Ahle Sunnat Wa Jamaa'at Ka Aqeedah Hai Ke Tamaam Sahaaba e Kiraam Radiallaahu A'nhum Ajma'een Ki Ta'zeem Wa Takreem Aur Unse Mohabbat Zaroori Hai Aur Kisi Bhi Sahaabi e Rasool Ki Tauheen Wa Tanqees Gumraahi Wa Zalaalat Hai, Matlab Yeh Hai Ke Tamaam Sahaaba e Kiraam Ka Adab Karna Zarooriyaat e Ahle Sunnat Wa Jamaa'at Me'n Se Hai, Ya'ni Agar Koi Shakhs Kisi Sahaabi e Rasool Ki Tauheen Wa Tanqees Karta Hai To Woh Sunniyat Se Khaarij Hai, Aur Hazrat Ameer e Mu'aaviya Radiallaahu A'nhu Sahaabi e Rasool ﷺ Hai'n Ahle Sunnat Wa Jamaa'at Ke Nazdeek, Lehaaza Hazrat Ameer Mu'aaviya Radiallaahu A'nhu Ki Sahaabiyat Ka Munkir Ya Phir Aap Radiallaahu A'nhu Ki Shaan e Aqdas Me'n Gustaakhi Karne Waala Ahle Sunnat Wa Jamaa'at Se Khaarij Hai.
Allaama Shaami A'laihir Rehma Fataawa Shaami Me'n Likhte Hai'n,
Tarjuma - A'imma e Kiraam Ka Ispar Ittefaaq Hai Ke Kisi Sahaabi e Rasool Ko Gaali Dena Aur Unse Bugz Rakhna Kufr To Nahee'n Magar Gumraahi Hai. (Ibne Aa'bideen, Al-Durrul Mukhtaar Wa Haashiya Ibne Aa'bideen (Raddul Muhtaar) Jild No.4, Safha No.237, Kitaabul Jihaad)
Ab Woh Dalaa'il Mulaaheza Farmaaye'n Jinse Bilkul Sooraj Ki Tarah Roshan Ho Jayega Ke Hazrat Ameer e Mu'aaviya Radiallaahu A'nhu Sahaabi e Rasool e Akram ﷺ Hai'n,
1- Bukhaari Shareef, Kitaab As'haabun Nabi ﷺ, Baab Zikre Mu'aaviya Radiallaahu A'nhu, Hadees No.3764.
Tarjuma - Ibne Malaa'ika Se Marwi Hai, Aap Kehte Hai'n Ke Hazrat Mu'aaviya Radiallaahu A'nhu Ne Isha Ke Ba'ad Ek Rak'at Witr Padhi, Uss Waqt Aapke Paas Hazrat Ibne Abbaas Radiallaahu A'nhuma Ke Gulaam Haazir The, Jab Woh Hazrat Ibne Abbaas Radiallaahu A'nhuma Ki Baargaah Me'n Aaye To Hazrat Ameer e Mu'aaviya Ka Waaqe'ah Arz Kiya To Aapne Farmaaya, Mu'aaviya Ka Mu'aamla Chhod Do Ke Woh Sahaabi e Rasool Hai'n.
2- Mirqaatul Mafaateeh Sharah Mishqaatul Masaabeeh, Jild No.9, Safha No.3875, Kitaabul Manaaqib Wal Fazaa'il, Baab Manaaqibis Sahaabati Radiallaahu A'nhum Ajma'een.
Tarjuma - Allaama Mulla Ali Qaari A'laihir Rehma Likhte Hai'n Ke Hazrat Ameer e Mu'aaviya Radiallaahu A'nhu Aa'dil Aur Saahib e Fazeelat Sahaaba e Kiraam Me'n Se Hai'n Aur Aap Radiallaahu A'nhu Ka Shumaar Akhiyaar (Behtareen) Sahaaba e Kiraam Me'n Hota Hai.
3- Al-Minhaaj Sharah Saheeh Muslim Bin Al-Hajjaaj, Kitaab Fazaa'ilul Sahaaba Radiallaahu A'nhum, Jild No.15, Safha No.149.
Tarjuma - Imaam Muhiyuddeen Abu Zakariya Yahya Bin Sharf Nawwi Shaafayi A'laihir Rehma Likhte Hai'n Ke Hazrat Ameer e Mu'aaviya Radiallaahu A'nhu Aa'dil Wa Faazil Aur Muntakhab Sahaaba e Kiraam Me'n Se Hai'n.
4 - Shifa Shareef, Jild No.2, Safha No.308.
Tarjuma - Imaam Qaazi Ayaaz Maaliki A'laihir Rehma Likhte Hai'n Ke Hazrat Imaam Maalik Radiallaahu A'nhu Ne Farmaaya Ke Jisne Kisi Sahaabi e Rasool Maslan Hazrat Abu Bakar, Hazrat Umar, Hazrat Usmaan, Hazrat Ali, Hazrat Mu'aaviya Ya Hazrat Amro Bin Aa's Ko Bura Bhala Kaha, Pas Agar Yeh Kahe Ke Yeh Sab (Al'ayaaz Billaah) Kufr Wa Zalaalat Par The To Use Qatal Kardiya Jaayega Aur Agar Iske Alaawah Sirf Aa'm Sab Wa Shitam (Bura Bhala) Se Kaam Le To Sakht Saza Di Jaayegi.
5 - Al-Bidaaya Wan-Nihaaya, Jild No.8, Safha No.139.
Tarjuma - Ibne Kaseer Likhte Hai'n Ke Ibraaheem Bin Maisarah Farmaate Hai'n Ke Mai'n Ne Kabhi Yeh Nahee'n Dekha Ke Hazrat Umar Bin Abdul Azeez A'laihir Rehma Kisi Shakhs Ko Kode Maar Rahe Ho'n Siwaaye Uss Shakhs Ke Jo Hazrat Ameer Mu'aaviya Radiallaahu A'nhu Ko Bura Bhala Kehta.
6 - As-Sunnah Li Abi Bakar Bin Khallaal, Jild No.2, Safha No.438, Raqam 671.
Tarjuma - Mohaddis Abu Bakar Bin Ahmad Bin Muhammad Bin Haaron Bin Yazeed Khallaal (Wafaat 311 Hijri) Likhte Hai'n Ke Muhammad Bin Hasan Ne Khabar Di, Kaha Hamse Muhammad Bin Zu'nboor Ne Bayaan Kiya, Unho'n Ne Kaha Ke Hazrat Fuzail Bin Ayaaz A'laihir Rehma Ne Kaha, Mujhe Apne Jis Amal Par Ae'temaad Hai Woh Hazrat Abu Bakar, Hazrat Umar, Hazrat Abu Ubaidah Bin Jarraah Aur Hazrat Muhammad ﷺ Ke Tamaam Sahaaba Se Mohabbat Karna Hai.
Hazrat Fuzail Bin Ayaaz A'laihir Rehma Hazrat Mu'aaviya Radiallaahu A'nhu Keliye Rehmat Ki Du'aa Kiya Karte The Aur Farmaaya Karte The Ke Hazrat Mu'aaviya Radiallaahu A'nhu Hazrat Muhammad ﷺ Ke Ulama Sahaaba Me'n Se The.
7 - As-Sunnah Li Abi Bakar Bin Khallaal, Jild No.2, Safha No.434, Raqam 659)
Tarjuma :- Hazrat Abu Abdullaah Imaam Ahmad Bin Hambal Radiallaahu A'nhu Ne Uss Shakhs Ke Baare Me'n, Jisne Kaha Mai'n Nahee'n Kehta Ke Janaab Mu'aaviya Kaatib e Wahi Hai'n, Mai'n Nahee'n Kehta Ke Woh Momineen Ke Maamu'n Hai'n Kyu'nke Unho'n Ne Bataur e Gasab Talwaar Uthaayi Hai ? (Imaam Ahmad Bin Hambal Ne) Farmaaya, Yeh Badtareen Baat Hai, Un Logo'n Se Ijtenaab Kiya Jaaye, Unke Paas Na Baitha Jaaye Aur Ham Unka Mu'aamla Logo'n Se Waazeh Karte Hai'n.
8 - As-Sunnah Li Abi Bakar Bin Khallaal, Jild No.2, Safha No.435, Raqam 664.
Tarjuma - Hazrat Bashar Bin Haaris (Al-Ma'roof Aa'rif Billaah Wali e Kaamil Hazrat Bishar Haafi A'laihir Rehma) Ne Farmaaya, Hazrat Ma'aani Se Sawaal Kiya Gaya Jabke Mai'n Sun Raha Tha, Ya Kaha, Mai'n Ne Unse Sawaal Kiya Ke Hazrat Mu'aaviya Radiallaahu A'nhu Afzal Hai'n Ya Hazrat Umar Bin Abdul Azeez Radiallaahu A'nhu ? To Aapne Irshaad Farmaaya, Hazrat Mu'aaviya Radiallaahu A'nhu, Hazrat Umar Bin Abdul Azeez Jaise 600 Hastiyo'n Se Afzal Hai'n.
9 - Lataa'if e Ashrafi, Jild Suwwam Mutarjim, Safha No.502, Lateefa No.52.
Tarjuma - Hazrat Sayyad Makhdoom Ashraf Jahaa'ngeer Simnaani Chishti A'laihir Rehma Likhte Hai'n Ke Nabi e Kareem ﷺ Ke Kaatib (Wahi Aur Khutoot Likhne Waale) 13 Hazraat The, Hazrat Abu Bakar Siddeeq Radiallaahu A'nhu, Umar Bin Khattaab Radiallaahu A'nhu, Usmaan Bin Affaan Radiallaahu A'nhu, Ali Bin Abi Taalib Radiallaahu A'nhu, Aa'mir Bin Fahar Radiallaahu A'nhu, Abdullaah Bin Arqam Radiallaahu A'nhu, Ubayi Bin Ka'b Radiallaahu A'nhu, Saabit Bin Qais Radiallaahu A'nhu, Khaalid Bin Sa'eed Radiallaahu A'nhu, Hanzala Bin Rabee Radiallaahu A'nhu, Zaid Bin Saabit Radiallaahu A'nhu, Mu'aaviya Bin Sufiyaan Radiallaahu A'nhu Aur Sharjeel Bin Hasna Radiallaahu A'nhu, Phir Aage Jumla Kaatibeen e Wahi Wa Khutoot Par Kin Kin Ko Khusoosi Ahmiyat Haasil Thi Uske Muta'alliq Likha Hai Ke Unme'n Mu'aaviya Radiallaahu A'nhu Aur Zaid Bin Saabit Radiallaahu A'nhu Ko Laazmi Aur Khusoosi Ahmiyat Haasil Thi.
Isi Kitaab "Lataa'if e Ashrafi" Me'n Hai Ke Hazrat Sayyad Makhdoom Ashraf Jahaa'ngeer Simnaani Chishti A'laihir Rehma Raafziyo'n Ke 12 Firqe Shumaar Karte Huwe Farmaate Hai'n Ke Daswaa'n Laa'niya : Jo Hazrat Mu'aaviya Radiallaahu A'nhu, (Hazrat) Talha Radiallaahu A'nhu, (Hazrat) Zubair Radiallaahu A'nhu Aur Hazrat Aa'yesha Radiallaahu A'nha Par La'nat Jaa'iz Qaraar Dete Hai'n. (Lataa'if e Ashrafi, Jild Duwwam Mutarjim, Safha No.220/221, Lateefa No.33)
(Ya'ni Hazrat Ameer Mu'aaviya Radiallaahu A'nhu Par La'n Ta'n Karna Unko Bura Bhala Kehna Raafziyo'n Ka Tareeqa Hai Ahle Sunnat Ka Nahee'n)
10 - Maktoobaat e Imaam Rabbaani, Daftar Awwal, Maktoob No.58, Jild No.1, Safha No.219/220)
Tarjuma - Imaam e Rabbaani Mujaddid e Alfsaani Hazrat Shaikh Ahmad Sarhindi Naqshbandi A'laihir Rehma Likhte Hai'n Ke Hazrat Abdullaah Bin Mubaarak Radiallaahu A'nhu Se Poochha Gaya Hazrat Mu'aaviya Afzal Hai'n Ya Hazrat Umar Bin Abdul Azeez ? To Aapne Jawaab Diya Woh Gubaar Jo Huzoor A'laihissalaam Ke Saath Hazrat Mu'aaviya Ke Ghode Ki Naak Me'n Daakhil Huwa Woh Kayi Darje Umar Bin Abdul Azeez Se Afzal Hai.
11 - Fataawa Razviya Mutarjim, Jild No.10, Safha No.201, Masla No.79)
Tarjuma - Alahazrat Imaam e Ahle Sunnat Imaam Ahmad Raza Khaan Qaadri Barelvi A'laihir Rehma Likhte Hai'n Ke Farq e Maraatib Beshumaar Aur Haq Badast Haidar Karraar, Magar Mu'aaviya Bhi Hamaare Sardaar, Ta'n Unpar Bhi Kaare Fujjaar, Jo Mu'aaviya Ki Himaayat Me'n Ayaazbillaah Asadullaah Ke Sabqat Wa Awwaliyat Wa Azmat Wa Akmaliyat Se Aa'nkh Pherle Woh Naasbi Yazeedi Aur Jo Ali Ki Mohabbat Me'n Mu'aaviya Ki Sahaabiyat Wa Nisbat Baargaah e Hazrat Risaalat Bhula De Woh Shi'ee Zaidi, Yehi Rawish e Aadaab Bihamdillaahi Ta'aala Ham Ahle Tawassut Wa Ae'tedaal Ko Har Jagah Malhooz Rehti Hai.
12 - Bahaare Sharee'at, Hissa 1, Safha No.254 Ta 256, Aqeedah No.6 Ta 10, Imaamat Ka Bayaan.
Sadrush Sharee'ah Allaama Amjad Ali Aa'zami A'laihir Rehma Likhte Hai'n Ke Tamaam Sahaaba e Kiraam Radiallaahu A'nhum Ahle Khair Wa Salaah Hai'n Aur Aa'dil, Unka Jab Zikr Kiya Jaaye To Khair Hi Ke Saath Kiya Jaaye, Kisi Sahaabi Ke Saath Sooye Aqeedat (Bura Gumaan Rakhna) Bad Mazhabi Wa Gumraahi Wa Istehqaaq e Jahannam Hai Ke Huzoor e Aqdas ﷺ Ke Saath Bugz Hai, Aisa Shakhs Raafzi Hai, Agar Chaaro Khulafa Ko Maane Aur Apne Ko Sunni Kahe Maslan Hazrat Ameer e Mu'aaviya Aur Unke Waalid e Maajid Hazrat Abu Sufiyaan Aur Waalidah Maajidah Hazrat Hindah Isi Tarah Hazrat Sayyaduna Amro Bin Aa's, Hazrat Mugeerah Bin Sho'ba, Abu Moosa Ash'ari Radiallaahu A'nhum, Inme'n Se Kisi Ki Shaan Me'n Gustaakhi Tabarra Hai Aur Iska Qaa'il Raafzi Agarche Hazraat e Shaikhain Radiallaahu A'nhuma Ki Tauheen Ke Misl Nahee'n Ho Sakti Ke Unki Tauheen, Balke Unki Khilaafat Se Inkaar Hi Fuqaha e Kiraam Ke Nazdeek Kufr Hai, Koi Wali Kitne Hi Bade Martabe Ka Ho Kisi Sahaabi Ke Rutbe Ko Nahee'n Paho'nchta, Sahaaba e Kiraam Radiallaahu A'nhum Ke Baaham Jo Waaqe'aat Huwe Unme'n Padna Haraam, Haraam, Sakht Haraam Hai, Musalmaano'n Ko To Yeh Dekhna Chaahiye Ke Woh Sab Hazraat Aaqa e Do Aa'lam ﷺ Ke Jaa'n Nisaar Aur Sachche Gulaam Hai'n, Tamaam Sahaaba e Kiraam Aa'la Wa Adna (Aur Unme'n Adna Koi Nahee'n) Sab Jannati Hai'n, Woh Jahannam Ki Bhanak Na Sune'nge Aur Hamesha Apni Man Maanti Muraado'n Me'n Rahe'nge, Mehshar Ki Woh Badi Ghabraahat Unhe'n Gamgeen Na Karegi, Farishte Unka Isteqbaal Kare'nge Ke Yeh Hai Woh Din Jiska Tumse Wa'dah Tha, Yeh Sab Mazmoon Qur'aan e Azeem Ka Irshaad Hai, Sahaaba e Kiraam Radiallaahu A'nhum Ambiya Na The, Farishta Na The Ke Ma'soom Ho'n, Unme'n Ba'az Keliye Lagzishe'n Huwee'n Magar Unki Kisi Baat Par Giraft Allaah Paak Wa Rasool ﷺ Ke Khilaaf Hai.
13 - Fataawa Faizur Rasool, Jild No.1, Safha No.109.
Phir Choo'nke Hazrat Ameer Mu'aaviya Radiallaahu A'nhu Ke Sahaabi Hone Se Inkaar Karna Yeh Unke Haq Me'n Tauheen Aur Gustaakhi Hai Aur Bakar Se Yeh Gustaakhi Huwi Hai Lehaaza Bakar Ko Yeh Fatwa Dikha Kar Usko Tauba Karaayi Jaaye Aur Agar Ma'aaz Allaah Bakar Ke Sar Par Gumraahi Aur Raafziyat Ka Bhoot Sawaar Hogaya Ho Aur Samjhaane Par Woh Na Maane To Juma Masjid Me'n Ae'laan Kardiya Jaaye Ke Bakar Sunni Nahee'n Reh Gaya, Woh Shehzaada e Rasool Sarkaar Imaam Hasan Radiallaahu A'nhu Ka Dushman Hogaya Hai, Ae'laan Ke Ba'ad Musalmaano'n Par Farz Hai Ke Woh Bakar Ka Bycott Kare'n Aur Usse Tamaam Ta'alluqaat Uss Waqt Tak Munqata Rakhe'n Jab Tak Woh Tauba Karke Sunni Musalmaan Na Ho Jaaye.
14 - Fataawa Shaareh Bukhaari, Jild No.2, Safha No.30 Ta 32.
Sayyaduna Ameer e Mu'aaviya Radiallaahu A'nhu Bila Shubah Sahaabi Hai'n, Unki Sahaabiyat Se Inkaar Karna Gumraahi Hai, Baittefaaq e Ahle Sunnat Hazrat Ameer Mu'aaviya Radiallaahu A'nhu Sahaabi Hai'n, Unhe'n Bura Bhala Kehne Waala Ahle Sunnat Se Khaarij Gumraah Bad Deen Hai.
In Tamaam Dalaa'il Se Bilkul Waazeh Hai Ke Hazrat Ameer e Mu'aaviya Radiallaahu A'nhu Sahaabi e Rasoole Akram ﷺ Hai'n Lehaaza Aapki Sahaabiyat Ka Munkir Ya Aap Radiallaahu A'nhu Ki Shaan e Aqdas Me'n Gustaakhi Karne Waala Sunni Nahee'n Balke Gumraah Hai.
By Alahazrat Foundation Research Team - 7710809266/9892708816
