'n Banaayi, Tere Paas Mitti Kam Thi Ya Tu Ne Rishwat Khaayi.
Iss She'r Me'n 3 Sareeh Kufriyaat Hai'n (1) Isme'n Allaah A'zzowajal Ki Zaat Par Patli Kamar Banaane Par Ae'teraaz Hai (2) Allaah A'zzowajal Par Aa'jiz Wa Bebas Hone Ka Ilzaam Hai (3) Rishwat Khaane Ki Tohmat Wa Ilzaam Hai.
(12) Iss Hoor Ka Kya Kare'n Jo Hazaaro'n Saal Puraani Hai.
Isme'n Jannati Hoor Ki Sakht Tauheen Hai, Jannat Ya Jannat Ki Kisi Bhi Ne'mat Ki Tauheen Sareeh Kufr Hai.
(13) Haseeno'n Ko Aate Hai'n Kya Kya Bahaane, Khuda Bhi Na Jaane To Ham Kaise Jaane.
Iss She'r Ke Doosre Misre Me'n Kaha Gaya Hai "Khuda Bhi Na Jaane" Yeh Baat Sareeh Kufr Hai.
(14) Khuda Bhi Aasmaa'n Se Jab Zamee'n Par Dekhta Hoga, Mere Mehboob Ko Kisne Banaaya Sochta Hoga.
Iss She'r Me'n Ma'aaz Allaah Kayi Kufriyaat Hai'n (1) Jab Dekhta Hoga Iska Matlab Yeh Huwa Ke Allaah A'zzowajal Har Waqt Nahee'n Dekhta (2) Iss Behaya Ke Mehboob Ko Allaah A'zzowajal Ne Nahee'n Banaaya Ma'aaz Allaah, Uska Koi Aur Khaaliq Hai (3) Kisne Banaaya Yeh Bhi Allaah A'zzowajal Ko Nahee'n Ma'loom (4) Sochta Hoga (5) Khuda A'zzowajal Aasmaan Se Dekhta Hoga, Haalaa'nke Allaah A'zzowajal Makaan Aur Simt Se Paak Hai, Baherhaal Yeh She'r Kufriyaat Ka Majmua Hai, Isme'n Allaah A'zzowajal Ki Taraf Jahaalat Aur Mohtaaji Ki Nisbat Hai, Kisi Aur Ko Khaaliq Maanna Hai, Allaah A'zzowajal Ki Khaaliqiat(Paida Karne) Ka Inkaar Hai, Woh Har Waqt Har Lamha Har Shay Ko Mulaaheza Farma Raha Hai, She'r Me'n In Ausaaf Ka Inkaar Hai, Yeh Sab Qat'an Wa Ijma Kufriyaat Hai, Kehne Waala Kaafir Wa Murtad Hogaya, Yoo'n Hi Allaah A'zzowajal Keliye Makaan Saabit Kiya Yeh Bhi Kufr Hai.
(15) Khuda Bhi Jab Tumhe'n Mere Paas Dekhta Hoga Itni Anmol Cheez Dedi Kaise Sochta Hoga.
Yeh She'r Kufriya Hai, Kyu'nke Isme'n Khuda Keliye Jahal (Ya'ni Na Ma'loom Hona) Laazim Aaraha Hai Jo Ke Allaah A'zzowajal Ki Shaan Ke Khilaaf Hai.
(16) Jabse Tere Naina Mere Naino Se Laagere, Tabse Deewana Huwa Sabse Begaana Huwa Rab Bhi Deewaana Laagere.
Yeh She'r Sareeh Kufr Hai, Kyu'nke Iss She'r Me'n Rab Ko Deewaana Kaha Ja Raha Hai Jo Ke Ayb Hai Aur Allaah A'zzowajal Har Ayb Se Paak Hai.
(17) Meri Nigaaho'n Me'n Kya Banke Aap Rehte Hai'n, Qasam Khuda Ki Khuda Banke Aap Rehte Hai'n.
Yeh She'r Bhi Kufriya Hai, Isliye Ke Majaazi Mehboob Ko Khuda Banaaya Jaaraha Hai Jo Ke Allaah A'zzowajal Ki Zaat Me'n Shareek Hai Aur Jo Shakhs Allaah A'zzowajal Ki Zaat Me'n Ya Sifaat Me'n Kisi Ko Shareek Kare Woh Mushrik Hai.
(18) Tere Naam Ka Mai Kalma Padhu'n, Raat Din Tujhe Yaad Mai'n Karu'n.
Yeh She'r Bhi Kufriya She'r Hai, Isliye Ke Isme'n Kalma e Tayyaba Ki Behurmati Laazim Aarahi Hai.
(19) Tujhme'n Rab Dikhta Hai Yaara Mai'n Kya Karu'n, Sajde Sar Jhukta Hai Yaara Mai'n Kya Karu'n.
Yeh She'r Bhi Kufriya Hai, Kyu'nke Ke Iss She'r Me'n Majaazi Mehboob Ko Rab Kaha Ja Raha Hai.
(20) Tujhe Chaaha Rab Se Bhi Zyaadah Phir Bhi Na Tujhe Pa Sake Ham.
Yeh She'r Bhi Kufriya Hai, Isliye Ke Sab Se Zyaadah Bandagi Aur Mohabbat Ka Haqdaar Allaah A'zzowajal Hai Aur Isme'n Allaah A'zzowajal Ke Alaawa Gairullaah Ki Mohabbat Ko Allaah A'zzowajal Ki Mohabbat Par Tarjeeh Di Jaarahi Hai.
(21) Dil Ki Sarzameen Pe Tera Sajda Mai'n Karu'n, Maaheru De Sukoon Kar Meri Chaahat Qabool.
Yeh She'r Bhi Kufriya Hai Isliye Ke Iss She'r Me'n Gairullaah Ki Jaanib Sajde Ki Nisbat Hai.
(22) Tu Hi Rab Tu Hi Du'aa Tu Hi Lab Tu Hi Zabaa'n, Tu Hi Raah Tu Hi Makaa'n Tu Rehnumaa'n.
Yeh She'r Bhi Kufriya She'r Hai, Isliye Ke Iss She'r Me'n Majaazi Mehboob Ko Rab Kaha Jaaraha Hai.
Astagfirullaah, La Elaaha Ellallaah Muhammadur Rasoolullaah ﷺ
Koi Bhi Gaana Jisme'n Allaah A'zzowajal Ke Alaawah Kisi Aur Ko Khuda Kaha Jaaraha Ho Ya Khuda Ke Jaisa Kaha Jaaraha Ho Ya Gairullaah Ko Sajda e Ibaadat Karne Ko Kaha Jaaraha Ho Ya Allaah A'zzowajal Par Ae'teraaz Kiya Jaaraha Ho Saare Kufriya Hai'n, Aise Kufriya Gaano'n Se Khud Bhi Bache'n Aur Doosre Musalmaano'n Ko Bhi Bachaaye'n.
By Alahazrat Foundation Research Team - 7710809266/9892708816
