Allaah Ke Wali Ki Taraf Se Bagair Da'wa e Nabuwwat Ke Khilaaf e Aa'dat Kaam Ke Zaahir Hone Ko "Karaamat" Kehte Hai'n.
Karaamat e Auliya Haq Hai Aur Yeh Aqeedah Zarooriyaat e Mazhab e Ahle Sunnat Me'n Se Hai, Lehaaza Jo Karaamat e Auliya Ka Inkaar Kare Woh Sunni Nahee'n, Balke Bad Mazhab Wa Gumraah Hai.
Alahazrat Imaam e Ahle Sunnat Imaam Ahmad Raza Khaan Qaadri Barelvi A'laihir Rehma Likhte Hai'n Ke Karaamat e Auliya Ka Inkaar Gumraahi Hai. (Fataawa Razviya, Jild No.14, Safha No.328)
Sadrush Sharee'ah Hazrat Allaama Mufti Muhammad Amjad Ali Aa'zami A'laihir Rehma Likhte Hai'n Ke Karaamat e Auliya Haq Hai, Iska Munkir Gumraah Hai, Murdah Zindah Karna, Maadarzaad Andhe Aur Kodhi Ko Shifa Dena, Mashriq Se Magrib Tak Saari Zameen Ek Qadam Me'n Tay Kar Jaana, Garz Tamaam Khawaariq e Aa'daat (Khilaaf e Aa'daat Kaam) Auliya Se Mumkin Hai Siwa Uss Mo'jeze Ke Jiski Baabat (Baare) Doosro'n Keliye Mumaane'at Saabit Ho Chuki Hai, Jaise Qur'aan e Majeed Ki Misl Koi Soorat Le Aana Ya Duniya Me'n Bedaari Me'n Allaah Paak Ke Deedaar Ya Kalaam e Haqeeqi Se Musharraf Hona, Iska Jo Apne Ya Kisi Wali Keliye Da'wa Kare Kaafir Hai. (Bahaare Sharee'at, Hissa 1, Safha 270 Se 272)
Ab Karaamat e Auliya Se Muta'alliq Chand Dalaa'il Mulaaheza Farmaaye'n.
1- Sureh Aale Imraan, Aayat No.37
Tarjuma - To Use Uske Rab Ne Achchi Tarah Qabool Kiya Aur Use Achcha Parwaan Chadhaaya Aur Use Zakariya Ki Nigehbaani Me'n Diya Jab Zakariya Uske Paas Uski Namaaz Padhne Ki Jagah Jaate Uske Paas Naya Rizq Paate Kaha Aye Mariyam Yeh Tere Paas Kahaa'n Se Aaya, Bolee'n Woh Allaah Ke Paas Se Hai, Beshak Allaah Jise Chaahe Be Ginti De.
Iss Aayat Ke Tahet Khazaa'inul Irfaan Me'n Hai Ke Yeh Aayat Karaamat e Auliya Ke Saboot Ki Daleel Hai Ke Allaah Paak Unke Haatho'n Par Khawaariq (Karaamaat) Zaahir Farmaata Hai. (Tafseer Khazaa'inul Irfaan, Sureh Aale Imraan, Aayat No.37)
2- Bukhaari Shareef, Jild No.2, Safha No.93, Hadees No.1351
Tarjuma - Hazrat Jaabir Radiallaahu A'nhu Bayaan Farmaate Hai'n Ke Jab Gazwa e Ohad Pesh Aaya To Mere Waalid Ne Mujhe Raat Ko Bulaaya Aur Kaha Mera Yehi Gumaan Hai Ke Nabi e Kareem ﷺ Ke As'haab Me'n Se Jo Shaheed Ho'nge Mai'n Unme'n Sabse Pehle Shaheed Ho Jaau'nga Aur Mai'n Jinko Chhod Kar Jaau'nga Unme'n Rasoolullaah ﷺ Ke Ba'ad Mujhe Sabse Zyaadah Azeez Tum Ho, Pas Mujh Par Qarz Hai So Tum Mera Qarz Ada Kardena Aur Tum Apni Behno'n Ke Saath Nek Sulook Karna, Phir Subah Huwi To Woh Sabse Pehle Shaheed The Aur Unke Saath Ek Aur Shakhs Ko Bhi Qabar Me'n Dafan Kiya Gaya, Mera Dil Isse Khush Nahee'n Huwa Ke Mai'n Unko Doosre Shakhs Ke Saath Rakhu'n, Pas Mai'n Ne 6 Maheene Ke Ba'ad Unko Qabar Se Nikaal Liya Pas Woh Usi Tarah The Jaise Unko Uss Waqt Rakha Tha, Albatta Kaan Thoda Sa Mutagayyar Huwa Tha.
Zara Gaur Farmaaye'n Ke Nabi e Kareem ﷺ Ke Pyaare Sahaabi Hazrat Abdullaah Radiallaahu A'nhu Ne Apni Maut Ki Khabar Pehle Se Dedi Yeh Karaamat e Auliya Ki Roshan Daleel Hai.
3- Sunane Abu Daawood Shareef, Jild No 3, Safha No.16, Hadees No.2523
Tarjuma - Hazrat Aa'yesha Siddeeqa Radiallaahu A'nha Farmaati Hai'n Ke Jab Najaashi "Baadshaah" Ne Wafaat Paayi To Ham Charcha Karte The Ke Unki Qabar Par Noor Dekha Jaata Rehta Hai.
As'hama Shaah Habsha Jinka Laqab Najjaashi Tha Jab Woh Wafaat Pa Gaye To Arsa Tak Aa'm Logo'n Ne Aapki Qabar Par Noor Ko Zaahir Hote Huwe Dekha, Isse Yeh Bhi Ma'loom Huwa Ke Karaamat Ba'ad e Wafaat Bhi Zaahir Ho Sakti Hai Balke Hoti Hai Jaisa Ke Mazkoorah Riwaayat Se Zaahir Hai.
4- Mishqaatul Masaabeeh, Jild No.3, Safha No.1676, Hadees No.5949
Tarjuma - Ibne Munkadir Se Riwaayat Hai Ke Rasoolullaah ﷺ Ke Gulaam Hazrat Safeena Radiallaahu A'nhu Room Ki Zameen Par Lashkar Se Bahek Gaye Ya Qaid Karliye Gaye, Woh Bhaagte Huwe Lashkar Ko Talaash Karte The Ke Achaanak Sher Saamne Tha To Bole Aye Abul Haaris ! Mai'n Rasoolullaah ﷺ Ka Gulaam Hoo'n Mera Waaqe'ah Aisa Huwa Hai, To Sher Dum Hilaata Huwa Aaya Hatta Ke Unke Baraabar Khada Ho Gaya, Jab Koi Aawaaz Sunta To Udhar Chala Jaata, Phir Aap Radiallaahu A'nhu Ke Baraabar Chalne Laga Hatta Ke Yeh Lashkar Tak Paho'nch Gaye, Phir Sher Laut Gaya.
Ma'loom Huwa Ke Hazrat Safeena Radiallaahu A'nhu Ki Yeh Karaamat Zaahir Huwi Ke Sher Aap Radiallaahu A'nhu Ka Kuchh Bigaadne Ke Bajaaye Aap Radiallaahu A'nhu Ke Saath Saath Chalne Laga Aur Goya Ke Aap Radiallaahu A'nhu Ki Hifaazat Karta Huwa Lashkar Tak Paho'ncha Aaya.
Khulaasa e Kalaam Yeh Hai Ke Qur'aan Wa Hadees Se Waazeh Taur Par Saabit Hota Hai Ke Karaamat e Auliya Allaah Barhaq Hai, Mazeed Karaamat e Auliya Allaah Ki Jaankaari Keliye Ulama e Ahle Sunnat Wa Jamaa'at Ki Kitaabo'n Ka Mutaale'ah Kare'n.
By Alahazrat Foundation Research Team - 7710809266/9892708816
