Ham Ahle Sunnat Wa Jamaa'at Ka Aqeedah Hai Ke Nabi e Kareem ﷺ Ne Bedaari Ke Aa'lam Me'n Apni Mubaarak Aa'nkho'n Se Me'raaj Ki Raat Allaah Paak Ko Dekha Hai, Aur Yeh Aqeedah Bhi Ham Ahle Sunnat Wa Jamaa'at Ke Nazdeek Na Zarooriyaat e Deen Se Hai Na Zarooriyaat e Ahle Sunnat Se Balke Furu Aqaa'id Me'n Se Hai.
Chunaanche Imaam e Ahle Imaam Ahmad Raza Khaan Qaadri Barelvi A'laihir Rehma "Fataawa Razviya" Me'n Likhte Hai'n, Allaama Shihaab Khafaaji Naseemur Riyaaz Sharah Shifa Imaam Qaazi Ayaaz Me'n Farmaate Hai'n, Mazhab e Asah (Saheeh) Aur Raajeh Yehi Hai Ke Nabi e Akram ﷺ Ne Shabe Asra Apne Rab Ko Ba Chashme Sar Dekha Jaisa Ke Jamhoor Sahaaba e Kiraam Ka Yehi Mazhab Hai. (Fataawa Razviya, 3/36)
Phir Alahazrat Imaam e Ahle Sunnat Imaam Ahmad Raza Khaan Qaadri Barelvi A'laihir Rehma Likhte Hai'n, Imaam Nawwi Sharah Saheeh Muslim Me'n, Phir Allaama Muhammad Bin Abdul Baaqi Sharah Mawaahib Me'n Farmaate Hai'n, Jamhoor Ulama Ke Nazdeek Raajeh Yehi Hai Ke Nabi e Akram ﷺ Ne Shabe Me'raaj Apne Rab Ko Apne Sar Ki Aa'nkho'n Se Dekha. (Fataawa Razviya, 3/643)
Ab Dalaa'il Mulaaheza Farmaaye'n.
Hazrat Abdullaah Bin Shaqeeq Radiallaahu A'nhu Ne Farmaaya Ke Mai'n Ne Hazrat Abu Zar Radiallaahu A'nhu Se Arz Kiya ! Agar Mujhe Hazrat Rasoolullaah ﷺ Ke Deedaar Ki Sa'aadat Haasil Hoti To Zaroor Huzoor ﷺ Se Dariyaaft Karta, Unho'n Ne Farmaaya Tum Kis Cheez Ke Muta'alliq Dariyaaft Karte ? Hazrat Abdullaah Bin Shaqeeq Radiallaahu A'nhu Ne Arz Kiya, Mai'n Huzoor ﷺ Se Yeh Dariyaaft Karta Ke Kya Aap A'laihissalaam Ne Apne Rab Ka Deedaar Kiya Hai ? To Hazrat Abu Zar Radiallaahu A'nhu Ne Farmaaya, Mai'n Ne Huzoor ﷺ Se Iss Silsile Me'n Dariyaaft Kiya Tha, To Huzoor ﷺ Ne Farmaaya Mai'n Ne Noor e Haq Ko Dekha Hai. (Saheeh Muslim, 1/161, Hadees No.292(178))
Ma'loom Huwa Ke Nabi e Kareem ﷺ Ne Allaah Paak Ko Dekha Hai Kyu'nke Noor e Haq Se Muraad Yahaa'n Koi Aur Nahee'n Balke Allaah Paak Hai.
Hazrat Ikrama Radiallaahu A'nhu Bayaan Karte Hai'n Ke Sayyaduna Abdullaah Bin Abbaas Radiallaahu A'nhuma Ne Farmaaya Ke Hazrat Sayyaduna Muhammad ﷺ Ne Apne Rab Ka Deedaar Kiya Hai, Mai'n Ne Arz Kiya, Kya Allaah Paak Ne Yeh Nahee'n Farmaaya, Nigaahe'n Uska Ihaata Nahee'n Kar Saktee'n Aur Woh Nigaaho'n Ka Idraak Wa Ihaata Karta Hai ? To Hazrat Abdullaah Bin Abbaas Radiallaahu A'nhuma Ne Farmaaya, Tum Par Ta'ajjub Hai, Jab Allaah Paak Apne Uss Noor Ke Saath Tajalli Farmaaye Jo Uska Gair Mutanaahi Noor Hai Aur Beshak Sayyaduna Muhammad ﷺ Ne Apne Rab Ka 2 Martaba Deedaar Kiya Hai. (Tirmizi Shareef, 5/395, Hadees No.3289)
Rasoolullaah ﷺ Ka Farmaan Hai Ke Mai'n Ne Apne Rab Tabaarak Wa Ta'aala Ko Dekha Hai. (Musnad e Ahmad Bin Hambal, 1/611, Hadees No.2580)
Qaazi Ayaaz Maaliki A'laihir Rehma Farmaate Hai'n Ke Hazrat Ibne Abbaas Radiallaahu A'nhuma Ke Mash'hoor Qaul Ke Mutaabiq Nabi e Paak ﷺ Ne Sar Ki Aa'nkho'n Se Rab Ta'aala Ko Dekha Hai. (Shifa, 1/196)
Hazrat Hasan Basri A'laihir Rehma Allaah Paak Ki Qasam Utha Kar Farmaate Hai'n Ke Muhammad ﷺ Ne Deedaar e Ilaahi Kiya Hai. (Shifa, 1/197)
Hazrat Imaam Abul Hasan Ash'ari A'laihir Rehma Farmaate Hai'n Ke Aap ﷺ Ne Sar Ki Aa'nkho'n Se Allaah Paak Ka Deedaar Kiya. (Shifa, 1/198)
In Tamaam Riwaayato'n Se Yeh Ma'loom Huwa Ke Aap ﷺ Ne Me'raaj Ki Raat Apne Maathe Ki Aa'nkho'n Se Rab Ta'aala Ka Deedaar Kiya Hai.
Inkaar Karne Waale Ka Hukm :- Hazrat Allaama Maulaana Sayyad Ahmad Sa'eed Kaazmi A'laihir Rehma Farmaate Hai'n Ke Aqaa'id Wa Aa'maal Se Muta'alliq Hamaare Beshumaar Aise Masaa'il Hai'n Jinhe'n Ham Jazm Wa Yaqeen Ke Martabe Me'n Shumaar Nahee'n Karte, Balke Mahez Fazeelat Wa Manqabat Ke Darje Me'n Maante Hai'n, Hatta Ke Agar Koi Nek Dil Taalib e Haq Mahez Daleel Na Milne Ki Wajah Se Hamaare Iss Masle Ko Tasleem Na Kare To Ham Use Bad Aqeedah Nahee'n Kehte, Na Uske Haq Me'n Bura Bhala Kehna Jaa'iz Samajhte Hai'n, Bashart Yeh Ke Uska Inkaar Rasoolullaah ﷺ Ki Adaawat Wa Bugz Wa Keena Ki Wajah Se Na Ho, Nabi e Kareem ﷺ Ke Jism e Aqdas Ka Saaya Na Hona Bhi Baab e Fazaa'il Wa Manaaqib Se Hai (Isi Tarah Deedaar e Ilaahi Ka Bhi Masla Hai) Jispe Kufr Wa Imaan Ka Madaar (Ya'ni Buniyaad) Nahee'n. (Maqaalaat e Kaazmi, 4/57)
By Alahazrat Foundation Research Team - 7710809266/9892708816
