Nabi e Akram ﷺ Ke Ta'alluq Se Yeh Aqeedah Rakhna Ke Allaah Paak Ne Apne Mehboobo'n Khusoosan Sayyadul Mehbubeen ﷺ Ko Guyoob e Khamsa Se Bahot Se Juz'iyyaat Ka Ilm Bakhsha Yeh Aqeedah Zarooriyaat e Ahle Sunnat Se Hai.
Risaala "Khaalisul Ae'teqaad" Me'n Hai Ke Allaah Paak Ne Apne Mehboobo'n Khusoosan Sayyadul Ambiya Rasoolullaah ﷺ Ko Guyoob e Khamsa Se Bahot Se Juz'iyyaat Ka Ilm Bakhsha Jo Yeh Kahe Ke Khums Me'n Se Kisi Fard Ka Ilm Kisi Ko Na Diya Gaya Hazaarha Ahaadees e Mutawaatera Al-Ma'ni Ka Munkir Aur Badmazhab Khaasir Hai, Yeh Qism e Duwwam "Ya'ni Zarooriyaat e Aqaa'id e Ahle Sunnat" Se Huwi. (Khaalisul Ae'teqaad, Bahawaala Fataawa Razviya Mutarjim, Jild No.3, Safha No.416)
Aur Allaama Sa'eed Ahmad Kaazmi A'laihir Rehma Likhte Hai'n Ke Ahle Sunnat Iss Amr Par Bhi Muttafiq Hai'n Ke Allaah Paak Ne Apne Mehboobo'n Khusoosan Sayyadul Ambiya Rasoolullaah ﷺ Ko Guyoob e Khamsa Me'n Se Bahot Se Juz'iyyaat Ka Ilm Ata Farmaaya, Jo Shaksh Yeh Kahe Ke Kisi Fard Ka Ilm Kisi Ko Na Diya Gaya Woh Hamaare Nazdeek Badmazhab Khaa'ib Wa Khaasir Hai. (Maqaalaat e Kaazmi, Hissa Duwwam, Ba Unwaan Ilm e Gaibun Nabi ﷺ)
Ab Ulama Wa Auliya Aur Mohaddiseen e Kiraam Ke Aqwaal Wa Tasreehaat Ki Roshni Me'n Rasoolullaah ﷺ Ke Uloom e Guyoob e Khamsa Ke Saboot Ke Noor Se Apne Dil Wa Dimaag Ko Purnoor Keejiye.
1- Mo'jamul Kabeer, Jild No.2, Safha No.155, Hadees No.1647
Tarjuma - Hazrat Sayyaduna Abu Zar Gaffaari Radiallaahu A'nhu Farmaate Hai'n, Nabi e Akram ﷺ Ne Hamse Iss Haal Me'n Mufaaraqat (Judaayi) Farmaayi Ke Koi Parindah Aisa Nahee'n Ke Apne Paro'n Ko Hilaaye Magar Aap A'laihissalaam Ne Hamse Uska Bhi Bayaan Farma Diya.
2- Mawaahibul Ladunniya, Jild No.3, Safha No.95
Tarjuma - Imaam Ahmad Bin Muhammad Qastalaani Rehmatullaah A'laih (Wafaat 923 Hijri) Iske Tahet Farmaate Hai'n Ke Kuchh Shak Nahee'n Ke Bila Shubah Allaah Paak Ne Isse Bhi Zaayed Huzoor ﷺ Ko Ilm Diya Aur Tamaam Aglo'n Pichhlo'n Ka Ilm Huzoor ﷺ Par Ilqa Farmaaya.
3- Madaarijun Nabuwwah, Juzw No.1, Jild No.1, Safha No.144
Tarjuma - Hazrat Shaykh Abdul Haq Muhaddis e Dahelvi (Wafaat 1052 Hijri) Farmaate Hai'n, Hazrat Aadam A'laihissalaam Ke Zamaane Se Soor Phoo'nkne Tak Jo Kuchh Duniya Me'n Hai Sab Hamaare Nabi Rasoolullaah ﷺ Par Zaahir Farma Diya Gaya, Yahaa'n Tak Ke Tamaam Ahwaal Awwal Se Aakhir Tak Ka Huzoor ﷺ Ko Ma'loom Huwa Aur Huzoor ﷺ Ne Apne As'haab Ko Usme'n Se Ba'az Ki Khabar Di.
4- Bukhaari Shareef, Jild No.9, Safha No.95, Hadees No.7294
Tarjuma - Hazrat Anas Radiallaahu A'nhu Se Marwi Hai, Farmaate Hai'n Ke Rasoole Akram ﷺ Mimbar Par Khade Huwe, Pas Qayaamat Ka Zikr Farmaaya Ke Usse Pehle Bade Bade Waaqe'aat Hai'n, Phir Farmaaya Ke Jo Shakhs Jo Baat Poochhna Chaahe Poochh Le, Qasam Khuda Ki Jab Tak Ham Iss Jagah Ya'ni Mimbar Par Hai'n Tum Koi Baat Hamse Poochhoge Magar Ham Tumko Uski Khabar De'nge, Ek Shakhs Ne Khade Ho Kar Arz Kiya Ke Mera Thikaana Kahaa'n Hai ? Farmaaya Jahannam Me'n, Hazrat Abdullaah Bin Huzaafa Radiallaahu A'nhu Khade Huwe Aur Dariyaaft Farmaaya Ke Mera Baap Kaun Hai, Farmaaya Huzaafa, Phir Baar Baar Farmaate Rahe Ke Poochho Poochho.
Ma'loom Huwa Ke Kaun Jannati Hai Kaun Jahannami Hai Iska Bhi Ilm Nabi e Akram ﷺ Ko Ata Kiya Gaya Hai Tabhi To Jab Ek Aadmi Ne Poochha Ke Mera Thikaana Kahaa'n Hai Jannat Ya Jahannam To Nabi e Kareem ﷺ Ne Bata Diya Ke Tumhaara Thikaana Jahannam Hai Aur Kiska Baap Kaun Hai Iska Bhi Ilm Nabi e Kareem ﷺ Ko Ata Kiya Gaya Hai Tabhi To Jab Hazrat Huzaafa Radiallaahu A'nhu Ne Arz Kiya Ke Mere Waalid Kaun Hai'n Jabke Unke Waalid Kaun Hai'n Iss Baare Me'n Logo'n Ko Nahee'n Ma'loom Tha To Nabi e Kareem ﷺ Ne Bata Diya Ke Fulaa'n Tumhaara Waalid Hai Aur Zaahir Si Baat Hai Jannati Kaun Jahannami Kaun Aur Kiska Baap Kaun Hai Yeh Baate'n Gaib Me'n Se Hai, In Hadeeso'n Se Ma'loom Huwa Ke Nabi e Kareem ﷺ Ko Kaun Jannati Hai Kaun Jahannami Hai Iska Bhi Ilm Tha Aur Kaun Kahaa'n Marega Kab Marega Iska Bhi Ilm Tha Allaah Paak Ki Ata Se.
By Alahazrat Foundation Research Team - 7710809266/9892708816
