Sawaal - Ba'az Logo'n Ka Yeh Kehna Hai Ke Jinnaat Ka Wajood Hi Nahee'n, Yeh Yoo'n Hi Qisse Kahaaniyaa'n Hai'n.
Jawaab - Jinnaat Ke Wajood Ka Inkaar Karna Kufr Hai, Jinnaat Ka Wajood Qur'aan Wa Hadees Se Saabit Hai, Qur'aan e Majeed Ki Kam Wa Besh 25 Soorato'n Me'n Jinnaat Ka Tazkerah Hai Hatta Ke Paarah 29 Ki Ek Poori Soorat Ka Naam Hi Sureh Jin Hai, Sadrush Sharee'ah Badrut Tareeqa Hazrat Allaama Maulaana Mufti Muhammad Amjad Ali Aa'zami A'laihir Rehma Farmaate Hai'n, Jin Ke Wajood Ka Inkaar Ya Badi (Buraayi) Ki Quwwat Ka Naam Jin Ya Shaitaan Rakhna Kufr Hai. (Bahaare Sharee'at, Hissa 1, Safha 25)
Isi Tarah Yeh Kehna Ke Jin Koi Cheez Nahee'n Balke Badi Ki Taaqat Ka Naam Hi Jin Hai Ya Kehna Ke Shaitaan Koi Cheez Nahee'n Balke Badi Ki Taaqat Ka Naam Hi Shaitaan Hai Yeh Kufr Hai.
Sawaal - Kya Aaseb, Bhoot Aur Chudail Wagairah Ka Bhi Wajood Hai ?
Jawaab - Jee Haa'n, Fataawa Razviya, Jild 21, Safha 218 Par Sayyadi Aa'la Hazrat Imaam e Ahle Sunnat Imaam Ahmad Raza Khaan Qaadri Barelvi A'laihir Rehma Ke Farmaan Ka Khulaasa Hai, Haa'n Jin Aur Naapaak Roohe'n Mard Wa Aurat, Ahaadees Se Saabit Hai'n Aur Woh Aksar Naapaak Mauqo'n Par Hoti Hai'n, Unhee'n Se Panaah Keliye Istenja Khaane (Toilet) Jaane Se Pehle Yeh Du'aa Padhna Waarid Huwi,
Tarjuma - Mai'n Gandi Aur Naapaak Cheezo'n Se Allaah Ki Panaah Maa'ngta Hoo'n.
(Yeh Ya Iss Tarah Ki Aur Koi Maasoor Du'aa Padh Kar Jaane Se Istenja Khaane Me'n Rehne Waale Gande Jinnaat Nuqsaan Nahee'n Paho'ncha Sakte)
Sawaal - Ba'az Mard Wa Aurat Ko Jinnaat Ki "Haazri" Aati Hai, Unse Sawaal Jawaab Karna Kaisa Hai ?
Jawaab - Jinnaat Se Aa'indah (Mustaqbil) Ki Baat Poochhni Haraam Hai, Maslan Poochhna Mera Bachcha Kab Tandrust Hoga ? Mai'n Muqaddama Jeetu'nga Ya Nahee'n ? Meri Fulaa'n Jagah Shaadi Hogi Ya Nahee'n ? Mai'n Imtehaan Me'n Kaamiyaabi Paau'nga Ya Nahee'n ? Wagairah Sawaalaat Karna Haraam Aur Jahannam Me'n Le Jaane Waale Kaam Hai'n, Sayyadi Aa'la Hazrat Imaam e Ahle Sunnat Imaam Ahmad Raza Khaan Qaadri Barelvi A'laihir Rehma Farmaate Hai'n, Haaziraat Karke Mu'akkalaan Jinn Se Poochhte Hai'n Fulaa'n Muqaddame Me'n Kya Hoga ? Fulaa'n Kaam Ka Anjaam Kya Hoga ? Yeh Haraam Hai. (Fataawa Afreeqa, Safha 177 - 178)
Astagfirullaah, La Elaaha Ellallaah Muhammadur Rasoolullaah ﷺ
By Alahazrat Foundation Research Team - 7710809266/9892708816
