Eid e Meelaadunnabi ﷺ Manaane Ke Muta'alliq Ahle Sunnat Wa Jamaa'at Ka Nazariya Wa Aqeedah Yeh Hai Ke Meelaadunnabi ﷺ Manaane Ka Masla Na To Zarooriyaat e Deen Se Hai Na Zarooriyaat e Ahle Sunnat Wa Jamaa'at Se Hai Balke Yeh Ek Mustahab Wa Jaa'iz Amal Hai Jisme'n Sawaab Hi Sawaab Hai.
Chunaanche Hazrat Allaama Maulaana Mufti Ahmad Yaar Khaan Na'eemi Ashrafi Alaihir Rehma Apni Mash'hoor e Zamaana Kitaab "Ja Al-Haq" Me'n Likhte Hai'n Ke Meelaad Shareef Ki Haqeeqat Huzoor ﷺ Ki Wilaadat e Paak Ka Waaqe'ah Bayaan Karna, Noor e Muhammad ﷺ Ki Karaamaat, Nasab Naama, Ya Sheer Khwaargi Aur Hazrat Haleema Radiallaahu Anha Ke Yahaa'n Parwarish Haasil Karne Ke Waaqe'aat Bayaan Karna Aur Huzoor Alaihissalaam Ki Na'at e Paak Nazm Ya Nasr Me'n Padhna Sab Iske Taabe Hai'n, Ab Woh Waaqe'ah Wilaadat Khwaah Tanhaayi Me'n Padho Ya Majlis Jama Karke Aur Nazm Me'n Padho Ya Nasr Me'n, Khade Ho Kar Ya Baith Kar, Jis Tarah Bhi Ho Usko Meelaad Shareef Kaha Jaayega, Meelaad Shareef Muna'qid Karna Aur Wilaadat e Paak Ki Khushi Manaana, Uske Zikr Ke Mauqe Par Khushbu Lagaana, Gulaab Chhidakna, Sheerni Taqseem Karna Garz Ke Khushi Ka Iz'haar Jis Jaa'iz Tareeqe Se Ho Woh Mustahab Aur Bahot Hi Baa'is e Barkat Aur Rehmat e Ilaahi Ke Nuzool Ka Sabab Hai. (Sa'eedul Haq Sharah Ja Al-Haq, Hissa Awwal, Safha No.547)
Ba'az Log Kehte Hai'n Ke Jashn e Wilaadat Na To Huzoor ﷺ Ne Manaayi Na Hi Khulafa e Raashideen Me'n Se Kisi Ne Manaayi Lehaaza Yeh Bid'at Hai Aur Hadees Me'n Hai Ke Har Bid'at Gumraahi Hai Jiska Anjaam Jahannam Hai.
Jawaab - Kisi Kaam Ke Na Jaa'iz Hone Ka Daaro Madaar Iss Baat Par Nahee'n Ke Yeh Kaam Huzoor e Akram ﷺ Ya Sahaaba e Kiraam Alaihimur Ridwaan Ne Nahee'n Kiya Balke Madaar Iss Baat Par Hai Ke Uss Kaam Se Allaah Aur Uske Rasool ﷺ Ne Mana Farmaaya Hai Ya Nahee'n ? Agar Mana Farmaaya Hai To Woh Kaam Na Jaa'iz Hai Aur Mana Nahee'n Farmaaya To Jaa'iz Hai, Kyu'nke Fiqh Ka Yeh Qaa'idah Hai Ke "Tamaam Cheezo'n Me'n Asal Yeh Hai Ke Woh Mubaah Hai'n", Ya'ni Har Cheez Mubaah Wa Halaal Hai Haa'n Agar Kisi Cheez Ko Sharee'at Mana Karde To Woh Mana Hai, Ya'ni Mumaane'at Se Hurmat Saabit Hogi Na Ke Naye Hone Se, Yeh Qaa'idah Qur'aan e Paak Aur Ahaadees e Saheehah Wa Aqwaal e Fuqaha Se Saabit Hai, Chunaanche Qur'aan e Kareem Me'n Allaah Paak Irshaad Farmaata Hai,
Tarjuma :- Aye Imaan Waalo ! Aisi Baate'n Na Poochho To Tum Par Zaahir Ki Jaaye'n To Tumhe'n Buri Lage'n Aur Agar Unhe'n Uss Waqt Poochhoge Ke Qur'aan Utar Raha Hai To Tum Par Zaahir Kardi Jaaye'ngi Allaah Unhe'n Mu'aaf Kar Chuka Hai. (Sureh Maa'idah, Aayat No.101)
Sadrul Afaazil Hazrat Allaama Maulaana Sayyad Muhammad Na'eemuddeen Muraadaabaadi Alaihir Rehma Farmaate Hai'n Ke Iss Aayat Se Saabit Huwa Ke Jis Amr Ki Shara Me'n Mumaane'at Na Aayi Ho Woh Mubaah Hai, Hazrat Salmaan Radiallaahu Anhu Ki Hadees Me'n Hai Ke Halaal Woh Hai Jo Allaah Ne Apni Kitaab Me'n Halaal Farmaaya Haraam Woh Hai Jisko Apni Kitaab Me'n Haraam Farmaaya Aur Jisse Sukoot Kiya Woh Mu'aaf Hai To Kilfat (Pareshaani) Me'n Na Pado. (Khazaa'inul Irfaan, Safha No.224)
Hadees e Paak Me'n Hai Ke Halaal Woh Hai Jisko Allaah Paak Ne Apni Kitaab Me'n Halaal Farma Diya Aur Haraam Woh Hai Jisko Allaah Paak Ne Apni Kitaab Me'n Haraam Farma Diya Aur Jis Par Khaamoshi Farmaayi Woh Mu'aaf Hai. (Tirmizi Shareef, Jild No.4, Safha No.220, Hadees No.1726)
Choo'nke Mahaafil e Deeniya Muna'qid Karke Eid e Meelaad Manaane Ki Mumaane'at Qur'aan Wa Hadees, Aqwaal e Fuqaha Neez Sharee'at Me'n Kahee'n Bhi Waarid Nahee'n, Lehaaza Jashn e Wilaadat Manaana Bhi Jaa'iz Hai Aur Sadiyo'n Se Ulama Ne Ise Jaa'iz Aur Mustahsan Qaraar Diya Hai.
Shaareh Bukhaari Imaam Qastalaani Alaihir Rehma Likhte Hai'n, Rabee'ul Awwal Choo'nke Huzoor ﷺ Ki Wilaadat e Ba Sa'aadat Ka Maheena Hai Lehaaza Isme'n Tamaam Ahle Islaam Hamesha Se Meelaad Ki Khushi Me'n Mahaafil Ka Ine'qaad Karte Chale Aarahe Hai'n, Iski Raato'n Me'n Sadqaat Aur Achche Aa'maal Me'n Kasrat Karte Hai'n, Khusoosan In Mahaafil Me'n Aap ﷺ Ki Meelaad Ka Tazkerah Karte Huwe Allaah Paak Ki Rehmate'n Haasil Karte Hai'n, Mehfil e Meelaad Ki Yeh Barkat Mujarrab Hai Ke Iski Wajah Se Yeh Saal Aman Ke Saath Guzarta Hai, Allaah Paak Uss Aadmi Par Apna Fazal Wa Ahsaan Kare Jisne Aapki Meelaad Mubaarak Ko Eid Bana Kar Aise Shakhs Par Shiddat Ki Jiske Dil Me'n Marz Hai. (Al-Mawaahibul Ladunniya, Jild No.1, Safha No.27)
Shaykh Abdul Haq Muhaddis e Dahelvi Alaihir Rehma Farmaate Hai'n, Aap ﷺ Ki Wilaadat e Ba Sa'aadat Ke Maheene Me'n Mehfil e Meelaad Ka Ine'qaad Tamaam Aa'lam e Islaam Ka Hamesha Se Ma'mool Raha Hai, Iski Raato'n Me'n Sadqa, Khushi Ka Iz'haar Aur Iss Mauqe Par Khusoosan Aap ﷺ Ki Wilaadat Par Zaahir Hone Waale Waaqe'aat Ka Tazkerah Musalmaano'n Ka Khusoosi Ma'mool Hai. (Ma Sabata Bissunnati, Safha No.102)
Imaam Jamaaluddeen Kattaani Likhte Hai'n Ke Huzoor ﷺ Ki Wilaadat Ka Din Nihaayat Hi Mo'azzam, Muqaddas Aur Mohtaram Wa Mubaarak Hai, Aap ﷺ Ka Wajood e Paak Itteba Karne Waale Keliye Zariya e Nijaat Hai, Jisne Bhi Aap ﷺ Ki Aamad Par Khushi Ka Iz'haar Kiya Usne Apne Aapko Jahannam Se Mehfooz Karliya, Lehaaza Aise Mauqe Par Khushi Ka Iz'haar Karna Aur Hasbe Taufeeq Kharch Karna Nihaayat Munaasib Hai. (Subulul Huda War Rashad, Jild No.1, Safha No.364)
Allaama Jalaaluddeen Suyooti Alaihir Rehma (Wisaal 911 Hijri) Likhte Hai'n Ke Mere Nazdeek Meelaadunnabi ﷺ Ki Haqeeqat Kuchh Yoo'n Hai Ke Log Ikat'the Hokar Ba Qadre Sahoolat Tilaawat e Qur'aan Karte Aur Huzoor Nabi e Akram ﷺ Ki Takhleeq Wa Paidaa'ish Ki Azeemush Shaan Nishaaniyo'n Par Mushtamil Ahaadees Ka Bayaan Karte Hai'n, Phir Unke Liye Dastarkhwaan Bichhaaya Jaata Hai Aur Log Khaana Kha Kar Mazeed Kuchh Kiye Bagair Waapas Laut Jaate Hai'n Aur Iss Taur Par Yeh Iqdaam "Bid'at e Hasanah" Me'n Se Hai Jis Par Inke Karne Waalo'n Ko Sawaab Bhi Diya Jaayega, Kyu'nke Isme'n Huzoor ﷺ Ki Ta'zeem Wa Tauqeer Aur Meelaad Shareef Par Khushi Wa Musarrat Ka Iz'haar Paaya Jaata Hai. (Husn Al Maqsad Fi Amal Al Maulid, Safha No.14,15)
Aur Yeh Kehna Ke "Har Naya Kaam Gumraahi Hai" Durust Nahee'n Kyu'nke Bid'at Ki Ibtedaayi Taur Par 2 Qisme'n Hai'n, Bid'at e Hasanah Aur Bid'at e Sayya'ah.
Bid'at e Hasanah Woh Naya Kaam Hai Jo Kisi Sunnat Ke Khilaaf Na Ho Jaise Maulid Shareef Ke Mauqe Par Mahaafil e Meelaad, Juloos, Qiraa'at Ki Mahaafil Ke Programme, Khatme Bukhaari Ki Mahaafil Wagairah.
Bid'at e Sayya'ah Woh Hai Jo Kisi Sunnat Ke Khilaaf Ya Sunnat Ko Mitaane Waali Ho Jaise Gair Arabi Me'n Khutba e Juma'h Wa Eidain.
Chunaanche Shaykh Abdul Haq Muhaddis e Dahelvi Alaihir Rehma Iss Hadees (Har Bid'at Gumraahi Hai) Ke Tahet Likhte Hai'n Ke Ma'loom Hona Chaahiye Ke Jo Kuchh Huzoor Nabi e Kareem ﷺ Ke Ba'ad Nikla Aur Zaahir Huwa Bid'at Kehlaata Hai, Phir Usme'n Se Jo Kuchh Usool Ke Mawaafiq Aur Qawaa'id e Sunnat Ke Mutaabiq Ho Aur Kitaab Wa Sunnat Par Qayaas Kiya Gaya Ho Bid'at e Hasanah Kehlaata Hai Aur Jo In Usool Wa Qawaa'id Ke Khilaaf Ho Use Bid'at e Zalaalat Kehte Hai'n, Aur "Kullu Bi'datin Dalaalah" Ka Kulliya Iss Doosri Qism Ke Saath Khaas Hai. (Ash'atul Lam'aat Mutarjim, Jild No.1, Safha No.422)
Balke Hadees e Paak Me'n Nayi Aur Achchhi Cheez Ijaad Karne Waale Ko To Sawaab Ki Bashaarat Hai, Chunaanche Muslim Shareef Me'n Hai Ke Jo Koi Islaam Me'n Achchha Tareeqa Ijaad Kare To Uspar Use Sawaab Milega Aur Uske Ba'ad Jitne Log Uspar Amal Kare'nge Tamaam Ke Baraabar Uss Jaari Karne Waale Ko Bhi Sawaab Milega Aur Unke Sawaab Me'n Kuchh Kami Na Hogi, Aur Jo Shakhs Islaam Me'n Bura Tareeqa Jaari Kare To Uspar Use Gunaah Milega Aur Uske Ba'ad Jitne Log Uspar Amal Kare'nge Un Sab Ke Baraabar Uss Jaari Karne Waale Ko Bhi Gunaah Milega Aur Unke Gunaah Me'n Bhi Kuchh Kami Na Hogi. (Muslim Shareef, Safha No.259, Hadees No.1017)
Jashne Wilaadat Manaana Bhi Ek Achchha Kaam Hai Jo Kisi Sunnat Ke Khilaaf Nahee'n Balke Ayn Qur'aan Wa Sunnat Ke Zaabto'n Ke Mutaabiq Hai, Allaah Paak Ki Ne'mat Par Khushi Ka Hukm Khud Qur'aan e Paak Ne Diya Hai, Chunaanche Allaah Paak Irshaad Farmaata Hai,
Tarjuma :- Tum Farmaao Allaah Hi Ke Fazal Aur Usi Ki Rehmat Aur Usi Par Chaahiye Ke Khushi Kare'n. (Sureh Yoonus, Aayat No.58)
Ek Aur Jagah Irshaad Farmaaya,
Tarjuma :- Aur Apne Rab Ki Ne'mat Ka Khoob Charcha Karo.
Khud Huzoor e Akram ﷺ Apna Yaum e Meelaad Rozah Rakh Kar Manaate Chunaanche Aap ﷺ Har Peer Ko Rozah Rakhte The, Jab Iski Wajah Dariyaaft Ki Gayi To Farmaaya, Isi Din Meri Wilaadat Huwi Aur Isi Roz Mujh Par Wahi Naazil Huwi. (Muslim Shareef, Jild No.2, Safha No.815, Hadees No.1162)
Khulaasa e Kalaam Yeh Hai Ke Sharee'at Ke Daa'ire Me'n Reh Kar Khushi Manaana, Mukhtalif Jaa'iz Tareeqo'n Se Iz'haar e Musarrat Karna Aur Mahaafil e Meelaad Ka Ine'qaad Karke Zikre Mustafa ﷺ Karte Huwe Un Par Musarrat Wa Mubaarak Lamhaat Ko Yaad Karna Jo Sarkaar e Do Aa'lam ﷺ Ke Duniya Me'n Tashreef Laane Ka Waqt Hai Bahot Badi Sa'aadat Mandi Ki Baat Hai.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai (Isi Tarah Eid e Meelaadunnabi ﷺ Manaane Se Muta'alliq Masla Bhi) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
