Furu Aqaa'id Woh Umoor Hai'n Jo Qur'aan Shareef, Ijma e Ummat Aur Ahadees e Mash'hoorah Se Saabit Na Ho'n Balke Akhbaar e Aahaad (Woh Hadees Jisko Bahot Kam Logo'n Ne Riwaayat Kiya Ho) Ya Un Aayaat e Mo'awwala (Jinki Ulama e Kiraam Ne Taaweel Ki Ho) Se Saabit Ho'n Jinke Muraadi Ma'ni Me'n Ahle Sunnat Mukhtalif Ho'n Jaise
(1) Nabi e Kareem ﷺ Aur Moosa A'laihissalaam Ke Duniya Me'n Allaah A'zzowajal Ko Dekhne Ka Masla.
(2) Husn Wa Qubah Aqli (Ya'ni Achchaayi Aur Buraayi Ka Aqal Idraak (Samajh) Kar Sakti Hai Ka Masla.
(3) Mushrikeen Ke Bachcho'n Ke Jannat Me'n Daakhil Hone Ka Masla.
(4) Nabi e Kareem ﷺ Ko Qayaamat, Rooh Aur Tamaam Guzishta Aur Aa'indah (Past & Future) Waaqe'aat Jo Lauhe Mehfooz Me'n Hai'n Balke Unse Bhi Zyaadah Cheezo'n Ka Ilm Diye Jaane Ka Masla.
(5) Wafaat Yaafta Buzurgaan e Deen Se Madad Maa'ngne Ka Masla.
(6) Teeja, Chaaleeswaa'n, Urs Wa Azaan e Qabr Aur In Jaisi Doosri Rasmo'n Wa Ma'moolaat e Ahle Sunnat Ke Ae'teqaad Ka Masla.
(7) Nabi e Kareem ﷺ Ki Nooraaniyat Ka Masla Wagairah.
Furu Aqaa'id Ka Agar Koi Shakhs Inkaar Kare Tab Bhi Woh Sunni Musalmaan Hi Rehta Hai, Ab Agar Kisi Taaweel Ke Bagair Hi Maane To Woh Faasiq Hai Aur Kisi Taaweel Ka Sahaara Lekar Na Maane To Faasiq Bhi Nahee'n, Jaisa Ke Tafseeraat e Ahmadiya Me'n Hai, Ya'ni Masjid e Aqsa Tak Me'raaj Qatayi Hai Qur'aan Se Saabit Hai, Aur Aasmaan e Duniya Tak Hadees e Mash'hoor Se Saabit Hai, Aur Aasmaano'n Se Upar Tak Akhbaar e Aahaad Se Saabit Hai, To Pehle Ka Munkir Qatayi Kaafir Hai Aur Doosre Ka Munkir Bad Deen Gumraah Hai Aur Teesre Ka Munkir Faasiq Hai. (Tafseeraat e Ahmadiya, Safha No.387)
Nabi e Kareem ﷺ Ki Nooraaniyat Ke Munkir Ka Hukm Bayaan Karte Huwe Huzoor Shareeful Haq Amjadi A'laihir Rehma Tehreer Farmaate Hai'n, Nabi e Kareem ﷺ Ko Noor Maanne Ka Aqeedah Sirf Baab e Fazaa'il Hi Tak Mehdood Hai, Iske Munkir Ki Na Takfeer Jaa'iz Na Tafseeq (Faasiq), Lekin Iss Zamaane Me'n Yeh Masla Ahle Sunnat Wa Jamaa'at Ka Ittefaaqi Wa Ijmaayi Masla Ban Chuka Hai Aur Iss Zamaane Me'n Iska Munkir Ahle Sunnat Me'n Se Koi Ek Fard Nahee'n Sirf Wahaabi Nechari Wagairah Badmazhab Gumraah Aise Ke Jinki Bad Mazhabi Hadde Kufr Tak Paho'nchi Huwi Hai Wohi Iska Inkaar Karte Hai'n, Isliye Iss Zamaane Me'n Nabi e Kareem ﷺ Ke Noor Hone Se Inkaar Bad Mazhabi Ka She'aar (Pehchaan) Ho Chuka Hai, Pas Ab Jo Bhi Nooraaniyat e Mustafa ﷺ Ka Inkaar Kare Bad Mazhabi Hai Balke Isliye Ke Yeh Inkaar Bad Mazhabo'n Ka She'aar (Pehchaan) Hai Iss Zamaan e Me'n Meelaad, Khade Ho Kar Salaam Padhna, Niyaaz, Faateha, Nida e Ya Rasoolallaah ﷺ Aur Auliya e Kiraam Se Madad Maa'ngna Wagairaha Ki Tarah Nabi e Kareem ﷺ Ke Baare Me'n Yeh Aqeedah Rakhna Ke Aap Noor The Ya Nahee'n ? Ahle Sunnat Aur Wahaabiya Ke Darmiyaan Imtiyaazi Nishaan Ban Chuka Hai. (Fataawa Shaareh Bukhaari, Jild No.1, Safha No.237/238)
Huzoor Mufti Shareeful Haq Amjadi A'laihir Rehma Ke Iss Jumle "Usko Wahaabi Bad Mazhab Keh Sakte Hai'n" Ka Matlab Hargiz Yeh Nahee'n Ke Waaqayi Wahaabi Ho Jaata Hai Ya Usko Ae'teqaadi Wahaabi Ya Mutlaqan Wahaabi Keh Sakte Hai'n Isliye Ke Iss Soorat Me'n Aapke Kalaam Me'n Tazaad Laazim Aayega Kyu'nke Aapne Uske Aage Peechhe Yeh 2 Jumle Bhi Tehreer Kiye Hai'n Ke "Iske Munkir Ki Na Takfeer Jaa'iz Na Tafseeq" Na Isliye Ke Yeh Inkaar Bad Mazhabi Hai, Lehaaza Aapke Kalaam Ko Tazaad Aur Ikhtelaaf Waala Hone Se Bachaane Keliye Yehi Kehna Padega Ke Yeh Matlab Hargiz Nahee'n Ke Woh Waaqayi Wahaabi Ho Jaayega Ya Usko Ae'teqaadi Wahaabi Ya Mutlaqan Wahaabi Keh Sakte Hai'n Balke Iska Matlab Sirf Itna Hai Ke Choo'nke Daur e Haazir Me'n In Sha'aaer e Ahle Sunnat Ka Inkaar Wahaabiyo'n Ka Kaam Hai Isliye Usne Wahaabiyo'n Ke Jaisa Kaam Kiya Pas Woh Amali Wahaabi Hai Jaise Jhoota Muslim Amali (Practical) Munaafiq Hai Aur Be Namaazi Amali Kaafir, Aur Jis Tarah Amali Munaafiq Ko Mutlaqan Munaafiq Aur Amali Kaafir Ko Mutlaqan Kaafir Kehna Jaa'iz Nahee'n, Jaisa Ke Fataawa Faizur Rasool Me'n Munaafiq Ki Amali Aur Ae'teqaadi Taqseem Ke Ba'ad Likha Hai, "Kisi Sunni Saheehul Aqeedah Ko (Jhoot Wagairah Ki Wajah Se) Munaafiq Kehna Jaa'iz Nahee'n". (Fataawa Faizur Rasool, Hissa Awwal, Safha No.142)
Isi Tarah Kisi Amali Wahaabi Ko Mutlaqan Wahaabi Kehna Bhi Jaa'iz Nahee'n, Haa'n Agar In Sha'aaer Ka Inkaar Bid'at, Gumraahi Aur Bad Mazhabi Hota To Bila Shuba Usko Wahaabi Kaha Ja Sakta Tha Kyu'nke Wahaabiyat Sunniyat Ke Muqaabil Hai Na Ke Uski Fara, Lekin Jab Baqaule Huzoor Shaareh Bukhaari Mufti Shareeful Haq Amjadi A'laihir Rehma Iske Munkir Ki Na Takfeer Jaa'iz Na Tafseeq Ya'ni Takfeer Wa Tazleel (Kaafir Aur Badmazhabi) Darkinaar Tafseeq Bhi Jaa'iz Nahee'n To In Sha'aaer e Ahle Sunnat Ke Munkireen Ko Mutlaqan Wahaabi Kehne Ki Koi Gunjaa'ish Nahee'n Hai Jabke Woh Zarooriyaat e Deen Aur Zarooriyaat e Ahle Sunnat Me'n Se Kisi Baat Ka Munkir Na Ho, Isliye Ke Zarooriyaat e Ahle Sunnat Ke Inkaar Hi Se Sunniyat Se Nikalta Hai Furu Aqaa'id Ke Inkaar Se Nahee'n.
By Alahazrat Foundation Research Team - 7710809266/9892708816
