Mohtaram Qaari'een e Kiraam, Allaah Paak Ke Nek Bando'n Ke Mazaaraat Sh'aa'irullaah Hai'n, Unka Ahteraam Wa Adab Har Musalmaan Par Laazim Hai, Khaasaan e Khuda Har Daur Me'n Mazaaraat e Auliya Alaihimur Rehma Par Haazir Hokar Faiz Haasil Karte Aaye Hai'n, Sahaaba e Kiraam Alaihimur Ridwaan Nabi e Kareem ﷺ Ke Mazaar Par Haazir Hokar Aap ﷺ Se Faiz Haasil Kiya Karte The, Phir Taaba'een e Kiraam Alaihimur Ridwaan Ke Mazaaraat Par Haazir Hokar Faiz Haasil Kiya Karte The, Phir Taba Taaba'een, Taaba'een e Kiraam Ki Mazaaraat Par Haazir Hokar Faiz Haasil Kiya Karte The, Taba Taaba'een Aur Auliya e Kiraam Alaihimur Rehma Ke Mazaaraat Par Aaj Tak Awaam Wa Khawaas Haazir Hokar Faiz Haasil Karte Hai'n Aur Insha Allaah Yeh Silsila Qayaamat Tak Jaari Rahega.
Laadeeni Quwwato'n Ka Yeh Hamesha Se Tareeqa Raha Hai Ke Woh Muqaddas Maqaamaat Ko Bad Naam Karne Keliye Wahaa'n Khuraafaat Wa Munkiraat Ka Baazaar Garam Karwaate Hai'n Taake Musalmaano'n Ke Dilo'n Se Muqaddas Maqaamaat Aur Sh'aa'irullaah Ki Ta'zeem Wa Adab Khatam Kiya Ja Sake, Yeh Silsila Sabse Pehle Baitul Muqaddas Se Shuru Kiya Gaya, Wahaa'n Fahhaashi Wa Uryaani Ke Adde Qaayem Kiye Gaye, Sharaabe'n Farokht Ki Jaane Lagee'n Aur Duniya Bhar Se Log Sirf Ayyaashi Karne Keliye Baitul Muqaddas Aate The. (M'aaz Allaah)
Isi Tarah Aaj Bhi Mazaaraat e Auliya Alaihimur Rehma Par Khuraafaat "Munkiraat" Charas Wa Bhaa'ng, Dhol Taashe, Mele Me'n Mard Wa Aurat Ke Ikhtelaat Ki Mahaafile'n Sajaayi Jaati Hai'n Taake Musalmaan Un Muqaddas Hastiyo'n Se Bad Zan Hokar Yahaa'n Ka Rukh Na Kare'n, Afsos Ki Baat To Yeh Hai Ke, Aksar Mukhaalifeen Allaah Waalo'n Ke Mazaaro'n Par Hone Waali Khuraafaat Ko Aa'la Hazrat Imaam Ahmad Raza Khaan Qaadri Mohaddise Barelvi Rehmatullaah Alaih Aur Doosre Ulama e Ahle Sunnat Wa Jamaa'at Ki Taraf Jodte Hai'n, Jabke Haqeeqat Yeh Hai Ke Allaah Waalo'n Ke Mazaaro'n Aur Aastaano'n Par Hone Waali Khuraafaat Aur Ajeeb Ajeeb Harkato'n Ka Ahle Sunnat Wa Jamaa'at Se Koi Ta'alluq Nahee'n Hai Balke Aa'la Hazrat Imaam Ahmad Raza Khaan Alaihir Rehma Aur Doosre Ulama e Ahle Sunnat Wa Jamaa'at Ne Apni Apni Kitaabo'n Me'n Inka Bharpoor Rad Farmaaya Hai.
Aurato'n Ka Dargaah Par Jaana :- Aurato'n Aur Jawaan Ladkiyo'n Ka Huzoor ﷺ Ke Mubaarak Aastaane Ke Siwa Kisi Bhi Mazaar Aur Dargaah Par Jaana Jaa'iz Nahee'n. (Fataawa Razviya, Jild No.9, Safha No.541)
Mazaaro'n Ka Tawaaf Karna :- Mazaaro'n Ka Tawaaf (Chakkar) Agar Ta'zeem Ki Niyat Se Kiya Jaaye To Na Jaa'iz Hai Kyu'nke Tawaaf Ke Saath Ta'zeem Sirf Ka'ba Shareef Ke Saath Khaas Hai, Aur Mazaar Ko Choomna Bhi Adab Ke Khilaaf Hai, Aas Paas Ki Oo'nchi Lakdi Ya Dono'n Taraf Ke Chaukhat Ko Choom Sakte Hai'n. (Fataawa Razviya, Jild No.9, Safha No.529)
Niyaaz Ka Khaana Lutaana :- Niyaaz Ka Khaana Lutaana (Phe'nk Kar Dena) Haraam Hai, Khaane Ka Iss Tarah Se Lutaana (Phe'nkna) Be Adabi Hai. (Fataawa Razviya, Jild No.24, Safha No.112)
Sar Jhukaana Ya Ruku Ki Had Tak Jhukna :- Ibaadat Ka Sajdah (Sar Jhukaana Ya Ruku Ki Had Tak Jhukna) Allaah Ke Siwa Kisi Ko Bhi Karna Shirk Hai Aur Ta'zeem Waala Sajdah Mazaaro'n Ko Ho Ya Peer Ko Ya Kisi Aur Ko, Haraam Hai. (Fataawa Razviya, Jild No.22, Safha No.426)
Ped, Deewaar Ya Taak Par Faateha Dilaana :- Logo'n Ka Kehna Hai Ke Fulaa'n Ped Par Shaheed (Ya Koi Buzurg) Rehte Hai'n Aur Uss Ped Ya Deewaar Ya Taak Ke Paas Jaakar Mithaayi, Chaawal (Ya Kisi Cheez) Par Faateha Dilaana, Haar Phool Daalna, Lobaan Ya Agarbatti Jalaana Aur Mannate'n Maanna, Muraade'n Maa'ngna Yeh Sab Baate'n Waahiyaat, Bekaar, Khuraafaat Aur Jaahilo'n Waali Be Waqoofiyaa'n Aur Be Buniyaad Baate'n Hai'n. (Ahkaam e Sharee'at, Hissa No.1, Safha No.22)
Kisi Buzurg Ya Shaheed Ya Wali Ki Haazri Ya Sawaari Aana :- Isi Tarah Yeh Samajhna Ke Fulaa'n Aadmi Ya Aurat Par Kisi Buzurg Ya Shaheed Ya Wali Ki Haazri Hoti Ya Sawaari Aati Hai Yeh Bhi Fuzool Aur Jaahilo'n Ki Gadhi Huwi Baat Hai Kisi Insaan Ke Kisi Bhi Tarah Se Marne Ke Ba'ad Uski Rooh Kisi Insaan Ya Kisi Cheez Me'n Nahee'n Aa Sakti, Jo Jannati Hai'n Unko Iss Tarah Ki Zaroorat Nahee'n Aur Jo Jahannami Hai'n Woh Aa Nahee'n Sakte, Jinnaat Aur Shaitaan Zaroor Kisi Cheez Ya Kisi Jaanwar Ya Kisi Insaan Ke Jism Ko Gumraah Karne Keliye Aa Sakte Hai'n, Hamzaad Bhi Shaitaan Jinnaat Me'n Se Hota Hai Jo Har Insaan Ke Saath Paida Hota Hai Zindagi Bhar Uske Saath Rehta Hai Aur Uss Insaan Ke Marne Ke Ba'ad Ya Zindagi Me'n Hi Kisi Bachche Ya Bade Ke Jism Me'n Ghus Kar Uski Zabaan Bolta Hai, Isi Ko Jaahil Musalmaan Doosra Janam Aur Pichhle Janam Ki Baat Samajh Lete Hai'n.
Mazaar Par Chaadar Chadhaana :- Mazaar Par Jab Chaadar Maujood Ho Kharaab Na Huwi Ho Badalne Ki Haajat Nahee'n To Chaadar Chadhaana Fuzool Hai Balke Jo Daam (Paisa) Usme'n Sarf Kare'n Allaah Ke Wali Ko Isaale Sawaab Karne Keliye Kisi Mohtaaj Ko De'n. (Ahkaam e Sharee'at, Hissa Awwal, Safha No.42)
Aaj Hamne Chaadar Chadhaane Ko Hi Sab Kuchh Samajh Liya Hai Aur Dhol Taashe Ke Saath Chaadar Lekar Jaate Hai'n Yeh Gair Sharayi Aur Galat Tareeqa Hai, Iss Tarah Ke Riwaajo'n Ki Islaam Me'n Koi Jagah Nahee'n Hai.
Mazaar Par Haazri Ka Tareeqa :- Farmaan e Sayyaduna Aa'la Hazrat Imaam Ahmad Raza Khaan Rehmatullaah Alaih Hai Ke Ziyaarat e Qabar Mayyat Ke Mawaaja (Chehre Ki Jaanib) Me'n Khade Hokar Aur Uss Taraf Se Jaaye Ke Uski Nigaah Saamne Ho, Sirhaane Se Na Aaye Ke Sar Uthaakar Dekhna Pade, Salaam Wa Isaale Sawaab Keliye Agar Der Karna Chaahta Hai Roo Ba'qabr Baith Jaaye Aur Padhta Rahe Ya Wali Ka Mazaar Hai To Usse Faiz Le, Wallaahu Ta'aala Aa'lam. (Fataawa Razviya, Jild No.9, Safha No.535)
Mazaar Par Du'aa Ka Tareeqa :- Aa'la Hazrat Imaam Ahmad Raza Khaan Qaadri Rehmatullaah Alaih Farmaate Hai'n Ke Faateha Ke Ba'ad Zaa'ir Saahibe Mazaar Ke Waseele Se Du'aa Kare Aur Apna Jaa'iz Maqsad Pesh Kare Phir Salaam Karta Huwa Waapas Aaye, Mazaar Ko Na Haath Lagaaye Na Bosa De, Tawaaf Bil Ittefaaq Na Jaa'iz Hai Aur (Ta'zeemi) Sajdah Haraam Hai. (Fataawa Razviya, Jild No.9, Safha No.522)
Mazaar Shareef Ya Qabar Par Phoolo'n Ki Chaadar Daalne Me'n Shar'an Harj Nahee'n Balke Nihaayat Hi Achchha Tareeqa Hai.
Qabro'n Par Phool Daalna Ke Jab Tak Woh Tar Rahega Tasbeeh Kare'nge Usse Mayyat Ka Dil Bahelta Hai Aur Rehmat Utarti Hai, Fataawa Aa'lamgeeri Me'n Hai Ke Qabro'n Par Phoolo'n Ka Rakhna Achchha Hai. (Fataawa Hindiya (Aa'lamgeeri), Jild No.5, Safha No.351)(Fataawa Imaam Qaazi Khaa'n)(Imdaadul Miftaah)(Raddul Mukhtaar Jild No.1, Safha No.606), (Fataawa Razviya, Jild No.9, Safha No.105)
Allaah Paak Hame'n Seedhe Raaste Par Chalaaye Ya'ni Ambiya Alaihimus Salaam, Shohada, Siddeeqeen Radiallaahu Anhum, Saaleheen Aur Auliya e Kiraam Alaihimur Rehma Ke Raaste Par Chalaaye Aur Sharee'at Ka Paaband Banaaye. Aameen
By Alahazrat Foundation Research Team - 7710809266/9892708816
