Salaam Padhne Ka Saboot To Daleel e Qatayi Se Saabit Hai, Ab Rahi Baat Khade Hokar Salaam Padhna To Khade Hokar Salaam Padhna Ahle Sunnat Wa Jamaa'at Ke Nazdeek Na Zarooriyaat e Deen Ka Masla Hai Na Zarooriyaat e Ahle Sunnat Ka Masla Hai Balke Ahle Sunnat Wa Jamaa'at Ke Nazdeek Yeh Bhi Ek Jaa'iz Aur Mustahsan Amal Hai, Ya'ni Furu Me'n Se Hai.
Chunaanche "Fataawa Faizur Rasool" Me'n Hazrat Allaama Maulaana Mufti Jalaaluddin Ahmad Amjadi Alaihir Rehma Likhte Hai'n Ke Tamaam Sunni Ulama Ka Iss Baat Par Ittefaaq Hai Ke Meelaad Shareef Ki Mehfil Muna'qid Karna Aur Usme'n Qayaam e Ta'zeemi Karna Ya Nabi Salaam Alaik Ya Rasool Salaam Alaik Padhna Na Sirf Jaa'iz Balke Mustahab Wa Baa'is Ajar Wa Sawaab Hai. (Fataawa Faizul Rasool, 2/509)
Mehfil e Meelaadun Nabi ﷺ Me'n Haalat e Qayaam Huzoor Nabi e Akram ﷺ Ki Zaat Par Salaam Arz Karna Muhibbaan e Mustafa ﷺ Ka Khaasa Hai Aur Yeh Nihaayat Pasandeedah Amal Hai, Jis Tarah Huzoor ﷺ Ki Hayaat e Zaahiri Me'n Aap ﷺ Ki Ta'zeem Wa Tauqeer Ahle Islaam Par Waajib Thi Aur Sahaaba e Kiraam Nihaayat Mohtaat Rehte The Aap ﷺ Ke Adab Wa Ahteraam Me'n Ke Koi Kotaahi Na Hone Paaye, Isi Tarah Aaj Bhi Aap ﷺ Ki Ta'zeem Wa Tauqeer Ummat Par Waajib Hai, Mehfil e Meelaad Ya Mehfil e Na'at Ke Dauraan Me'n Aap ﷺ Par Salaam Padhte Waqt Ahteraaman Khade Hona Isi Adab Wa Ta'zeem Ka Tasalsul Hai, Jis Mehfil Me'n Ta'zeem e Rasool ﷺ Se Sarshaar Hokar Qayaam Kiya Jaaye Uspar Yaqeenan Anwaar Wa Barkaat e Ilaahiya Ka Nuzool Hota Hai, Ba'az Logo'n Ne Taajdaar e Kaa'inaat ﷺ Ke Adab Wa Ahteraam Me'n Qayaam Karne Ko Bhi Bid'at Ka Lebal Laga Diya Hai Aur Mazeed Yeh Bhi Kehte Hai'n Ke Huzoor Ki Wohi Ta'zeem Ki Jaaye Jo Ke Sunnat Se Saabit Ho, To Unhe'n Yeh Baarhaa Jawaab Diya Ja Chuka Hai Ke Har Bid'at Haraam Nahee'n, Raha Yeh Kehna Ke Huzoor Alaihis Salaatu Was Salaam Ki Wohi Ta'zeem Ki Jaaye Jo Sunnat Se Saabit Hai, Kya Yeh Qaa'idah Sirf Huzoor ﷺ Ki Ta'zeem Keliye Hai Ya Deegar Ulama e Deoband Wa Wahabi Wagairah Keliye Bhi, Ya'ni Aa'lim, Kitaab Madarsa Tamaam Cheezo'n Ki Wohi Ta'zeem Honi Chaahiye Jo Sunnat Se Saabit Hai, To Ulama e Deoband Wa Wahabi Ki Aamad Par Station Jaana, Unke Gale Me'n Haar Phool Daalna, Unke Liye Juloos Nikaalna, Jhandiyo'n Se Raasta Aur Jalsa Gaah Ko Sajaana, Kursiyaa'n Lagaana, Wa'az Ke Waqt Zindahbaad Ke Na're Lagaana, Masnad Aur Qaaleen Bichhaana Wagairah Iss Tarah Ki Ta'zeem Ka Aap Koi Saboot Pesh Kar Sakte Hai'n, Ke Sahaaba e Kiraam Ne Huzoor e Akram ﷺ Ki Aisi Ta'zeem Ki Ho, Nahee'n Pesh Kar Sakte To Farmaa'iye Ke Yeh Ta'zeem Haraam Hai Ya Halaal, Lehaaza Aap Ka Yeh Qaa'idah Hi Galat Hai.
Zail Me'n Ham Daleele'n Pesh Karte Hai'n Jo Khade Hokar Salaam Padhne Par Mo'tarizeen Ko Bhi Majboor Kardegi Insha Allaah.
Sahaaba e Kiraam Ka Adab Zara Mulaaheza Keejiye ! "Bukhaari Shareef" Me'n Hai Ke Hazrat Sahal Bin Sa'ad Radiallaahu Anhu Se Marwi Hai Ke Rasoolullaah ﷺ Bani Amro Bin Auf Ki Taraf Unke Darmiyaan Sulah Karwaane Keliye Gaye Pas Namaaz Ka Waqt Aa Gaya, Phir Mo'azzin Hazrat Abu Bakar Radiallaahu Anhu Ke Paas Aaya, Pas Kaha, Kya Aap Logo'n Ko Namaaz Padhaaye'nge To Mai'n Namaaz Ki Iqaamat Padhu'n ? Hazrat Abu Bakar Radiallaahu Anhu Ne Namaaz Padhaayi, Phir Rasoolullaah ﷺ Tashreef Le Aaye Aur Log Uss Waqt Namaaz Padhne Me'n Mashgool The, Nabi e Kareem ﷺ Safo'n Ke Darmiyaan Se Guzarte Huwe Aaye Hatta Ke (Pehli) Saf Me'n Aakar Khade Ho Gaye Pas Logo'n Ne Taaliyaa'n Bajaayeen, Aur Hazrat Abu Bakar Radiallaahu Anhu Namaaz Me'n Idhar Udhar Iltifaat Nahee'n Karte The Jab Logo'n Ne Bahot Zyaadah Taaliyaa'n Bajaayee'n To Unho'n Ne Tawajjoh Ki, Pas Unho'n Ne Rasoolullaah ﷺ Ko Dekh Liya, Rasoolullaah ﷺ Ne Unko Ishaarah Kiya Ke Woh Apni Jagah Thehre Rahe'n, Hazrat Abu Bakar Radiallaahu Anhu Ne Apne Dono'n Haath Buland Kiye Aur Ispar Allaah Ka Shukr Ada Kiya Ke Rasoolullaah ﷺ Ne Unhe'n Namaaz Padhaate Rehne Ka Hukm Dediya, Phir Hazrat Abu Bakar Radiallaahu Anhu Peechhe Hat Gaye Hatta Ke Saf Ke Baraabar Khade Ho Gaye, Aur Rasoolullaah ﷺ Ne Aage Badh Kar Namaaz Padhaayi, Jab Nabi e Kareem ﷺ Namaaz Se Faarig Ho Gaye To Aapne Farmaaya, Aye Abu Bakar ! Tumko Apni Jagah Barqaraar Rehne Se Kis Cheez Ne Mana Kiya ? Jab Mai'n Ne Tumhe'n (Namaaz Padhaate Rehne) Ka Hukm Diya Tha ? Hazrat Abu Bakar Radiallaahu Anhu Ne Kaha, Abu Quhaafa Ke Bete Keliye To Yeh Mumkin Nahee'n Hai Ke Woh Rasoolullaah ﷺ Ke Saamne Namaaz Padhaaye, Phir Rasoolullaah ﷺ Ne (Logo'n Se) Farmaaya, Kya Wajah Hai Ke Mai'n Ne Tumko Bahot Zyaadah Taaliyaa'n Bajaate Huwe Dekha ? Jis Shakhs Ki Namaaz Me'n Koi Amar Pesh Aajaaye Woh Subhaan Allaah Kahe Jab Woh Subhaan Allaah Kahega To Uski Taraf Iltifaat Kiya Jaayega Taaliyaa'n Bajaana Sirf Aurato'n Keliye Hai. (Bukhaari Shareef Kitaabul Azaan, Jild No.1, Safha No.137, Hadees No.684)
Qaari'een ! Mulaaheza Farmaaye'n Ke Hazrat Sayyaduna Siddeeq e Akbar Radiallaahu Anhu Namaaz Ki Haalat Me'n The Aur Jab Aapko Ilm Huwa Ke Sarkaar Nabi e Kareem ﷺ Tashreef La Chuke Hai'n, To Aap Alaihissalaam Ki Ta'zeem Ki Khaatir Peechhe Aakar Muqtadi Ban Gaye Aur Huzoor Alaihissalaam Ne Namaaz Ki Imaamat Farmaayi Yeh Tha Sahaaba e Kiraam Alaihimur Ridwaan Ka Tareeqa Ke Namaaz Ki Haalat Me'n Bhi Ta'zeem e Nabi e Akram ﷺ Baja Laate The.
Allaah Paak Bhi Hame'n Apne Mehboob Alaihis Salaatu Was Salaam Ki Ta'zeem Wa Tauqeer Ka Hukm Irshaad Farmaata Hai, Chunaanche Irshaad Hota Hai,
Tarjuma :- "Aur Rasool Ki Ta'zeem Wa Tauqeer Karo" (Sureh Fateh, Aayat No.9)
Lekin Fi Zamaana Shaitaan Ne Logo'n Ke Zehno'n Me'n Nabi e Kareem ﷺ Ki Ta'zeem Se Muta'alliq Tarah Tarah Ke Waswase Daal Diye Hai'n Haalaa'nke Iss Farmaan e Khudaawandi Par Sahaaba e Kiraam Wa Ahle Bait e At'haar Se Badh Kar Amal Karne Waala Kaun Ho Sakta Hai ? Yeh Nufoos e Qudsiya To Har Waqt Huzoor Alaihissalaam Ki Baargaah Me'n Rehte The, Halaal Wa Haraam Ko Bhi Bakhoobi Jaante The, Sarkaar ﷺ Jab Unke Paas Tashreef Laate To Yeh Hazraat Aapki Ta'zeem Me'n Khade Ho Jaaya Karte.
Chunaanche Mishqaat Shareef Me'n Hai, Hazrat Aa'yesha Radiallaahu Anha Bayaan Karti Hai'n Ke Mai'n Ne Rasoolullaah ﷺ Ki Hayyat, Seerat Wa Soorat, Ek Riwaayat Me'n Hai, Baat Cheet Me'n Hazrat Faatema Radiallaahu Anha Se Zyaadah Kisi Ko Mushaaba Na Paaya, Jab Hazrat Faatema Radiallaahu Anha Nabi e Kareem ﷺ Ke Paas Aati To Nabi e Kareem ﷺ Unka Isteqbaal Karte Unka Haath Pakadte Aur Unki (Peshaani Par) Bosa Lete Aur Unhe'n Apni Jagah Par Bithaate Aur Jab Nabi e Kareem ﷺ Unke Paas Tashreef Le Jaate To Woh Bhi Nabi e Kareem ﷺ Ka Isteqbaal Karti Nabi e Akram ﷺ Ka Haath Pakadti Aur Nabi e Kareem ﷺ Ka Bosa Leti Aur Nabi e Kareem ﷺ Ko Apni Jagah Par Bithaatee'n. (Mishqaat, Kitaabul Adab,2/171, Hadees No.4689)
Ab Qur'aan e Kareem Ki Yeh Aayat Mulaaheza Farmaaye'n Allaah Paak Ka Irshaad e Giraami Hai,
Tarjuma :- Aur Jo Allaah Ke Nishaano'n Ki Ta'zeem Kare To Yeh Dilo'n Ki Parhezgaari Se Hai. (Sureh Hajj, Aayat No.32)
Hazrat Mufti Jalaaluddeen Amjadi Alaihir Rehma Apni Kitaab "Ta'zeem e Nabi" Safha No.18 Par Iss Aayat e Kareema Ka Khulaasa Bayaan Karte Huwe Farmaate Hai'n, Ke Jiske Dil Me'n Taqwa Aur Parhezgaari Hogi Woh Sha'aa'irullaah Ki Ta'zeem Karega Aur Sha'aa'irullaah Ke Ma'ni Hai'n Allaah Paak Ke Deen Ki Nishaaniyaa'n Aur Sarkaar e Aqdas Alaihissalaam Deen Ki Nishaaniyo'n Me'n Se Azeem Tareen Nishaani Hai'n To Woh Saari Nishaaniyo'n Me'n Sabse Zyaadah Ta'zeem Ke Mustahiq Hai'n Aur Aayat e Mubaaraka Me'n Iss Baat Ka Waazeh Ishaarah Hai Ke Jo Log Huzoor ﷺ Ki Ta'zeem Ka Inkaar Karte Hai'n Woh Agarche Bazaahir Achchhe Nazar Aate Ho'n Magar Unke Quloob Taqwa Wa Parhezgaari Se Khaali Hai'n.
Hazrat Mufti Ahmad Yaar Khaan Na'eemi Alaihir Rehma Farmaate Hai'n, Ta'zeem Me'n Koi Paabandi Nahee'n Balke Jis Zamaane Me'n Aur Jis Jagah Jo Tareeqa Bhi Ta'zeem Ka Ho Usi Tarah Karni Chaahiye Basharteke Sharee'at Ne Usko Haraam Na Kiya Ho Jaise Ke Ta'zeemi Sajdah Wa Ruku.
(Zikre Mustafa Karte Waqt Ta'zeeman Khada Hona Afzal Hai Iss Baare Me'n Irshaad Farmaate Hai'n) Hamaare Zamaane Me'n (Ta'zeem Ki Niyat Se) Shaahi Ahkaam Khade Hokar Bhi Padhe Jaate Hai'n Lehaaza Mehboob Ka Zikr Bhi Khade Hokar Hona Chaahiye, Dekho "Kulu Wash Rabu" Me'n Mutlaqan Khaane Peene Ki Ijaazat Hai Ke Har Halaal Giza Khaao Piyo, To Biryaani, Zardah, Qorma Sab Hi Halaal Huwa Khwaah Khairul Quroon (Ya'ni Daur e Sahaaba Wa Taaba'een) Me'n Ho Ya Na Ho, Aise Hi "Tuwaqqaroohu" Ka Amar Mutlaq Hai Ke Har Qism Ki Jaa'iz Ta'zeem Karo, (Chaahe) Khairul Quroon Se Saabit Ho Ya Na Ho. (Ja Al Haq, Safha No.207)
Mohtaram Qaari'een, Bayaan Kardah Guftagu Se Yeh Baat Waazeh Ho Gayi Ke Sha'aa'irullaah Ki Ta'zeem Ba Hukme Khuda Wandi Jaa'iz Aur Mustahab Amal Hai Aur Huzoor ﷺ Bhi Allaah Paak Ki Nishaaniyo'n Me'n Se Ek Azeem Nishaani Hai'n To Jab Sha'aa'irullaah Ki Ta'zeem Jaa'iz Wa Mustahsan Huwi To Huzoor Alaihissalaam Ki Ta'zeem Badarja Aula Jaa'iz Hogi, Jab Aapki Zaat e Ba Barkat Laayeq e Ta'zeem Hai To Aapka Zikr e Mubaarak Bhi Mo'azzam Huwa Isi Wajah Se Sarkaar ﷺ Ki Baargaah Me'n Khade Hokar Durood Wa Salaam Padhna Afzal Hai.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai (Isi Tarah Khade Ho Kar Salaam Padhne Ka Masla Bhi Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57).
By Alahazrat Foundation Research Team - 7710809288/9892708816
