Yaad Rahe Iqaamat Ke Waqt Kab Khade Ho'n Se Muta'alliq Musalmaano'n Ka Jo Aqeedah Hai Yeh Na To Zarooriyaat e Deen Ka Masla Hai Na Hi Zarooriyaat e Ahle Sunnat Wa Jamaa'at Ka Masla Hai Balke Yeh Ek Furooyi Masla Hai.
Ahnaaf Ke Nazdeek Iss Baare Me'n Hukm Yeh Hai Ke Imaam Wa Muqtadi Jab Masjid Me'n Maujood Ho'n To Iss Soorat Me'n Imaam Wa Muqtadi Sab "Hayya Alal Falaah" Par Khade Ho'n Aur "Hayya Alal Falaah" Par Khada Hona Sunnat e Mustahabba Aur Ise Sirf Sunnat Hi Keh Liya Jaaye To Bhi Kuchh Harj Nahee'n Aur Yoo'n Bhi Theek Hai Ke "Hayya Alas Salaah" Par Khada Hona Shuru Kare'n Aur "Hayya Alal Falaah" Par Mukammal Khade Ho Jaaye'n.
Umdatul Muhaqqiqeen Hazrat Allama Mufti Muhammad Habeebullaah Na'eemi Bhagalpuri Rehmatullaah Alaih Farmaate Hai'n, "Jab Iqaamat Shuru Karne Se Pehle Muqtadi Masjid Me'n Haazir Ho'n Aur Imaam Bhi Apne Musalle Par Ya Uske Qareeb Me'n Maujood Ho Aur Iqaamat Kehne Waala Shakhs Khud Imaam Na Ho To Iss Soorat Me'n Sabko "Hayya Alas Salaah" Ya "Hayya Alal Falaah" Par Khada Hona Chaahiye, Yehi Masnoon Wa Mustahab Hai, Iss Soorat Me'n Ibteda e Iqaamat Se Khade Hone Ko Hanfi Maslak Me'n Hamaare Fuqaha e Kiraam Ne Makrooh Tehreer Farmaaya Hai. (Habeebul Fataawa, Safha No.134)
Khade Khade Iqaamat Sunna Makrooh Hai, Raddul Muhtaar Me'n Hai,
Tarjuma - Ya'ni Khade Hokar Intezaar e Namaaz Na Kare Ke Makrooh Hai, Balke Baith Jaaye Phir Jab Mo'azzin "Hayya Alal Falaah" Kahe To Khada Ho. (Raddul Muhtaar, Jild No.2, Safha No.88)
Allaama Abu Bakar Bin Mas'ood Kaasaani Alaihir Rehma Badaai'us Sanaayi Me'n Farmaate Hai'n,
Tarjuma - Ya'ni Khulaasa e Kalaam Yeh Hai Ke Imaam Qaum Ke Saath Masjid Me'n Ho To Sabko Uss Waqt Khada Hona Mustahab Hai Jab Mo'azzin "Hayya Alal Falaah" Kahe. (Badaai'us Sanaayi, Jild No.1, Safha No.467)
Sadrush Sharee'ah Mufti Mohammad Amjad Ali Aa'zami Alaihir Rehma Farmaate Hai'n, Iqaamat Ke Waqt Koi Shakhs Aaya To Use Khade Hokar Intezaar Karna Makrooh Hai, Balke Baith Jaaye Jab "Hayya Alal Falaah" Par Paho'nche Uss Waqt Khada Ho, Yoo'n Hi Jab Log Masjid Me'n Maujood Hai'n, Woh Baithe Rahe'n, Uss Waqt Uthe'n Jab Mukabbir "Hayya Alal Falaah" Par Paho'nche, Yehi Hukm Imaam Keliye Hai, Aajkal Aksar Jagah Riwaaj Pad Gaya Hai Ke Waqt e Iqaamat Sab Khade Rehte Hai'n Balke Aksar Jagah To Yahaa'n Tak Hai Ke Jab Tak Imaam Musalle Par Khada Na Ho, Uss Waqt Tak Takbeer Nahee'n Kahi Jaati, Yeh Khilaaf e Sunnat Hai. (Bahaare Sharee'at, Hissa 3, Jild 1, Safha No.471)
Ab Dalaa'il Mulaaheza Farmaaye'n :-
Bukhaari Shareef Aur Muslim Shareef Ki Hadees e Paak Me'n Hai Ke
Hazrat Abu Qataadah Radiallaahu Anhu Se Riwaayat Hai Ke Nabi e Kareem ﷺ Ne Farmaaya,
Tarjuma - Jab Iqaamat Kahi Jaaye To Uss Waqt Tak Na Utho Jab Tak Tum Mujhe Na Dekhlo. (Bukhaari Shareef, Hadees No.909, Muslim Shareef, Hadees No.1365)
Iss Hadees Ke Tahet Allaama Budruddeen Ayni (Wafaat 855 Hijri) Umdatul Qaari Sharah Saheeh Bukhaari Me'n Sahaaba e Kiraam Ke Amal Ke Baare Me'n Farmaate Hai'n,
Tarjuma - Ya'ni Hazrat Anas Radiallaahu Anhu Uss Waqt Khade Hote The Jab Mo'azzin "Qad Qaamatis Salaah" Kehta,
Mazeed Isi Safha Par Hai,
Tarjuma - Ya'ni Musannaf Me'n Hai Ke Hishaam Bin Urwaah Iqaamat Me'n "Qad Qaamatis Salaah" Se Pehle Khade Hone Ko Makrooh Jaante The. (Umdatul Qaari, Jild No.4, Safha No.215)
Hazrat Abdullaah Bin Abi Aufa Radiallaahu Anhu Farmaate Hai'n,
Tarjuma - Jab Hazrat Bilaal Radiallaahu Anhu "Qad Qaamatis Salaah" Kehte To Rasoolullaah ﷺ Uthte, Phir "Allaahu Akbar" Kehte. (Musnadul Bazzaar, Hadees No.1733) (As-Sunanul Kubra Lil-Bayhaqi, Hadees No.932)
Khaleefa e Raashid Hazrat Sayyaduna Usmaan Zun Noorain Radiallaahu Anhu Ka Amal.
Hazrat Qataadah Radiallaahu Anhu Farmaate Hai'n,
Tarjuma - Hazrat Usmaan Radiallaahu Anhu Jab Mo'azzin Ko "Qad Qaamatis Salaah" Kehte Sunte To Kehte, Haq Kehne Waalo'n Ko Marhaba, Namaaz Ko Marhaba Wa Khush Aamdeed, Phir Namaaz Keliye Uthkar Khade Hote. (Musannaf Ibne Abi Shayba, Hadees No.1832, 29302)
Hazrat Anas Bin Maalik Radiallaahu Anhu Ka Amal.
Hazrat Abu Ya'la Radiallaahu Anhu Farmaate Hai'n,
Tarjuma - Mai'n Ne Hazrat Anas Bin Maalik Radiallaahu Anhu Ko Dekha Ke Jab "Qad Qaamatis Salaah" Kaha Jaata To Fauran Uthkar Khade Ho Jaate. (Al-Ausat Li-Ibnil Munzir, Hadees No.2291)
Imaam Abu Haneefa, Imaam Abu Yoosuf, Imaam Muhammad Rahima Humullaahu Alaihim Ka Nazariya.
Hazrat Imaam Abu Haneefa Radiallaahu Anhu Ke Shaagird Hazrat Imaam Muhammad Rehmatullaah Alaih Farmaate Hai'n,
Tarjuma - Jab Imaam Jamaa'at Ke Saath Masjid Me'n Maujood Ho To Mere Nazdeek Mehboob Yeh Hai Ke Jab Mo'azzin "Hayya Alal Falaah" Kahe To Sab Log Saf Me'n Khade Ho Jaaye'n. (Al-Mabsoot Lil Shaibaani, Jild No.1, Safha No.81)
Muheet e Burhaani Aur Iske Alaawah Kayi Ek Mo'tabar Kitaabo'n Me'n Imaam Abu Haneefa, Imaam Abu Yoosuf Aur Imaam Muhammad Rahima Humullaahu Alaihim Ka Yehi Nazariya Zikr Farmaaya Aur Isi Ko Saheeh Qaraar Diya.
Yeh Mubaarak Ahaadees Aur Paakeezah Jumle Hame'n Da'wat Dete Hai'n Ke Ham Iqaamat Shuru Hote Hi Uthkar Khade Na Ho Jaaye'n, Balke "Hayya Alal Falaah" Pe Uthne Ki Ibteda Kare'n Aur "Qad Qaamatis Salaah" Tak Bilkul Seedhe Khade Ho Jaaye'n.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai (Isi Tarah Iqaamaat Ke Waqt "Hayya Alal Falaah" Par Khade Hone Ka Masla Bhi Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57).
By Alahazrat Foundation Research Team - 7710809288/9892708816
