Ilm e Gaib Ki 3 Soorte'n Hai'n Aur Inke Alaahedah Alaahedah Ahkaam Hai'n.
(1) Allaah Paak Aa'lim Bizzaat Hai, Uske Bagair Bataaye Koi Ek Hurf Bhi Nahee'n Jaan Sakta. (Khaalisul Ae'teqaad, Safha 6/7)
(2) Rasoolullaah ﷺ Aur Deegar Ambiya e Kiraam Ko Allaah Paak Ne Apne Ba'az Gaibo'n Ka Ilm Diya Hai.
(3) Rasoolullaah ﷺ Ka Ilm Saari Makhlooq Se Zyaadah Hai, Hazrat Aadam Wa Khaleel A'laihimas Salaam Aur Malakul Maut Wa Shaitaan Bhi Makhlooq Hai'n, Yeh 3 Baate'n Zarooriyat e Deen Me'n Se Hai'n Aur Inka Inkaar Karna Kufr Hai.
Daleel No.1 - Sureh Aale Imraan, Aayat No.179
Tarjuma :- Allaah Musalmaano'n Ko Isi Haal Par Chhodne Ka Nahee'n Jispar Tum Ho Jab Tak Juda Na Karde Gande Ko Suthre Se Aur Allaah Ki Shaan Yeh Nahee'n Ke Aye Aa'm Logo Tumhe'n Gaib Ka Ilm De De Haa'n Allaah Chun Leta Hai Apne Rasoolo'n Se Jise Chaahe To Imaan Laao Allaah Aur Uske Rasoolo'n Par Aur Agar Imaan Laao Aur Parhezgaari Karo To Tumhaare Liye Bada Sawaab Hai.
Daleel No.2 - Sureh Nisa, Aayat No.113
Tarjuma :- Aur Aye Mehboob Agar Allaah Ka Fazl Wa Rehmat Tum Par Na Hota To Unme'n Ke Kuchh Log Yeh Chaahte Ke Tumhe'n Dhoka De De'n Aur Woh Apne Hi Aap Ko Behka Rahe Hai'n Aur Tumhaara Kuchh Na Bigaade'nge Aur Allaah Ne Tum Par Kitaab Aur Hikmat Utaari Aur Tumhe'n Sikha Diya Jo Kuchh Tum Na Jaante The Aur Allaah Ka Tum Par Bada Fazl Hai.
Aise To Bahot Saari Qur'aani Aayate'n Hai'n Jisse Saabit Hota Hai Ke Allaah Paak Ne Apne Rasoolo'n Ko Ilm e Gaib Ata Kiya Hai Magar Ham Khulaasatan Zikr Karna Chaahte Hai'n Lehaaza In 2 Aayato'n Par Hi Iktefa Karte Hai'n, In 2 Aayato'n Se Ma'loom Huwa Ke Nabi e Paak ﷺ Ko Allaah Paak Ne Ilm e Gaib Ata Farmaaya Hai. Ab Hadees e Paak Se Daleel Mulaaheza Keejiye.
Daleel No.3 - Bukhaari Shareef, Jild No.4, Safha No.6, Hadees No.3192
Tarjuma - Hazrat Umar Radiallaahu A'nhu Se Riwaayat Hai Ke Ek Martaba Nabi e Kareem ﷺ Ne Mimbar Par Khade Ho Kar Hame'n Wa'az Farmaaya Aur Ibteda e Khalq (Ya'ni Makhlooq Ki Ibteda) Ke Baare Me'n Hame'n Khabar Di Yahaa'n Tak Ke Jab Jannat Waale Apni Manzilo'n Me'n Daakhil Ho Jaaye'nge Aur Jahannam Waale Apne Thikaano'n Me'n Paho'nch Jaaye'nge (Wahaa'n Tak Saari Tafseel Ko Aapne Bayaan Farmaaya) Jise Iss Hadees Ko Yaad Rakhna Tha Usne Yaad Rakha Aur Jise Bhoolna Tha Woh Bhool Gaya.
Daleel No.4 - Muslim Shareef, Hadees No.7267
Tarjuma - Hazrat Abu Zaid Amro Bin Akhtab Radiallaahu A'nhu Se Riwaayat Hai Ke Rasoolullaah ﷺ Ne Hame'n Fajr Ki Namaaz Padhaayi Aur Mimbar Par Raunak Afroz Huwe To Hame'n Khutba Diya Yahaa'n Tak Ke Zohar Ki Namaaz Ka Waqt Hogaya Aap (Mimbar) Se Utre Hame'n Namaaz Padhaayi Phir Dobaarah Mimbar Par Raunak Afroz Huwe Aur (Aage) Khutba Irshaad Farmaaya Yahaa'n Tak Ke Asar Ki Namaaz Ka Waqt Hogaya, Phir Aap Utre Namaaz Padhaayi Aur Phir Mimbar Par Tashreef Legaye Aur Khutba Diya Yahaa'n Tak Ke Sooraj Guroob Hogaya, Aapne Jo Huwa Aur Jo Hone Waala Tha (Sab) Hame'n Bata Diya, Ham Me'n Se Zyaadah Jaanne Waala Wohi Hai Jo Yaad Daasht Me'n Doosro'n Se Badh Kar Hai.
In 2 Ahaadees Se Bhi Saabit Huwa Ke Rasoolullaah ﷺ Ko Allaah Paak Ne Ilm e Gaib Diya Hai, Agar Koi Rasoolullaah ﷺ Ke Ilm e Gaib e Ataayi Ka Inkaar Karta Hai To Woh Kaafir Hai.
*Doosri Soorat :-*
(1) Auliya e Kiraam Ko Bhi Ambiya e Kiraam Ke Waaste Se Kuchh Uloom e Gaib Milte Hai'n.
(2) Allaah Paak Ne Rasoolullaah ﷺ Ko 5 Gaibo'n Me'n Se Bahot Se Juz'iyyaat Ka Ilm Diya Hai, Jo Iss Doosri Soorat Ka Munkir Hai To Woh Gumraah Aur Babmazhab Hai, Kyu'nke Yeh Zarooriyaat e Ahle Sunnat Ka Masla Hai, Aur Zarooriyaat e Ahle Sunnat Ka Munkir Badmazhab, Gumraah Hota Hai, Isliye Ke Woh Bahot Saari Hadeeso'n Ka Inkaar Karraha Hai.
Daleel No.1 - Sunan Ibne Maaja, Jild No.2, Safha No.1293, Hadees No.3923.
Tarjuma - Qaaboos Bayaan Karte Hai'n Ke Hazrat Ummul Fazl Radiallaahu A'nha Ne Kaha, Ya Rasoolallaah ﷺ ! Mai'n Ne Khwaab Dekha Hai Ke Hamaare Ghar Me'n Aapke Aa'za Me'n Se Ek Uzwo Hai, Aapne Farmaaya, Aapne Achcha Khwaab Dekha Hai, Anqareeb Hazrat Faatema Radiallaahu A'nha Ke Haa'n Ladka Paida Hoga Aur Aap Usko Doodh Pilaaye'ngi, Phir Hazrat Faatema Radiallaahu A'nha Ke Haa'n Hazrat Husain Radiallaahu A'nhu Ya Hazrat Hasan Radiallaahu A'nhu Paida Huwe Aur Unho'n Ne Hazrat Qasam Bin Abbaas Ke Saath Unko Doodh Pilaaya.
Iss Hadees Se Ma'loom Huwa Ke Nabi e Akram ﷺ Ko Allaah Paak Ne Maa'n Ke Pet Me'n Kya Hai Beta Ya Beti Uska Bhi Ilm Ata Farma Diya Tha, Tabhi To Rasoolullaah ﷺ Ne Farmaaya Ke Hazrat Faatema Radiallaahu A'nha Ke Haa'n Beta Paida Hoga Aur Huwa Bhi Aisa Hi.
Daleel No.2 - Muslim Shareef, Hadees No.7222
Tarjuma - Hazrat Umar Faarooq Radiallaahu A'nhu Se Riwaayat Hai Ke Rasoolullaah ﷺ Ek Din Pehle Hame'n Badar (Ja'ng e Badar Me'n Qatl Hone) Waalo'n Ke Girne Ki Jagahe'n Dikha Rahe The, Rasoolullaah ﷺ Farma Rahe The, Insha Allaah ! Kal Fulaa'n Ke Qatl Hone Ki Jagah Yeh Hogi, To Hazrat Umar Radiallaahu A'nhu Ne Kaha, Uss Zaat Ki Qasam Jisne Rasoolullaah ﷺ Ko Haq Ke Saath Bheja ! Woh Log Un Jagaho'n Ke Kinaaro'n Se Zara Bhi Idhar Udhar (Qatl) Nahee'n Huwe The Jinki Nishaandehi Rasoolullaah ﷺ Ne Ki Thi, (Hazrat Umar Ne) Kaha, Phir (Unki Laasho'n) Ko Ek Doosre Ke Upar Kuwe'n Me'n Daal Diya Gaya To Rasoolullaah ﷺ Chal Kar Unke Paas Paho'nche Aur Farmaaya, Ya Fulaa'n Bin Fulaa'n Aur Ya Fulaa'n Bin Fulaa'n ! Kya Tumne Allaah Aur Uske Rasool Se Kiye Huwe Wa'de Ko Sachcha Paaya ? Bila Shubah Mai'n Ne Uss Wa'de Ko Bilkul Sachcha Paaya Hai Jo Allaah Ne Mere Saath Kiya Tha, Hazrat Umar Radiallaahu A'nhu Ne Kaha, Ya Rasoolallaah ﷺ ! Aap In Jismo'n Se Kaise Baat Karrahe Hai'n Jinme'n Roohe'n Nahee'n Hai'n ? Rasoolullaah ﷺ Ne Farmaaya, Mai'n Jo Kuchh Keh Raha Hoo'n Tum Log Usko Inse Zyaadah Sunne Waale Nahee'n Ho Magar Woh Meri Baat Ka Koi Jawab Dene Ki Taaqat Nahee'n Rakhte.
Iss Hadees Se Saabit Huwa Ke Rasoolullaah ﷺ Ko Yeh Bhi Ma'loom Hai Ke Kal Kaun Marega Aur Kahaa'n Par Marega.
Daleel No.3 - Bukhaari Shareef, Hadees No.218
Tarjuma - Hazrat Abdullaah Bin Abbaas Radiallaahu A'nhu Se Riwaayat Hai Ke Rasoolullaah ﷺ Do Aisi Qabro'n Ke Paas Se Guzre Jinme'n Azaab Horaha Tha To Irshaad Farmaaya, Inhe'n Azaab Horaha Hai Aur Inko Azaab Kisi Aisi Shay (Cheez) Ki Wajah Se Nahee'n Diya Jaaraha Hai Jisse Bachna Bahot Mushkil Ho, Ek To Peshaab Ke Chheeto'n Se Nahee'n Bachta Tha Aur Doosra Chugli Kiya Karta Tha.
Iss Hadees Se Saabit Huwa Ke Rasoolullaah ﷺ Ko Yeh Bhi Ma'loom Hai Ke Qabr Me'n Azaab Horaha Hai Aur Yeh Bhi Ma'loom Hai Ke Azaab Kyu'n Horaha Hai.
*Teesri Soorat :-*
Ilm e Gaib Ka Aisa Ilm e Ataayi Ke Ibteda e Khalq Se Lekar Qayaamat Qaayem Hone Tak Jitni Cheeze'n Ho Chuki Aur Horahi Hai Aur Hone Waali Hai Un Tamaam Umoor Ka Aisa Tafseeli Ilm Ke Koi Cheez Koi Zarrah Makhfi (Chhupa) Na Rahe Aur Sab Zaahir Wa Aashkaar Ho Aur Tamaam Kulliyaat Aur Juz'iyyaat Ka Ilm Ho Aur Sab Roshan Ho Aise Ilm e Gaib e Kulli Ka Nabi e Akram ﷺ Keliye Saabit Karna Fazaa'il e Mustafa ﷺ Me'n Se Hai, Iske Liye Nusoos e Qat'iyyah Ka Hona Zaroori Nahee'n Balke Yeh Saheeh Ahaadees Se Bhi Saabit Ho Sakta Hai.
Chunaanche Imaam e Ahle Sunnat Imaam Ahmad Raza Khaan Qaadri Barelvi A'laihir Rehma "Fataawa Razviya" Me'n Ek Jagah Likhte Hai'n Ke "Haa'n Agar Tamaam Khabaasato'n Se Paak Ho Aur Ilm e Gaib Kaseer Wa Waafar Baqadre Mazkoor Par Imaan Rakhe Aur Azmat Ke Saath Uska Iqraar Kare, Sirf Ehaata Jamee Ma Kaana Wama Yakoon Me'n Kalaam Kare Aur Inme'n Adab Wa Hurmat Malhooz Rakhe To Gumraah Nahee'n Sirf Khata Par Hai. (Fataawa Razviya Mutarjum, Jild No.6, Safha No.136)
Allaama Hazrat Sayyad Sa'eed Ahmad Kaazmi A'laihir Rehma Likhte Hai'n Ke "Jo Log Mahez Bugz Wa Inaad Ki Wajah Se Iss Wus'at e Ilm Ka Inkaar Karte Hai'n Aur Huzoor Sayyad e Aa'lam ﷺ Ki Shaan e Aqdas Me'n Na'oozbillaah Gustaakhi Ke Murtakib Hote Hai'n Ya Gustaakho'n Ki Gustaakhiyo'n Par Muttala Hokar Inme'n Na Paak Taaweele'n Karke In Tauheeniyo'n Par Raazi Hote Hai'n Woh Ahle Sunnat Kuja (Kahaa'n) Musalmaan Bhi Nahee'n, Isliye Ke Allaah Ke Pyaare Habeeb ﷺ Se Al-A'yaazbillaah Bugz Wa Inaad Rakhna Inki Shaan e Muqaddas Me'n Tauheen Karna Kufr e Khaalis Hai. (Maqaalaat e Kaazmi, Hissa Duwwam, Unwaan Ilm e Gaib e Mustafa)
Ilm e Gaib Ataayi Kulli Par Hadees Se Daleel :-
Daleel No.1 - Musnad e Ahmad Bin Hambal, Jild No.35, Safha No.29, Hadees No.31361
Tarjuma - Hazrat Abu Zar Gaffaari Radiallaahu A'nhu Farmaate Hai'n Ke Nabi e Akram ﷺ Ne Hame'n Iss Haal Par Chhoda Ke Hawa Me'n Koi Parindah Par Maarne Waala Aisa Nahee'n Jiska Ilm Huzoor Ne Hamaare Saamne Bayaan Na Farma Diya Ho.
Daleel No.2 - Hilyatul Auliya, Tabqaatul Asfiya, Jild No.6, Safha No.101
Tarjuma - Hazrat Abdullaah Bin Umar Radiallaahu A'nhuma Se Marwi Hai Ke Rasoolullaah ﷺ Farmaate Hai'n, Beshak Mere Saamne Allaah Paak Ne Duniya Utha Li Hai Aur Main Use Aur Jo Kuchh Usme'n Qayaamat Tak Hone Waala Hai Sab Kuchh Aisa Dekh Raha Hoo'n Jaise Apni Hatheli Ko Dekh Raha Hoo'n Uss Roshni Ke Sabab Jo Allaah Paak Ne Apne Nabi Keliye Roshan Farmaayi Jaise Muhammad ﷺ Se Pehle Ambiya Keliye Roshan Ki Thi.
Iske Alaawah Bhi Bahot Saari Ahaadees Hai'n Jinse Ma'loom Hota Hai Ke Nabi e Kareem ﷺ Ko Allaah Paak Ne Ilm e Gaib e Kulli Ata Kiya Hai.
Note - Sureh An'aam Ki Aayat No.50 Aur Sureh Aa'raaf Ki Aayat No.188 Me'n Allaah Paak Ne Jo Rasoolullaah ﷺ Se Kahelwaaya Hai Ke "Aap Farma Do Ke Mai'n Gaib Nahee'n Jaanta" To Iss Aayat Me'n Rasoolullaah ﷺ Keliye Zaati Ilm e Gaib Ki Nafi Ki Gayi Hai Na Ke Ataayi. Dekhiye Tafseer e Neshaapuri, Shifa Shareef, Naseemur Riyaaz Aur Tafseer e Khaazin Wagairah.
Iss Post Ko Har Jagah Share Keejiye Taake Doosro'n Ko Bhi Ilm Haasil Ho Sake.
By Alahazrat Foundation Research Team - 7710809266/9892708816
