Mazaaraat Par Phool Aur Chaadar Daalne Ke Baare Me'n Ahle Sunnat Wa Jamaa'at Ka Aqeedah Aur Nazariya Yeh Hai Ke Yeh Na To Zarooriyaat e Deen Se Hai Na Zarooriyaat e Ahle Sunnat Wa Jamaa'at Me'n Se Hai Balke Yeh Ek Jaa'iz Aur Mustahsan Amal Hai Ya'ni Furu Me'n Se Hai.
Iske Jaa'iz Hone Ki Bahot Saari Daleele'n Hai'n Magar Ham Aapke Saamne Chand Daleele'n Pesh Karte Hai'n Bagaur Padhiye.
Huzoor Nabi e Kareem ﷺ Ka Ek Martaba 2 Qabro'n Par Guzar Huwa, Farmaaya Ke Dono'n Mayyato'n Ko Azaab Ho Raha Hai, Inme'n Ek To Peshaab Ke Chheeto'n Se Nahee'n Bachta Tha Aur Doosra Chugli Kiya Karta Tha, Phir Aap ﷺ Ne Ek Tar Shaakh Li Aur Uske 2 Hisse Kiye Aur Phir Har Ek Qabar Par Ek Hissa Gaad Diya, Logo'n Ne Arz Kiya Ke Aapne Aisa Kyu'n Kiya ? Farmaaya Jab Tak Yeh Khushk Na Ho'n Tab Tak Inke Azaab Me'n Kami Rahegi. (Mishqaatul Masaabeeh, 1/110, Hadees No.338)
Iss Hadees Ke Tahet "Mirqaatul Mafaateeh" Me'n Hai Ke Kaha Gaya Hai Ke Isliye Azaab Kam Hoga Ke Jab Tak Woh Dono'n Shaakh Ke Tukde Tar Rahe'nge Tasbeeh Pade'nge. (Mirqaatul Mafaateeh, 1/376, Tehtul Hadees 338)
Ash'atul Lam'aat Me'n Isi Hadees Ke Tahet Hai Ke Iss Hadees Ke Tahet Likha Gaya Hai Ke Iss Hadees Se Ek Jamaa'at Daleel Pakadti Hai Ke Qabro'n Par Sabzah Aur Gul Wa Rayhaan (Khushbu) Daalna Jaa'iz Hai. (Ash'atul Lam'aat, 1/215)
Mirqaatul Mafaateeh Me'n Iss Hadees Ki Sharah Me'n Hai Ke Hamaare Ba'az Mutaakhireen As'haab Ne Iss Hadees Ki Wajah Se Fatwa Diya Ke Phool Aur Khajoor Ki Tehni Chadhaane Ki Jo Aa'dat Hai Woh Sunnat Hai. (Mirqaatul Mafaateeh, 1/376, Tehtul Hadees 338)
Mohtaram Qaari'een ! Jaisa Ke Aapne Padha Aur Alhamdulillaah Yeh Masla Ya'ni Mazaaraat Par Phool Daalna Waazeh Hogaya Hoga Kyu'nke Yeh Daleele'n Iss Masle Ko Khoob Achchhe Tareeqe Se Waazeh Karti Hai Aur Iske Jaa'iz Hone Ki Taraf Dalaalat Karti Hai, Agar Aapne Iss Masle Ko Khoob Achchhe Tareeqe Se Samajh Liya Ho To Aage Badhte Hai'n Aur Mazaaraat Par Chaadar Chadhaane Ke Baare Me'n Musalmaano'n Ka Kya Aqeedah Wa Nazariya Hai Woh Bhi Jaan Lete Hai'n To Phirse Bataata Chaloo'n Ke Mazaaraat Par Chaadar Daalna Bila Shubah Sharee'at e Mutahhara Me'n Jaa'iz Wa Mustahsan Amal Hai Ke Isse Saahib e Mazaar Ki Ta'zeem Wa Azmat Ka Iz'haar Hota Hai.
Jaisa Ke Allaama Ibne Aa'bideen Shaami Farmaate Hai'n Ke Ba'az Fuqaha Ne Saaliheen Wa Auliya Ki Qabro'n Par Gilaaf Aur Kapde Rakhne Ko Makrooh Kaha Hai. "Fataawa Al-Hujja" Me'n Kaha Ke Qabro'n Par Gilaaf Chadhaana Makrooh Hai.
Lekin Ab Ham Kehte Hai'n Ke Aa'm Logo'n Ki Nazro'n Me'n Ta'zeem Wa Takreem Maqsood Hai Taake Woh Qabar Waale Ko Haqeer Na Samjhe'n Aur Taake Aa'jizi Wa Inkesaari Paida Ho Aur Gaafil Zaa'ireen Me'n Adab Paida Ho To Yeh Umoor Jaa'iz Hai Ke Aa'maal Ka Daaro Madaar Niyato'n Par Hai Agarche Nayi Cheez Hai. (Ibne Aa'bideen Shaami, Raddul Muhtaar, Jild No.6, Safha No.363)
Hakeemul Ummat Allaama Mufti Ahmad Yaar Khaan Na'eemi Ashrafi Alaihir Rehma Tehreer Farmaate Hai'n Ke Ulama e Ahle Sunnat Ka Farmaan Hai Ke Phool Daalna To Har Momin Ki Qabar Par Jaa'iz Hai Khwaah Allaah Ke Wali Ho'n Ya Gunehgaar Aur Chaadar Daalna Auliya, Ulama, Sulaha Ki Quboor Par Jaa'iz Aur Awaam e Muslimeen Ki Quboor Par Na Jaa'iz Hai Kyu'nke Yeh Be Faa'idah Hai.
Khulaasa e Kalaam Yeh Hai Ke Musalmaan Ki Qabar Par Phool Chadhaana Bhi Masnoon Hai Aur Zaa'ireen Ki Sahoolat Keliye Raat Ko Chiraag Jalaana Ya Roshni Karna Bhi Achchha Kaam Hai, Isse Logo'n Ko Aaraam Aur Saahib e Qabar Ki Izzat Wa Azmat Ka Iz'haar Hota Hai, Yoo'n Hi Gilaaf Chadhaana Bhi Mazaaraat Wa Saahibaan e Mazaaraat Ki Ta'zeem Wa Takreem Ka Iz'haar Karna Hai.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai (Isi Tarah Mazaaraat Par Phool, Chaadar Daalne Ka Masla Bhi Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
