Kufr Ka Lugvi Ma'na Hai "Kisi Shay Ko Chhupaana" (Al-Mufradaat, Safha No.714) Aur Istelaah Me'n Kisi Ek Zaroorat e Deeni Ke Inkaar Ko Bhi Kufr Kehte Hai'n, Agarche Baaqi Tamaam Zarooriyaat e Deen Ki Tasdeeq Karta Ho, (Bahaar e Sharee'at, Jild No.1, Safha No.92) Jaise Koi Shakhs Agar Tamaam Zarooriyaat e Deen Ko Tasleem Karta Ho Magar Namaaz Ki Farziyat Ya Khatme Nabuwwat Ka Munkir Ho Woh Kaafir Hai, Ke Namaaz Ko Farz Maanna Aur Sarkaar e Madeena ﷺ Ko Aakhri Nabi Maanna Dono'n Baate'n Zarooriyaat e Deen Me'n Se Hai'n,
Zarooriyaat e Deen Islaam Ke Woh Ahkaam Hai'n Jinko Har Khaas Wa Aa'm Jaante Ho'n, Jaisa Allaah A'zzowajal Ki Wehdaaniyat (Ya'ni Uska Ek Hona), Ambiya e Kiraam A'laihimus Salaatu Wassalaam Ki Nabuwwat, Namaaz, Roze, Haj, Zakaat, Jannat, Dozakh (Jahannam), Qayaamat Me'n Uthaaya Jaana, Hisaab Wa Kitaab Lena Wagairha, Maslan Yeh Aqeedah Rakhna (Bhi Zarooriyaat e Deen Me'n Se Hai) Ke Huzoor Rehmatul Lil Aa'lameen ﷺ "Khaatamun Nabiyyeen" Hai'n, Huzoor e Akram ﷺ Ke Ba'ad Koi Naya Nabi Nahee'n Ho Sakta, Awaam Se Muraad Woh Musalmaan Hai'n Jo Ulama Ke Tabqe Me'n Shumaar Na Kiye Jaate Ho'n Magar Ulama Ki Sohbat Me'n Baithne Waale Ho'n Aur Ilmi Masaa'il Ka Zauq Rakhte Ho'n, Woh Log Muraad Nahee'n Jo Door Daraaz Ja'ngalo'n Pahaado'n Me'n Rehne Waale Ho'n Jinhe'n Saheeh Kalma Padhna Bhi Na Aata Ho Ke Aise Logo'n Ka Zarooriyaat e Deen Se Na Waaqif Hona Iss Deeni Zaroori Ko Gair Zaroori Na Kardega, Albatta Aise Logo'n Ke Musalmaan Hone Keliye Yeh Baat Zaroori Hai Ke Zarooriyaat e Deen Ke Munkir (Ya'ni Inkaar Karne Waale) Na Ho'n Aur Yeh Aqeedah Rakhte Ho'n Ke Islaam Me'n Jo Kuchh Hai Haq Hai, In Sab Par Ijmaalan Imaan Laaye Ho'n, (Bahaar e Sharee'at, Hissa No.1, Safha No.92)
Kalimaat e Kufr Ki Qisme'n :-
(1) Luzoom e Kufr
(2) Iltizaam e Kufr
Chunaanche Sadrush Sharee'ah Badrut Tareeqa Hazrat Allaama Maulaana Mufti Muhammad Amjad Ali Aa'zami A'laihir Rehma Farmaate Hai'n, Aqwaal e Kufriya 2 Qism Ke Hai'n (1) Ek Woh Jisme'n Kisi Ma'ni e Saheeh Ka Bhi Ahtemaal (Ya'ni Pehlu) Ho, (2) Doosre Woh Ke Isme'n Koi Aise Ma'na Nahee'n Bante Jo Qaa'il Ko Kufr Se Bachaawe, Isme'n Awwal Ko Luzoom e Kufr Kaha Jaata Hai Aur Qism e Duwwam Ko Iltezaam e Kufr, (Fataawa Amjadiya, Jild No.4, Safha No.512/513)
Luzoom e Kufr Aur Iltezaam e Kufr :- Luzoom e Kufr Ki Ta'reef Ka Khulaasa Yeh Hai Ke Woh Baat Ayne Kufr Nahee'n Magar Kufr Tak Paho'nchaane Waali Hai Aur Iltizaam e Kufr Yeh Hai Ke Zarooriyaat e Deen Me'n Se Kisi Cheez Ka Saraahatan (Ya'ni Waazeh Taur Par) Khilaaf Kare, Chunaanche Aa'la Hazrat Imaam Ahmad Raza Khaan Faazil e Barelvi A'laihir Rehma Farmaate Hai'n Jiska Maf'hoom Yeh Hai Ke, Iqtibaas Me'n Imaan Wa Kufr Ki Ta'reef Bayaan Karne Ke Ba'ad Kufr Ki 2 Aqsaam Luzoom Wa Iltizaam Ka Zikr Karte Huwe Farmaate Hai'n, (1) Iltezaam e Kufr Ya'ni Zarooriyaat e Deen Me'n Se Kisi Ek Cheez Ka Bhi Khilaaf Karna, Chaahe Woh Khilaaf Karne Waala Bazaahir Islaam Ka Kaisa Hi Shaydaayi Banta Ho Aur Beshak Kufr Ke Naam Se Chidhta Ho Magar Uspar Hukm e Kufr Hai, (2) Luzoom e Kufr Ayne Kufr To Nahee'n Hota Magar Kufr Tak Le Jaane Waala Hota Hai, Ya'ni Kalaam Ka Anjaam Aur Hukm Ka Laazim Kufr e Haqeeqi Hai, Muraad Yeh Ke Agar Muqaddamaat Ko Tarteeb Diya Jaaye Aur Taqreebaat Ko Mukammal Karte Jaaye'n To Bil Aakhir Kisi Zaroori Deeni Ka Inkaar Laazim Aayega, Iski Bahot Si Soorate'n Hai'n, (Fataawa Razviya, Jild No.15, Safha No.431)
By Alahazrat Foundation Research Team - 7710809266/9892708816
