Mohtaram Qaari'een e Kiraam : Yaad Rahe Chaaro A'imma e Fiqah A'laihimur Rehma Ke Aqaa'id Me'n Koi Farq Nahee'n Hai, Sabka Aqeedah Wohi Hai Jo Sahaaba e Kiraam Radiallaahu A'nhum Ka Tha, Hamesha Se Ummat Me'n Ek Bahot Badi Jamaa'at Ka Aqeedah Ek Raha Hai Aur Yehi Aqeedah Durust Hai, Isi Ko Jamaa'at Ya Sawaad e Aa'zam Ka Naam Diya Gaya Hai, Jo Jamaa'at Se Nikal Jaata Hai Usko Firqa Kehte Hai'n, Jamaa'at Hamesha Se Haq Par Hai Aur Haq Par Rahegi, Jitne Bhi Firqe Ho'nge Haq Par Nahee'n Ho'nge Kyu'nke Yeh Bante Rahe Hai'n Aur Khatam Hote Rahe Hai'n, Isi Tarah Qayaamat Tak Hota Rahega.
Hazrat Ibne Umar Radiallaahu A'nhuma Riwaayat Karte Hai'n Ke Huzoor ﷺ Ne Farmaaya Ke Allaah Paak Meri Ummat Ko Gumraahi Par Jama Nahee'n Karega (Ya Farmaaya Ummat e Muhammadiya ﷺ Ko Gumraahi Par Jama Nahee'n Karega Allaah Ka Haath (Madad Aur Nusrat) Jamaa'at Ke Saath Hai, Jo Shakhs Jamaa'at Se Juda (Alag) Huwa Woh Jahannam Me'n Gira. (Tirmizi Shareef, 4/466, Raqam 2167, Haakim Al-Mustadrak, 1/201, Raqam 397)
Hazrat Ibne Umar Radiallaahu A'nhuma Se Marwi Hai Ke Huzoor Nabi e Akram ﷺ Ne Farmaaya Ke Allaah Paak iss Ummat Ko Kabhi Bhi Gumraahi Par Ikattha Nahee'n Farmaayega Aur Farmaaya Allaah Paak Ka Dast e Qudrat Jamaa'at Par Hota Hai, Pas Sabse Badi Jamaa'at Ki Itteba Karo Aur Jo Iss Jamaa'at Se Alag Hota Hai Woh Aag Me'n Daal Diya Jaata Hai. (Haakim Al-Mustadrak, 1/199, Raqam 391. Ibne Abi Aa'sim, 1/39, Raqam 80)
Hazrat Anas Bin Maalik Radiallaahu A'nhu Se Marwi Hai Ke Huzoor Nabi e Akram ﷺ Ne Farmaaya Ke Beshak Meri Ummat Kabhi Gumraahi Par Jama Nahee'n Hogi, Pas Agar Tum Unme'n Ikhtelaaf Dekho To Tum Par Laazim Hai Ke Sabse Badi Jamaa'at Ko Ikhtiyaar Karo. (Ibne Maaja Shareef, 4/367, Raqam 3950. Tabraani Mo'jamul Kabeer, 12/447, Raqam 13623)
Rasoolullaah ﷺ Ne Farmaaya, Khabardaar ! Tumse Pehle Ahle Kitaab 72 Firqo'n Me'n Taqseem Hogaye The Aur Yeh Millat 73 Firqo'n Me'n Taqseem Hogi, 72 Aag Me'n Jaaye'nge Aur Ek Firqa Jannat Me'n Jaayega Yehi "Al-Jamaa'ah" Hoga. (Abu Daawood Shareef, Hadees No.4597)
Lehaaza Chaaro'n A'imma A'laihimur Rehma Ko Follow Karne Waale Ya Phir Koi Ilaaqaayi Taur Par Kisi Naam Se Pukaare Jaane Waale Musalmaan Agar Aqeedah Sawaad e Aa'zam Ahle Sunnat Wa Jamaa'at Waala Rakhte Ho'n To Woh Firqa Nahee'n Hai'n Balke Jamaa'at Hi Hai'n Kyu'nke Sabka Aqeedah Sahaaba e Kiraam Radiallaahu A'nhum Waala Aqeedah Hai Aur Qur'aan Wa Hadees Ki Ta'leemaat Ke Mutaabiq Hai, Haa'n Jiska Aqeedah Jamaa'at Se Mukhtalif Huwa Woh Jahannam Ke Raaste Par Hai Aur Wohi Firqa Hai.
Barelvi Naya Firqa Hai Mukhaalifeen e Ahle Sunnat Ki Saazish Ka Mudallal Jawaab :- Alahazrat Imaam e Ahle Sunnat Imaam Ahmad Raza Khaan Qaadri Barelvi A'laihir Rehma Ke Ifkaar Wa Nazariyaat Ki Be Panaah Maqbooliyat Se Mutaassir Ho Kar Mukhaalifeen Ne Unke Ham Maslak Ulama Wa Mashaa'ikh Ko Barelvi Ka Naam Dediya, Maqsad Yeh Zaahir Karna Tha Ke Doosre Firqo'n Ki Tarah Yeh Bhi Ek Naya Firqa Hai Jo Sarzameen e Hind Me'n Paida Huwa Hai.
Abu Yahya Imaam Khaa'n Naushaherwi Ahle Hadees Likhte Hai'n Ke Yeh Jamaa'at Imaam Abu Haneefa Rehmatullaah A'laih Ki Taqleed Ki Muddayi Hai Magar Deobandi Muqallideen (Aur Yeh Bhi Bajaaye Khud Ek Jadeed Istalaah Hai) Ya'ni Ta'leem Yaaftgaan e Madarsa Deoband Aur Unke Itteba Unhe'n "Barelvi" Kehte Hai'n. (Abu Yahya Imaam Khaa'n Naushaherwi, Taraajim Ulama e Hadees Hind, Safha No.376)
Jabke Haqeeqat e Haal Isse Mukhtalif Hai, Bareli Ke Rehne Waale Ya Usse Silsila e Shaagirdi Ya Bay'at Ka Ta'alluq Rakhne Waale Apne Aapko Barelvi Kahe'n To Yeh Aisa Hi Hoga Jaise Koi Apne Aapko Qaadri, Chishti Ya Naqshbandi Aur Soharwardi Kehlaaye, Lekin Ham Dekhte Hai'n Ke Khairaabaadi, Badaayuni, Raampuri Silsile Ka Bhi Wohi Aqeedah Hai Jo Ulama e Bareli Ka Hai, Kya In Sab Hazraat Ko Bhi Barelvi Kaha Jaayega ? Zaahir Hai Ke Haqeeqat Me'n Aisa Nahee'n Hai, Agarche Mukhaalifeen In Tamaam Hazraat Ko Bhi Barelvi Hi Kahe'nge, Isi Tarah Aslaaf Ke Tareeqe Par Chalne Waale Qaadri, Chishti, Naqshbandi, Soharwardi Aur Rifaayi Mukhaalifeen Ki Nigaah Me'n Barelvi Hi Hai'n. (Zaheer, Al-Barelviya, Safha No.7)
Mai'n Yehi Kahu'nga Ke Ahle Sunnat Wa Jamaa'at Ko Barelvi Kehna Hindustaani Deobandiyo'n Ka Tareeqa Hai. (Al-Haqqul Mubeen Arabi, Safha No.3, Az Taajushshariya Hazrat Allaama Muhammad Akhtar Raza Khaan Saheb Rehmatullaah A'laih)
Muballige Islaam Hazrat Allaama Sayyad Muhammad Madni Kichhochhavi Farmaate Hai'n, Gaur Farmaa'iye Ke Faazil e Barelvi Kisi Naye Mazhab Ke Baani Na The, Az Awwal Ta Aakhir Muqallid Rahe, Unki Har Tehreer Kitaab Wa Sunnat Aur Ijma Wa Qayaas Ki Saheeh Tarjumaan Rahi, Neez Salaf Saaleheen Wa A'imma Wa Mujtahideen Ke Irshaadaat Aur Maslake Aslaaf Ko Waazeh Taur Par Pesh Karti Rahi, Woh Zindagi Ke Kisi Goshe Me'n Ek Pal Keliye Bhi "Sabeel Momineen Saaleheen" Se Nahee'n Hate, Ab Agar Aise Ke Irshaadaat e Haqaaniya Aur Tauzeehaat Wa Tashreehaat Par Ae'temaad Karne Waalo'n, Unhe'n Salaf Saaleheen Ki Rawish Ke Mutaabiq Yaqeen Karne Waalo'n Ko "Barelvi" Keh Diya Gaya, To Kya Barelviyat Wa Sunniyat Ko Bilkul Mutaraadiful Ma'ni Nahee'n Qaraar Diya Gaya ? Aur Barelviyat Ke Wajood Ka Aagaaz Faazil e Barelvi Ke Wajood Se Pehle Hi Tasleem Nahee'n Karliya Gaya ?. (Sayyad Muhammad Madni, Shaikhul Islaam, Taqdeem, Daur e Haazir Me'n Barelvi Ahle Sunnat Ka Alaamati Nishaan, Safha No.10/11)
Khud Mukhaalifeen Bhi Iss Haqeeqat Ko Tasleem Karte Hai'n, Yeh Jamaa'at Apni Paidaa'ish Aur Naam Ke Lehaaz Se Nayi Hai Lekin Ifkaar Aur Aqaa'id Ke Ae'tebaar Se Qadeem Hai. (Ahsaan Ilaahi Zaheer, Al-Barelviya, Safha No.7)
Ab Iske Siwa Aur Kya Kaha Jaaye Ke Barelviyat Ka Naam Lekar Mukhaalefat Karne Waale Dar Asal Unhee'n Aqaa'id Wa Ifkaar Ko Nishaana Bana Rahe Hai'n Jo Zamaana e Qadeem Se Ahle Sunnat Wa Jamaa'at Ke Chale Aaye Hai'n, Yeh Alag Baat Hai Ke Unme'n Itni Akhlaaqi Jur'at Nahee'n Hai Ke Ahle Sunnat Ke Aqaa'id Ko Mushrikaana Aur Gair Islaami Qaraar De Sake'n, Baab e Aqaa'id Me'n Aap Dekhe'nge Ke Jin Aqaa'id Ko Barelvi Aqaa'id Keh Kar Mushrikaana Qaraar Diya Gaya Hai, Wa Qur'aan Wa Hadees Aur Mutaqaddimeen Ulama e Ahle Sunnat Se Saabit Aur Manqool Hai, Koi Ek Aisa Aqeedah Bhi To Pesh Nahee'n Kiya Ja Saka Jo Barelviyo'n Ki Ijaad Ho, Aur Mutaqaddimeen A'imma e Ahle Sunnat Se Saabit Na Ho'n.
Imaam e Ahle Sunnat Shaah Ahmad Raza Khaan Barelvi A'laihir Rehma Ke Alqaab Me'n Se Ek Laqab Hi Aa'lim e Ahle Sunnah Tha, Ahle Sunnat Wa Jamaa'at Ki Numaa'indah Jamaa'at All India Sunni Conference Ka Rukn Banne Keliye Sunni Hona Shart Tha, Iske Form Par Sunni Ki Yeh Ta'reef Darj Thi Ke Sunni Woh Hai Jo "Ma Ana A'laihi Wa As'haabi" Ka Misdaaq Ho Sakta Ho, Yeh Woh Log Hai'n Jo A'imma e Deen, Khulafa e Islaam Aur Muslim Mashaa'ikh e Tareeqat Aur Mutaakhkhireen Ulama e Deen Se Shaykh Abdul Haq Saahab Muhaddis e Dehlavi, Hazrat Malikul Ulama Behrul Uloom Sahaab Firangi Mehli, Hazrat Maulaana Fazle Haq Khairaabaadi, Hazrat Maulaana Fazal Rasool Saahab Badaayuni, Hazrat Maulaana Irshaad Husain Saahab Raampuri, Alahazrat Maulaana Mufti Ahmad Raza Khaan Rahima Humullaahu Ta'aala Ke Maslak Par Ho. (Maulaana Muhammad Jalaaluddeen Qaadri, Khutbaat e All India Sunni Conference, Safha No.85/86)
Khud Mukhaalifeen Bhi Iss Haqeeqat Ka Ae'teraaf Karte Hai'n Ke Yeh Log Qadeem Tareeqo'n Par Kaarband Rahe, Mash'hoor Mo'arrikh Sulemaan Nadvi Jinka Mailaan Taba Ahle Hadees Ki Taraf Tha, Likhte Hai'n Teesra Fareeq Woh Tha Jo Shiddat Ke Saath Apni Rawish Par Qaayem Raha Aur Apne Aapko Ahle Sunnah Kehta Raha, Iss Giroh Ke Peshwa Zyaadah Tar Bareli Aur Badaayu'n Ke Ulama The. (Sulemaan Nadvi, Hayaat e Shibli, Safha No.46, Bahawaala Taqreeb Tazkerah Akaabir e Ahle Sunnat, Safha No.22)
Mash'hoor Writer Shaikh Muhammad Ikraam Likhte Hai'n, Unho'n (Imaam Ahmad Raza Barelvi) Ne Nihaayat Shiddat Se Qadeem Hanfi Tareeqo'n Ki Himaayat Ki. (Muhammad Ikraam Shaikh, Mauje Kausar, Taba Haftum 1966 Eeswi, Safha No.70)
Ahle Hadees Ke Shaikhul Islaam Molvi Sanaa'ullaah Amritsari Likhte Hai'n, Amritsar Me'n Muslim Aabaadi, Gair Muslim Aabaadi (Hindu Sikh Wagairah) Ke Masaawi Hai, 80 Saal Qabl Pehle Sab Musalmaan Isi Khayaal Ke The, Jinko Barelvi Hanfi Khayaal Kiya Jaata Hai. (Sanaa'ullaah Amritsari, Shama Tauheed, Safha No.40)
Yeh Amr Bhi Saamne Rahe Ke Gair Muqallideen Baraahe Raast Qur'aan Wa Hadees Se Istembaat Ke Qaa'il Hai'n, Aur A'imma e Mujtahideen Ko Istenaadi Darja Dene Ke Qaa'il Nahee'n Hai'n, Deobandi Maktab e Fikr Rakhne Waale Apne Aapko Hanfi Kehte Hai'n Taaham Woh Bhi Hindustaan Ki Muslim Shakhsiyat Yahaa'n Tak Ke Shaah Wali'ullaah Muhaddis e Dehlavi Aur Shaykh Abdul Haq Muhaddis e Dehlavi Ko Deobandiyat Ki Ibteda Maanne Keliye Tayyaar Nahee'n Hai'n.
Anwar Shaah Kashmeeri Ke Sahaabzaade, Daarul Uloom Deoband Ke Ustaazut Tafseer Molvi Anzar Shaah Kashmeeri Likhte Hai'n, Mere Nazdeek Deobandiyat Khaalis Wali'ullaahi Fikr Bhi Nahee'n Aur Na Kisi Khaanwaadah Ki Lagi Bandhi Fikr Daulat Wa Mataah Hai, Mera Yaqeen Hai Ke Akaabir Deoband Jinki Ibteda Mere Khayaal Me'n Sayyaduna Al-Imaam Maulaana Qaasim Saahab Aur Faqeeh Akbar Hazrat Maulaana Rasheed Ahmad Gangohi Se Hai.....Deobandiyat Ki Ibteda Hazrat Shaah Wali'ullaah Rehmatullaah A'laih Se Karne Ke Bajaaye Mazkoorah Baala 2 Azeem Insaano'n Se Karta Hoo'n. (Anzar Shaah Kashmeeri, Ustaaz Deoband, Maah Naama Al-Balaag, Karaachi, Shumaarah Maarch 1969 Eeswi/1388 Hijri, Safha No.48)
Phir Shaykh Abdul Haq Muhaddis e Dehlavi Rehmatullaah A'laih Se Deoband Ka Ta'alluq Qaayem Na Karne Ka In Alfaaz Me'n Izhaar Karte Hai'n, Awwal To Iss Wajah Se Ke Shaykh Marhoom Tak Hamaari Sanad Hi Nahee'n Paho'nchti, Neez Hazrat Shaykh Abdul Haq Ka Fikr Kulliyatan Deobandiyat Se Jod Bhi Nahee'n Khaata...Suna Hai Hazrat Maulaana Anwar Shaah Kashmeeri Farmaate The Ke "Shaami Aur Shaykh Abdul Haq Par Ba'az Masaa'il Me'n Bidat Wa Sunnat Ka Farq Waazeh Nahee'n Ho Saka" Bas Isi Ijmaal Me'n Hazaar Ha Tafseelaat Hai'n Jinhe'n Shaykh Ki Taaleefaat Ka Mutaale'ah Karne Waale Khoob Samjhe'nge. (Fit Not, Anzar Shaah Kashmeeri, Ustaaz Deoband, Maahnaama Al-Balaag, Karaachi, Shumaarah Maarch 1969 Eeswi/1388 Hijri, Safha No.49)
Taajushshariya Hazrat Allaama Muhammad Akhtar Raza Khaan Sahaab Azhari Rehmatullaah A'laih Se Ek Interview Ke Dauraan Jab Sawaal Kiya Gaya Ke Paakistaan Me'n Ba'az Log Apne Aapko Barelvi Kehte Hai'n Aur Ba'az Apne Aapko Deobandi, Kya Yeh Achchi Baat Hai ? Iske Jawaab Me'n Huzoor Azhari Miyaa'n A'laihir Rehma Ne Irshaad Farmaaya Ke Barelvi Koi Maslak Nahee'n Ham Musalmaan Hai'n, Ahle Sunnat Wa Jamaa'at Hai'n, Hamaara Maslak Yeh Hai Ke Ham Huzoor ﷺ Ko Aakhri Nabi Maante Hai'n, Huzoor ﷺ Ke As'haab Ka Adab Karte Hai'n, Huzoor ﷺ Ke Ahle Bait Se Muhabbat Karte Hai'n, Huzoor ﷺ Ki Ummat Ke Auliya Allaah Se Aqeedat Rakhte Hai'n, Fiqh Me'n Imaam e Aa'zam Abu Haneefa A'laihir Rehma Ke Muqallid Hai'n, Ham Apne Aapko Barelvi Nahee'n Kehte, Hamaare Mukhaalif Hame'n Barelvi Kehte Hai'n. (Maahnaama Ziya e Haram, Laahor, February 1988, Safha No.14)
Maahire Razviyaat Professor Doctor Mas'ood Ahmad A'laihir Rehma Iss Baare Me'n Farmaate Hai'n Ke Imaam Ahmad Raza Par Ek Ilzaam Yeh Hai Ke Woh Barelvi Firqe Ke Baani Hai'n, Agar Taareekh Ki Roshni Me'n Dekha Jaaye To Ma'loom Hota Hai Ke Barelvi Koi Firqa Nahee'n Balke Sawaad e Aa'zam Ahle Sunnat Ke Maslake Qadeem Ko Urfe Aa'm Me'n Barelviyat Se Taabeer Kiya Jaata Hai Aur Yeh Urf Bhi Paak Wa Hind Me'n Mehdood Hai, Asal Me'n Imaam Ahmad Raza Aur Iss Maslake Qadeem Ke Mukhaalifeen Ne Barelviyat Ke Naam Se Yaad Kiya Hai Aur Baqaul Abu Yahya Imaam Khaa'n Naushaherwi "Yeh Naam Ulama e Deoband Ka Diya Huwa Hai", Doctor Jamaaluddeen (Jaamiya Hanfiya, Dehli) Ne Bhi Apne Ek Tehqeeqi Maqaale Me'n Yehi Tehreer Farmaaya Hai Ke Yeh Naam Mukhaalifeen Ka Diya Huwa Hai. (Aa'ina e Razviyaat, Safha No.300)
By Alahazrat Foundation Research Team - 7710809266/7710809266
